Htû̌sò̌htò̌ 62
62
Yṳ̌ǎnṳ̌ Cǒmara ata̤takabǐ
Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě ta̤sǎwǐ htû̌sò̌htò̌nu tôshǒ mî̌ Khûjedutǔ dǒ a yṳ̂̌klè̌nè̌klòǐ pwa̤sǎwǐ htû̌sò̌htò̌ ta̤ nutôpwa̤ aya.
1He sǎphlǒhtû ô̌pǒ̤ kè̌shuǐ tǒ̤dǒ Cǒmaradû̌ a ô̌.
Ta̤ma̤hǎplǎge he ô̌ dǒ aô̌ hè.
2Pwa̤ dǒ a htû he lǒ̤dû̌ kû̌ pwa̤ma̤hǎplǎ he mî̌ a pwǎ.
A mî̌ pwa̤takabǐ he, he lò̤jû̌jò pe tôkhò̌꤮ tô̤̌.
3Sî lǒ̤꤮ bònu, sî gǔ shěpě̤yî̤ he pwǐtè?
He mî̌ pwa̤khû̌ǎjǎ sô̌sô̌kû̌ we̤ dǒ alò̤tě̤pro, sî glè̌ shěpě̤ pe he ya?
4Asî ma̤nǎ kû̌ a glè̌ bè̌lò̤ he dǒ ta̤bè̌dubè̌nǎ̤ agûlǎ̤htò̌yô̤̌nu.
Asî mô̤nṳ̌ ta̤lahǎlahò tokhlǒ.
Asî ǐshôwî̤ kòyò kû̌ khû̌phě, asî ǐsho kòyò dǒ asǎphlǒkû.
5He sǎphlǒhtû ô̌pǒ̤ kè̌shuǐ pwǎtǒ̤ Cǒmaradû̌ a ô̌ nô̤̌.
He ta̤kè̌shuǐ ô̌ dǒ a ô̌ hè.
6Pwa̤ dǒ a htû he lǒ̤dû̌, pwa̤ma̤hǎplǎ he mî̌ a pwǎ.
A mî̌ pwa̤takabǐ he, he lò̤jû̌jò petô̤̌.
7Cǒmara mî̌ pwa̤ dǒ a ma̤hǎplǎge he, a ǐ he ta̤bè̌dubè̌nǎ̤.
A mî̌ he lǒ̤dû̌ dǒ ashû̌asho, he lǎ̤ô̌tûdûbǐ gûlǎ̤.
8Ǒ꤮ kòyò hǎkhû̌phû̌ sî, Cǒmaradû̌ mî̌ pa lǎ̤ô̌tûdûbǐ agûlǎ̤ hǒ, yṳ̌ǎnṳ̌ Cǒmaradû̌ pṳ̂̌꤮ tôplǎ.
Shôbǐǐbò lû̌û kû̌ sî ta̤pò̤̌ta̤sha lǒ̤꤮ bò.
9Kòyò hǎkhû̌phû̌ sô̌sô̌ pwǎkû̌ ta̤sǎnṳ̌sǎhtò̌ tôplǎ.
Kòyò dû̌yò̤̌ bǎbǎ, kòyò shèwè̤ bǎbǎ, a tṳdè sô̌sô̌ bò pwǎ.
Kè̌ jèmò̌ asî kû̌ còcûlǎ mî̌, a phidè̌shè̌ pwǎ.
Asî lǒ̤꤮ bò mî̌ a sô̌sô̌pwǎ kû̌ ta̤sǎnṳ̌sǎhtò̌ tôplǎ nô̤̌pwǎ.
10Yṳ̌ǎ kè̌shuǐ tǎ̤ ta̤ma̤jî̌ma̤jû̌ kòyò mǎ̤.
Phî̌htò̌yô̤̌ǐ tǎ̤ sînǎ̤ kû̌ ta̤phû̌ta̤li̤ dǒ sî pṳ̂̌sigwǐyǒsaphǎ kòyò nutokhlǒ mǎ̤.
Na ta̤dû̌yò̤̌htò̌sa sǔ sǔ a ô̌dû̌htò̌ bǎbǎ, sǎmǒ ǐ tǎ̤ ta̤ nutokhlǒ mǎ̤.
11Cǒmaradû̌ hî̌phlôtě̤mè̤̌ ayô̤̌ dě he ganǎ̤de dû̌wî̤ kû̌ Cǒmaradû̌ mî̌ a pô̤phǎshû̌sho.
12Kǎtô̤̌ ǒ Běcǎdû̌, nata̤mô̤ mî̌ ta̤mô̤ dǒ ahǎbòjò tô̤̌.
Pô̤̌ asî ma̤ hto ta̤nu, na ǐ mè̤̌caca kòyò pṳ̂̌꤮ tôpwa̤ ata̤ma̤nǐ̤khû̌kǎ pě.#Pwa̤sî̌pwa̤jò̌phû̌ alě̤yô̤̌ 24:12; Isôkěla 33:20; Matè̌ 16:27; Kôritu ginǐ̤bǎ tôbǎ 5:10; Petarǔ awǐlǒ tôbǎ 1:17; Ta̤dǔlè̌lṳ̌htò̌ 2:23
Currently Selected:
Htû̌sò̌htò̌ 62: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
