Acts 28
28
Sema Epasamak Ired Paul Cha Malta
123 Idi kima-jat kawid dogad a edikmothan na baybay, iyamtaan mi i engaranan na Malta. 2Sema iren naiyan-iyan chiwan, mapteng a pasiyay imag cha para cha si-kawi. Tep iyan-afoy ira tan sinintil cha kawi tep inchogi ton on-oran tan teg-in. 3Si Paul ngo, ena-nop na bila-jo, et idi towan iejan cha afoy, bimo-day i esabirongan a oleg kagol na petang, et kidat toy diwen Paul et pimeket iwa oleg. 4Sema tothoon i-Malta, idi mita ra ma oleg a manbibilay cha diwen Paul, iyankinowan ira i “Sigoradon mabono ma too. Angken iyamtik alid baybay, metiy met laeng tep mimothok i chosa thod si-katho.” 5Nem inpelkin Paul iwa oleg say ma-kas cha afoy, et nagwariy epasamak a ngaaw cha si-katho. 6Et sema iren tothoon i-Malta, iyanseked iren si-nengen cha no ondarag i diwa tho ono biglen metongba et metiy. Nem idi ebayag a singked cha et nagwariy epasamak cha Paul, siya-dathan chiy nemnem cha, et kigwan cha i chiyos si Paul.
7Gwariy payo-payow a iyay-esop cha kad-an iren Paul a kegwen Publius. Si Publius, kainportantian a tood Malta. Tiya-gway to kawid baliy to et sinintil to kawi na tedon akow. 8Iyaytompong a si awen Publius, mansekit a gwariy petang to tan mantatai na chala. Kimowan si Paul cha kad-an to, et inkararagan to. Et insagpat Paul i diwa thod ma mansekit, et mimapteng a chakos. 9Idi iyamtaan na tothoo i epasamak, emiin a mansekit chiwan, kimowan ired kad-an Paul, et inpamapteng to ngo ira. 10Chakel i mapteng a in-i-kan na tothood si-kawi. Et idi bimetik kawi, in-i-kan cha ngoy emiin a mesepol mi para cha biyahi wi.
Iyanbiyahi Ires Paul Cha Roma Did Malta
11Idi iyan-iyan kawi wed Malta na tedon bolan, intoloy miy biyahi win iyandogan cha sa-kin bapor a sima-mad chiwan ingkathod iyakcheng i timpo na powek. Sema bapor, edafod Alexandria a siyodad cha Egypt, et emalkaan na ditarato na epin a chiyos a si Castor tan si Pollux. 12Idi mimothok kawid siyodad na Syracuse a gwared Sicily, gwara kawid man na tedon akow. 13Et bimetik kawid Syracuse et chidan miy kilig na Sicily ingkathod mimothok kawid siyodad na Rhegium cha kilig na Italy. Idi gwa-gwa tho, gwariy chahem a emangkedafo did pesaw a mengitolchon na bapor mid piyan min konan, isonga dima-jat kawi. Idi maykadgwen akow, mimothok kawid siyodad na Puteoli. 14Idi gwara kawid man, enagwi kawi na echom a ematid Jesus, et ininbitar cha kawin man-iyan cha si-kara na sa-kin domingko. Et intolo-toloy min iyan-ahad cha Roma. 15Sema iren ematid Roma, idi chimag cha i onkowan kawid tan, iyanbiyahi iren aspolen cha kawi angken aragwi kawi pay. Sema echom, koston kimowan ired market cha siyodad na Appius a engaspolan ched si-kawi. #28:15 Sema Appius, pithon poloy kilomitro did Roma. Sema ngon echom, iyaspol cha kawid dogad a engaranan na Tedon Panjo-kowan. #28:15 Sema Tedon Panjo-kowan, dimen polo tan tedoy kilomitro did Roma. Idi miten Paul ira ma emati, iyansalamat si Paul cha Afo Chiyos et kimedsang i nemnem to. 16Et idi mimothok kawid Roma, intolok chen iyan-abang si Paul na baliy a naiyan-iyanan to, pati sa-kin solcharon naiyanbantay cha si-katho.
Ekitebal Si Paul Ired Ma Hodjos Cha Roma
17Idi epalabas i tedon akow, tiya-gway Paul i naengibalbalnay na Hodjos cha Roma. Idi esa-sa-nop ma ira, kigwan Paul i “Aahi, piyan kon amtaen jo i nagwariy imag kon ngaaw ired ma echom kon Hodjos, tan nagwariy ogadi na afo-afo thayo len kiyontrak. Nem angken nagwariy basol ko, sema iren Hodjos cha Jerusalem, inkalebos chaak, et in-awat chaak ired Romano a ofisiyalis. 18Sema ngo iren Romano a ofisiyalis, idi binistigal chaak, piyan chen ibolos chaak tep iyamtaan cha i nagwariy imag kon basol a iyaybagay cha ketiy ko. 19Nem nat piyan iren ma Hodjos a maybolosak, isonga nagwariy pesing ko, malaksid a ibagak i onkowanak cha Roma say si Caesar i mengowisak. Inbagak man angken nagwariy kagol a pengicharoman ko iren ma echom kon Hodjos. 20Isonga, tiya-gway tahejo say mekitebalak cha si-kayo. Tep piyan kon ipaamted si-kayo i sema kagol a ebaloran ko niya kadina, si-kathoy sigoradon namnamak a tongpalen Afo Chiyos i kigwan tod si-kathayon poli-polin Israel maypangkep Cristo tan panpawil na iyangketiy.”
21Et sema ngo iren naengibalbalnay na Hodjos, kigwan cha i “Nagwariy igwat min sola-solat a edafod Judea maypangkep cha si-kam. Tan sema iren echom min Hodjos a edafod man, nagwariy inistoriya ra maypangkep na imag mon ngaaw. 22Nem piyan min iki-ngelan i konen mo tep amta wi i sema iren tothood emiin a doga-dogad, nakigwan chiy ngaaw maypangkep cha si-kayon naematid Jesus.”
23Et emispis ira na akow no mesa-nop mowan ira. Idi mimothok iwa akow, chakel i esa-sa-nop ired naiyan-iyanan Paul. Et iyanchogid agsapa ingkathod dagwi, in-iksplikar Paul i maypangkep na pantorayan Afo Chiyos et inpahat toy kabaalan ton engawis cha si-kara i si Jesus i Criston iyaybasar cha kigwan tod dinteg Moses tan sola-solat na profita. 24Sema echom, piyati riy kigwan Paul, nem sema ngon echom, nat piyati ra. 25Idi edagwi wa et mansasagana ira ma tothoon onbetik, iyansosongbathan chiy inki-ngelan cha. Nem idi aneng pay iren onbetik, kigwan Paul i “Podno ngarod i inpasolat na Ispirito Santod Isaiah a profita maypangkep iren ma afo-afo thayo len kigwan to i:
26‘Taha ired ma too et
kowan mod si-kara i
Angken jowan iki-ngeli,
eg jo egwathan,
tan angken jowan mathaa,
eg jo peschian.
27Tep seja iren too,
esolpeng ira.
Eg cha piyan a manki-ngel
tan nakinimit chiy matha ra
say nat mahasi-neng ira
tan nat mahaki-ngel ira,
et nat mahaawat ira.
Tep no egwathan cha wa,
on-oli ched si-kak
say pemapteng ko ira,
nem eg cha piyan.’ ” #28:26-27 Isaiah 6:9-10
28Et kigwan Paul i “Isonga, si-kayon Hodjos, piyan kon amtaen jo jay a sema esel Afo Chiyos maypangkep na pengisalakan to na tothoo, emangkaitoro ired ma Gentiles et iki-ngelan cha et patien cha.” 29Idi kigwan men Paul iwan, bimetik ira ma Hodjos a mansosongbat pay ira.
30Et iyan-iyan si Paul na chegwen tawen chiwa baliy a naengabangan to. Et emiin a kimowan a manbisited si-katho, inpaskep to ira. 31Tan nainkasaben Paul i maypangkep na pantorayan Afo Chiyos tan naintoro thoy maypangkep Jesu Criston Afo thayo. Etoled a naimag to man et nagwariy engiparit cha si-katho.
© 2023 Wycliffe Bible Translators, Inc. All rights reserved.