Ta̤htû̌sò̌ǐ 17
17
Kòcǒkòyòtè̤ ata̤kwisaba
Khwǐdǎ̤wi̤ ata̤kwisaba ta̤sò̌po̤
1Kǒ Cǒmara tûjûpwa̤, bǎ he kwigwèbǎǐ na ta na glè ma̤toma̤bǎ ma̤cǒma̤tè̤ ta̤ akhanu, gana̤depû heta̤kwi, gana̤depû heta̤yi̤kǒhtò̌, dò̌pû bǎ he ta nanò̌ku.
Kǒ Cǒmara tûjûpwa̤, gana̤depû kòyòcǒtè̤ sò̌phlǒ mṳ̂plî kwihtò̌ nahtǒo.
2He ta̤sǔ ǒtò̤nu hî̌lò̤tû̌ nana̤ nî̌.
He ma̤toma̤bǎbònu kè̌shǐ tû̌ta nami̤sǎ nî̌.
3Na sèlèkè̌ hesò̌phlǒ, na hèǒlèkû̌ he tasa tasa, na sèlèkè̌ he pwǎtadě na kè̌shǐ heta̤sǔ dǐcǎ꤮ tò̤.
Hebè̌lò̤ hesò̌phlǒ ta he glè hî̌bǎsǔ dǐcǎ꤮ tò̤.
4He gûkû̌ kòyòphû̌mò̤ kè̌lǎma̤pî̌ma̤lṳ̂ kò aklè̌aklònu toǒ tò̤.
He gûma̤kû̌ pwǐ na ta̤mǎlò̤.
5Hegûkû̌ nakhǎlǎla̤kha pṳ̂̌taplǎ.
He la̤cû̌tûlû̌khatî̤lî̤ naklè̌nu aǒ dǐplǎ꤮ tò̤.
6Kǒ Cǒmaradû̌, na glè kǒshǔ he pě akhû̌akhî, he kwigwèbǎǐ na.
Khòsò̌do dò̌ nanò̌ku, gana̤depû he kwisabahtò̌ nahtǒo.
7Nata̤mo̤ǐ htě ahǎbòjò tò̤ htǒo, dǔlṳhtò̌ cǒklî̌kî̌ya mò̌.
Kòyò htě a khlè̌ pwa̤sò̌khě nû̌û toǒ#17:7 Bǎ lî̤cahtǐkû htǒo khuwè̤ ta pwa̤sò̌khě mî̌ asǒsǒpwǎ nû̌û. ala̤ dě a khlè̌hè ǒtûdû ǒhǔ dě naǒ toǒnu, na ma̤lû̌htò̌ge asî ta nacǔdemû.
8Ma̤kwaǐ he pwǐ꤮ na ma̤kwaǐ nami̤sǎphlǒnu.
Hǔbǐǐ he pwǐ꤮ shîmo̤ hǔbǐǐ aphû̌ dě aděla̤nu.
9Ma̤kwaǐ he ta kòyòphû̌mò̤ htě a hèshěhèpe̤ he htǒotoǒ.
Ma̤kwaǐ he ta pwa̤sò̌khě he htě a hèbote̤we̤ he dě a glè ma̤si he htǒotoǒ.
10Asî mî̌ a ta̤sò̌yṳgwèbǎǐ ǒkû̌ tò̤.
Asî hî̌bǎ htò̌yî̤ mè̤mè̤̌.
11Asî lṳ̂kè̌lǎshě he dě khònò̤ asî bote̤we̤ ǐ he.
Asî ǒpo̤kè̌ shukhwèwǒ dě a glè ma̤si he.
12Asî lò̤ta sî̌ò̌ sǎǎ ashǎ dě a jo pṳ̂ǎ ta̤phû̌ta̤li̤nu.
Alò̤ta sî̌ò̌ ǒhǔ dě jojikla.
13Kǒ Cǒmara tûjûpwa̤, ma̤mò̌, shěshǔmò̌ asî, shěpè̤ kèmò̌ asînu.
Noǎ nanò̌she dě ma̤lû̌htò̌kè he dě kòyòphû̌mò̤nu toǒ acǔdekû.
14Kǒ Cǒmara tûjûpwa̤, noǎ nacǔde htě ashû̌asho dě ma̤lû̌htò̌ge mò̌ he dě kòyòphû̌mò̤ sò̌le̤sò̌lò̤ ǐtû̌ ata̤dû̌yò̤htò̌sa toǒ acǔdekû htǒo.
Na glè sû̌ǐbebò asîphukû ta nata̤wǒ ta nana̤ tû̌ nî̌.
Aphû̌ali̤ ali̤alṳ̂ akhlialè hǎte̤gilò̤ sîtoǒ ǒplṳ̂ǒphǎ dě a bè̌ǒkè plṳ̂ bǎ mè̤mè̤̌ aphû̌ali̤ toǒ û̌cata̤bî̌.
15Pwǎta hedě he ǒcǒǒtè̤ akhû̌akhî, he glè kè̌shǐ na mi̤sǎ.
Lṳmṳlî he gènè̤htò̌ akha he sî̌ya ta na ǒkû̌ ta he dě hesò̌phlǒmo̤ mè̤mè̤̌.
Currently Selected:
Ta̤htû̌sò̌ǐ 17: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
