Mako 15
15
1Ma i la uusuwadia u boo wane inoto ni foa ki keki furia ṉata bia ulunao ki ma wane ni kekeda ki ma ofu la eri sui bana, sui keka kania tha Jesus, keka tolea, keka fale nia ifatha Paelate. 2Ma tha Paelate ka soetoona, Oe ṉa Kiṉa Ju ki? Ma nia luua, ka soree isana, Oi sorea. 3Ma wane inoto ni foa ki keki alaṉi nia ana do oro ki; ma nia e ai si luuda ana ta si do. 4Ma tha Paelate ruana ka soetoona lau, ka una eri, Osi luuda boo ana ta si do? rikia fasi do oro nei ki toa nei keki alaṉi oe ania. 5Ma tha Jesus e ai si luua lau ana ta si do; adedea tha Paelate ka kwele.
6Ma ana fafaṉa eri ade la kai ililia kai lulubea tee wane na kera kania kai lae ifada, wane eri na kera gani nia uria. 7Ma tee wane, thatana tha Barabasi, kera kania bia toa na kera firu bia toa i Roma, toa eri kera thauwane ana firua eri. 8Ma malului wane eki kera ’ai faamau, keka thathamia sa nia kai ilia si do ne ililia ifada. 9Ma tha Paelate e luuda, ka una eri, Mulu thathamia kwai lubea Kiṉa Ju ki kai lae ifamulua? 10Uria ne thaitoomana wane inoto ni foa ki kera fale nia uria bana manatade uga isana. 11Ma wane inoto ni foa ki kera faaṉalua toa eki, fasi nia kai lubea tha Barabasi kai lae ifada. 12Ma tha Paelate e luuda, ka sorea lau isada, Ma si ta na muka thathamia kwai ilia ana wane na mulu alaṉia ana Kiṉa Ju ki? 13Ma keka ’ai lau, Fota fafi nia ana ’ai rarafolo. 14Sui tha Paelate ka soree isada, Uria ta, si ta ne taa nia ilia? Ma keka bii ’ai baita ka tatha, Fota fafi nia ana ’ai rarafolo. 15Ma tha Paelate, uria ne thathamia kai faalea manatana toa eri, ka lubea tha Barabasi ka lae ifada, ma iburiana ne kwae tataria ana suila tha Jesus, nia ka fale nia fasi keka fota fafi nia ana ’ai rarafolo.
16Ma toa ana firua kera talai nia i la lalabata, i la biu baita kera; ma keka ailia mai aini toa ana firua sui bana. 17Ma kera faatooni nia ana tooni momothelaa, kera eeroa kwalo totora, keka alua i gwauna; 18Ma keki bii faainoto nia, keki una eri, Kiṉa Ju ki ae! 19Ma kera kwaea gwauna ana fa ue, ma keka ṉisufi nia, ma kera boururu, keka faabaita nia. 20Ma buriana na kera aefara ania e sui, keka tanusia tooni momothelaa faisia, ma kera faatooni nia ana tooni nia ki. Ma kera tole nia kau uria fota fafi lana ana ’ai rarafolo.
21Ma tee wane, thatana tha Saimona, wane i Saerini, maka tha Alikasada ma tha Rufasi, e too ana tee fanua kakali mai, ka lae mai, ma kera tolobare nia kai ṉalia ’ai rarafolo nia. 22Ma kera talai nia uria kula na kera alaṉia ana Gologotha, ma toolaṉai lana si ṉata eri, Si kula gwa lelete. 23Ma kera falea waene na kera dola ana mara ifana: ma nia e ai si kuufia. 24Ma buriana na kera fota fafi nia, keka ukalia tooni nia ki faisi kera, ma kera ilala, fasi keka thaitoomana ni tei kai ṉalia. 25Ma ula si kadee maṉa naa neri, ma kera fota fafi nia ana ’ai rarafolo. 26Ma si do na kera alaṉi nia ania kera keda i gwauna ’ai eri una eri, KIṈA JU KI. 27Ma kera fota fafia ro wane kera laulau ki bi nia; ta wane ibali aba aola nia, ma ta wane ibali aba mauli nia. 28Ma kekeda la abu eri e mamana, ne sorea, Ma kera teemai nia bia toa kera abula asi abula la na kera lufia. 29Ma toa na kera tatha keka bae fafi nia, keki isua gwauda, ma keka una eri, Ua! wane oki ogea biu baita tha God, ma oki kasia ana ulu fa boṉi, 30Faamaruki oe fasi i talaamu, ma oki sifo mai faisia ’ai rarafolo ena. 31Una eri lau boo wane inoto ni foa ki keka aefara iana, keka sorea uri kera bia wane ni kekeda ki, Nia fafaamarukia toa eeta; sui ka dora ana faamaruki lana i talaana. 32Ṉa Christ, Kiṉa Isirela, kai sifo mai si maṉa eri faisia ’ai rarafolo, fasi mili rikia, mika fitoona. Ma ro wane na kera fota fafidaroa bi nia keko sore nia.
33Ma lalae ona si kadee maṉa e fula naa, maerodo ka to fafia fanua eri sui boo lalae ka fula ana sikwana si kadee maṉa. 34Ma ana sikwana si kadee maṉa tha Jesus ka ’ai ana ’ai la baita, ka una eri, Eloi, Eloi, lama sabakathani? ma toolaṉai lana si ṉata eri e una eri, God nau, God nau, uria ta no akwasi nau? 35Ma tei wane ana toa kera takwe kula eri, si maṉa na kera roṉoa, keka sorea, Rikia fasi, nia kei eilia tha Elaeja. 36Ma tee wane e fita, ka lula ṉa fulo ka fuṉu ana waene ne afae, ma ka alua i gwauna fa ue, ka falea ifana sa kai kuufia, ka una eri, To ana; kulu rikia fasi mada sa tha Elaeja kai lae mai uria sifolaṉai lana. 37Ma tha Jesus ka ’ai faamau, ma ka luka ana maṉona. 38Ma maku ne taru faisia maana kadee biu lalo ana biu baita tha God e seṉa, too mai i gwauna ka seṉa uri aaena. 39Ma si maṉa na senitiurione, ne takwe otofana, e rikia na nia ’ai una eri ma ka luka ana maṉona, nia ka sorea, Kaluwane tha God mamana boo nai nia. 40Ma tei kini kera to lau boo, keki lio da mai: ni Meri Makadaline ka ni isada, bia ni Meri thainana tha Jemesi faekwa ma tha Josesi, bia ni Salome; 41Ai eki, si maṉa na nia i u i Galili, kera lae buriana, ma keka ra ifana; bia tei ei oro lau na kera lae mai bi nia uri Jerusalema.
42Ma si maṉa ne thaulafia naa, sulaania ṉa Tagudoa neri, si maṉa na kai karaṉia naa fa boṉi mamaloa, 43Tha Josefa, wane i Arimathia, wane ana ofu la eri, wane inoto, na kai maasia lau boo tooa tha God, e lae; ka kotho seeraa isatha Paelate, ka gania seena tha Jesus. 44Ma tha Paelate e roṉoa na nia mae bonaa, ka kwele: ma nia ka ailia senitiurione eri, ka soetoona mada sa nia ta mae ka sukani tau naa. 45Ma buriana ne roṉoa ana seniturione eri, nia ka alamatania seena ifatha Josefa. 46Ma nia usia si maku kwakwaoa, me sifolaṉai nia, ka afua ana maku eri, ma ka alua i la kwaiṉeia na kera garua i la kale; ma nia abulisia tee gwa fau faisia maana kwaiṉeia eri. 47Ma ni Meri Makadaline bia ni Meri thainana tha Josesi kero rikia si kula na kera alu nia iei.
Currently Selected:
Mako 15: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
