Romans 12
12
Sema Panbiyag Na Naemati
1Isonga, aahi, kagol na kaasin Afo Chiyos cha si-kathayo, pangaasi yo, iawat joy angel jod Afo Chiyos a singen tangdal a sibibiyag a esantoan tan pan-imdengan to. Tep setan i podnon pesing a manchejaw. 2Enog i iyonoran i panbiyag iren ma nat naemati, no diket ipabado yoy nemnem jod Afo Chiyos say mesa-dathan i panbiyag jo. Tep no a-magen jo man, amtaen joy piyan Afo Chiyos, et sema piyan to, sema mapteng tan sema pan-imdengan to tan sema nagwariy kolang to.
3Kagol na karebengan kon apostolis a in-i-kan Afo Chiyos, konen kod si-kayon emiin i: Enog i inkayang i angel jod echom jo, no diket si-neng jo ngoy angel jo. Nemnem jo i emiin a gwared si-kayo, pati daing jo ket, in-i-kan Afo Chiyos kagol na pamati yod Cristo. 4Tep sema angel na too, chakel i parti tho, tan afi-afil i osal cha. 5Inges to kiya ngon naemati. Angken chakel kiya, singen sa-kin angel kiya tep ekisa-ki kiyed Cristo. Tan singen iyankaka-chom kiya cha. 6In-i-kanan to kiyen Afo Chiyos na ekila-kilasin daing kagol na kaasi tho, et mesepol a maosal. No daing moy mengigwanggwang na inpaamten Afo Chiyos cha si-kam, igwanggwang mo ma piyatim a inpaamten Afo Chiyos cha si-kam. 7No mansilbiy daing mo, pansilbi ka. No mengitoroy daing mo, pantoro ka. 8No mengikedsang na nemnem na echom i daing mo, amag mo. No mengi-kan na tolong i daing mo, pengi-kan ka. No mengitorong i daing mo, ipasnek mo. No mena-cha na kakaasiy daing mo, imdeng ken oncha-cha.
9Sema semek jod echom, mesepol a medepod poso yo. Owes joy ngaaw, nem petpeti yoy mapteng. 10Pansisinemek kayon singen san-aahi. Imdeng kayon mengikayang na echom jo. 11Enog i salcheng na sedo. Itolok jon tolongan to kayo na Ispirito Santon onsedo-sedo. Pansilbi kayod Afo. 12Imdeng kayo kagol na namnama yo, anosi yoy digat, tan pankara-kararag kayo na olay. 13Cha-chai yoy toon Afo Chiyos no gwariy mesepol cha. Sintil joy onkowan alid baliy jo.
14Ibaga yod Afo Chiyos i bindisjonan to ira ma manpadigat cha si-kayo. Ahow, ibaga yod si-katho i bindisjonan to ira. Enog iriy biyotbot. 15Pekiimdeng kayo ired ma kainimdeng tan pekinangis kayo ired ma keninangis. 16Pan-iinawat kayo. Enog i pahi-tek, no diket pekikadgwa kayo ired ma iyangkekombaben too. Enog i kigwan i si-kayo bengat iriy edaing. 17Enog i inbales no gwariy mengemag na ngaaw cha si-kayo, no diket amag joy mapteng cha nemnem na emiin a too. 18Ipahat joy kabaalan jo say mapteng i pekitimpoyog jod emiin a too. 19Si-kayon ensemek ko, enog i bale-bales, no diket itolok jon si Afo Chiyos i mengibales. Tep iyaysolat cha esel Afo Chiyos i “Si-kak i mahaamten mengibales. Si-kak i menosa ired ma naengamag na ngaaw, kigwan na Afo.” #12:19 Deuteronomy 32:35 20Amag jo et iyay a iyaysolat ngod esel Afo Chiyos a: “No aofay mahakontred si-kam, pahan mo. No iya-kow, i-kanim na inomen to. Tep no a-magen mo jay, onbaing a chili.” #12:20 Proverbs 25:21-22 21Enog i intolok a egwahen to kayo na ngaaw, no diket agwak joy ngaaw babaen na mapteng a naimag jo.
Currently Selected:
Romans 12: KAR
Highlight
Copy
Compare
Share
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.