Htû̌sò̌htò̌ 48
48
Wî̤̌sǐû mî̌ Cǒmaradû̌ awî̤̌dû̌
Phakû̌ri akhlialè tokhlǒ ata̤sǎwǐ htû̌sò̌htò̌.
1Cǒmara tûjû̌pwa̤ mî̌ adû̌htû mî̌ca.
Kòyò tôbǎ htû̌sò̌htò̌ mî̌ca lû̌û dǒ pa Cǒmaradû̌ awî̤̌kû, akhôlô plò̌shî̌khû̌.#Lî̤wě̤mǎnǎ awǐlǒ tôbǎ 16:25
2Cǒmaradû̌ akhôlô, Sǐû khôlô numî̌ adû̌ahtû, awî̤awô̌ gutṳ̌, a ma̤sǎlě̤sǎlò̤ bò hǎkhû̌ tôbǎbò.
Sǐû khôlô nî̌ a sô̌sô̌kû̌ khôlôdûkhôlôhtû ô̌ dǒ cǔcôcî̌ tôkhô tokhlǒ, a mî̌ khwǐdû̌ wî̤̌dû̌ tôwî̤̌.#Matè̌ 5:35
3Cǒmaradû̌ ô̌ dǒ wî̤̌nutôwî̤̌ ahôhta tokhlǒ akû.
A dǔlṳ̌htò̌ ǐ anǎ̤ kû̌ a mî̌ gûlǎ̤ lǎ̤ô̌tûdû.
4Kè̌mò̌, khwǐ tokhlǒ kaǎplǒkaǎcu akli tokhlǒ dě a hèshě wî̤̌nu.
5Bǎ asî kè̌shǐ Sǐû khôlô akhanu, a htò̌shôpe̤bò asî.
Asî ǐshabò, a hǎhtò̌ khlè̌shukhlè̌tò̤̌ kèbò.
6Asî ǐsha gònò̤̌gòglè dě ǐshajî̌jû̌ asô̌sô̌kû̌ pwa̤mǒ̤ hǐphushanu.#Yashǎya 13:8
7Na ma̤pî̌ma̤lṳ̂̌ kèhto asî pô̤̌ gili̤sǎ dǒ lô̤̌bò̌ tôkhô htû̌lûtě̤pro̤kè bò Wî̤̌tashǔ sǒkhlidû̌.
8Pa ganǎ̤de wî̤̌nu a ô̌ kû̌ asîrîdû̌sîrîhtû, khònò̤̌ pa kè̌shǐ bǎ Cǒmara tûjû̌pwa̤ dǒ a pǒ ta̤ lǒ̤bò awî̤̌dû̌ kû̌ panǎ̤.
Wî̤̌dû̌ numî̌ Cǒmaradû̌ awî̤̌, a shǒlò̤nǎ lû̌ tûjû̌pwa̤ talakhǎ.
9Ǒ Cǒmaradû̌, pa ô̌ dǒ nata̤lṳ̌htò̌hôkû.
Pa gènè̤bǎ nata̤mô̤ dǒ ahǎbòjò tô̤̌nu awe̤akè.
10Ǒ Cǒmaradû̌, pô̤̌ nami̤ lṳ̌shilṳ̌gǎ mè̤mè̤̌nu, kòyò gǔ htû̌sò̌ cû̌tǒ̤ jò nami̤ dǒ mǒgutṳ̌, nacǔtûmû nî̌ aô̌lǒô̌be kû̌ ta̤cǒta̤tè̤.
11Dǒ na cî̌htò̌cǒtè̤ ta̤ akhû̌akhî, Sǐûwî̤̌ gǔ sǎlě̤sǎlò̤ pû nî̌.
Yǔdagǎ awî̤̌ tokhlǒ sǎlě̤sǎlò̤ pû nî̌.
12Cû̌tewe̤ Sǐû khôlô, lètewe̤ wî̤̌sǐû, cû̌dô̌mǎǐmò̌ hǐphû̌htò̌yô̤̌lǒ lǎ̤ô̌pǒ̤kè̌ nutokhlǒ.
13Pô̤̌khô na gǔ shôbǐǐlṳ̌ bò̌ bǎ naphû̌nali̤ dǒ nô̌kò tôhtu pě ayanu, kè̌mǎǐ gûlǎ̤ lǎ̤ô̌tûdû nutokhlǒ, cû̌ ma̤kè̌kè̌mò̌ hôhta nutokhlǒ.
14Cǒmaradû̌ mî̌ pa Cǒmaradû̌ dǒ aô̌ tûjû̌pwa̤ talakhǎ.
A gǔ htû bǎ pa pwa̤yṳ̂̌klè̌nè̌klò tûjû̌pwa̤ talakhǎ pě.
Currently Selected:
Htû̌sò̌htò̌ 48: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
