Mako 13
13
1Ma si maṉa na nia kai kotho i maa faisia biu baita tha God, tee nonii wane ana toa nia ne toleda ka soree isana, Wane ni kwaifamanatai ae, rikia fasi, fau baita nei ki ma aini biu baita nei! 2Ma tha Jesus e luua, ka soree isana, O rikia aini biu baita nei? toto kesi ekwa ata fau si to fafona ta fau kunei, keki aga teefau ania.
3Ma si maṉa nia kai ono sulia gwa tolo i Olifesi otofana biu baita eri, tha Pita ma tha Jemesi ma tha Jone ma tha Adaru, talifili kera, keka soetoona, 4Oki faaroṉo kamilia, Do eki kai mamana iaṉita? ma nifenia bala si maṉa na do eki sui boo karaṉia keki ilia naa? 5Ma tha Jesus e luuda, ka bii soree isada, Muka fia ada ta wane kai talai garo ani kamulua. 6Uria na toa oro toto keki lae mai ana thataku, keki una eri, Nau ni nia; ma keki talai garo ana toa oro. 7Ma toto muka roṉoa omea ki ma faaroṉoa ana omea ki, musi mamau: uria na kera to’oa u boo sa do eki kai lae mai e ai si ei; ma susui lana si do e ai u bana. 8Uria na toa ata fanua toto keki tatae keki firu bia toa ata fanua, ma toa ta wane inoto keki firu bia toa ta wane inoto: ma anunu kai liu ata fanua ma ta fanua na mai; ma unii thaofa ki ma taa la ki kai tatha: si do eki thafali lana bana fiwela la.
9Ma muki to kinakina ana beta lamulua la: uria na toto keki fale kamulua ifana ofu la ki; ma keki kwae kamulua i la biu ni ofu la ki; ma toto keki talai kamulua inaofana wane inoto ki ma kiṉa ki inunufaku, uria faamamane la isadalua. 10Ma faaroṉoa lea eri keki ṉata sulia totonao e ai si ei boo isana kulee toa eki sui bana. 11Ma lalae keki talai kamulua, ma keki fale kamulua, musi laloma fufuli totonao uria si do na toto muki sorea; ma musi thathaia ṉata lamulua totonao: ta si ta na keki falea si kadee maṉa eri, do eki muka sorea: uria ni kamulua e ai na muki ṉata neri, tha Spirit Abu ana. 12Ma wane kai falea doorana uria mae la, ma wane ana wela kai falea kaluwane nia; ma ta baree wela keki lalakwatania maka kera ki bia thainada kera, ma keki adea na keki thauṉida. 13Ma toto toa ni sui bana keki riki kamulua ka taa inunufana thataku: ma wane na kai susuu ka fula ana susui lana kada nei, wane eri keki faamaruki nia.
14Lalae mulu rikia si do kera mamagu ania, si do ana faafunu la na tha Daniela ṉa porofeta e ṉata sulia na ba, kai takwe asi kula na kera lufia (wane na kai teemai kai thaitoomana fasi), asi maṉa eri toa na kera ni Judia keki thaka ada uria gwa tolo lo ki: 15Ma wane ni fafona biu kai to ana, si sifo mai uria kotho la i biu, ma ṉali lana ta si do faisia biu nia: 16Ma wane ni la ra kai to ana si oli lau mai uria ṉali lana tooni nia. 17Ma taa la kai thauṉia ai na kera iana ma ai keki faasusu afa boṉi eki! 18Ma muki foa fasi e ai musi thaka ana unii gwagwaria. 19Uria na afa boṉi eki unii fualaṉa toto kai fula, si do una eri e ai si fula u too ana thafali lana thauwaia na tha God e thauwai nia ka fula asi maṉa eri, ma sa ka fula lau e ai. 20Ma mada sa tha Lord e ai si lofoṉurusia fa boṉi eki, ta wane sa ka maruki e ai: sui uria toa na kera talisida, na nia e filida, nia ka lofoṉurusia boo fa boṉi eki. 21Ma asi maṉa eri mada sa ta wane kai soree isamulua, Lio fasi, Christ ba ni kunei; mado, Lio fasi, kula nei; musi faamamanea: 22Uria na Christ na kesi mamana ki ma porofeta na kesi mamana toto keki tatae, keki fatai nia bala si do ki ma do ni kwele la ania ki, fasi mada sa kera talaana, do keki talai garo ana toa na kera talisida mena. 23Sui muki to kinakina: rikia fasi, nau ku faaroṉo kamulua inao asi do eki sui bana.
24Sui afa boṉi eki, buriana unii fualaṉa eri, keki faarorodoa thato lo, ma madami ka ai si laa, 25Ma bubulu ki thalo mai kai asia, ma do sukwai ki nai thalo lo ki keki igiigia. 26Ma sui keki rikia Kaluwane imole kai lae mai ana datha lo ki ana sukwaia baita ma inotoa. 27Ma sui nia kai arasia mai angel nia ki, ma kai ofua mai toa nia ne talisida faisia fai sui fanua, asi kula ne tau asia mena i fanua nei iano, ma asi kula ne tau asia mena i thalo lo.
28Muki thaitoomana fasi maalutana tarifula thakwari: si maṉa na tharana e bibina naa, ma kai ṉoṉothaa, muka thaitoomana unii thato ni karaṉi naa; 29Una eri lau boo ni kamulua, lalae mulu rikia si do eki kai mamana, muki thaitoomana nia to karaṉi naa, isana maana olofolo ki. 30Mamana ku soree isamulua, Kulee toa nei toto kesi sui u, ma si do eki sui boo kai mamana. 31Thalo lo ma fanua nei iano toto kai sui: ma bae laku toto si sui. 32Ma fa boṉi eri ma kadee maṉa eri e ai ta wane si thaitoomana, angel ki i thalo mena ka ai, bia Kaluwane eri mena ka ai lau boo, talitoona boo ṉa Maka e thaitoomana. 33Muki to kinakina, muki tharai ma muki foa: uria ne ai musi thaitoomana si maṉa na do eki kai fula mai. 34E ’uria ta wane kai to ni lae la ata fanua eeta, ne akwasia biu nia, ma ka alua toa ni ra nia ki kera toa keki gwauwai, ma ka talisia si ra ki faisida sui, ma ka faaroṉoa wane ni ifini lana biu kai to kai tharai. 35Mania muka tharai: uria ne ai musi thaitoomana si maṉa na arai ana biu eri kai fula, kai fula i thaulafi, mado initoona rodo, mado asi maṉa na kukua kai ’ai, mado i uusuwadia; 36Ada kai fula fatonamulua, kai fulatoomulua maṉa na muki biṉa. 37Ma si do ku soree isamulua ku soree isana imole ni sui, Muki tharai.
Currently Selected:
Mako 13: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
