Rò̌mǎphû̌ 5
5
Ta̤pè̤ta̤dû ta ta̤sò̌le̤sò̌lò̤
1Hǐnudě Cǒmara bè̌cǒbè̌tè̤ pa ta pa ta̤yṳta̤nǎ akhû̌akhî hǒ. Dě pa ǒpè̤ǒdû mo̤klaǐgesǒ ta Cǒmara hǒ. Pwa̤ma̤ htûhtò̌ bǎ pa pwǐhè̌onumî̌ mî̌pwǎ pa Běcǎ Ye̤shǔkhrî̌stu hǒ. 2Pa yṳǎ Běcǎ Ye̤shǔkhrî̌stu akhû̌akhî, a noǒhtûpwa̤ pa dě Cǒmara abwǐasîrî akû hǒ. Khònò̤htǒo pa ǒhtûpwa̤ dě abwǐasîrî akû hǒ. Dě pa sò̌le̤ kè̌shuǐ Cǒmara a bwǐdû̌sîrîhtû htǒonu hǒ. 3Pa kè̌shuǐ pwǎpǒ̤ htǒonu mè̤tò̤, bǎ pa kè̌shǐ ta ta̤jîta̤jû, ta̤pò̤ta̤sha akhanu bǎbǎ, pa sò̌le̤sò̌lò̤bò pwǎ, ma̤tè̤hî̌dě pa sî̌ya ta ta̤ htǒotoǒnu a ǐ dû̌htò̌po̤ bǎ pa ta̤khòbǎ ta̤jîta̤jû. 4Ta̤khòbǎ ta̤jîta̤jûnu a ǐ ǒdû̌htò̌ ta̤ma̤to Cǒmara asò̌phlǒ, ta̤ma̤to Cǒmara asò̌phlǒnu, a ǐ htûhtò̌ dû̌po̤ ta̤kè̌shuǐ. 5Bǎ pa kè̌shuǐ ta Cǒmara ma̤ bǎ pa akhanu, pa sò̌phlǒpî̌ tò̤, ma̤tè̤hî̌dě, bǎ Cǒmara ǐlò̤ pa Běcǎ sǎcahtǐ akhanu, a glolò̤ lò̌lò̤ bǎ pa a ta̤mo̤ǐ dě pa sò̌phlǒkû hǒ.
6Ma̤tè̤hî̌dě, bǎ pa ma̤jèbò̌jòpe pana̤ tò̤ akhanu, Ye̤shǔkhrî̌stu hèkhòsi tokhîtokha bǎ kòyòjî kòyòjû toǒ aya. 7Kòyò tapwa̤ khòsi bǎ kòyòcǒkòyòtè̤ aya tapwa̤ hî̌numî̌, agrò mè̤mè̤̌. Pwǎ̤tadě kòyòwǒ mè̤mè̤̌ tapwa̤ aya hî̌nu mî̌ pwa̤ khòsibǔ ayanu a ǒpwǎ kǎlè. 8Pwǎ̤tadě Cǒmara mo̤ǐ pa pwî̌꤮ tè hî̌dě, bǎ pa htûpe ta̤ma̤sǔphû̌ akhapenu, Khrî̌stu hèlò̤khòsi asò̌ ta paya. Htǒomî̌ Cǒmara dǔlṳ pa ta amo̤ǐ pa hǒ.
9Pa htû kòyòcǒkòyòtè̤ dě Cǒmara a lo̤mo̤ ta Khrî̌stu asǐ khû̌khî hǒ. Hǐnudě Khrî̌stu ma̤lû̌htò̌ge mè̤mè̤̌ pa ta Cǒmara a ta̤cèrò htǒonu pě. 10Dě awǐkha numî̌, pa htû kòyò htě a sò̌khě Cǒmara toǒ. Dě aphû̌khû khòsi asò̌ ta paya akhû̌akhî, a ma̤ mo̤klaǐgesǒ pa hǒ. Khònò̤htǒo pa htû akhobǒsû̌ hǒ. Pa sî̌ya te̤mǎ ta pa lû̌htò̌bò̌ pwǎ ta aphû̌khû a ta̤ǒhtûpwa̤ akò pwǎ. 11Pa la̤sò̌le̤sò̌lò̤nu aǒ pwǎpǒ̤ htǒonu mè̤tò̤. Běcǎ Ye̤shǔkhrî̌stu akhû̌akhî, pa sò̌le̤sò̌lò̤ bǒsû̌ǐ ta Cǒmara hǒ. Pwa̤ htě a ma̤ bǒsû̌khǎkho gesǒ bǎ pa ta Cǒmara mî̌ Ye̤shǔkhrî̌stu htǒonu hǒ.
Ta̤si ta Ada, ta̤htûpwa̤ ta Khrî̌stu
12Ma̤hǐnudě, kòyò tapwa̤ gana̤de Cǒmara ayo̤ tò̤ akhû̌akhî, kòyò pṳ̂̌꤮ tapwa̤ ma̤bò ta̤sǔ hǒ. Ta̤sǔta̤plě htǒo a dǔlṳhtò̌ ta̤si hǒ. Hǐnudě ta̤sǔta̤plě htǒo akhû̌akhî, kòyò pṳ̂̌꤮ tapwa̤ kè̌shǐ shěto̤bǎbò ta ta̤si hǒ.#Mǒhtûlû̌hǎhtûsa 3:6 13Kòyòhǎkhû̌phû̌ ma̤wǐbò ta̤sǔ ta Cǒmara ǐlò̤ ta̤sû̌ta̤tòwò htǒonu. Pwǎ̤tadě ta̤sû̌ta̤tòwò dè ǒtò̤ hî̌nu Cǒmara cèrò kòyò ta̤sǔ tò̤. 14Tèhtò̌ bǎ Ada gana̤de Cǒmara ayo̤ tò̤ ahtukhanu, a to̤hè dě Mǒ̤jè ahtukhanu, kòyò lǒ̤꤮ bò bǎsibò. Kòyònu toǒ mî̌, a ma̤sǔkû̌ pwǐ Ada ma̤sǔnu mè̤tò̤ pwǎ̤tadě asî bǎsi kû̌bò pwǎ. Ada mî̌ asǒsǒta Khrî̌stu htě a glè hèpěnu tapwa̤ hǒ.
15Pò̤̌ta Cǒmara a ta̤ǐlò̤ko sû htǒonu ta Ada ma̤ta̤sǔ htǒoginǐ̤cǎ numî̌ a sǒsǒnû̌û tò̤. Ma̤tè̤hî̌dě, kòyò tapwa̤ gana̤de Cǒmara ayo̤ tò̤ akhû̌akhî, kòyò bǎ si plṳ̂. Pwǎ̤tadě Cǒmara abwǐasîrînu adû̌khlope ta hǐnu. Htohǒtò̤ nî̤bǎko sû htě a hè dě kòyò ahǔwa̤ tapwa̤ a ǒ mî̌ mè̤hǒ Ye̤shǔkhrî̌stu htǒonuhǒ. Dě abwǐasîrî khû̌khî, a ǐ lò̤betî̌pî̌ plṳ̂ bǎ kò tṳ̂prṳ̂taphǎ hǒ. 16He glè hî̌po̤sǒ ta, Cǒmara a ta̤ǐko sû htǒonu, ta kòyò tapwa̤ ma̤ta̤sǔ numî̌ a sǒsǒnû̌û tò̤. Bǎ a ma̤ ta̤sǔ akhanu, Cǒmara cèrò nû̌û pwǐ kòyò htě a ma̤sǔma̤plě ta̤ tapwa̤nu pwǎ̤tadě bǎ kòyò ma̤plṳ̂ ta̤sǔ akhanu, Cǒmara ǐko bǎ asî ta abwǐasîrî asûhtǒo akhû̌akhî, a bè̌cǒbè̌tè̤ asî hǒ. 17Dě makhû Ada ma̤ ta̤sǔta̤plě akhû̌akhî, kòyò lǒ̤꤮ bò bǎsi numî̌ ato pwǎ. Pò̤̌ta kòyò htě a sò̌yṳ phî̌shǔ Cǒmara ǐnû̌û ta abwǐdû̌sîrîhtû htǒonu ta a ǐko nû̌û ta̤cǒta̤tè̤ asû htǒotoǒnu, a ǒhtûpwa̤ kû̌ta Ye̤shǔkhrî̌stu tûjûpwa̤ pě, htohǒtò̤ a pǒǐ kû̌dǒ ta̤ ta Ye̤shǔkhrî̌stu pě. Ma̤tè̤hî̌dě kòyò tapwa̤ a mî̌ Khrî̌stu htǒonu, a ma̤ bǎhto ta̤ ta paya hǒ.
18Hǐnudě kòyò tapwa̤ mî̌ Ada htǒo ma̤sǔta̤ tacǎ akhû̌akhî, Cǒmara cèrò kòyò pṳ̂̌꤮ tapwa̤ hǒ. Hǐnudě, kòyò tapwa̤ htě a mî̌ Ye̤shǔkhrî̌stu htǒo a ma̤ ta̤cǒta̤tè̤ tacǎ akhû̌akhî, Cǒmara bè̌cǒbè̌tè̤bò kòyò pṳ̂̌꤮ tapwa̤, dě asî nî̤bǎ lǒkho ta̤htûpwa̤ tûjûpwa̤ pě. 19Ma̤tè̤hî̌dě kòyò tapwa̤ gana̤de Cǒmara ayo̤ tò̤ akhû̌akhî, kòyò pṳ̂̌꤮ tapwa̤ htûbò ta̤sǔta̤plě a phû̌mǔphû̌khû toǒ hǒ. Pò̤̌ta kòyò tapwa̤ gana̤de Cǒmara ayo̤ akhû̌akhî, Cǒmara bè̌cǒbè̌tè̤bò kòyò pṳ̂̌꤮ tapwa̤ hǒ.
20Ma̤pûhǐ kòyò lǒ̤꤮ bò sî̌ya ta asî ma̤sǔplṳ̂ ayanu, Cǒmara bè̌lò̤bǎ asî ta̤sû̌ta̤tòwò htǒonu hǒ. Pwǎ̤ta sǔ asî ma̤dû̌htò̌ ta̤sǔ akhanu, Cǒmara a ta̤bwǐta̤sîrî htǒo sǔsǔ a tǐ̤ ǒdû̌htò̌. 21Ma̤hǐnudě, pwǐ ta̤sǔta̤plě pǒǐbò kòyò lǒ̤꤮ bò dě a noǒhtûhtò̌ ta̤si akhonu, khònò̤htǒo ma̤pûhǐ pa nî̤bǎ tû̌ yolahtûpwa̤ tûjûpwa̤ dě pa Běcǎ Ye̤shǔkhrî̌stu a ǒ dě, Cǒmara abwǐasîrî pǒǐtû̌ pa ta ta̤cǒta̤tè̤ hǒ.
Currently Selected:
Rò̌mǎphû̌ 5: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
