Rṳ̂̌me̤ Ta̤hî̌bǎ wǐ
Ta̤hî̌bǎ wǐ
Khûpò̌lǔ wě̤ cû̌ lî̤ hǒtôbǎ dǒ Wî̤̌rṳ̂̌me̤ ô̌. A wě̤ tîwî̌tòwònǎ kû̌ a glè̌ cû̌ ô̌lè kû̌ Wî̤̌rṳ̂̌me̤ ta̤dòkû. A ta̤yè̤lò̤nǎ mî̌titè mî̌ a cû̌ ma̤wô̤̌wô̤̌ ta̤ kû̌ khrǐphû̌ bǎnu tòshò̌phû̌ pě, htopědě asî bǎnutokhlǒ gǔ ma̤jè̌ yǎ dǒ a gǔ cû̌ sělě pô̤̌ dǒ Sapegǎ. Pô̤̌khô a sî̌ganǎ̤ khrǐphû̌ a ta̤yṳ̌ta̤nǎ̤ kû̌ khrǐphû̌ tô ô̌htûpwa̤ ma̤ tokhlǒnu, a wě̤lṳ̌ bǎ bò kòyò. Khûpò̌lǔ dǔlè̌lṳ̌ bǎ kòyò khrǐphû̌ a ô̌htûpwa̤ awe̤akè tokhlǒ aklanu, lî̤hǒtôbǎ numî̌ alǒabe hǒ.
Khûpò̌lǔ hî̌mô̤hî̌wô̌ Rṳ̂̌me̤ ta̤dòkûphû̌ tokhlǒ dě a shôbǐǐlṳ̌ bǎ asî kû̌ a ta̤kwicaba hto bǎ asîya tokhlǒnu. Hǒtôplǎdě a hî̌lṳ̌ bǎ asî kû̌ ta̤ dǒ a sǎyṳ wě̤ lî̤nu a kòshî̌ awe̤akè. Ta̤we̤ta̤kè a kòshî̌ mî̌ “Cǒmara bè̌cǒbè̌tè̤ kòyò tokhlǒ kû̌ anǎ̤ hětènu ta̤sǎlě̤we̤kè ô̌lṳ̌htò̌ hǒ. Ta̤cǒta̤tè̤ numî̌ a sahtò̌ kû̌ ta̤yṳ̌ dě a gutṳ̌ kû̌ ta̤yṳ̌.” (1:17).
Htodě Khûpò̌lǔ shôbǐǐlṳ̌ dû̌wî̤pô̤̌ ta̤we̤ta̤kè a kòshî̌ gutṳ̌nu. Yǔdaphû̌ tokhlǒ bǎbǎ, Yǔdaphû̌ mè̤̌tô̤̌ tokhlǒ bǎbǎ, Cǒmara lǎ̤lṳ̂ ma̤cǒma̤tè̤ gebò asî pṳ̂̌꤮ tôpwa̤, ma̤titèhî̌dě kòyò pṳ̂̌꤮ tôpwa̤ ô̌ cubò lû̌û dǒ ta̤sǔta̤plě a ta̤siwi̤sòwò̤ alǎ̤ pwǎ. Dǒ kòyòhǎkhû̌phû̌ yṳ̌ǎ Khrǐ akhû̌akhîdě, Cǒmara bè̌cǒbè̌tè̤ asî hǒ. Htodě Khûpò̌lǔ shôbǐǐlṳ̌ pô̤̌ kû̌ ta̤ô̌htûpwa̤ asa dǒ pa nǐ̤bǎ numî̌ dǒ pa htûhtò̌ kû̌ Khrǐ ta̤tôcǒ꤮ nô̤̌ akhû̌akhî pwǎ, a shôbǐǐlṳ̌ bǎ pô̤̌nu. Pwa̤yṳ̌ǎta̤phû̌ tokhlǒnu, a nǐ̤bǎ lô̌khô ta̤pè̤̌ta̤dû kû̌ Cǒmara hǒ, htokhôtô̤̌ ta̤sǔ kû̌ ta̤si a ta̤siwi̤sòwò̤ pṳ̂̌mě asînu, Cǒmara a Yôla Plò̌shǐ plûhǎhtò̌ pili asîhǒ. Bǎ amǒ̤phadû̌ 5-8 akûnu, Khûpò̌lǔ shôbǐǐlṳ̌bǎ pô̤̌ kû̌ Cǒmara a ta̤yè̤lò̤nǎ a ta̤sû̌ta̤tòwò tokhlǒ awe̤akè kû̌ Yôla Plò̌shǐ Běcǎ a ta̤pô̤ta̤phǎ shû̌shonu htû̌lè̌ tèplè̌ bǎ kòyò ta̤ô̌htûpwa̤ asa awe̤akè. Htokhôtô̤̌ Yǔdaphû̌ tokhlǒ aya bǎbǎ, Yǔdaphû̌ mè̤̌tô̤̌ tokhlǒ aya kû̌ Cǒmara ta̤yè̤lò̤nǎ bǎ lǒ̤꤮ bò kòyò pṳ̂̌꤮ tôpwa̤ hî̌tènu, Khûpò̌lǔ shôbǐǐlṳ̌phlô bò kòyò hǒ. Pô̤̌khô kòyò pṳ̂̌꤮ tôpwa̤ gǔ nǐ̤bǎ tṳtṳ̌ lô̌khô Cǒmara ta̤bwǐdû̌sîrîhtû dǒ Yeshǔ Khrǐ ô̌ ayanudě, Yǔdaphû̌ tokhlǒ wîkè Běcǎ Yeshǔ Khrǐ pwǎ. A ma̤ pô̤̌numî̌ Cǒmara a ta̤yè̤lò̤nǎ pwǎ. Bǎbǎkǎlè pwa̤wě̤lî̤nu yṳ̌ǎ kû̌ Yṳ̌daphû̌ tokhlǒ nî̌, a wîkè Běcǎ Yeshǔ tô̤̌, a hî̌phlǔkè ayô̤̌sǎ pô̤̌nu. Dǒ gutṳ̌ dě Khûpò̌lǔ wě̤lṳ̌bǎ kû̌ khrǐphû̌ tokhlǒ tôbǎ ô̌htûpwa̤ lô̤̌khô a sǎphlǒsǔshi hî̌tè, htotô̤̌ a lûdû̌lǒ꤮ mî̌ bǎ asî bǒsû̌khǎkhô kû̌ kòyò dǒ awô̌ tokhlǒ akha, a tô bè̌lṳ̌ lô̌khô ata̤mô̤ hî̌tènu, a wě̤lṳ̌phlô bǎpô̤̌ asî pô̤̌nu. A wě̤lṳ̌ kû̌ mî̌ Cǒmara a ta̤phǐta̤ma̤ awe̤akè, htodě khrǐphû̌ tokhlǒ tôbǎ ganǎ̤de khwǐcôphǎ dǒ a pǒshigǎ tokhlǒ ayô̤̌, dě a tôbǎ mô̤ǐ lû̌û ma̤jè̌ǐ lû̌û tôpwa̤ kû̌ tôpwa̤. Dě a ma̤gutṳ̌kè alî̤ nutôbǎ kû̌ a ta̤hî̌mô̤hî̌wô̌ tokhlǒ kû̌ a htû̌sò̌htò̌ Cǒmara tokhlǒ pwǎ.
Ta̤hî̌bǎ tôtô̤̌ kû̌ tôtô̤̌
Ta̤hî̌bǎ wǐ kû̌ ta̤we̤ta̤kè akòshǐkòtṳ̌ tokhlǒ 1:1-17
Kòyò pṳ̂̌꤮ tôpwa̤ lṳ̂bǎ ta̤ma̤hǎplǎge 1:18-3:20
Comara ata̤ma̤hǎplǎge kòyò aklè̌aklò 3:21-4:25
Ta̤ô̌htûpwa̤ asa dǒ Khrǐ akû 5:1-8:39
Cǒmara a ta̤yè̤lò̤nǎ bǎ Isarelaphû̌ tokhlǒ 9:1-11:36
Khrǐphû̌ ata̤ǐlò̤ sǎphlǒsǔshi 12:1-15:13
Ta̤hî̌bǎ gutṳ̌kò kû̌ ta̤hî̌mô̤hî̌wô̌ tokhlǒ 15:14-16:27
Currently Selected:
Rṳ̂̌me̤ Ta̤hî̌bǎ wǐ: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA