Si do Aposela ki kera ilidaki 14

1Ma lalae mai i Ikoniama, kero kotho ofu i la biu ni ofu la Ju ki, keko ṉata, adedea malului wane ana Ju ki bia toa i Girisi ki lau boo keka fitoo. 2Ma sui Ju eki na kesi fitoo keka faasurake ana Jenetaele ki, manatada ka esia baree wai doorana eki. 3Mania keko to ka tau i kula eri, keko ṉata seeraa ana ṉa Lord, ne faamamanea si do ne thaitoomana sulia si baea ana lea la nia, ka falea bala si do ki ma do ni kwele la ania ki ne ilia ana abadaroa. 4Ma toa eki sui bana i la toaa susu eri kera to ana ro si lio; ta bali keka bira fafia Ju ki, ma ta bali keka bira fafia ro aposela eki. 5Ma si maṉa na Jenetaele ki ma Ju ki lau boo bia wane gwauwai kera ki kera alasi keroa, fasi keki fare taa iadaroa, ma keki ufaudaroa, 6Keko thaitoomana si do eri, ma keko thaka uri i Lisitara ma i Debe, ro toaa susu ana Laekaonia, ma uria fanua na ni kakalia ro toaa eki: 7Ma keko ṉata sulia si faaroṉoa lea ana fanua eri.

8Ma i Lisitara tee nonii wane aaene katu e ono mai, ne lidu ita u bomai asi maṉa thainana e thare nia, ne ai si lae. 9Wane eri e roṉoa ṉata lana tha Polo: ne lio tete uri nia, ka rikia na fitooa ni isana fasi keka faamaruki nia, 10Sui ka bae baita, ka una eri, Oki takwe ia ana aaemu. Ma nia thaka alaa, ka lae. 11Ma malului wane eki kera rikia si do na tha Polo e ilia neri, kere ’ai faamau, keka sore mala Laekaonia, Tei god kera sifo mai isakulua ’uria imole ki. 12Ma kera alaṉia tha Banabasi atha Jupita; ma tha Polo atha Makiuriasi, sulaania nia wane ne inoto ana ṉata la. 13Ma wane ni foa tha Jupita na biu baita nia ni otofana toaa susu eri, e talaia mai buloka ki me ṉalia tai uthii takee ’ai isana maethaka, manatana sa kai thauṉia do ni foa la ki, kai foa bia malului wane eki. 14Ma si maṉa na ro aposela eki, tha Banabasi ma tha Polo, kero roṉoa, keko seṉa tooni keroa ki, keko fita mai i maalutana malului wane eki, keko ’ai faamau, 15Keko una eri, Thaa wane ae, uria ta na mulu ade una eri? Kamarea imole ki ’uri kamulua lau boo, na mere ṉalia mai si faaroṉoa lea ifamulua, fasi muki akele faisia si do eki ne ai si kwaiadomi uria ṉa God maruki, ne thauwai nia thalo lo ma fanua nei iano ma ṉa amali, ma si do ki sui bana ana do eki: 16Ne alamatania asi maṉa nai nao ki kulee toa ki sui bana keka abula sulia tala kera ki i talaada. 17Una ena mena, e ai si ṉalia faisi kia si do na kai fatai nia mamana lana, uria ne ade lea, e falea mai i thalo si dani ifaka ma unii abusua ki, ka faafuṉua ruruuka asi faṉa ma ana seethathala la. 18Ma asi ṉata la eki mena kero aṉasi faamau fasi keko suusia malului wane eki kesi thauṉia do ni foa la ki ana thatadaroa.

19Ma sui Ju ana Adioko ma Ikoniama ki kera fula mai: kere gaea toa oro eki, keka ufauna tha Polo, keka tara i thara faisia toaa susu eri, manatada sa nia mae naa. 20Ma sui si maṉa na toa tha Jesus e toleda kera takwe kakali nia, nia tatae, ka kotho i la toaa susu: ma afa boṉi iburiana e lae kau bia tha Banabasi uri Debe. 21Ma buriana na kero ṉata sulia si faaroṉoa lea isana toaa susu eri, ma keko tolea toa oro iburiatha Jesus, keko oli lau uri Lisitara, ma Ikoniama, ma Adioko. 22Keko faaṉadoa ruruuna toa na tha Jesus e toleda, keko soree isada keki to ṉado asi do eki na kulu fitoona, keko faaroṉoda na kuki to e ai si ei boo ana taa la oro ki fasi kuki kotho ana tooa tha God. 23Ma buriana na kero talisia ulunao ki ifada ana figua eki sui boo, ma kero foa bia to la faisia faṉa la, keko takofale kera ana ṉa Lord, na kera fitoona. 24Ma kero tatha i Pisidia, keko fula ana Pamafilia. 25Ma lalae kero ṉata sulia si baea eri i Paga e sui, keko sifo uri Atalia; 26Ma keko akwasia kula eri, keko lae i la faka uri Adioko, si kula ba na kera takofale keroa ana lea la tha God iei uria si ra eri na kero ilia sui naa. 27Ma lalae kero fula, keko bii ailia mai figua eri, keko uunu sulia si do eki sui bana na tha God e ilia ani keroa, me ifinia maethaka ana fitooa ifana Jenetaele ki. 28Ma keko to iei ka suka tau bia toa eki na tha Jesus e toleda.

Currently Selected:

Si do Aposela ki kera ilidaki 14: MLU1949

Highlight

Copy