Htû̌sò̌htò̌ 118
118
Ta̤hî̌bwǐhî̌sîrî ata̤kwicaba dǒ ta̤ma̤pè̤̌ aya
1Cǒmara tûjû̌pwa̤ wô̌ mî̌ca, hî̌bwǐhî̌sîrîhtò̌ lô̌khô yǎ.
Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤. #Lî̤wě̤mǎnǎ awǐlǒ tôbǎ 16:34; Lî̤wě̤mǎnǎ ginǐ̤bǎ tôbǎ 5:13, 7:3; Ěsara 3:11; Htû̌sò̌htò̌ 100:5, 106:1, 107:1, 136:1; Yeramǐya 33:11
2No hî̌mò̌ Isôrě̤lakhlilèphû̌ sîtokhlǒ kû̌, “Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.”
3No hî̌mò̌ PhaArû akhlialè amî̌ pwa̤shû̌gǎ tokhlǒ kû̌, “Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.”
4No hî̌mò̌ kòyò dǒ a ǐsha bè̌dubè̌nǎ̤ Cǒmara tûjû̌pwa̤ nutokhlǒ kû̌, “Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.”
5He kè̌shî̌tṳ̌bǎ kû̌ ta̤pò̤̌ta̤sha dě he kwisǎyṳhtò̌ Cǒmara tûjû̌pwa̤.
A ganǎ̤de he ta̤kwihtò̌, a ma̤hǎplǎbǎ he.
6Cǒmara tûjû̌pwa̤ mî̌ pwa̤ dǒ a ma̤jè̌ he.
Kòyò ma̤ he pwî̌tètè̌ bǎbǎ, he ǐsha tô̤̌.#Rṳ̂̌me̤ 8:31; Hebrǔ 13:6
7Cǒmara tûjû̌pwa̤ ô̌cu dǒ he tôkhô dě a ma̤jè̌ he akhû̌akhî, a no kè̌shǐ he kû̌ pwa̤sǎkhě he tokhlǒ lò̤jû̌kè.
8Nǎla̤ǐ Cǒmara tûjû̌pwa̤nu, awô̌lǒ bò kû̌ nǎla̤ǐ kòyòhǎkhû̌phû̌.#Htû̌sò̌htò̌ 62:8-9, 146:3; Yeramǐya 17:5, 17:7
9Nǎla̤ǐ Cǒmara tûjû̌pwa̤nu awô̌lǒ bò kû̌ nǎla̤ǐ pwa̤htû ikǒlǒkò pě.
10Lǒ̤bò khlilèphû̌ tokhlǒ ô̌te̤we̤bò he bǎbǎkǎlè Cǒmara tûjû̌pwa̤ ma̤jè̌ he akhû̌akhî, he ma̤pè̤̌ kèbò asî.
11Asî ô̌te̤we̤ he, a ô̌ te̤we̤bò he bǎbǎkǎlè Cǒmara tûjû̌pwa̤ ma̤jè̌ he akhû̌akhî, he ma̤pè̤̌ kèbò asî.
12Asî ô̌te̤we̤ bò he asô̌sô̌kû̌ wè̌ jotewe̤bǐ abǔnu.
Bǎbǎkǎlè asî siphwèkè asô̌sô̌kû̌ mî̌ u jôjǔnu.
Cǒmara tûjû̌pwa̤ ma̤jè̌ he akhû̌akhî, he ma̤pè̤̌ kèbò asî.
13Pwa̤sǎkhě he tokhlǒ jî̌pwǐ̤ shěshǔ he dě he glè̌ lò̤jû̌ tûlû̌kè bǎbǎkǎlè Cǒmara tûjû̌pwa̤ ma̤jè̌ he.
14Cǒmara tûjû̌pwa̤ mî̌ hekhû̌heǎ, pwa̤tukutakaǐ he.
A mî̌ pwa̤ dǒ a ma̤hǎplǎge he.#Hǎplǎge 15:2; Yashǎya 12:2
15Kòyòcǒkòyòtè̤ ma̤pè̤̌ pwa̤sǎkhě asînu akhû̌akhî, ganǎ̤demò̌.
Asî kaǎgǔsǎwǐ lô̌khô dǒ ahǐphû̌kû kû̌, “Cǒmara tûjû̌pwa̤ mî̌ apô̤phǎshû̌sho mî̌ca.
16“A ma̤jè̌ pa kû̌ ata̤pô̤ta̤phǎ akhû̌akhî, pa ma̤pè̤̌ ta̤.
“Cǒmara tûjû̌pwa̤ mî̌ apô̤phǎshû̌sho mî̌ca.”
17He si bǎkhôtô̤̌, he ô̌htûpwa̤ pe pwǎ.
He gǔ pwe̤ǐlṳ̌ bǎ ta̤ dǒ Cǒmara tûjû̌pwa̤ ma̤ htonu.
18Cǒmara tûjû̌pwa̤ sû̌ǐwô̌ge shû̌shû̌ he bǎbǎkǎlè a nosibǎ he khôtô̤̌.
19Bǔmô bǎ he ta̤lṳhtò̌hô atakhadû̌nu.
He gǔ nṳ̌ hî̌bwǐhî̌sîrîhtò̌ Cǒmara tûjû̌pwa̤.
20Takhanumî̌ Cǒmara tûjû̌pwa̤ atakhakû.
Tǒ̤ kòyòcǒkòyòtè̤ tokhlǒ bǎ nṳ̌bò bǒo.
21Ǒ Cǒmara tûjû̌pwa̤, na ganǎ̤de he ta̤kwicaba, na ma̤hǎplǎkè he akhû̌akhî, he hî̌bwǐhî̌sîrîhtò̌ na.
22Lǒ̤ dǒ kòyò ma̤htò̌ hǐ dě kòyò wîkè lû̌ nutômènu, a htûhtò̌ lǒ̤ dǒ alṳ̂dû̌lǒ dě a tûhtû̌mě bò hǐtômèbò.#Yashǎya 8:14, 28:16; Matè̌ 21:42; Makǔ 12:10; Lǔka 20:17; Pwa̤nophû̌ 4:11; Petarǔ awǐlǒ tôbǎ 2:7
23Hǒonumî̌ Cǒmara tûjû̌pwa̤ ma̤ta̤ pwǎ.
Ama̤ta̤ numî̌ a cô̌klǐcô̌sè mî̌ca.
24Lṳmṳ̌ni̤ khò̌tini̤ mî̌ lṳmṳ̌ni̤ dǒ Cǒmara tûjû̌pwa̤ bè̌lò̤nǎ hǒ.
Sǎlě̤sǎlò̤ sû̌mô̤sò̌mô̤ wô̤̌wô̤̌ lû̌.
25Ǒ Cǒmara tûjû̌pwa̤, ma̤hǎplǎgemò̌ pa.
Ǒ Cǒmara tûjû̌pwa̤, ǐ pa ta̤ma̤pè̤̌.#Matè̌ 21:9; Makǔ 11:9; Yṳ̂ha 12:13
26Kòyò dǒ a hè kû̌ Cǒmara tûjû̌pwa̤ ami̤ tôpwa̤nu, Cǒmara tûjû̌pwa̤ ǐshôwî̤ pû a nî̌.
Pa ô̌ dǒ Cǒmara tûjû̌pwa̤ ahǐkû dě pa ǐshowî̤ sî lǒ̤bò.#Matè̌ 21:9, 23:39; Makǔ 11:9; Lǔka 13:35, 19:38; Yṳ̂ha 12:13
27Cǒmara tûjû̌pwa̤ mî̌ pa Cǒmaradû̌, a ma̤mô̤ma̤wô̌ pa.
Cǐhè ta̤phû̌ta̤li̤ lǎ̤lṳtòhtò̌ nudě comě lû̌û kû̌ sǒpli̤ bǎ ta̤lṳhtò̌wǎ̤ ano̤lô̤.
28Na mî̌ he Cǒmaradû̌, he gǔ hî̌bwǐhî̌sîrîhtò̌ na.
Na mî̌ he Cǒmaradû̌, he gǔ htû̌sò̌htò̌ na.
29Cǒmara tûjû̌pwa̤ wô̌ mî̌ca, hî̌bwǐhî̌sîrîhtò̌ lô̌khô yǎ.
Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.
Currently Selected:
Htû̌sò̌htò̌ 118: KXF
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
