Roma 1
1
1Tha Polo, wane ni ra tha Jesus Christ, na kera aili nau fasi kwai aposela, ma kera fili nau ifana si faaroṉoa lea tha God, 2Si do ne alaṉai nia dini u mai inao asi ṉata porofeta nia ki i la kekeda la abu eki, 3Sulia Kaluwane nia tha Jesus Christ na Lord kulu, ne futa mai ana kwalafa tha Defeta ana seena imole, 4Ma kera fatai nia na nia Kaluwane tha God ana sukwaia, sulia Spirit ne abu, ana tatae la eri faisia toa mae ki; 5Wane na mili ṉalia lea la ma thatana aposela ki ani nia, fasi keki ade sulia si do na kulu fitoona i maalutana toa na fanua ni sui bana, uria thatana: 6Ma ni kamulua kera aili kamulua lau boo bia toa eki, kamulua do tha Jesus Christ ki: 7Isana toa nai Roma ki sui bana, na tha God e liothau ani kamulua, toa abu ne aili kamulua mai: Lea la iamulua ma enenoa ita mai atha God na Maka kulu ma tha Lord Jesus Christ.
8Si do totonao, ku sore lea talea God nau atha Jesus Christ uri kamulua sui, uria na kera ṉata sulia fitooa kamulua i la fanua nei iano ni sui bana. 9Sulaania tha God kai faamamanea si do ne thaitoomana suli nau, nia na nau ku ra ifana ana spirit nau asi faaroṉoa lea sulia Kaluwane nia, ka sorea na nau ku ṉata suli kamulua ana foa la nau ki ta si maṉa si ei, 10Ku gani ṉado, fasi mado e ai buriana ne tau naa keki ifinia tala ifaku si maṉa eri sulia si do na tha God e thathamia, kwai lae kau isamulua. 11Uria nau ku thathamia faamau kwai riki kamulua, fasi kwai falea ta si do ifamulua ana do tha Spirit ki na kera tona falea, fasi muki takwe ṉado; 12Keki faainamaruki kulu ofu neri, ni nau ana fitooa kamulua, ma ni kamulua ana fitooa nau. 13Ma nau ku lalakwa na musi thaitoomana, doora kera, na ruruuku e thathamii lae kau isamulua asi maṉa oro ki bana (ma kera suusi nau faisia ka fula asi maṉa eri), fasi kwai alua tei foee do ani kamulua lau boo, ’uria lau boo ana Jenetaele ki sui bana. 14Si do ni isaku na kera takofale nau ania uria fale lana ifana toa i Girisi ki ma toa ṉata lade eeta, toa na liode too ki ma toa na kesi manata lea. 15Mania, sulia si do ku talaana ili lana, ku fifarao ana ṉata la sulia si faaroṉoa lea isamulua toa nai Roma lau boo. 16Sulaania e ai kwasi seenoni asi faaroṉoa lea tha Christ: uria sukwaia tha God ana marukia neri fani tei na kai fitoo; ṉa Ju totonao, ma ṉa wane i Girisi ni lau boo. 17Sulaania asi kula eri kera fatai nia kokoto la ne ita mai atha God ana fitooa ma uria fitooa: ’uria kera keda, Ma wane kokoto kai maruki uria fitooa.
18Sulaania rakeiria tha God kera fatai nia ne lae mai i thalo ka fula asi lio ni sui bana ne fare faekwa atha God ma asi abula la ni sui bana ne ai si kokoto ana wane ki, na kera thaitoomana mamana la eri, sui abula lada e ai si kokoto; 19Uria na si do imole kai talaana thaitoomana lana sulia tha God kera rikia naa; uria na tha God e fatai nia isada. 20Sulaania si do nia eki ne to bana ma kesi rikia ita mai ana thauwai lana fanua nei iano ka to lalaa, uria na kera thaitoomana asi do ne thauwanidaki, sukwaia nia neri na ka to ladoa ma liona na si lio ana God; fasi e ai lau ta si do ana suusi lana abula taa la kera: 21Uria na si maṉa na kera thaitoomana tha God, kesi faainoto nia ana inotoa tha God, bia kesi sore lea; manata lada ka fakoka, ma kera faarorodoa ruruuda ne oewanea. 22Si maṉa keka sorea liode too, kera toa oewanea ki, 23Keka taala inotoa tha God na toto si fufura ka lioe nuna wane na toto kai fufura, ma thaaro ki, ma do maruki ana fai ae ki, ma wa ki.
24Mania tha God lau boo e lukatai kera asi thathami la taa ruruuda ana manata taa la, fasi keka fare faekwa ana seeda kwailiu: 25Sulaania kera taala mamana la tha God ana lole la, ma kera fare baita ana do ne thauwai nia ma keka ra ifana do una eki, me ai kesi fare baita ani nia ne thauwai nia si do eki, nia na kera taṉoa toto si sui. Emeni.
26Sulia si kula eri tha God e lukatai kera asi lio ni oea ne taa ka tatha: uria kini kera ki kera taala si do imole tala thaitoomana sulia ṉa kini asi do ne eeta faisia si do eri: 27Ma wane ki kera ade una eri lau boo, kera ekwa asi do imole e tala thaitoomana sulia ṉa kini, kera thathami kera faamau kwailiu ana si thathami la taa, wane ki kera ilia bia wane ki si do ne ai si kokoto, ma kera ṉalia duu lana ade garo la kera i seeda i talaada.
28Ma talafana na kera lalakwee thaitoomana tha God, alafana lau boo tha God e lukatai kera asi lio ne taa bonaa, keki ilia si do ne ai si kokoto ki; 29Uria na kera faafuṉu kera asi abula la ni sui bana ne ai si kokoto, oe la, taa la, thathami lana si do kera ki, si lio ne taa; kera fuṉu ana uga la, thauwane la, firu la, lole la, manata taa la; kera toa ana fuaro la, 30Ana ṉata buri la, toa na tha God e rikida ka taa ki neri, kera bae naunau, kera fafakao kera i talaada, kera uunaoda, kera boa si do taa ki, kera ade faisia ṉata lana maka kera ki ma thainada, 31Kesi manata lea, kera musia alaofua ki, kesi liothau ana ina lada kera, si lio ana tatakomi la ka ai faisida: 32Toa na kera thaitoomana si ṉata fifi tha God, ne sorea mae lana toa na kera ilia si do una eki, una ena mena kera ilia boo, ma talitoona ili lana e ai, kera ala lau boo fafia toa eki na kera ilia.
Currently Selected:
Roma 1: MLU1949
Highlight
Share
Compare
Copy
Want to have your highlights saved across all your devices? Sign up or sign in
British and Foreign Bible Society 1949, 1951
