Htû̌sò̌htò̌ Ta̤hî̌bǎ wǐ dǒ alô̤mô̤̌
Ta̤hî̌bǎ wǐ dǒ alô̤mô̤̌
Lî̤htû̌sû̌htò̌ awe̤akè
Dǒ lî̤plò̌shǐkû nu, lî̤htû̌sû̌htò̌ hǒtôbǎ mî̌ ahtûlǒ kòyò hǒ. Lî̤htû̌sû̌htò̌ numî̌ lî̤ta̤hǎwô dǒ kòyò dô̌ sǎwǐ lû̌û, asô̌sô̌kû̌ kòyò hî̌bǎ kè̌khîlû̌û tôpwa̤ kû̌ tôpwa̤, kòyòsaprû ata̤kwicaba sîtokhlǒ. Lî̤htû̌sû̌htò̌ hǒo lî̤hǎwô ô̌ atô̤̌ kû̌ atô̤̌, kòyò phǐô̌plǒ lî̤sǎwǐhǎwô hǒtokhlǒ yî̤ bòhǒ, dě a htûhtò̌kètû̌ Isôrě̤laphû̌ sîtokhlǒ ata̤caba dǒ a lṳ̂dû̌lǒ tôcǒ.
Lî̤plò̌shǐkû hǒo, ǎtakǐmî̌ ta̤ dǒ a lṳ̂dû̌lǒ nu a ô̌lṳ̌htò̌bò bǎ lî̤htû̌sû̌htò̌ akûnu. Nutokhlǒ mî̌ amè̤̌hǒ ta̤htû̌sò̌htò̌, ta̤hî̌bwǐsîrî, ta̤yṳ̌ta̤nǎ̤, ta̤kè̌shuǐ, ta̤sǎplǎ̤ dǒ ta̤sǔ aya, Cǒmara ata̤cǒkû̌yô̤̌ kû̌ Cǒmara ata̤ma̤jè̌ sîtokhlǒ. Pô̤̌khô pa gǔ yṳ̌ǎ shû̌shonṳ̌ Cǒmara aya lî̤htû̌sû̌htò̌ pa. Lî̤htû̌sû̌htò̌nu kòyò kè̌ dô̌ lû̌û mî̌ ǎtakǐmî̌ a ǐmô̤htò̌ sô̌ kòsǎphlǒ, a bè̌lṳ̌htò̌ bǎ ta̤kè̌shuǐ dǒ Cǒmara a ô̌. Bǎ ta̤pò̤̌ta̤sha kû̌ ta̤gû̌ta̤gè̌ sîtokhlǒ hèbǎ akhanu, tôbǎ ma̤pè̤̌kè ta̤ nutokhlǒ hětè nu a dǐsî̌ganǎ̤ jè̌ ta̤. Dǒ lǎ̤htû̌sò̌ hî̌bwǐhî̌sîrîhtò̌ Cǒmara a ǐ gènè̤bǎ kòyò.
Isôrě̤laphû̌ dǒnukha tokhlǒnu, tôkû kû̌ tôkû asî noǎ khô̌ lû̌û lî̤htû̌sû̌htò̌. Ǎtakǐ lî̤htû̌sû̌htò̌ mî̌ kòyò tayanǎ dǒ kòyò lǎ̤noǎ a tǒ̤ tôcǒtṳ̌ aya mè̤̌tô̤̌ (1) lî̤htû̌sû̌htò̌ 1 akûnu, asî sû̌ǐtòwòǐ kòyò (2) ta̤htò̌sò̌htò̌ 13 akûnu, asî dǐlṳ̌htò̌ ata̤ sayṳsǎbǎ (3) lî̤htû̌sû̌htò̌ 46 akûnu, asî dǐlṳ̌ ta̤mô̤ dǒ Yarǔshale (4) lî̤htû̌sû̌htò̌ 47 akûnu, asî shôbǐǐlṳ̌ Cǒmara bô̌lò̤ ta̤ tokhlǒ kû̌ ata̤pô̤ta̤phǎ awe̤akè (5) lî̤htû̌sû̌htò̌ 72 akûnu, asî gǔ bè̌dubè̌nǎ̤ khwǐ dě kwicaba bǎ dǒ a gǔ pǒtôpǒbǎ ta̤ aya (6) lî̤htû̌sû̌htò̌ 84 kû̌ 122 akûnu, asî sǎwǐ lî̤sǎwǐ tokhlǒ dě a htò̌caba lô̌khô dǒ ta̤lṳhtò̌hôkû, kû̌ (7) lî̤htû̌sû̌htò̌ 105 akûnu, asî htû̌sò̌htò̌ Cǒmara.
Bǎ Běcǎ Yeshǔ shôbǐǐlṳ̌, kòyò akhanu, a noǎ lî̤htû̌sû̌htò̌, htodě pwa̤wě̤ lî̤plò̌shǐ asa tokhlǒnu asî nè̌lṳ̌ getîkhî sô̌ kû̌ lî̤htû̌sû̌htò̌ numî̌ a ô̌ dû̌wî̤꤮ le. Khrǐphû̌ dǒ awǐnu tokhlǒnu, a noǎ lî̤htû̌sû̌htò̌ dǒ asî ta̤caba, pwa̤sû̌ǐtòwòǐ kû̌ ta̤hî̌lṳ̌ bǎ kòyò kû̌ ta̤sǎlě̤we̤kè dǒ Cǒmara ma̤hto tutṳ̌ kû̌ Yeshǔkhrǐ nuhǒ. Hî̌mò̌mî̌, lî̤plò̌shǐ ô̌ tômè bǎ lî̤htû̌sû̌htò̌ 118 akûnu, a nè̌lṳ̌ getîkhî dǒ lî̤plò̌shǐ asakûnu a ô̌ aplǎ susô̌ dě a hî̌ kû̌, “lǒ̤ dǒ pwa̤ma̤hǐ tokhlǒ htû̌tephekè nu, khònò̤̌dě a htûhtò̌ lǒ̤ dǒ a lṳ̂dû̌lǒ.” (Htû̌sò̌htò̌ 118:22) pwa̤wě̤ lî̤plò̌shǐ asa shôbǐǐlṳ̌pô̤̌ kû̌ lǒ̤ hǒtômè yô̤̌sǎyô̤̌mû mè̤̌caca mî̌ Yeshǔkhrǐ hǒ.
Ta̤taya dǒ alṳ̂dû̌ tokhlǒ
lî̤htû̌sû̌htò̌ hǒo kòyò bè̌phò̌ lû̌û yè̤̌kǔ mè̤̌tô̤̌dě yè̤̌bǎ. Lî̤htû̌sû̌htò̌ awǐlǒ tôbǎ kû̌ ginǐ̤bǎ tôbǎnu, ǎtikǐmî̌ khwǐDawi̤ wě̤ pwǎ, bǎbǎkǎlè subǎ tôbǎ kèdě Khûasǎ mè̤̌tô̤̌dě Kûra a kòyò tokhlǒ wě̤. Lǒ̤꤮ bò lî̤htû̌sû̌htò̌ amèdû̌ 120-134 hǒtokhlǒ nu, “Lî̤htû̌sû̌htò̌ numî̌ lǎ̤sǎwǐ dǒ ta̤htò̌caba ta̤lṳhtò̌hôkû aya.” ta̤bèyò lî̤htû̌sû̌htò̌ yè̤̌bǎ tokhlǒ mî̌ kwè̌ mî̌titè hî̌dě:
- Lî̤htû̌sû̌htò̌ awǐlǒ tôbǎ (1-41)
- Lî̤htû̌sû̌htò̌ ginǐ̤bǎ tôbǎ (42-72)
- Lî̤htû̌sû̌htò̌ subǎ tôbǎ (73-89)
- Lî̤htû̌sû̌htò̌ lî̤̌bǎ tôbǎ (90-106)
Lî̤htû̌sû̌htò̌ yè̤̌bǎ tôbǎ (107-150)
Currently Selected:
Htû̌sò̌htò̌ Ta̤hî̌bǎ wǐ dǒ alô̤mô̤̌: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA