Mako 1
1
1Thafali lana ṉa faaroṉoa lea tha Jesus Christ, Kaluwane tha God.
2’Uria si do na kera keda ana porofeta ki,
Rikia fasi, kwai arasia wane nau ana ṉaliṉata kai tatha inaona maamu,
Na kai beta tala oe maakwali oe;
3Liṉana ṉata lana tee wane kei ’ei la fanua kwasi,
Muki beta tala tha Lord ka kwaimaawali,
Beta tala nia ki ka kokoto;
4Tha Jone e babataesi la fanua kwasi, ma ka ṉata sulia babataesi la ana manata akele la uria doanita la ana abula taa la ki. 5Ma toa na fanua i Judia sui boo kera lae isana, bia toa i Jerusalema; ma nia ka babataesida ka sui boo i la kafo i Jodana, keka faaroṉo ana abula taa la kera ki. 6Ma tha Jone e tooni ana ifuna kamela, ma tee uṉee do i litana, ma nia ka ania siko ki ma dudualiṉa. 7Ma nia ṉata, ka una eri, Tee wane ne sukwai ka tatha iaku toto kai lae mai iburiaku, si kwao ana butu nia ki mena e ai kwasi farana agwaoro la uria luke lana. 8Nau ku babataesi kamulua boo ana kafo; ma nia kai babataesi kamulua atha Spirit Abu.
9Ma lalae mai afa boṉi eki, tha Jesus e toto i Nasaretha, mai Galili, ka lae mai, ma tha Jone e babataesi nia i Jodana. 10Ma si maṉa eri u boo na nia kai tae mai faisia kafo, nia ka rikia thalo lo ki keka seṉa ka ifi, ma tha Spirit ’uria ta bola ka sifo mai fafi nia: 11Ma liṉana si ṉata la too mai thalo lo ki ka una eri, Kaluwane liliothaua nau ni oe, ne lea iaku uri oe.
12Ma si maṉa eri u boo tha Spirit e tari nia uri la fanua kwasi. 13Ma nia ka to i la fanua kwasi eri sulia fai fafulu fa boṉi, tha Satan ka bae aliṉana; ma nia ka to bia do maruki kwasi ana fai ae ki; ma angel ki keki ra ifana.
14Sui buriana na kera alua tha Jone i la lokafu, tha Jesus ka fula i Galili, ka ṉata sulia faaroṉoa lea ana tooa tha God, 15Ka una eri, Si maṉa ba ka mamana naa, ma tooa tha God e ni karaṉi naa: muki akeletania manatamulua, ma muki fitoona si faaroṉoa lea eri.
16Ma si maṉa na nia kai i amali i Galili, nia ka rikia tha Saimona bia doorana na tha Adaru keko ala ana furei la amali: uria na kero ro wane ana de la. 17Ma tha Jesus ka soree isada, Moki lae mai iburiaku, kwai tole kamaroa ana de lana imole. 18Ma si maṉa eri u boo keko akwasia furei kera ki, ma keko lae iburiana. 19Ma si maṉa nia lae e ai si tau, nia ka rikia tha Jemesi kaluwane tha Sebede, bia doorana na tha Jone, kero ni lau boo i la foorua, keko uthea ada furei kera ki. 20Ma si maṉa eri u boo nia ka ailida: ma kero akwasia maka keroa na tha Sebede i la foorua bia toa ni ra ki na kera usida, ma keko lae iburiana.
21Ma kera lae uri Kapaneama; ma si maṉa eri u boo ana fa boṉi mamaloa nia kotho i la biu ni ofu la, kai kwaifamanatai. 22Ma kera kwele ana kwaifamanatai la nia: sulia nia faamanatai kera mala wane inoto, me ai si ’uria wane ni kekeda ki. 23Ma tee wane spirit taa ni ani nia e ni la biu ni ofu la kera; ma ka ’ai. 24Ka una eri, To ana; ta si ta fetei miki kwaimani bi oe fafia, oe tha Jesus, wane i Nasaretha? o lae mai fasi oki labatai kamilia? Nau ku thaitoomamu, oe Wane Abu tha God. 25Ma tha Jesus ka sore nia, ka una eri, Bona amua, oki lae mai faisia. 26Ma spirit taa eri ka logetai nia wane eri, ma kai ’ai ana ’ai la baita, sui ka lae faisi nia. 27Ma kera sui keka maata, adedea keka soetooda kwailiu i talaadalua, keka una eri, Ma ṉa ta nania? kwaifamanatai la falu ta nania? uria nia kai ṉata mala wane inoto isana spirit taa ki mena, ma keki ade sulia ṉata lana. 28Ma si maṉa eri u boo taloa nia ka talofia kula eki sui boo i la fanua ni sui bana kakalia i Galili.
29Ma si maṉa eri u boo, na kera kotho mai faisia biu ni ofu la eri, keka kotho i maafera tha Saimona ma tha Adaru, bia tha Jemesi ma tha Jone. 30Ma kini na waifuṉa tha Saimona e teo ka matai asi fule; ma kera mala faaroṉo nia ania si maṉa eri u boo: 31Ma nia e lae mai ma ka rau ana abana, ka tataea; ma si maṉa eri u boo fule eri ka ai faisi nia, ma kini eri ka bii ra ifada.
32Ma i thaulafi, maṉa thato e su, kera talaia mai toa eki sui boo na kera matai isana, bia toa na spirit taa ki ni anida. 33Ma toa na toaa susu eri sui boo kera figu i maana olofolo. 34Ma nia ka faamarukia toa oro na kera matai ana mataia oro ki sui bana, bia ka arasia spirit taa ki faisia wane oro ki; ma nia e ai si alamatania spirit taa eki kesi bae, uria kera thaitoomana ni nia.
35Ma i thathala ana dani, nia tatae si maṉa na kai tau u fasi kai bii dani, ma nia ka lae uri la fanua kwasi, kai foa i kula eri. 36Ma tha Saimona bia toa na kilu to bi nia kera lae buriana; 37Ma lalae kera fulatoona, keka soree isana, Toa eki sui bana keki rofe oe. 38Ma nia ka soree isada, Kulu lae si lau uria toaa na ni ki u, fasi kwai ṉata lau boo i kula eki; uria na si do eri ku lae mai uria. 39Ma nia ka ṉata i la biu ni ofu la kera ki ta si kula si ei boo i Galili, ma ka arasia spirit taa ki.
40Ma tee wane uru e thauṉia e lae mai isana, ka ṉata kwaitakoi isana, ma ka boururu isana, ka una eri isana, Mado so thathamia, o thaitoomana faafalu laku. 41Ma tha Jesus e tatakomi nia, ka falea kau abana, ka sua nia, ma ka soree isana, Ku thathamia boo; oe oki falu. 42Ma si maṉa na nia ṉata u boo, si maṉa eri boo uru eri ka ai faisi nia, ma nia ka falu. 43Ma nia ka ṉata fifi isana, sui si maṉa eri u boo ka arasi nia, 44Ma nia soree isana, Ada oko sorea ta si isata wane: lae kamua, oko fatai oe isana wane ni foa, ma oki falea si do ba ki na tha Mosesi e sorea maana faafalu lamu, ana faamamane la isada. 45Ma nia lae kau, ka bii faaroṉo faladoa ania, ma ka ’ai taloṉania do eri la fanue, adedea tha Jesus ka dora ania lae fatai la i la toaa susu, ka to bana i thara mai la fanua kwasi ki: ma keka lae mai isana faisia fanua eki sui bana.
Currently Selected:
Mako 1: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
