Ta̤htû̌sò̌ǐ 90
90
Ta̤htû̌sò̌ǐalî̤ lǐ̤bǎ tabǎ
(Ta̤htû̌sò̌ǐ 90-106)
Cǒmara htě ahtûpwa̤ tûjûpwa̤ ta kòyòhǎkhû̌phû̌ htě ahtûpwa̤ teděsǎ awi̤akè̌
Cǒmaradû̌ akòyò Mǒ̤jè ata̤kwisaba
1Kǒ Běcǎ ta̤adû̌, na htûhtotû̌ pagûla̤ la̤ǒtûdû pṳ̂̌꤮ tuhtu.
2Dě kholo sîtoǒ ǒhtûhtò̌ hǒtò̤, na bǒlò̤ hǎkhû̌ hǒtò̤ akhanu,
Na mî̌ Cǒmaradû̌ htě aǒhto tûjûpwa̤, aǒ sělěhèpo̤ tûjûpwa̤.
3Na nohtûhtò̌ gesǒ kòyòhǎkhû̌phû̌ ta lo̤hǎ.
Na hî̌ ta, “Kòyò htě asijò toǒ, gehtûsǒ lo̤hǎnu.”
4Dě nayanu, aně tîrî̌ mî̌ asǒsǒpwǎ ta bǎhǎno dě a cû̌ tûlû̌phwèkè.
Alò̤pwǎta tûkû̌wo̤ teděsǎ pwǎ.#Petru ginǐ̤bǎ tabǎ 3:8
5Na nosisumṳbò kòyòhǎkhû̌phû̌ lò̤ta hǎmoǒmi̤mò̤nu.
Asî sǒsǒpwǎta ta̤pho dě aphohtò̌ lṳmṳlî, anokè lṳmṳbǎ.
6Lṳmṳlîdě phohtò̌wî̤wǒ, lṳmṳhǎdě anokhwesi.
7Nata̤sò̌phlǒdû̌ akhû̌akhî, pa to̤bò ta ta̤pî̌ta̤lṳ̂.
Nasǔshidû̌ akhû̌akhî, pa sò̌gònò̤ ǐshabò.
8Na kè̌shǐ pǒ̤꤮ ta̤sǔta̤plě htě pa cû̌ma̤sǔma̤plěnu mè̤ tò̤.
Na kè̌shǐ ta̤sǔta̤plě htě pa ma̤hǔma̤sè̌nu.
9Na sò̌phlǒdû̌ pa akhû̌akhî, lǒ̤꤮ bò paněpala toǒ aphǒtǔ.
Paněpala toǒnu, a hǎbòphwè lò̤ta sǎdǒ tuhu.
10Paněpala mî̌ ahtû gutṳ̌pwǎ susǒ tishi.
Pa dè khû̌ǎshû̌sho hî̌mî̌ paněpala mṳni̤ htûto̤ ashilǐ̤sǒ.
Pwǎ̤tadě alǒbe còcè̌꤮ pwǎ ta ta̤bǎgubǎgè, ta̤jîta̤jû.
Ǒyî̤tò̤ paněpala mṳni̤ phǔkè dě pasihǎmǎkèbò.
11Ûpè tapwa̤ sî̌ya lǒbebò̌ nata̤sò̌phlǒdû̌ asîrîshû̌sho htǒonu pè?
Na sò̌phlǒdû̌ mè̤mè̤̌ htǒonu a htûhtò̌bò kò la̤ǐsha bè̌dubè̌na̤ na.
12Ma̤pûhǐ pa sî̌yaǐ paněpala phǒtǔ pwî̌꤮ tè ani̤nu, sû̌ǐtòwòǐ pa. Pě꤮ dě pa nî̤bǎ ta̤sî̌ta̤jò dě pasò̌phlǒkû.#Ta̤dǒhtû̌ǐ 32:29; Kòlò̌shiaphû̌ 4:5
13Kǒ Cǒmara tûjûpwa̤, htû̌tiwǐ getosǒ mò̌ pa.
Pa bǎ khòjîkhòjû yî̤po̤ pě pwî̌꤮ tè?
Gwèbǎǐ napwa̤ma̤ta̤phû̌ htǒo toǒ tò̤ya.
14Ma̤pûhǐ pa sò̌po̤htò̌ ta ta̤sò̌le̤sò̌lò̤ ta̤mo̤sû̌mo̤sò̌ pṳ̂̌꤮ ti̤ni̤ ayanu, lṳmṳlîlî꤮ ma̤mo̤ pasò̌phlǒ ta nata̤mo̤ǐ htě ahǎbòjò tò̤ htǒo.
15Ma̤ sò̌le̤sò̌lò̤ mṳni̤mṳsa yî̤ bǎgesǒ pa pwî̌꤮ na nokhòbǎ pa ta̤jîta̤jû, ta̤pò̤ta̤sha aněala yî̤nu.
16Dǔlṳ bǎ napwa̤ma̤ta̤phû̌ toǒ ta nata̤ma̤ cǒklî̌kî̌ya.
Dǔlṳ bǎ nasîrîdû̌sîrîhtû ta asîphû̌asîli̤.
17Pa glè nî̤bǎtû̌ Běcǎ ta̤adû̌, pacǒmara ata̤ma̤mo̤ma̤wǒ pa.
Pa ma̤ hî̌tètè̌꤮ bǎbǎ, nodû̌htò̌htûhtò̌ bǎ pa.
Pa ma̤ hî̌tètè̌꤮ bǎbǎ, nodû̌htò̌htûhtò̌ mè̤mè̤̌ bǎ pa nî̌.
Currently Selected:
Ta̤htû̌sò̌ǐ 90: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
