Ta̤htû̌sò̌ǐ 118
118
Ta̤hî̌bwǐhî̌sîrî ata̤kwisaba ta ta̤ma̤pè̤ aya
1Cǒmara tûjûpwa̤ wǒ mè̤mè̤̌, hî̌bwǐhî̌sîrîhtò̌ lǒkho yǎ.
Ata̤mo̤ǐ htě ahǎbòjò tò̤nu, a ǒměǒgle tûjûpwa̤.#Ta̤khwè̌mǎnǎ awǐlǒ tabǎ 16:34; Ta̤khwè̌mǎnǎ ginǐ̤bǎ tabǎ 5:13, 7:3; Esara 3:11; Ta̤htû̌sò̌ǐ 100:5, 106:1, 107:1, 136:1; Jeremǐa 33:11
2No hî̌mò̌ Israelkhlilèphû̌ sîtoǒ ta, “Ata̤mo̤ǐ htě ahǎbòjò tò̤nu, a ǒměǒgle tûjûpwa̤.”
3No hî̌mò̌ Aro akhlialè a mî̌ pwa̤lṳhtò̌ta̤ toǒ ta, “Ata̤mo̤ǐ htě ahǎbòjò tò̤nu, a ǒměǒgle tûjûpwa̤.”
4No hî̌mò̌ kòyò htě a ǐsha bè̌dubè̌na̤ Cǒmara tûjûpwa̤nu toǒ ta, “Ata̤mo̤ǐ htě ahǎbòjò tò̤nu, a ǒměǒgle tûjûpwa̤.”
5He shěto̤bǎ ta ta̤pò̤ta̤sha dě he kwigwèbǎǐ Cǒmara tûjûpwa̤.
A gana̤de he ta̤kwihtò̌, a ma̤lû̌htò̌ he.
6Cǒmara tûjûpwa̤ mî̌ pwa̤ htě a ma̤jè he.
Kò ma̤ he hî̌tètè bǎbǎ, he ǐsha tò̤.#Rò̌mǎphû̌ 8:31; Ebrephû̌ 13:6
7Cǒmara tûjûpwa̤ ǒkû̌ hetokho dě a ma̤jè he akhû̌akhî, a nokè̌shǐ he ta pwa̤sò̌khě he toǒ lò̤jûkè.
8Nǎla̤ǐ Cǒmara tûjûpwa̤nu, awǒ꤮ khlo ta nǎla̤ǐ kòyòhǎkhû̌phû̌.#Ta̤htû̌sò̌ǐ 62:8-9, 146:3; Jeremǐa 17:5, 17:7
9Nǎla̤ǐ Cǒmara tûjûpwa̤nu awǒ꤮ khlo ta nǎla̤ǐ pwa̤htûdû̌htûpwa̤ pě.
10Lǒ̤꤮ bò khlilèphû̌ toǒ ǒte̤we̤bò he pwǎ̤tadě Cǒmara tûjûpwa̤ ma̤jè he akhû̌akhî, he ma̤pè̤kèbò asî.
11Asî ǒte̤we̤ he, aǒte̤we̤bò he pwǎ̤tadě Cǒmara tûjûpwa̤ ma̤jè he akhû̌akhî, he ma̤pè̤kèbò asî.
12Asî ǒte̤we̤bò he lò̤kèta wè̌ jolě̤lṳbǐ abǔnu.
Pwǎ̤tadě asî siphwèkè lò̤ta mî̌gè sǒkhwenu.
Cǒmara tûjûpwa̤ ma̤jè he akhû̌akhî, he ma̤pè̤kèbò asî.
13Pwa̤sò̌khě he toǒ jipwi̤ shěshǔ he dě he glè̌ lò̤jû phǔtînî̌ pwǎ̤tadě Cǒmara tûjûpwa̤ ma̤jè he.
14Cǒmara tûjûpwa̤ mî̌ heta̤khû̌ta̤ǎ, pwa̤ma̤kwaǐ he.
A mî̌ pwa̤ htě a ma̤lû̌htò̌ge he.#Ta̤lû̌htò̌ge 15:2; Isaǐa 12:2
15Kòyòcǒkòyòtè̤ ma̤pè̤ pwa̤sò̌khě asînu akhû̌akhî, gana̤demò̌ lè.
Asî kaǎgusò̌po̤ lǒkho dě ahǐphû̌kû ta, “Cǒmara tûjûpwa̤ mî̌ apo̤phǎshû̌sho mè̤mè̤̌.
16“A ma̤jè pa ta ata̤po̤ta̤phǎ akhû̌akhî, pa ma̤pè̤ ta̤.
“Cǒmara tûjûpwa̤ mî̌ apo̤phǎshû̌sho mè̤mè̤̌.”
17He si hǒtò̤, he ǒhtûpwa̤pe pwǎ.
He glè pwe̤ǐlṳ ta̤ htě Cǒmara tûjûpwa̤ ma̤htonu.
18Cǒmara tûjûpwa̤ sû̌ǐwǒge shosho he hǐnudě a nosi he hǒtò̤.
19Bòmo bǎ he ta̤lṳhtò̌ho atakhadû̌ htǒo.
He glè nṳ hî̌bwǐhî̌sîrîhtò̌ Cǒmara tûjûpwa̤.
20Takhahtǒomî̌ Cǒmara tûjûpwa̤ atakhakû.
Pǒ̤꤮ kòyòcǒkòyòtè̤ toǒ bǎ nṳbò bǎo.
21Kǒ Cǒmara tûjûpwa̤, na gana̤de heta̤kwisaba, na ma̤lû̌htò̌ge he akhû̌akhî, he hî̌bwǐhî̌sîrîhtò̌ na.
22Lo̤ htě kòyò ma̤htò̌ hǐ dě kò wîkè yǎ tamanu, a htûhtò̌ lo̤ htě alo̤bǎgutṳ̌ dě a tûhtû̌měbò hǐtama.#Isaǐa 8:14, 28:16; Matěo 21:42; Mǎ̤riko 12:10; Lǔka 20:17; Pwa̤nophû̌ toǒ 4:11; Petru awǐlǒ tabǎ 2:7
23Htǒonumî̌ Cǒmara tûjûpwa̤ ma̤ta̤ pwǎ.
Ama̤ta̤ htǒonu mî̌ a cǒklî̌kî̌ya mè̤mè̤̌.
24Mṳni̤ khò̌ti̤ni̤ mî̌ mṳni̤ htě Cǒmara tûjûpwa̤ bè̌lò̤nǎ hǒ.
Sò̌le̤sò̌lò̤ mo̤sû̌mo̤sò̌ plǒnû̌û.
25Kǒ Cǒmara tûjûpwa̤, ma̤lû̌htò̌kèmò̌ pa.
Kǒ Cǒmara tûjûpwa̤, ǐ pa ta̤ma̤pè̤.#Matěo 21:9; Mǎ̤riko 11:9; Jowǎ̤ni̤ 12:13
26Kòyò htě a hè ta Cǒmara tûjûpwa̤ ami̤ htǒotapwa̤nu, Cǒmara tûjûpwa̤ howi̤ tû̌ta a nî̌.
Pa ǒ dě Cǒmara tûjûpwa̤ ahǐkû dě pa howi̤ sî lǒ̤꤮ bò.#Matěo 21:9, 23:39; Mǎ̤riko 11:9; Lǔka 13:35, 19:38; Jowǎ̤ni̤ 12:13
27Cǒmara tûjûpwa̤ mî̌ pacǒmaradû̌, a ma̤mo̤ma̤wǒ pa.
Cǐhè ta̤phû̌ta̤li̤ la̤lṳtòhtò̌nu dě comě nû̌û ta sǒpli̤ bǎ ta̤lṳwa̤ ane̤lo̤.
28Na mî̌ hecǒmaradû̌, he glè hî̌bwǐhî̌sîrîhtò̌ na.
Na mî̌ hecǒmaradû̌, he glè htû̌sò̌ǐ na.
29Cǒmara tûjûpwa̤ wǒ mè̤mè̤̌, hî̌bwǐhî̌sîrîhtò̌ lǒkho yǎ.
Ata̤mo̤ǐ htě ahǎbòjò tò̤nu, a ǒměǒgle tûjûpwa̤.
Currently Selected:
Ta̤htû̌sò̌ǐ 118: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
