Romans 10
10
Chegwen Kilasin Kinachonong
1Aahi, piyan kon chilin maysalakan i echom kon Hodjos, et setan i nainkararag ko na olay cha Afo Chiyos. 2Amtak i nainpahat chen patien si Afo Chiyos, nem nat egwathan chen agpaysoy piyan to. 3Tep nat egwathan chiy nainpasing Afo Chiyos a manpachonong na too, no diket nainparas chen onchonong babaen na naimag chen mapteng. Et isonga nat manpakombaba iren mengonod na pesing Afo Chiyos a mengipachonong na too. 4Tep sema podno wa, si Cristoy engingkaan na dinteg say emiin a naematid si-katho, ibilang Afo Chiyos a maronong.
5Sejay i insolat Moses maypangkep na pengibilang Afo Chiyos na toon maronong kagol na pengonoran cha na dinteg. Kigwan to i “Sema toon naengonod na emiin a bili-bilin na dinteg, gwared si-kathoy biyag.” #10:5 Leviticus 18:5 Nem nat mebedin iyay tep nagwaren polos i mahaonod na emiin a dinteg. 6Nem gwara ngoy iyaysolat maypangkep na pengibilang Afo Chiyos na toon maronong kagol na pamati red Cristo, et kigwan to i nat edigat. Kigwan to i “Enog i kigwan cha nemnem mo i ‘Siyay onkowan cha dangit’ ” say a-daen to dis Cristo iy kimowan mala. #10:6 Deuteronomy 30:12-13 7“Et enog ngoy kigwan i ‘Siyay onsa-kod cha kawad-an na etiy’ ” say ipawil tos Cristo iy iyanpawil mala. 8Tep sema kigwan to, sejay: “Sema esel Afo Chiyos, iyay-esop cha si-kayo. Gwared nemnem jo tan mebedin a a-seden jo.” Sejay a esel Afo Chiyos, si-kathoy esel maypangkep na pamatid Criston nainkasaba wi. #10:8 Deuteronomy 30:14 9Tep no igwanggwang jo i si Jesus i Afo tan podnon napiyati yo i inpanpawil Afo Chiyos, maysalakan kayo. 10Tep no podnon naematiy too, ibilang Afo Chiyos a maronong, tan no igwanggwang na tood echom i napiyati tho, isalakan Afo Chiyos. 11Kigwan tod esel Afo Chiyos i “Emiin a naematid si-katho, nat mebaingan ira.” #10:11 Isaiah 28:16 12Nagwariy iyandasinan na Hodjos ired ma Greeks. #10:12 Chiyay a birsikolo, sema banag a Greek, toon nat Hodjo. Si Afoy Afo na emiin, tan esolok i nain-i-kan to ired ma manbaged si-katho. 13Tep kigwan tod esel a Afo Chiyos i “Emiin a mekikaasid Afo Chiyos, maysalakan ira.” #10:13 Joel 2:32
14Nem kas-anon manbagay tothood si-katho no eg ira naematid si-katho? Et kas-anon memati ired si-katho no eg cha inki-ki-ngelan i maypangkep cha si-katho? Et kas-anon mengi-ngel ira maypangkep cha si-katho no nagwariy mengikasabed si-kara? 15Et kas-anon mengesabay tothoo no nagwariy mengito-nod si-kara? Nem igwan iriy into-non Afo Chiyos tep iyaysolat chiwa esel to i “Mapteng a pasiyay ikowan ali iren ma mankasaba niwa mapteng a chamag!” #10:15 Isaiah 52:7 16Nem nat emiin a tooy emati ira niwa mapteng a chamag. Tep kigwan Isaiah i “Afo, singen nagwariy emati na kigwan mi.” #10:16 Isaiah 53:1 17Isonga, memati wa iriy tothoo tep inki-ngelan chiy maypangkep Cristo, tan inki-ngelan cha tep iyaykasabay mapteng a chamag maypangkep Cristo.
18Nem ijay i ibagak a: Sema iren Hodjos a nat emati, nat inki-ngelan cha emoy minsahin maypangkep Cristo? Inki-ngelan cha wango tep kigwan tod ma esel Afo Chiyos maypangkep iren ma naengikasaba i:
“Sema ese-esel cha, iyayki-ngelan cha intiron dobong,
tan sema kigwan cha, iyaypaamta waled emiin a soli na dobong.” #10:18 Psalm 19:4
19Gwariy sa-ki pay a ibagak a: Sema iren Hodjos, eg cha emo igwathan i inki-ngelan cha? Igwathan cha wango, nem enbalaw chen patien. Tep sejay i iyaysolat cha esel Afo Chiyos. Pilmiro gwariy insolat Moses maypangkep na kigwan Afo Chiyos ired ma Hodjos a:
“Pan-aapal tahejo no bindisjonan ko ira ma kigwan jo i nat tribo ira.
Pebonget tahejo no tolongan ko ira ma nagwariy pengegwat ched si-kak.” #10:19 Deuteronomy 32:21
20Et gwariy intoled Isaiah a insolat a kigwan Afo Chiyos maypangkep na Gentiles a:
“Sema iren nat enganap cha si-kak, si-kariy enafol cha si-kak.
Sema iren nat iyanbaga maypangkep cha si-kak, si-kariy iyanparangan ko.” #10:20 Isaiah 65:1
21Nem maypangkep iren ma Hodjos a poli-polin Israel, kigwan Afo Chiyos i “Ebayag a in-okjad koy diwak cha si-kara, nem nat patien chaak tan benged ira.” #10:21 Isaiah 65:2
© 2023 Wycliffe Bible Translators, Inc. All rights reserved.