Romans 4
4
Inbilang Afo Chiyos Si Abraham A Maronong
1Nemnemen tayos Abraham a afo thayo len Hodjos. 2No inbilang Afo Chiyos si Abraham a maronong kagol na mapteng a imag to, gwara komiy iki-tek Abraham. Nem say podno, nat mebedin a iki-tek Abraham i imag to tep nat seman i kagol a engibilangan Afo Chiyos cha si-kathon maronong. 3Tep kigwan tod ma esel Afo Chiyos i “Piyatin Abraham i kigwan Afo Chiyos, isonga inbilang Afo Chiyos a maronong.” #4:3 Genesis 15:6
4No man-obday too et medagboan, sema egwathen to, nat rigalo, no diket dagbo na bediy to. 5Nem sema toon nat naemiyal na naimag to, no diket napiniyal tos Afo Chiyos a naemakawan na mabesol, sema pamati tho i kagol a pengibilangan Afo Chiyos cha si-kathon maronong. 6Sejay ngoy piyan David a a-seden nonta kigwan to i imdeng na toon nainbilang Afo Chiyos a maronong, nat kagol na naimag niwa too, no diket pamati tho. Tep kigwan David i:
7“Magesat i toon
piyakawanan Afo Chiyos
i basol to,
tan diningding Afo Chiyos
i ngaaw a imag to.
8Magesat i toon
inbilang Afo Chiyos
a nagwariy basol to.” #4:7-8 Psalm 32:1-2
9Sejay a bindisjon, para ired ma Hodjos a ekogit bengat aya? Enchi, angken sema iren Gentiles a nat ekogit. Amta thayo i inbilang Afo Chiyos si Abraham a maronong tep piyati thoy kigwan Afo Chiyos. 10Nengoy timpon epasamahan nithan? Nonta iyakcheng malen ekogit? Enchi, no diket nonta eg pay laeng ekogit. 11Idi engkay, ekogit a sinjal say maamtaan i inbilang Afo Chiyos a maronong kagol na pamati tho angken nonta eg pay laeng ekogit. Isonga, singen si Abraham i afo la na emiin a naematin ibilang Afo Chiyos a maronong angken eg ira ekogit. 12Si Abraham i afo ngo la iren ma ekogit, nem nat chafot a ekogit ira, no diket sema pay a pamati red Afo Chiyos a inges toy pamatin Abraham nonta eg pay laeng ekogit.
Sema Pamatin Abraham Tan Kaasin Afo Chiyos
13Inkarin Afo Chiyos cha Abraham tan cha poli-poli tho i si-kariy menegwid na dobong. Nem nat inkarin Afo Chiyos iwan tep iyonoran Abraham i dinteg. Inkari tho tep piyatin Abraham i kigwan to, et inbilang Afo Chiyos a maronong. 14No sema iren mengonod na dinteg bengat i may-i-kanan na inkarin Afo Chiyos, nagwariy silbi ngarod na pamati. Nagwara ngarod ngoy banag tod inkarin Afo Chiyos tep nagwariy mahaonod a kosto na dinteg. 15Tep sema dinteg, nainbiybiy toy bonget Afo Chiyos. Tep no gwariy dinteg, amta thayo wa i manbesol kiya wa no eg tayo onoran.
16Isonga, sema inkarin Afo Chiyos, may-i-kan ired ma gwariy pamati tho say mesi-neng i edafod kaasin Afo Chiyos. Tep no sema kaasin Afo Chiyos i naedafoan to, sigoradon may-i-kan cha si-kathayon emiin a iyaybilang a poli-polin Abraham--nat sema iren Hodjos bengat a mahaamta na dinteg, no diket emiin a gwariy pamati thon inges toy pamatin Abraham. Tep si Abraham, singen afo thayo len emiin. 17Tep iyaysolat chiwa esel Afo Chiyos a kigwan Afo Chiyos cha Abraham i “Panbalin tahen afo na chakel a tood chakel a ili.” #4:17 Genesis 17:5 Si Abraham i afo thayo len emiin cha nemnem Afo Chiyos. Tan sejay a Afo Chiyos a piyatin Abraham, nainpanpawil toy etiy tan napiyarsowa thoy nat aamag pay na esel to. 18Piyatin Abraham si Afo Chiyos. Angken singen nagwariy namnama, gwara pay i namnamen Abraham tep sinigorado tho i metongpal i inkarin Afo Chiyos cha si-katho. Isonga, iyanbalin si Abraham na afo na chakel a tood chakel a ili. Tep kigwan Afo Chiyos cha si-katho i “Onchake-chakel aliy polim a inges toy karakel na pasingsing.” #4:18 Genesis 15:5 19Idi kigwan Afo Chiyos iwan, nat mebedin men manpotot si Abraham tep sandasos emoy tawen to tan ebasig si Sarah. Nem angken seman, nat kimapsot i pamatin Abraham. 20Nat iyanchegwa-chegwes Abraham i tongpalen Afo Chiyos i inkari tho, no diket kimedkedsang pay i pamati tho tan iyanchaya-chayaw cha Afo Chiyos. 21Tep sinigorado thon chilin kayen Afo Chiyos a tongpalen i inkari tho. 22Sejay a pamatin Abraham i kagol a engibilangan Afo Chiyos a maronong. 23Nem sejay iren esel a kigwan to i “inbilang Afo Chiyos a maronong,” nat iyaysolat para cha Abraham bengat, 24no diket para cha si-kathayo ngo. Tep ibilang to kiya ngon Afo Chiyos a maronong no naemati kiyed Afo Chiyos a engipawil Jesus a Afo thayo. 25In-awat Afo Chiyos si Jesus a metiy kagol na basol tayo, et inpanpawil to say mebedin a ibilang to kiyen maronong.
Currently Selected:
Romans 4: KAR
Highlight
Copy
Compare
Share
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.