Ta̤htû̌sò̌ǐ 72
72
Kwisaba bǎ ta Khwǐ aya
Khwǐshòlomo ata̤sò̌po̤ htû̌sò̌ǐ.
1Kǒ Cǒmaradû̌, ǐ khwǐ ta nata̤sî̌ta̤jò ta a glè ma̤toma̤bǎ ta̤ aya.
Ǐ khwǐphû̌ ta nata̤cǒta̤tè̤.
2A cèròcǒcèròtè̤ bǎ tû̌ta nakòyò nî̌.
A cèròtocèròbǎ bǎ tû̌ta nakòyò htě kò ma̤jîma̤jû nû̌ûnu toǒ nî̌.
3Kholodû̌ toǒ ǐ kòyònu toǒ ta̤ǒmo̤ǒkwǐ nî̌.
Kholoplǔ toǒ ǐ asî ta̤cǒta̤tè̤ nî̌.
4Khwǐhtǒo a ma̤kwaǐ tû̌ta kòyò htě kò ma̤jîma̤jû nû̌ûnu toǒ nî̌.
A ma̤lû̌htò̌ge tû̌ta kòyò shodo pwa̤ma̤jè aphû̌ali̤ toǒ nî̌.
A yî̤mǔkîî̌kèbò tû̌ta pwa̤pè̤ǎpè̤o kò toǒ nî̌.
5Lṳmṳ dè lî sadape dě mǒla̤, la dè꤮ lî sadape dě mǒkhû̌ hî̌dě kòyò tuhtu hto tuhtu ǐsha dě bè̌dubè̌na̤ tû̌ta na nî̌.
6Khwǐ ata̤pǒǐ ma̤jè tû̌ta kòyò htǒotoǒ sǒsǒta khwè̌julò̤ bǎ sǒmṳwû̌bo nî̌.
A sǒsǒtû̌ta khwè̌judû̌ bǎ hǎkhû̌ nî̌.
7Kòyòsò̌phlǒwǒ toǒ ǎbǎobǎ tû̌ta ahtukha nî̌.
La dè꤮ ǒ sadape hî̌mî̌, ta̤dû̌yò̤htò̌sa ǒměǒgle tû̌ta nî̌.
8A tèhtò̌pǒǐ tû̌ta dě mǒkòtṳ kòshî̌ to̤htû̌ mǒkòtṳ nî̌.
A tèhtò̌pǒǐ tû̌ta dě Yǔphare shilo̤dû̌ to̤htû̌ hǎkhû̌ gutṳ nî̌.#Sakharǐa 9:10
9Kòyò ǒ dě lo̤mî̌shǒklakhû̌nu toǒ gene̤lò̤bò tû̌ta dě a lo̤mo̤ nî̌.
Pwa̤sò̌khě yǎ toǒ lò̤jûbò tû̌ta ala̤ nî̌.
10Khwǐ ǒ dě Tashǔwî̤nu toǒ ta dě shidû̌shite̤we̤htunu toǒ phî̌hè lǒkho sû toǒ dě aǒ nî̌.
Shebǎga ta Sè̌bǎgakhwǐ toǒ phî̌hèǐ ta̤lṳta̤tò̌ nî̌.
11Khwǐ lǒ̤꤮ bò gene̤lò̤bò tû̌ta Israel Khwǐ lo̤mo̤ nî̌.
Khlilèphû̌ lǒ̤꤮ bò ma̤bò tû̌ a ta̤phî̌ta̤ma̤ nî̌.
12Ma̤tè̤hî̌dě a glè ma̤lû̌htò̌ge kòyò shodo pwa̤ma̤jè dě a kaǎguhtò̌ nû̌û.
A glè ma̤lû̌htò̌gepo̤ kòyò htě kò ma̤jîma̤jû yǎ dě ashodo pwa̤ma̤jè.
13A glè gwèbǎǐ pwa̤shuphǔshèwèphû̌ ta kòyò shodo pwa̤ma̤jè.
A glè ma̤lû̌htò̌ge kòyò htě a shodo pwa̤ma̤jènu toǒ ta ta̤si.
14Asîta̤ǒhtûpwa̤ htǒonu ale̤dû̌pwî̤htû mè̤mè̤̌ dě alo̤mo̤ akhû̌akhî, a glè ma̤lû̌htò̌ge asî dě kòjîkòjû ta kòyòkhu kòyòphû̌mò̤ toǒ acǔdekû.
15A ǒhtûpwa̤ nědû̌lahtû tû̌ta nî̌.
Kò hèǐ tû̌ta nû̌û hta htě a hǎhtò̌ dě Shebǎganu toǒ nî̌.
Kò kwisaba bǎ tû̌ta nû̌ûya pṳ̂̌꤮ taplǎ nî̌.
Cǒmaradû̌ howi̤ tû̌ta Khwǐ pṳ̂̌꤮ taplǎ nî̌.
16No sǎhtò̌phohtò̌ cǒlǒ ta̤sǎta̤pho pṳ̂̌꤮ tò̤glò.
No sǎhtò̌behtò̌ to̤bò yǎ dě kholokhi.
Sǒsǎ sîtoǒ, nosǎhtò̌dû̌htò̌ sǒsǒta pwǐ sǒmṳ dě Lebanokhololo̤.
Kòyò toǒ ǒwo̤ǒhtò̌ tû̌ta bǎ wî̤nu toǒ akû lò̤ta mi̤dǒ dě ya̤dakhû̌ nî̌.
17Lṳmṳ dè꤮ lî sadape hî̌dě Khwǐ ami̤ ǒměǒgle tû̌ta tûjûpwa̤ nî̌, ami̤ lṳshilṳga tû̌ta nî̌.
Dě a akhû̌akhî, khlilèphû̌ lǒ̤꤮ bò nî̤bǎdû̌ tû̌ta ta̤howi̤ nî̌.
Asî htû̌sò̌ǐbò tû̌ta nû̌û nî̌.
18Htû̌sò̌ǐ mò̌ Cǒmara tûjûpwa̤, amî̌ Israel acǒmaradû̌ htǒo.
Pwa̤ htě a ma̤cǒklî̌kî̌ya ta̤ mî̌ pǒ̤꤮ pwǎ a tapwa̤.
19Htû̌sò̌ǐ ami̤ htě asîrîdû̌sîrîhtû tûjûpwa̤ talakhǎ nî̌.
A ta̤sîrîdû̌sîrîhtû htǒonu a ǒbebò tû̌ta dě hǎkhû̌ tebě nî̌.
Amè̤, Amè̤.
20Jeshè̌ aphû̌ Dǎwi̤ ata̤kwisabahtokè bǎo hǒ.#72:20 Ta̤kwisaba htǒomî̌ a sahtò̌ dě ta̤htû̌sò̌ǐ 42:1 to̤ dě ta̤htû̌sò̌ǐ 72:19
Currently Selected:
Ta̤htû̌sò̌ǐ 72: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
