Ta̤htû̌sò̌ǐ 77
77
Cǒmara ǒkû̌ta akòyò bǎ asî shěto̤bǎ ta̤pò̤ta̤sha akha
Asa ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokûnu tapwa̤ aya. Dě ta̤sò̌po̤htû̌sò̌ǐ htǒo to̤to̤ mî̌ Jedutu htě a yṳ̂klè̌nè̌klònṳ pwa̤sò̌po̤htû̌sò̌ǐ ta̤nu tapwa̤ aya.
1He kwi꤮ gwèbǎǐ mè̤mè̤̌ Cǒmaradû̌ ata̤ma̤jè.
He kwi꤮ sabahtò̌ nò yǎ dě a glè gana̤de heta̤kwi.
2Bǎ he shěto̤bǎkè̌shǐbǎ ta ta̤pò̤ta̤sha akhanu, he kè̌lǎ Běcǎ ta̤adû̌.
He yṳ̂htò̌ hecǔde, he kwisabahtò̌ na tasa tasa pwǎ̤tadě agaya̤ nǒ hecǔdetò̤.
Pwǎ̤tadě amo̤to̤ nǒ hesò̌phlǒ dî̌kî̌꤮ tò̤.
3Bǎ he gènè̤htò̌to̤ Cǒmaradû̌ akhanu, he kookasha.
He gènè̤꤮ gènè̤ awi̤akè̌ dě he sò̌phlǒpî̌ mè̤mè̤̌.
4Na nohǎmoǒnî̤pe he tò̤.
Aguagè tûlû̌shû̌ he, he hî̌bǎhǎhtò̌bò̌pe tò̤.
5He gènè̤htò̌to̤ mṳni̤mṳsa htě atûlû̌hto toǒ, he gènè̤to̤bǎ něla dě꤮ awǐnu toǒ.
6He hî̌lò̤ hena̤ ta, “Lṳmṳkhǐkha he glè gènè̤htò̌nṳ heta̤sò̌po̤.
“He glè gènè̤ te̤te̤mǎmǎ ǐ yǎ.
7“Mî̌ Běcǎ ta̤adû̌ glè wîkè pa tûjûpwa̤ ya?
“Mî̌ a dǔlṳpe ata̤mo̤ǐ ta pa dǐplǎ꤮ tò̤ ya?
8“Ata̤mo̤ǐ htě ahǎbòjò tò̤ htǒonu a gutṳkè tûjûpwa̤ ya?
“Ata̤olò̤ mî̌ a pî̌gutṳkè ya?
9“Cǒmaradû̌ htǒo a tobǎ gwèbǎǐ kònu mî̌ a shope̤kèbò hǒ ya?
“Asò̌phlǒdû̌ tûlû̌꤮ shû̌ dě a gwèbǎǐpe tò̤ ya?”
10Htodě he hî̌ ta, “Cǒmara htě adû̌ahtûkhlo kò htǒotapwa̤ ma̤jè bǎ he ta acǔde dě asîrîshû̌sho htǒo to he hî̌ htǒonu, a bǎpò̤bǎshakhlo he.”
11He glè gènè̤htò̌to̤ Cǒmara tûjûpwa̤ ata̤ma̤nu toǒ.
He glè gènè̤htò̌bǎ nata̤ma̤ cǒklî̌kî̌ya dě awǐnu toǒ.
12Na ma̤ kwè̌꤮ hî̌tènu he glè gènè̤ te̤mǎǐbò.
He glè gènè̤bò nata̤ma̤ htě apo̤phǎshû̌shonu toǒ.
13Kǒ Cǒmaradû̌, na ma̤ nakòyò toǒ hî̌tètè̌꤮ bǎbǎ, atoawǒbò.
Cǒmara htě adû̌ lò̤ta pacǒmaranu aǒ dǐpwǎ̤꤮ tò̤.
14Na mî̌ Cǒmara htě a ma̤ ta̤cǒklî̌kî̌ya.
Na dǔlṳ tû̌ nata̤sîrîshû̌sho dě khlilèphû̌ toǒ akla.
15Nakòyò htě a mî̌ Yǎ̤kò ta Jǒjè akhlialè sîtoǒnu, na htè̌genṳ asî ta nacǔde htě a sîrîpo̤phǎ.
16Kǒ Cǒmaradû̌, bǎ shi toǒ kè̌shǐ na akhanu, a ǐshabò nala̤.
Shidû̌shite̤we̤ toǒ guyṳgònò̤ lò̤to̤ dě akòdǎ.
17Khwè̌judû̌ shilo̤shikho hè.
Kǒwǒshibo dě mǒla̤.
Tî̌lî̌bo pṳ̂̌꤮ tò̤glò.
18Na notî̌lî̌lò̤ mǒgomǒyi̤htǒo a pi̤ti̤pṳ̂tṳ̂ dě phopiwidû̌ kla.
Tî̌lî̌bo dě a lîrakhabò hǎkhû̌.
Hǎkhû̌ ǐsha gònò̤gèglè, guyṳbò.
19Na cû̌phlǔbò̌ shidû̌shite̤we̤, na cû̌tûlû̌bò̌ shidû̌shiyo̤.
Kòyò kè̌shǐ nǒ nakhǎlǎla̤kha gûla̤ dǐpwǎ̤꤮ tò̤.
20Napǒnasû̌nṳ nakòyò toǒ lò̤ta sophû̌ htě Mǒ̤jè ta Aro sûcû̌ asînu hǒ.#Ta̤lû̌htò̌ge 14:21-31
Currently Selected:
Ta̤htû̌sò̌ǐ 77: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
