Aposetolo 20
20
Paulo ve sariva Makedonia aeata Akaia voa
1Lea karakara kaleipe soa, Paulo satiriaraita karu arero tai koti vei o itapi, aea ere rofo leiti vei erero kurea, aea maeaforoe o mei roroka lei, are Makedonia voa sariva leipe. 2Are lea soasoa ve aru voa kei karu la rofo leiti o rauapo ita kurea, are sariva ata lei Akaia voa foreri, 3are papare oroisoria lōvoa peiape. Are Suria voa terai vei vavaea voa foreai vei leipe lea mea, are Iuda karu arero murufa paeai vei seseōvi kekese leipe fari la mapi, are Makedonia ve aru voa ata kerori vei haiiri kekese leipe. 4Lei, are ita fareho Asia voa sariva karu meha; Sopatera Puro, Berea karu; aeata Tesalonika karu oraka, Aristareko auka Sekundo ita; aeata Gaio, Derebe karu, aea Timoteo; aea Tukiko auka Terofimo ia, Asia ve karu oraka reha. 5Ere everori te elaro Troasa voa taiape. 6A—, ela Filipi voa Fefesi auke Faloa ve Sosoka ve sare lei kaleipe soa ve aite voa, ela vavaea voa forea ufi, sare five aite voa ela erero tai Troasa voa foreri, sare seven lōvoa pepeiape.
Paulo ve sisa soa Troasa voa
7Soka Saturday faita voa, ela faloa fofai vei kokorukōpe lea mea, Paulo itoro a’ a’, aea ipi are lea aite sare voa sariva ata leiti vei leipe lea vei, are itoro o si a’ a’ tetete apisi soa voa. 8Ela kokoruka aipepeiape lea uvi ve arori lalava voa lamepa rauapo pepeiape. 9Harokou farakeka, rare Eutuko, utape seika voa aiseseiape. Paulo o si a’ a’ are ofae hoea ivutu suru lei, totopi arori ase oroisoria lalava voa oei, opōpe la fareovōpe. 10Paulo ipi voa fauka, areve arori voa hiopi, pasavi mō ōpe, Fi levi aria, areve makuri areve iri voa la eaea. 11Aite are patei ere ita faloa la fofi lōpe; aea ere ita farehoria soa savori laua sukōvi sukōvi tetete mea ōpai voa lōri terōpe. 12Ere lea harokou makuri ita lariōvi terōpe haikavora ta foromai kaleipe.
Soa Troasa soa Mileto voa
13Soka ela vavaea voa omopa te forea auvia suka Asoso voa soeōpe, Paulo la lōvoa vuapai vei. Areve haiiri reha ipi are mora sariva la haikaeōpe eavia. 14Ela arero Asoso voa sukaeōpe lea mea ela arero vavaea voa vuapi, ela Mitulene voa soeōpe. 15Lōvoa kiripi ufi ela aite sare voa Kioso ve mai pisiri voa foreri, aea lea aite sare voa Samoso voa soea, aite sare voa Mileto voa forerōpe reha. 16Ipi Paulo ve haiiri Efeso karikara vavaea sa au foapai vei, are sare rauapo Asia voa lei kaleiti ave. Are Ierusalema voa Pentekoste ve sare voa forerai ō ōpe eavia, lea vei are sariva utohoa leipe.
Paulo areve sisa ovoro Efeso opasorasora la moipe
17Paulo Mileto voa pōvi, are Efeso voa meu karu itapi, ekalesia ve opasorasora la arero tai koti vei isōpe. 18Ere arero tai kotipe lea mea, are erero mō ōpe, Ara Asia voa omopa forerōpe sare voa itiiti faitora, ara eve aru voa pea saresare foromai voa leiape mai e ore. 19Ara Papuvita ve tivi haimafu foromai ita aea sisapaita ovororo ita lei vovo meiape, haisora soasoa ve aru voa ipi Iuda karu sa araro leiape lea maeahahauhahau vei. 20Lei lareva leita o foromai la ero omoi vei ara haiarara leiti sore; a—, ara pisiri otioti voa itoro a’, aeata eve uvi hariaharia voa ara ta ero satiriaraiape. 21Ara Iuda karu aea Helene karu ita la o kere ita kureaiape, ere ereve kaiae haiarara lei Ualare tai haiiri kerori, Papuvita Iesu Keriso la sukaerereai vei. 22Soka faitora, mapaia, ara Arahoha sa araro ovaita lea vei, ara Ierusalema voa sariva la lei me meha, etau lekōru araro lōvoa hasiavaita varo ara lea la ore kao. 23Arave ore farakeka meha, karikara foromai voa Safu Arahoha Lareva sa araro o mei kekese, karu araro dibura voa fasi, araro lei haisora leiti vei la taipea. 24A—, ara arave makuri tava rovaea etau feare levi seseōvai roi, arave haikaeai farakeka meha, arave loreape arita soa la kekese lei aea ara Papuvita voa ovōpe tivi, Ualare ve haiforoe ve Ovoro Lareva la okofa lei moita, lea tivi ta lei roroka leiti vei.#2 Tim 4:7
25Ara e foromai voa Ualare ve Basileia vei itoro ōvovo meiape. A—, faitora, mapaia, ara ore e voa karu farakeka aea arave soso ofae ata levi eavai roi. 26Ipi lea etau vei, ara okofa ita ero o la moipea, e voa karu aea ve ove veverapait’ oria, lea arave kaiae kasirau. 27Ipi ara Ualare sa haikaeaita mai foromai la ero omoi vei, haiarara leiti kakaeite. 28E eve haria mai la kiva lei vovo roroava, aea Safu Arahoha Lareva sa e kiva leiti vei miarōpe lea momoe sitavu ta reha. Ualare ve ekalesia la mamoe kiva karu feare savuaia, areve elore ovo la tava vei miarōpe lea ekalesia. 29Ara ore ara maea lei teraita soa ve aite voa, furuka ave ivara eokere eve aru voa forerai roi, aea ere mamoe la maeaforoe levi leiti roi. 30Aea eve elore aru voa ta karu hea apeva vuteaita o a’ satiriaraita karu la erero aitetai vei kureai roi. 31Soka ovoako lei vovo roroava; ara sisoro oroisoria sare ita faita ita karu foromai la ovororo ita kureai voa poetapai kao lea la haikaeaia.
32Soka faitora ara Ualare ve kiva voa aea areve haiforoe ve meru ve o voa ero miavaita meha. Are sa ero lei rofo leitita ore, aea aite kofa voa soa lareva ta ero miaraita ore, are sa areve safu karu foromai vei miavi kiva leita lea oti lareva voa. 33Ara karu aea ve silva, ō gold ō puta la au ovai vei haikaeai sore. 34E ore ara arave elore mai sa tivi leiape, moni ovi, arave elore haikaeaita etau aea ara ita fareho leiape lea karu ve etau ita la itaea lei maravai vei. 35Ara etau foromai voa mai lareva ero muia, e tivi lōri leitita lea haura, ipi e rofo auke karu la toarai vei; aea Papuvita Iesu ve o la haikaeai vei, mōfeare, Karu la etau au miaraita soa hailareva ia, a—, etau la karu voa au ovaita soa hailareva kofa kao.
36Soka are lea o la mei roroka lei, are sukakoka avi ere ita farehoria Ualare la loki leipe. 37Ere foromai fi rovaea toepi a’, arero pasavi, arero evera sisipe. 38Ereve haisora rovaea ipi are o erero mōri moipe, ere areve soso la ofae ata levi eavai roi. Soka ere are ita fareho isei, vavaea voa arero toilalōpe.
Currently Selected:
Aposetolo 20: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
