Mako 3
3
1Ma nia e kotho lau i la biu ni ofu la; ma tee wane ka ni kula eri na abane mae. 2Ma kera lio uri nia, mada sa nia ka faamarukia afa boṉi mamaloa; fasi keki alaṉi nia ania. 3Ma nia ka soree isana wane eri na abane mae, Lae mai, oki takwe i maalutamilia. 4Ma nia ka soree isada, Kera alamatania ili lana do lea afa boṉi mamaloa ki, mado ili lana do taa? keki faamarukia maṉona imole, mado keki thauwane? Ma keka bona bada. 5Ma buriana ne lilio kakali kera ana rakeiria, lione dila uria sadi lana ruruuda, nia ka soree isana wane eri, Tekwasia abamu. Ma nia ka tekwasia: ma abana ka lea lau bana ’uria ruana aba nia. 6Ma Farisi eki kera lae kau, ma si maṉa eri u boo kera ofu bia toa tha Heroda keka furia ṉata fafi nia, uria si ade la na keki ilia fasi keka thauṉi nia.
7Ma tha Jesus ka lae nana bia toa nia ne toleda uri fafoasi: ma malului wane baita ana toa i Galili kera lae iburiana: bia toa i Judia, 8Bia toa i Jerusalema, toa i Idiumea, bia toa na kera to ibali laba i Jodana, toa fanua kakalia i Taera bia i Saedona, malului wane baita, si maṉa na kera roṉoa si do baita nia e ilidaki, keka lae mai isana. 9Ma nia soree isana toa nia ne toleda, sa tee foorua faekwa ka maakwali nia uria malului wane eri, ada keka beresi nia: 10Uria nia e faamarukia toa oro; adedea toa na kera matai ana mataia oro ni bana kera beresi nia fasi keki sua nia. 11Ma spirit taa ki, si maṉa na kera riki nia, keka asi kera iano isana, ma keki ’ai, keka una eri, Oe Kaluwane tha God. 12Ma nia ka faaroṉo fifi ani kera e ai kesi faaroṉo ani nia.
13Ma nia ka tae i la gwa tolo eri, ma ka ailia toa nia thathamia isana: ma keka lae mai isana. 14Ma nia e talisia akwala ma ro nonii wane, fasi keki to bi nia, bia fasi kai arasida uria ṉata la, 15Bia fasi keki sukwai uria faamaruki lana mataia ki, ma arasi lana spirit taa ki: 16Ma tha Saimona nia ka alaṉia atha Pita; 17Ma tha Jemesi kaluwane tha Sebede, bia tha Jone doorana tha Jemesi; ma nia ka alaṉida ana Boanajisi, ma toolaṉai lana si ṉata eri, Na ro kaluwane kukururua: 18Ma tha Adaru, ma tha Filifi, ma tha Batholomiu, ma tha Mathiu, ma tha Tomasi, ma tha Jemesi kaluwane tha Alafeasi, ma tha Thadeasi, ma tha Saimona ṉa Kenanaete, 19Ma tha Judasi Isikarioto, wane ne faaalamai nia.
Ma keka kotho i la ta biu. 20Ma malului wane eri keka figu lau, adedea keka dora naa asi kada sa keki faṉa. 21Ma si maṉa na ina lana kera kera roṉoi, kera lae mai sa keki raua: uria kera sorea, Nia oewanea. 22Ma toa ni kekeda ki na kera toto i Jerusalema kera lae mai, keki sorea ada, Tha Bielasibaba ni isana, ma, Nia ka arasia spirit taa ki ana spirit ne inoto ana spirit taa ki. 23Ma nia ka ailida isana, ma ka soree isada ana tarifula ki, Nifana ade lana tha Satan kai arasia lau tha Satan? 24Ma mada sa ta tooa kera tala firu bi kera i talaada, tooa eri so ka ṉado e ai. 25Ma mada sa ta biui wane kera tala firu bi kera i talaada, biui wane eri so ka ṉado e ai. 26Ma mada sa tha Satan kai tatae, kai firu bi nia i talaana, ma kai to ro bali, nia sa ka ṉado e ai, kai sui lau bana. 27Ta wane sa ka kotho i la biu wane sukwai, ma ka lagua do nia ki e ai; nia kia kania wane sukwai eri totonao; sui kai bii lagua biu nia. 28Mamana ku soree isamulua, Abula taa la sui boo keki manata lubea wela imole ki, bia atona bana si baea na keki bae ania ana faretoliṉi lana tha God: 29Ma ni tei na kai bae ni faretoliṉi lana tha Spirit Abu e ai bonaa ta manata lube la, abula taa la eri kai to bonaa fafi nia: 30Uria na kera sorea, Spirit taa ni ani nia.
31Sui doorana kera bia thainana keka fula; keka takwe bada i maa, keka kwaiarasi isana, keka aili nia. 32Ma malului wane keki ono kali nia; ma keka soree isana, Rikia fasi, thainamu bia dooramu kera kera ni maa, keki rofe uri oe. 33Ma nia luuda, ka sorea, Ni tei na thainaku ma dooraku kera? 34Ma nia e lio kakali kera, toa na kera ono kali nia, ma ka sorea, Rikia fasi, thainaku bia dooraku kera! 35Sulia ni tei bana na kai ilia si do na tha God e thathamia, nia na dooraku, ma waiwaena nau, ma thainaku.
Currently Selected:
Mako 3: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
