Ta̤htû̌sò̌ǐ 64
64
Ta̤kwisaba ta la̤ma̤kwaǐ aya
Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒlǒkòdû̌ dě ta̤lṳhtò̌hokû nutapwa̤ aya.
1Kǒ Cǒmaradû̌, gana̤depû he kookasha kwihtò̌ na.
Ma̤kwaǐ he ta pwa̤sò̌khě he toǒ ata̤ma̤sò̌gònò̤ ǐsha he.
2Ma̤kwaǐpû he ta kòyò htě a shokhû̌ye̤yo̤ ma̤phû̌mò̤shî̌hto he, kòyò htě a phû̌mò̤ htǒotoǒ aprṳ̂ahokla.
3Asî wṳ̂htò lǒkho aplî̤ lò̤ta nò̌she.
Asî hî̌bǎhè wi̤japhǎkò lò̤kèta kò khǎhè pla̤.
4Asî ǒhǔ jokhǎ kòyò htě ata̤sǔ ǒtò̤nu.
A khǎ asî taplǎpa, a ǐsha nǒtò̤.#Ta̤htû̌sò̌ǐ 11:2
5Asî glè tîwî̌ ma̤phû̌mò̤ ta̤ ayanu, a ǐkhû̌ǐǎ kè̌khînû̌û tapwa̤ ta tapwa̤.
Asî hî̌bǎ nû̌û ta la̤dò̌hǔdò̌sè̌ htò̌glo.
Asî hî̌tû̌ nû̌û ta, “Ûpè kè̌shǐjò pa pè?”
6Asî ma̤wǒnǎ ta̤phû̌mò̤shî̌hto.
Dě a hî̌ lǒkho ta, “Pata̤ma̤wǒnǎ htǒo awǒ mè̤mè̤̌.”
Kòyòhǎkhû̌phû̌ sò̌phlǒ ta ta̤gènè̤ toǒmî̌ adû̌ayǒ, sî̌yapò̤ya̤ mè̤mè̤̌.
7Cǒmaradû̌ glè khǎ asî ta apla̤.
Taplǎpa asî bǎshabò pě.
8Asî ta̤hî̌bǎ glè ma̤pî̌kèbò gesǒtû̌ asî.
Lǒ̤꤮ bò kòyò htě a kè̌shǐ asî toǒ glè pi̤ji luya̤bò asî.
9Kòyò pṳ̂̌꤮ tapwa̤ glè ǐshabò.
Asî glè dǒhtû̌ǐ Cǒmaradû̌ ata̤ma̤.
Asî glè sî̌yaphlowǒ Cǒmaradû̌ ma̤hto ta̤.
10Dě Cǒmara tûjûpwa̤ akhû̌akhî, lǒ̤꤮ bò kòyòcǒkòyòtè̤ glè sò̌le̤sò̌lò̤.
Asî glè ǒtûdûbò nû̌ûǒ.
Kòyò sò̌phlǒwî̤sò̌phlǒwǒ htû̌sò̌ǐ nû̌û pě.
Currently Selected:
Ta̤htû̌sò̌ǐ 64: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
