Htû̌sò̌htò̌ 21
21
Khwǐdǎwi̤ htû̌sò̌htò̌ǐ ta̤ma̤pè̤̌
Khwǐdawi̤ ata̤sǎwǐ, ta̤sǎwǐ numî̌ pwa̤sǎwǐ ta̤ tokhlǒ ikǒlǒkò dǒ ta̤lṳhtò̌hôkû nutôpwa̤ aya.
1Ǒ Cǒmara tûjû̌pwa̤, dǒ na ǐ khwǐdû̌ ta̤shû̌ta̤sho akhû̌akhî, a sǎlǎ̤sǎlò̤ mî̌ca.
Na ma̤jè̌ lû̌û dě a ma̤pè̤̌kè khuwè̤ akhû̌akhî, a sǎlě̤sǎlò̤ mî̌ca.
2Na ma̤lǒbe bò asǎphlǒ ta̤sǎyṳsǎbǎ.
Na la̤lò̤ kè ta̤kwisǎyṳ na tô̤̌.
3Na ǐ pû yǎ ta̤ǐshowî̤ dǒ awî̤awô̌.
Na glû̌htò̌ bǎ yǎ khû̌glû̌hta dǒ kò ma̤ kû̌ hta acè̌.#Shamuěla ginǐ̤bǎ tôbǎ 12:30
4A kwihtò̌ na ta̤htûpwa̤ nědû̌lahtû.
Na ǐ yǎ lṳmṳ̌ni̤ lṳmṳ̌sa tûjû̌pwa̤ talakhǎ.
5Na ǐ yǎ ta̤ma̤pè̤̌ akhû̌akhî, kò bè̌dû̌bè̌htû ǐ mî̌ca lû̌û.
Na ǐ yǎ ta̤siwi̤sòwò̤ dǒ alîakakha.
6Na ta̤ǐshowî̤ ô̌ kû̌ lû̌û tûjû̌pwa̤.
Na ô̌kû̌ yǎ akhû̌akhî, a sǎlě̤sǎlò̤ mî̌ca.#Lî̤wě̤mǎnǎ awǐlǒ tôbǎ 17:27
7Hǒomî̌ dǒ khwǐdû̌ yṳǎ Cǒmara tûjû̌pwa̤ akhû̌akhî hǒ.
Cǒmara dǒ adû̌ahtûlǒ hǒtôpwa̤ mô̤ǐ yǎ kû̌ ta̤mô̤ǐ dǒ ahǎbòjò tô̤̌ akhû̌akhî, a hǎnòò̌ bǎ mî̌ca dǒ gògǒhtakhû̌.#Htû̌sò̌htò̌ 125:1
8Khwǐdû̌ gǔ pṳ̂̌nṳ̌bò pwa̤khû̌khwè yǎ tokhlǒ kû̌ acǔde.
A gǔ gwèmě bò akhuwè̤ nutokhlǒ kû̌ acǔtûmû.
9Bǎ Cǒmara tûjû̌pwa̤ hèô̌lṳ̌htò̌ akha pěnu, a ma̤pî̌ kèbò asî sô̌sô̌kèkû̌ mî̌gè̌dû̌lò̤nu.
A sǎphlǒdû̌ lî̤pi̤sǐ jî̌ akhû̌akhî, a lò̤gè̌te̤we̤bǐ kèbò asî.
A ulò̤ si bò asî.
10Khwǐdû̌ gǔ ma̤sima̤hǎmǎ kèbò asî akhlialè bǎ hǎkhû̌.
A gǔ ma̤tṳ̌ kèbò asî aphû̌ali̤ lò̤tutṳ̌ tokhlǒ dǒ kòyòhǎkhû̌phû̌ akla.
11Asî gǔma̤phû̌mò̤̌ lô̌khô khwǐdû̌ bǎbǎkǎlè ata̤yè̤lò̤nǎ tokhlǒnu a behtò̌belò̤ tôcǒ tô̤̌.
12A mṳcû̌tô asî kû̌ akhlǐ akhû̌akhî, asî htû̌tiwǐ hǎhtò̌khlè̌ ge bò sô̌.
13Ǒ Cǒmara tûjû̌pwa̤, pa gǔ htû̌sò̌htò̌ǐ nata̤sîrîshû̌sho.
Pa sǎwǐhtû̌sò̌htò̌ na ta̤pô̤ta̤phǎ pě.
Currently Selected:
Htû̌sò̌htò̌ 21: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA