Si do Aposela ki kera ilidaki 27
27
1Ma si maṉa manatada na miki lae i la faka uri Itali, keka falea tha Polo bia tai wane na kera kanidaki lau boo isana tee senitiurione, thatana tha Juliasi, ana omea wane eri ne inoto ka atha ani kera sui. 2Ma mili tae i lala tee faka i Adaramitiama, na karaṉia kai lae uria toaa ni thara ki ana Asia, mika lae i la matakwa, ma tha Arisitakasi, wane i Masedonia ana toaa i Thesalonika, ka lae bi kamilia. 3Ma afa boṉi iburiana mili olo i Saedona: ma tha Juliasi e ade lea uria tha Polo, ka alamatania kai lae isana toa na kera ado bi nia fasi kai mamalo. 4Ma ita asi kula eri mili lae i la matakwa, mika tatha karaṉia Saeporasi, fanua eri kai suusia thauthau faisi kamilia, uria thauthau kai too mai inaofamilia. 5Ma buriana na mili faifolo i la amali ne otofana Silisia ma Pamofilia, mika fula i Maera, fanua i Lisia. 6Ma senitiurione eri e fulatoona tee faka i Alikisadaria i kula eri na karaṉia kai lae uri Itali, ma nia ṉali kamilia i la faka eri. 7Ma buriana na mili thafee lae sulia fa boṉi oro ki, ma mili aṉasi faamau mili fula otofana Kinidasi, uria na thauthau e suusi kamilia misi tatha i kula eri, mika lae karaṉia Kirita, otofana Salamone, fanua eri kai suusia thauthau faisi kamilia; 8Ma mika aṉasi faamau, mika usuli thara, mika fulatoona tee si kula na kera alaṉia ana Fokali Lea ki; na toaa susu i Lasea ni karaṉia.
9Ma uria na mili lae ka tau na mai, ma mika to karaṉia maea kada na mika lae i la faka si maṉa eri, uria na lalae si maṉa ba na toa kera abu ana faṉa la ka sui naa, tha Polo e ṉata fifi isada, 10Ka soree isada, Thaa wane ae, nau ku thaitoomana i manataku lae la unei la amali kai ṉalia mai taa la ma rofe la baita; talitoona si do nai la faka ma faka nai na kai aana e ai, maṉokulua lau boo. 11Una ena mena, senitiurione eri e fale nia ana manatatoona lana si do wane ne inoto ana ra la i la faka eri ma wane ne ana ania keko sorea, e ai si manata baita asi ṉata tha Polo. 12Ma uria na fokali eri e ai si baita lea fasi keki to iei sulia unii gwagwaria, manatana oroṉana toa eki keki akwasia si kula eri, keki lae i la matakwa, sa mado e ai keki fulatoona Fenisi, keki to mai iei sulia unii gwagwaria; tee fokali i Kirita neri, na kai lio uria si kula i maalutana tae lana thato ma notoa ma uria si kula i maalutana tae lana thato ma mutana lau boo. 13Ma si maṉa na thauthau ne ai si sukwai e maṉo mai i mutana, manatada sa kera fulatoona naa si do kera thathamia, keka kwaigwalu ma keka usuli thara i Kirita. 14Ma sui e ai si tau ma kuburu baita, na kera alaṉia ana Iurokilidona, ka suusida faisia fanua eri: 15Ma si maṉa na thauthau eri ka toea ṉa faka, ne ai si sukwai ana suusi lana, miki lae sulia lae lana thauthau eri, me too iburiamilia. 16Ma si maṉa mika tatha fofoa karaṉia tee auua faekwa, thatana Kiloda, ne suusia thauthau faisi kamilia, mika aṉasi faamau, mika alu ni lea la ana foorua: 17Ma buriana na kera lafua mai ia e sui, keka ra asi do na kai adomida ki, keka kani rarafolo i matoṉana faka ana ara; ma, uria na kera mau ada mado e ai keka te asi kula ne tete, keka ligisia eba, ma thauthau ka too bonaa iburiada. 18Ma si maṉa faka kamilia e gelugelu faamau ana kuburu eri, afa boṉi iburiana keka naṉa ana do nai la faka eki; 19Ma ana ula fa boṉi mika rau ana tai si do ana si do lea nai la faka eki, mika naṉa ania ana abamilia i talaamilia. 20Ma si maṉa na thato ma bubulu ki e ai si laa kakali kamilia sulia fa boṉi oro ki, ma kuburu e baita fafi kamilia, mika sorea ne ai misi maruki bonaa. 21Ma buriana ne tau naa na kesi faṉa, tha Polo e takwe ia i maalutada, ma ka sorea, Thaa wane ae, e lea na sa mulu roṉo nau na ba, ma musi lae faisia Kirita, musi fulatoona taa la nai ma rofe la nai. 22Ma si maṉa eri ku soree isamulua, kai lea bana iamulua: uria ne ai ta imole iamulua si mae, talitoona bana faka na kai aana. 23Sulaania tee angel ana ṉa God na do nia ni nau, ma kwa ra lau boo ifana, e takwe isaku afa rodo eri boo, 24Ma ka una eri, Osi mau, Polo; oki takwe e ai si ei boo inaofatha Sisa: ma rikia fasi, tha God e alamatania toa eki sui boo ifamu na kera lae i la faka bi oe. 25Mania thaa wane ae, kai lea bana iamulua: uria nau ku fitoona tha God, na si do eki kai fula mai ’uria si do na kera soree isaku. 26Ma sui amali kai naṉa ani kulu ifafona tee auua.
27Ma sui maṉa faina fa rodo e ta isana tafulu fa rodo, si kada na kuburu ka ṉali olili ani kamilia i la amali i Adiria, fuliṉana initoona rodo manatana wane ni ra la i la faka ki e soso sa mika ni karaṉia ta fanua; 28Ma kera olotoona amali, keka fulatoona ro tafulu abala: ma buriana ta kasi maṉa faekwa, ruana keka olotoona lau, keka fulatoona tee tafulu abala lima abala. 29Ma uria na kera mau ada mado e ai amali kai naṉa ani kamilia i la mai, keka asigwalu ana fai gwalu ki i buira faka, ma keka thathamia faamau si maṉa fanua kai dani 30Ma si maṉa na wane ni ra la ana ṉa faka ki keki thathamii thaka faisia faka eri, ma kera sifolaṉai nia foorua kai to naa i la amali, ’uria sa kera asigwalu ana tai gwalu i maana faka, 31Tha Polo ka soree isana senitiurione eri ma isana wane ana firua ki, Mada sa wane nai ki kesi to i la faka, sa muka maruki e ai. 32Sui wane ana firua ki kera irimusia arana foorua eri, keka ekwatania ka lae faisia faka. 33Ma thathala ana dani, tha Polo e ṉata kwaitakoi, ka soree isada sui boo sa keki ania ta si faṉa, ka una eri, Faina fa boṉi e ta isana tafulu fa boṉi na mulu maakwalia si do na kai fula mai, mulu toto faisia faṉa, musi ania ta si do. 34Mania ku ṉata kwaitakoi, ku soree isamulua muki ania ta si faṉa: uria si do na kai faamaruki kamulua neri: sulaania ta tee kwakwee ifu mena sa ka aana faisia gwauna ta wane iamulua e ai. 35Ma buriana ne ṉata una eri, nia ṉalia ta si berede, ma ka sore lea atha God inaofada sui: ma nia nia, ka thafalii faṉa. 36Sui e lea iada sui boo, ma ni kera keka faṉa lau boo. 37Ma ni kamilia sui na mili to i la faka, amilia ro taleṉee imole ma fiu akwala ma ono imole. 38Ma buriana na kera abusu e sui, keka adea faka kai thathala, keka naṉa ana uiti eri la amali. 39Ma toto fanua e thato naa, kesi thaitoomana fanua eri: ma keka rikia tee loua si one ni iei, ma keka bae ofu sa mado e ai keki talaana faaruufai lana faka iei. 40Ma keka u ana ara ne faaṉadoa gwalu eki, keka ekwa ania i la amali, si maṉa na keka lukea si do na kera kania ana do ni atho la; ma keka lolo eba ana eba nai nao ana thauthau, keka lae uria si one eri i thara. 41Ma sui kera fula ana kula na ro afe ki ka kwaitodai iei, faka eri ka katu; ma maana faka ka katu, ka to ṉado, ma buira faka eri ka dekwe uria amali ne kwae sukwai ania. 42Ma manatana wane ana firua ki sa keki thauṉia wane na kera kanidaki, ada tai wane keki araṉa faisida, keka thaka. 43Ma senitiurione eri ka lufida faisia si do kera thathamii ilia, uria ne thathamia kai faamarukia tha Polo; ma nia sorea toa na kera thaitoomana araṉa la keki fusi la amali, keki fula totonao i thara: 44Ma toa na kesi thaitoomana, tai toa iada keki ono i fafona si rebee ’ei, ma tai toa lau i fafona si do ana faka ki. Ma kera ade una eri, kera sui keka maruki, keka fula i thara.
Currently Selected:
Si do Aposela ki kera ilidaki 27: MLU1949
Highlight
Share
Compare
Copy
Want to have your highlights saved across all your devices? Sign up or sign in
British and Foreign Bible Society 1949, 1951
