Romans 8
8
Sema Biyag Na Toon Naintorayan Na Ispirito Santo
1Isonga, nagwara wiy chosa iren ma ekisa-kid Cristo Jesus. 2Tep kagol na ekisa-kian kod Cristo Jesus, sema Ispirito Santon naengi-kan na badon biyag, naintorayan toak ma tan iyaydibchiak med panakabalin na basol tan pathiy. 3Nat mebedin a maydibchi kiya babaen na dinteg tep too kiya bengat tan nat posien tayon onoran a emiin i bili-bilin to. Nem si Afo Chiyos, imag toy nat mebedin a ma-mag babaen na dinteg. Into-no thoy Anak ton iyanbalin na toon inges to kiya ngo say si-kathoy mechosa para cha basol tayo. Babaen na ingkathiy Cristo, iyomas Afo Chiyos i panakabalin na basol a mantoray cha tothoo. 4Imag Afo Chiyos iwan say mebedin a koston tongpalen tayoy mapteng a bili-bilin na dinteg. Tep nat emangkaonori wiy ngaaw a ogadi thayo, no diket sema Ispirito Santo. 5Tep sema iren naengonod na ngaaw a ogadi ra, nainpo-tok chiy piyan na ngaaw a ogadi ra. Nem sema iren naengonod na Ispirito Santo, nainpo-tok chiy piyan na Ispirito Santo. 6Sema panpa-noan na pengipo-tok na ngaaw a ogadi, pathiy. Nem sema panpa-noan na pengipo-tok na Ispirito Santo, talna tan biyag a nagwariy pengingkaan to. 7Tep sema naengipo-tok na piyan na ngaaw a ogadi tho, en-owes tos Afo Chiyos. Nat naiyonoran toy dinteg Afo Chiyos, tan sema podno, eg to napiyosin onoran. 8Isonga, sema naengonod na ngaaw a ogadi tho, eg to posien a paimdeng si Afo Chiyos.
9Nem si-kayo, kagol a gwara wed si-kayoy Ispiriton Afo Chiyos, sema Ispirito thoy jowan onori, nat sema ngaaw a ogadi yo. #8:9 Sema Ispiriton Afo Chiyos i sa-kin ngaran na Ispirito Santo. No gwariy toon nagwared si-kathoy Ispiriton Cristo, nat iyayka-chom cha Cristo. #8:9 Sema Ispiriton Cristo i sa-kin ngaran na Ispirito Santo. 10Nem no gwared si-kayos Cristo, angken metiy i angel jo tep iyanbasol kayo, sibibiyag i ispirito yo tep inpachonong to kayon Afo Chiyos. 11Tep no agpayson gwared si-kayoy Ispiriton Afo Chiyos, si Afo Chiyos a engipawil Cristo Jesus, ipawil to ngoy angel jon naetiy babaen na Ispirito thon gwared si-kayo.
12Isonga, aahi, mesepol a ma-mag i piyan Afo Chiyos, nat sema piyan na ngaaw a ogadi thayo. 13Tep nem no onoran joy ngaaw a ogadi yo, metiy kayo et mechosa kayo na ingked ingka. Nem no isalcheng joy piyan na ngaaw a ogadi yo babaen na tolong na Ispirito, manbiyag kayo et gwariy biyag jon nagwariy pengingkaan to. 14Tep emiin a itorong na Ispiriton Afo Chiyos, anak iren Afo Chiyos. 15Tep sema Ispiriton in-i-kan Afo Chiyos cha si-kayo, nat inpanbalin to kayo na bagaen et say entahot kayo mowan a mechosa. No diket inpanbalin to kayo na anak Afo Chiyos say mebedin men ngaranan jos Afo Chiyos na “Abba! Awa!” #8:15 Sema esel a abba, edafod esel a Aramaic, tan awa i banag to. 16Et sema ngon Ispirito Santo i naengipaneknek cha ispirito thayon anak to kiyen Afo Chiyos. 17Et no anak to kiyen Afo Chiyos, tegwiren tayo ngoy indasin Afo Chiyos para cha aanak to say mekitawid kiyed Cristo na emiin a inkarin Afo Chiyos cha Cristo. Nem mesepol a da-kaman tayoy digat singen mekidigat kiyed Cristo say mayka-chom kiyed kinakayang to.
Sema Panbalinan Na Emiin A Mapteng No Sa-ki Din Akow
18Nabinilang koy digat a nadiya-kaman tayo niman a nagwariy bel-at to no iinges kod kinamapteng na ibiybiy Afo Chiyos cha si-kathayo no sa-ki din akow. 19Emiin a piyarsowen Afo Chiyos, piyan chen pasiyen onmothok aliy akow a pengibiybiy Afo Chiyos na podnon kasasaad na aanak to. 20Tep emiin a piyarsowen Afo Chiyos, siya-dathan toy kasasaad cha et say sema sigod a osal cha, nat mebedin a metongpal. Sema iren piyarsowen Afo Chiyos, nat si-kariy engikakara niyay, no diket si Afo Chiyos. Nem gwara pay i chiyan namnamaa. 21Tep no sa-ki din akow, sema iren piyarsowen Afo Chiyos, idibchi tho ired toray na boyok tan pathiy. Et mayka-chom ired ma gwaya-gwayen da-kaman iren ma anak Afo Chiyos no onmothok aliy akow a pengikayang Afo Chiyos na kasasaad cha. 22Amta thayo i manipod nontan da ingkathod niman, sema emiin a piyarsowen Afo Chiyos, singen man-iingag a inges toy biin mandigat a on-anak. 23Nem nat sema piyarsowa bengat Afo Chiyos a man-iingag, nem si-kathayo ngon engawat na Ispirito Santon pilmiron rigalon Afo Chiyos. Singen man-iingag kiya ngod nemnem tayo, tan emangkesked i timpon koston ibiybiy Afo Chiyos i kasasaad tayon aanak to. Tan panbalin to ngoy angel tayo na badon eg meti-metiy. 24Tep sejay i emangkenamnama manipod nonta iyaysalakan kiya. Niman no etongpal maliy namnama, nat menamnama wa. Tep nat namnamaen na tooy etongpal mala. 25Nem no eg pay metongpal i emangkenamnama, anosan tayo ngarod a seskeren.
26Nat sema namnama thayo bengat i ontolong cha si-kathayo, nem sema Ispirito Santo ngoy ontolong cha si-kathayo maypangkep na kinakapsot tayo. Tep no mankararag kiya, nat amta thayon pesing komen mankararag, nem sema Ispirito mismo, ikararagan to kiya ngod enbel-at a deknen nat mebedin a may-a-sel. 27Et si Afo Chiyos a mahaamta na gwared nemnem na too, amta tho ngoy gwared nemnem na Ispirito tep angken nengoy ikararag na Ispirito para cha tothoon Afo Chiyos, ontonos cha piyan Afo Chiyos.
28Sema iren mahasmek cha Afo Chiyos a tiya-gway to kagol na plano tho, amta thayo i emiin a naepasamak cha si-kara, nainpanbalin Afo Chiyos met laeng na panmaptengan cha. 29Tep sema iren naemati, amta iren Afo Chiyos manipod nonta kapkapoanan, tan pinispis to iren manbalin a inges toy Anak ton si Cristo say sema Anak to diy kafangodowanan cha chakel a aahi to. 30Et sema iren pinispis Afo Chiyos, tiya-gway to ngo ira, et sema iren tiya-gway to, inbilang to ngo iren maronong. Et sema iren inbilang ton maronong, inkayang to ngoy kasasaad cha say mayka-chom ired kinakayang Cristo.
Sema Semek Afo Chiyos Cha Si-kathayo Kagol Jesu Cristo
31Nengo ngarod i mekegwan maypangkep iren jay? No gwared si-kathayos Afo Chiyos, nagwaren polos i mahaagwak cha si-kathayo. 32Tep angken sema Anak ton mismo, nat entafin Afo Chiyos a intangdal, no diket in-awat ton mechosa para cha si-kathayon emiin. No in-i-kan Afo Chiyos i Anak to para cha si-kathayo, eg to ngo aya i-kan cha si-kathayoy emiin a mesepol tayo? 33Nagwariy mebedin a mengicharom cha si-kathayon pinispis Afo Chiyos. Tep si Afo Chiyos i naengibilang cha si-kathayon maronong. 34Nagwariy mebedin a mengibasol cha si-kathayo. Tep etiy si Cristo Jesus a iyanpawil et gwara wed gwanan Afo Chiyos, tan si-kathoy naengitakchel cha si-kathayo. #8:34 Sema gwanan na mantoray, si-kathoy kad-an na banay a chayaw. Sema toon gwared man, igwan ngoy karebengan ton mantoray. 35Isonga, nagwaren polos i mahatiped cha si-kathayo na semek Cristo. Nat sema digat, chanag, pemedigat, ofa, kolang na baro, sema iren emanekot, ono angken pathiy. 36Sema digat a inges to jay, iyaysolat cha esel Afo Chiyos i:
“Kagol cha si-kam, Afo Chiyos,
nasingo wi na olay i pathiy.
Iyaybilang kawin singen
kalniron chanchanin
mayparti.” #8:36 Psalm 44:22
37Nem angken nadiya-kaman tayon emiin i kilasin digat, sigoradon mengegwak kiya cha babaen Criston mahasmek cha si-kathayo. 38Tep sigoradoak a chilin nagwaren polos i mahatiped cha si-kathayo na semek to. Nat pathiy, biyag, sema iren anghilis, sema iren mantoray, sema iren banag a gwara niman, sema iren banag a onkowan ali, sema iren banag a gwariy toray to, 39sema iren banag a gwared iyaykayang, sema iren banag a gwared iyaysa-kod, ono kompormi ngo iren eparsowa. Nagwaren polos i mahatiped cha si-kathayo na semek Afo Chiyos a inbiybiy to babaen Cristo Jesus a Afo thayo.
Currently Selected:
Romans 8: KAR
Highlight
Copy
Compare
Share
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.