Htû̌sò̌htò̌ 85
85
Ta̤kwicaba dǒ shiphû̌gǎphû̌ ô̌shû̌ô̌mô̤ aya
Phakû̌ri akhlialè tokhlǒ ata̤sǎwǐ. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya.
1Ǒ꤮ Cǒmara tûjû̌pwa̤, na kè̌dû̌ ǐ tûû̌ nashinagǎ.
Na ǐ ǎbǎôbǎ Isôrě̤la khlilèphû̌.
2Na plûkèbò na kòyò tokhlǒ ata̤ma̤sǔma̤plě.
Na phǐtephekè bò asî ta̤sǔta̤plě.
3Na sǎphlǒdû̌ hǎmǎkè lǒ̤bò hǒ.
Na ta̤sǎphlǒdû̌ li̤pisǐ꤮ nî̌, tôplǎnô̤̌ a gûjû̌ gelò̤ bò.
4Ǒ Cǒmaradû̌ dǒ a ma̤hǎplǎge pa, dǐ ǎbǎôbǎ sô̌ pa.
Sǎphlǒdû̌ tǎ̤ pa mǎ̤.
5Na glè̌ sǎphlǒdû̌ pa tûjû̌pwa̤ pe ya?
Na glè̌ sǎphlǒdû̌ sělě pô̤̌ pa tôhtu hto tôhtu pěya?#Htû̌sò̌htò̌ 79:5
6Pô̤̌khô na kòyò tokhlǒ gǔ sǎlě̤sǎlò̤ dǒ na ma̤htûbǎ pa nutokhlǒ ayanu, ǐshû̌htò̌shohtò̌ sô̌ pa.#Htû̌sò̌htò̌ 71:20
7Ǒ꤮ Cǒmara tûjû̌pwa̤, bè̌lṳ̌mò̌ pa kû̌ nata̤mô̤ dǒ a bòpe jòtô̤̌ hǒo.
Ma̤hǎplǎkèmò̌ pa.
8Běcǎ Cǒmara tûjû̌pwa̤ hî̌ hî̌tènu, he ganǎ̤de.
Ma̤titèhî̌dě a olò̤ kû̌ a gǔ ǐ a kòyò dǒ acǒ kû̌ yô̤̌ tokhlǒ ata̤ô̌gûjû̌kabǎ.
Bǎbǎkǎlè no ma̤bǐma̤ô̌ sô̌ tǎ̤ asî mǎ̤.
9Pô̤̌khô kòyò glè̌ kè̌shǐ Cǒmaradû̌ asîrîpô̤phǎ dǒ pagǎkû ayanu, kòyò dǒ a ǐsha bè̌dubè̌nǎ̤ lû̌û tokhlǒ nǐ̤bǎ mè̤̌caca Cǒmara ata̤ma̤hǎplǎge pě.
10Ta̤mô̤ kû̌ ta̤cǒ kû̌ yô̤̌ kè̌shǐshěshu lû̌û hǒ.
Ta̤cǒta̤tè̤ kû̌ ta̤ô̌gûjû̌kabǎ gômô̤ kè̌khî lû̌û.
11Hǎkhû̌phû̌ ata̤cǒ kû̌ yô̤̌ ô̌ lṳ̌htò̌ dǒ hǎkhû̌.
Cǒmara ata̤cǒta̤tè̤ ô̌ dǒ mǒkhû̌ kè̌lò̤ pě.
12Cǒmara tûjû̌pwa̤ gǔ glǒlò̤lò̌lò̤ mè̤̌caca ata̤ǐshôwî̤ pě.
Sǒmṳ̌wû̌bô sǎhtò̌phôhtò̌ pô̤̌ dǒ pa gǎkû.#Htû̌sò̌htò̌ 67:6
13Ta̤cǒta̤tè̤ cû̌wǐ dǒ Cǒmara tûjû̌pwa̤ alô̤mô̤̌ pô̤̌ pwa̤sû ta̤we̤ta̤kè tôpwa̤nu pě.
A gǔ tîwî̌tòwò nǎwǐ bǎ aklè̌lǎ̤hè aya pě.
Currently Selected:
Htû̌sò̌htò̌ 85: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
