Ta̤htû̌sò̌ǐ 85
85
Ta̤kwisaba ta shiphû̌gaphû̌ glè ǒmo̤ǒkwǐ aya
Kǒri akhlialè toǒ ata̤sò̌po̤. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya.
1Kǒ Cǒmara tûjûpwa̤, na kè̌dû̌ǐ nashinaga.
Na ǐ ǎbǎobǎ Israelkhlilèphû̌.
2Na bòlû̌kèbò nakòyò toǒ ata̤ma̤sǔma̤plě.
Na phî̌tephekèbò bǎ asî ta̤sǔta̤plě.
3Nasò̌phlǒdû̌ hǎmǎbò hǒ.
Nata̤sò̌phlǒdû̌gûhî htǒonu, taplǎpa a gûjû gilò̤bò.
4Kǒ Cǒmaradû̌ htě a ma̤lû̌htò̌ge pa, ǐǎbǎobǎ gesǒ pa.
Sò̌phlǒdû̌ pûma̤ pa ma̤.
5Na sò̌phlǒdû̌ pa tûjûpwa̤ pě ya?
Na sò̌phlǒdû̌ sělěpo̤ pa tuhtu hto tuhtu pě ya?#Ta̤htû̌sò̌ǐ 79:5
6Ma̤pûhǐ nakòyò toǒ sò̌le̤sò̌lò̤ ta na ma̤htobǎ panu toǒ ayanu, ǐshû̌htò̌shohtò̌ gesǒ pa.#Ta̤htû̌sò̌ǐ 71:20
7Kǒ Cǒmara tûjûpwa̤, dǔlṳmò̌ pa ta nata̤mo̤ǐ htě a hǎbò jòtò̤ htǒo.
Ma̤lû̌htò̌mò̌ pa.
8Běcǎ Cǒmara tûjûpwa̤ hî̌ hî̌tènu, he glè gana̤de.
Ma̤tè̤hî̌dě a olò̤ ta a glè ǐ akòyò htě a cǒtè̤tayo̤ toǒ ata̤ǒmo̤ǒkwǐ.
Pwǎ̤tadě noma̤bǐaǒ gesǒ pûma̤ asî ma̤.
9Ma̤pûhǐ kò kè̌shǐ Cǒmaradû̌ asîrîpo̤phǎ dě pagakû ayanu, kòyò htě a ǐsha bè̌dubè̌na̤ nû̌û toǒ nî̤bǎ mè̤mè̤̌ Cǒmara ata̤ma̤lû̌htò̌ge pě.
10Ta̤mo̤ǐ ta ta̤cǒtè̤tayo̤ kè̌shǐglashǔ nû̌û.
Ta̤cǒta̤tè̤ ta ta̤ǒmo̤ǒkwǐ gomo̤ kè̌khînû̌û.
11Kòyòhǎkhû̌phû̌ ata̤cǒtè̤tayo̤ ǒ lṳhtò̌ dě hǎkhû̌.
Cǒmara ata̤cǒta̤tè̤ ǒ dě mǒkhû̌ kè̌lò̤ pa.
12Cǒmara tûjûpwa̤ glolò̤lò̌lò̤ mè̤mè̤̌ ata̤howi̤ pě.
Sǒmṳwû̌bo sǎhtò̌phohtò̌ plṳ̂ dě pagakû.#Ta̤htû̌sò̌ǐ 67:6
13Ta̤cǒta̤tè̤ cû̌wǐ dě Cǒmara tûjûpwa̤ alo̤mo̤ pwǐ pwa̤sûta̤wi̤ta̤kè̌ tapwa̤nu pě.
A tîwî̌tòwònǎwǐ bǎ nû̌û klè̌la̤hè aya pě.
Currently Selected:
Ta̤htû̌sò̌ǐ 85: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
