Romans 16
16
Sema Pankomosta Tan Kaonoran A Bili-bilin
1Gwariy sa-kin biin piyan kon ipaamted si-kayon ahi thayod Cristo. Si Phoebe i ngaran to, tan natimolong ired ma naematin gwared Cenchreae. 2No onmothok ded tan, mapteng komay pengegwat jo tep naemati ngod Afo. Tep sejay i koston a-magen na toon Afo Chiyos. Tolongi yo ngo no gwariy mesepol to tep chakel i tiyolongan to, pati si-kak.
3Komostai yos Priscilla tan si Aquila a echom ko iren naiyan-obda para cha Cristo Jesus. 4Inposta riy biyag cha para cha si-kak. Banay i pansalamat kod si-kara. Tan nat si-kak bengat, nem emiin a naematin Gentiles, iyansalamat ira ngod si-kara. 5Komostai yo ngoy naematin naesa-sa-nop cha baliy cha. Komostai yos Epaenetus a epateg a kajem kon pilmiron ematid Cristod probinsiya na Asia. 6Komostai yos Maria a masdon man-obda para cha panmaptengan jo. 7Komostai yos Andronicus tan si Junias a echom kon Hodjos. Echom ko iren iyaykalebos nontan da. Apostolis iren maremag, tan edagwas iren ematid Cristo iy say si-kak. 8Komostai yos Ampliatus a epateg a kajem ko kagol na pamati thod Afo. 9Komostai yos Urbanus a echom tayon naiyan-obda ngo para cha Cristo tan sema epateg a kajem kon si Stachys. 10Komostai yos Apelles a aapolbaran tep mahedsang i pamati thod Cristo. Komostai yoy pamiljen Aristobulus, pati sema iren naekiiyan cha baliy to. 11Komostai yos Herodion a echom kon Hodjo. Komostai yo ira ma naematid Afo cha baliy Narcissus. 12Komostai yos Tryphaena tan si Tryphosa a bibii iren naiyan-obda ngo para cha Afo. Komostai yos Persis a epateg a kajem kon bii. Masdon man-obda para cha chayaw na Afo. 13Komostai yos Rufus a maremag i obda tho para cha Afo, pati si ineton singen inak met laeng. 14Komostai yo ches Asyncritus, Phlegon, Hermes, Patrobas, Hermas, tan sema echom chen naematid Cristo. 15Komostai yo ches Philologus, Julia, Nereus tan ahi thon bii, tan si Olympas, tan emiin a echom chen toon Afo Chiyos. 16Pankikinomosta kayon mengibiybiy na semek jod sa-ki tan sa-ki. Emiin a naematid Cristo, chiyan komostai kayo ngo.
17Aahi, pangaasi yo, tanchaani yoy tothoon mengipasi-jan cha si-kayo tan meningod si-kayo maypangkep na pamati yo. Tep sema naintoro cha, nakiyontra thoy podnon toro-toron iyachal jo. Ibiyang jo ira. 18Tep sema iren toon inges to man, nat si Criston Afo thayoy naiyansilbian cha, no diket sema angel cha. Kagol a en-amis i ki-ngel na ese-esel cha tan nainbili-biling chen manchejaw cha too, nasiyaol cha ma inam-ay a medingo. 19Amtak i naechamag a chiliy pemati yod Cristo cha emiin a too. Isonga, banay a chiliy chadsak ko maypangkep cha si-kayo. Nem piyan kon ontakal kayo maypangkep na mapteng tan edinis i nemnem jo maypangkep na ngaaw. 20Si Afo Chiyos a naedafoan na talna, a-gwahen ton chakos si Satanas say singen inkathin jo. Sapay koma ta gwared si-kayoy kaasin Jesu Criston Afo thayo.
21Si Timothy a echom kon naiyan-obda para cha Afo, towan komostai kayo, pati si Lucius, Jason, tan si Sosipater a echom kon Hodjo.
22Si-kak a si Tertius a engipasolathan Paul niyay, kowan komostai kayo tep ahi yoak cha Afo.
23Si Gaius a mahabaliy na naiyan-iyanan kon si Paul tan naiyan-aspolan na naemati ngo, towan komostai kayo. Si Erastus a para-egchi na pilak chiya siyodad tan si Quartus a ahi thayod pamati, chiyan komostai kayo.
24Sapay koma ta gwared si-kayon emiin i kaasin Jesu Criston Afo thayo. Amen.
25Sapay koma mechejaw si Afo Chiyos. Si-kathoy gwariy panakabalin ton mengikedsang na pamati yo say maybagay cha mapteng a chamag a inkasabak maypangkep Jesu Cristo. Sejay a mapteng a chamag, ebayag a nat inpaamten Afo Chiyos. 26Nem niman inpaamta tho babaen na sola-solat iren ma profita. Et si Afo Chiyos a nagwariy kapoanan to tan pengingkaan to, inbilin to i maypaamtay mapteng a chamag cha emiin a tood emiin a ili say patien cha man et onoran ches Afo Chiyos. 27Si Afo Chiyos bengat i gwaren emiin i daing to. Sapay koma mechejaw na ingked ingka kagol Jesu Cristo! Amen.
Currently Selected:
Romans 16: KAR
Highlight
Copy
Compare
Share
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.