ရောမ နိဒါန်း
နိဒါန်း
စာရွီးဆရာ အကြောင်း
စာရွီးဆရာ နာမည် ပေါလု ဖြစ်ပါရေ (ရောမ ၁:၁)။ သူ့မာ အခြားတစ်ခု နာမည်စာ ရှောလု ဖြစ်ပါရေ။ သူစာ ကိလိကိပြည်နယ် တာရှုမြို့မာ မွီးဖွားလီပါရေ။ သူစာ ရောမနိုင်ငံသား တစ်ယောက် ဖြစ်ပါရေ။ သူစာ ယုဒလူမျိုးအထဲက ဗင်္ယာမိန် အမျိုးအနွယ်သား ဖြစ်ပါရေ။ သူစာ စာပီပညာတတ်သူတစ်ယောက် ဖြစ်ပါရေ။ သူစာ ကျမ်းဆရာ ဂါမလျေလဘားမာ မောရှေ၏ ပညှတ်တရားကို သင်ယူလီပါရေ။ ယေရှုကို မကျုံခင်အယင်က သူစာ ယုဒဘာသာတရားကို အားထုတ်ရို့ လိုက်နာလီစာ ဖာရိရှဲအဖွဲ့သား တစ်ယောက် ဟိလီပါရေ (ရောမ ၁၁:၁၊ ဖိလိပ္ပိ ၃:၅)။ ယင်းအတွက်န သူစာ ဖာရိရှဲအဖွဲ့သား တစ်ယောက်အနေန ယုဒလူမျိုးအထဲက ကျုံသူရို့ကို ကောင်းကောင်း ညှဉ်းဆဲလီပါရေ (ဖိလိပ္ပိ ၃:၆)။ တစ်ရက်နိ သူစာ ကျုံသူရို့ကို ညှဉ်းဆဲဖို့ လားလီရေခါ လမ်းတစ်ပိုင်းမာ အသျှင်ယေရှုကို ကိုယ်ထင် မြင်ရို့ သူ့ကို ကျုံလီပါရေ၊ အရာ အသျှင်ယေရှုစာ သူ့ကို တမန်တော်အဖြစ် ခန့်လီပါရေ (တမန်တော် ၉:၁-၁၉)။
စာရွီးစာ အချိန်န နေရာ
ခရစ်သက္ကရာဇ် ၅၆ နှစ်လှောက်မာ တတိယခေါက် တရားဟောဖို့ ခရီးထွက်လီရေခါ ပေါလု ကောရိန္သုမြို့က ဒေ စာစောင်ကို ရွီးလီစာ ဖြစ်နိုင်ပါရေ။
စာရွီးဆရာ၏ ရွယ်မှတ်ချက်
ပညှတ်တရားကို လိုက်နာခြင်းကနီရို့ သူတော်ကောင်းအဖြစ် လက်ခံခြင်းကို မရနိုင်၊ ယေကေလည်း အသျှင်ယေရှုကို ကျုံခြင်းကနီရို့ရာ သူတော်ကောင်းအဖြစ် လက်ခံခြင်းကို ရနိုင်ရေဆိုစာကို နားလည်ပြဖို့အတွက် ရောမမြို့ အသင်းတော်တို့ ဒေ စာစောင်ကို ရွီးလီပါရေ။ အရာ ယုဒလူမျိုးရို့ မနာလိုစိတ် ဖြစ်လတ်အောင် ယုဒမဟုတ်သူရို့ အကြောင်းကို ပုံဥပမာ တင်ပြရို့ သွန်သင် ပီးလီပါရေ၊ အကြောင်းကား သူစာ ကိုယ့်ယုဒလူမျိုးရို့ကို ကယ်တင်ခြင်းလမ်းတို့ ယူလာချင်လီပါရေ။ အရာ သူစာ ရောမမြို့ အသင်းတော်က အကူညီတောင်းရို့ စပိန်ပြည်တို့ ခရီးထွက်ဖို့အတွက်လည်း ဒေ စာစောင်ကို ရွီးလီစာ ဖြစ်ပါရေ (ရောမ ၁၅:၂၄)။
စာအုပ် ခွဲခြားမှု
ဒေ စာစောင် တစ်စောင်လုံးမာ ခရစ်တော်၏ သတင်းကောင်း အကြောင်းကို တမန်တော် ပေါလု ပပွင့်လလင်း ရှင်းပြလီပါရေ။ ယေကေလည်း ဒေ စာစောင်စာ အခြားစာစောင်တိထက် နားလည်ဖို့ ခက်ခဲပါရေ၊ အကြောင်းကား ဒေ စာစောင်မာ ခရစ်ယာန်ဘာသာ ကျုံခြင်းတရား အကြောင်းနပတ်သပ်ရို့ ကောင်းကောင်း နက်နဲစာ သွန်သင်ချက်တိ ဟိပါရေ။ အရာ ဒေ စာစောင်မာ မြင်ရပါစာကား၊ ပညှတ်တရားထက် ကျုံခြင်းတရား ပိုရို့ အရေးကြီးရေဆိုစာကို သူစာ အမျိုးမျိုး ပုံဥပမာန သွန်သင်ပီးရို့ ကိုယ့်ယုဒလူမျိုးရို့ကို နားလည်ပြလီပါရေ။
သမိုင်း အကြောင်း
ဒေ စာစောင်ကို ရွီးလီရေအချိန်မာ ရောမတစ်နိုင်ငံလုံးမာ ရောမဧကရာဇ်မင်း နေရို အုပ်ချုပ်ရို့ ဟိလီပါရေ။ ရောမမြို့မာ ယင်းအချိန်ခါလည်း ခရစ်ယာန်ရို့ကို ညှဉ်းဆဲဖို့ မစလီပါသိ။ ယင်းမြို့မာ ယုဒလူမျိုး အများကြီး နီထိုင်ရို့ ဟိလီပါရေ။ သူရို့အထဲမာ တစ်ချိုး ကျုံသူရို့ ဟိလီကတ်ပါရေ။ သူရို့စာ ရက်ပေါင်းငါးဆယ် ပွဲတော်နိမာ ယေရုရှလင်မြို့တို့ လာလီသူရို့အထဲက ပေတရု ဟောပြောစာ တရားကို ကြားရို့ ယေရှုကို ကျုံလီသူရို့ ဖြစ်နိုင်ပါရေ (တမန်တော် ၂:၁-၄၁)။
အဓိက စကားလုံး
သူတော်ကောင်း ယေရှုကို ကျုံခြင်းကနီရို့ ထာဝရဘုရား၏ လက်ခံခြင်းကို ခံရသူကို သူတော်ကောင်း ဟို့ ခေါ်ပါရေ။ ကောင်းမြတ်စာ အလုပ်ကို လုပ်ခြင်းကနီရို့ သူတော်ကောင်းအဖြစ် လက်ခံခြင်းကို မရနိုင်ပါ၊ ယေကေလည်း ယေရှုကို ကျုံခြင်းကနီရို့ရာ သူတော်ကောင်းအဖြစ် လက်ခံခြင်းကို ရနိုင်ပါရေ။ အရာ သူတော်ကောင်းအဖြစ် လက်ခံခြင်းကို ခံရသူစာ ကယ်တင်ခြင်းကို ရပါရေ။
ကျေးဇူးတော် ဇာမဆိုတစ်ခု ရဖို့ မထိုက်တန်ဘိုင်းန ရခြင်းစာ ကျေးဇူးတော် ဖြစ်ပါရေ။ အကျွန်ရို့ ရဖို့ မထိုက်တန်ဘိုင်းနလည်း ထာဝရဘုရားစာ အကျွန်ရို့ကို သနားရို့ ကယ်တင်ခြင်းန ထာဝရအသက်ကို ပီးလီပါရေ (ဧဖက် ၂:၅-၉)။
အရီဖျားလှီးမင်္ဂလာ ထာဝရဘုရား ရွီးကောက်ယူစာ လူမျိုး၏ အမှတ်တရအဖြစ် ယုဒလူမျိုးရို့မာ အကြီး-အသျှေ ယောက်ျား အားကုံးသူမာ အိန္ဒြီအရီဖျားကို လှီးရပါရေ (ကမ္ဘာဦးကျမ်း ၁၇:၂၃-၂၇)။ ထိုအိန္ဒြီအရီဖျား လှီးခြင်းကို အရီဖျားလှီးမင်္ဂလာ ဟို့ ခေါ်ပါရေ။ ထာဝရဘုရားစာ အရီဖျားလှီးမင်္ဂလာ လုပ်ဖို့စာ ထုံးစဉ်ကို ယုဒလူမျိုးရို့ကို ပီးလီပါရေ (ကမ္ဘာဦးကျမ်း ၁၇:၁၀-၁၁၊ တမန်တော် ၇:၈)။
အကြောင်းအရာ အကျဉ်းချုပ်
(က) နှုတ်ဆက်ခြင်း ၁:၁-၇
(ခ) ကျုံသူရို့အတွက် ပေါလု တောင်းတခြင်း ၁:၈-၁၅
(ဂ) ဟိသမျ လူရို့ ကယ်တင်ခြင်းတရားကို လိုအပ်ခြင်း ၁:၁၆-၃:၂၀
(ဃ) ထာဝရဘုရား၏ ကယ်တင်ခြင်း နည်းလမ်း၃:၂၁-၅:၂၁
(င) ခရစ်တော်ကနီရို့ ဆင်းလာစာ ဘဝအသစ် ၆:၁-၈:၃၉
(စ) ဣသရေလလူမျိုးကို ကယ်တင်ဖို့အတွက် ထာဝရဘုရား၏ စီစဉ်ချက် ၉:၁-၁၁:၃၆
(ဆ) ကျုံသူရို့ နိစဉ် နီထိုင်ခြင်း ၁၂:၁-၁၅:၁၃
(ဈ) အဆုံးသတ်ချက် စကား ၁၅:၁၄-၁၆:၂၇
Currently Selected:
ရောမ နိဒါန်း: RMZ
Highlight
Share
Copy
Want to have your highlights saved across all your devices? Sign up or sign in
©2023 Wycliffe Bible Translators, Inc.