Ta̤htû̌sò̌ǐ 105
105
Cǒmaradû̌ ma̤lû̌htò̌kè akòyò toǒ
1Hî̌bwǐhî̌sîrî Cǒmara tûjûpwa̤, kwisabahtò̌ yǎta ami̤.
Ǐsî̌yadǒ bǎ khlilèphû̌ toǒ ta a ma̤hto ta̤nu.
2Sò̌po̤htò̌mò̌ yǎ, sò̌po̤ htû̌sò̌ǐmò̌ nû̌û.
Pwe̤ǐlṳbòmò̌ bǎ kò ta lǒ̤꤮ bò a ma̤ ta̤cǒklî̌kî̌yanu.
3Htû̌sò̌ǐ mò̌ ami̤cahtǐ.
No sò̌le̤sò̌lò̤ mò̌ kòyò htě a kè̌lǎ Cǒmara tûjûpwa̤nu.
4Kè̌lǎ mò̌ Cǒmara tûjûpwa̤, kwihtò̌ mò̌ atakhû̌ta̤ǎ.
Pṳ̂̌plǎplǎ hèphǔ alo̤mo̤.
5Gènè̤htò̌to̤ ta̤cǒklî̌kî̌ya, ta̤ma̤te̤pe̤ sû̌pi̤sò̌pi̤, ta̤cèròtocèròbǎ htě a ma̤htonu.
6Sî mî̌ Cǒmaradû̌ apwa̤ma̤ta̤phû̌ mî̌ Abraham aphû̌ali̤ hǒ.
Sî mî̌ Yǎ̤kò akhlialè htě Cǒmara wû̌lǎ toǒ hǒhǒ.
7A mî̌ Cǒmara tûjûpwa̤, pacǒmaradû̌ hǒ.
A cèròtocèròbǎbò hǎkhû̌běkhû̌.
8A gènè̤ǐ ata̤wṳ̂dò pṳ̂̌꤮ taplǎ.
Yo̤sǎ htě a olò̤hto toǒnu, kòyòtuhtu hto tuhtu, htu dě arî̌kû a shope̤nǎpè̤ tò̤.
9A glè cǒtè̤ ta ayo̤ htě a wṳ̂dòhto ta Abraham, a bèlò̤hto ta Isǎkonu.#Mǒhtûlû̌hǎhtûsa 12:7, 17:8, 26:3
10A bè̌měbè̌gle ata̤sû̌ta̤tòwò ta Yǎ̤kò.
A wṳ̂dò měgle ayo̤ ta Israel tûjûpwa̤.#Mǒhtûlû̌hǎhtûsa 28:13
11A hî̌ ta, “He glè ǐ na Khana̤ga pwǐ naû̌cata̤bî̌.”
12Bǎ a hî̌ yo̤ hǐnu akhanu, asî ǒpî̌tî̌lepe pwǎ.
Asî htû shǐpwa̤shǐmè̤ dě Khana̤gakûnu a ǒpî̌tî̌pe pwǎ.
13Asî lè ta̤ga hto ta̤ga, tò̤glò hto tò̤glò.
14A noma̤jîma̤jû asî ta kòyò dǐpwǎ̤꤮ tò̤.
Dě asî ayanu, a ǐsè̌rè̌nṳ Khwǐ toǒ dě a glè ma̤kwaǐ asî.#Mǒhtûlû̌hǎhtûsa 20:3-7
15A hî̌ ta, “Ma̤bǎma̤sha pûma̤ kòyò htě he wû̌lǎ yǎnu toǒ ma̤.
“Ma̤shama̤htò pûma̤ hepwa̤po̤nu toǒ ma̤.”
16Cǒmara tûjûpwa̤ noǒhtûhtò̌ gawi̤gakodû̌ dě Khana̤gakû.
A ma̤pî̌ma̤lṳ̂kèbò asîsǒsǎwû̌pho bǔmṳ sîtoǒ.#Mǒhtûlû̌hǎhtûsa 41:53-57
17A sûcû̌wǐ kòyò tapwa̤ dě asî alo̤mo̤.
Kò shaǎcû̌kè Jǒjè dě Egyptga pwǐ jû tapwa̤.#Mǒhtûlû̌hǎhtûsa 37:28, 45:5
18Kò coklo htòbò nû̌ûkhò̌lopo̤ ta sǒpli̤ te̤htò̌.
Kò kǒle̤nṳ te̤htò̌pli̤ dě agobolo̤.#Mǒhtûlû̌hǎhtûsa 39:20-40:23
19Cǒmara tûjûpwa̤ pwe̤ǐnǎ yo̤ toǒ lǒhtò̌behtò̌ hǒtò̤nu, a ma̤kè̌pe Jǒjè ata̤bè̌ sò̌phlǒsû̌shi.
20Egyptgaphû̌ plûhtò̌kè Jǒjè.
Pwa̤pǒǐ khlilèphû̌ toǒnu tapwa̤ plûhtò̌ pelekè nû̌û.#Mǒhtûlû̌hǎhtûsa 41:14
21Khwǐ nohtû nû̌û ta pwa̤pǒǐ yǎ hohta.
A nopǒǐ nû̌û ta Khwǐ ata̤kî̌ta̤kû̌ lǒ̤꤮ bò.#Mǒhtûlû̌hǎhtûsa 41:39-41
22Jǒjè yṳ̂klè̌nè̌klò bǎ Khwǐ apwa̤ma̤ta̤phû̌ toǒ pwǐ ata̤sò̌yṳ ǒnu.
A sû̌tòwòǐ pwa̤htû hǐkǒlǒkòdû̌ htě a ǐsî̌yajè Khwǐ htǒotapwa̤nu toǒ.
23Htodě Israel hèto̤ dě Egyptga.#Mǒhtûlû̌hǎhtûsa 46:6
A hèǒ shǐtè̤mè̤ gûmṳ̂ bǎ Hamǎkhlilèphû̌ ǒǐ gakû.#Mǒhtûlû̌hǎhtûsa 47:11
24Cǒmara tûjûpwa̤ nophû̌ǒwo̤ li̤ǒphǎ akòyò.
A nokhû̌ǎshû̌shokhlo asî ta pwa̤sò̌khě asînu.#Ta̤lû̌htò̌ge 1:7-14
25A notèlè̌khǒkè Egyptkhlilèphû̌ asò̌phlǒ.
A nosò̌khěkhû̌khwè Egyptkhlilèphû̌ toǒ ta Cǒmara apwa̤ma̤ta̤phû̌ toǒ.
26A sûhè apwa̤ma̤ta̤phû̌ Mǒ̤jè ta Aro htě a wû̌lǎ htǒonu sò̌gini̤.#Ta̤lû̌htò̌ge 3:1-4:17
27Mǒ̤jè ta Aro dǔlṳ bǎ Cǒmara ata̤ma̤te̤pe̤ sû̌pi̤sò̌pi̤ dě Egyptkhlilèphû̌ akla.
A dǔlṳpo̤ ta̤ma̤cǒklî̌kî̌ya dě Hamǎkhlilèphû̌ agakû.
28Cǒmara nokhǐlò̤ sagala̤bò.
Pwǎ̤tadě Egyptkhlilèphû̌ ma̤tukutakǎshǔ yo̤ dě a hî̌lò̤nu tò̤.#Ta̤lû̌htò̌ge 10:21-23
29Cǒmara nohtûhtò̌kèbò asîshikhî̌ ta sǐ, dě tò̤phû̌ sikèbò.#Ta̤lû̌htò̌ge 7:17-21
30Dî̌phû̌ toǒ ǒbetî̌pî̌꤮ bò dě asîgakû pṳ̂̌꤮ tò̤glò.#Ta̤htû̌sò̌ǐ 8:1-6
A cû̌to̤ ǒto̤bò dě Khwǐcophǎ hohtakû.
31Bǎ Cǒmara hî̌lò̤ ayo̤ akhanu, phǔsǒphû̌ ta kadǎ toǒ a wi̤cû̌ ǒbebò asîga sagala̤.#Ta̤lû̌htò̌ge 8:16-24
32Khwè̌ to ju dě asîga sagala̤ pwǎ̤tadě Cǒmara nojulò̤ sèwèji, anolò̤ tî̌lî̌ dě asî gakû.#Ta̤lû̌htò̌ge 9:22-25
33A ma̤pî̌kèbò Egyptphû̌ asobîmṳ ta dǐshimṳ.
A ma̤lòkhǔ ma̤la̤gakèbò sǒmṳ dě asîgakû.
34A hî̌lò̤ ayo̤ dě dèpo̤ toǒ hèlò̤bò.
Dèpo̤ toǒ mî̌ dǒbòpè̤pe tò̤.#Ta̤lû̌htò̌ge 10:12-15
35Asî lò̤ǎbò sǒdosǒlǎ sulè̌sula ǒ dě gakû.
A lò̤ǎbò ta̤sǎta̤pho htě asî lǔ dě ahǔklakhû̌.
36Htodě Cǒmara ma̤sikèbò Egyptkhlilèphû̌ aphû̌wè̤pwa̤.
Phû̌wè̤pwa̤ mî̌ asî ta̤khû̌ta̤ǎ awǐgutṳ̌ tacǎ.#Ta̤lû̌htò̌ge 11:1-12:30; Ta̤htû̌sò̌ǐ 78:51, 135:8
37A kaǎhǎhtò̌gekè Israelphû̌ toǒ, asî to̤ge lǒkho wûhta.#Ta̤lû̌htò̌ge 12:33-36
Dě asîkhli aklanu, akhû̌ǎyû̌lò̤ ǒ dǐpwǎ̤꤮ tò̤.
38Egyptkhlilèphû̌ sîtoǒ ǐsha mè̤mè̤̌ Israelphû̌ toǒ ala̤ akhû̌akhî, bǎ asî hǎhtò̌ge akhanu, Egyptkhlilèphû̌ toǒ sò̌le̤sò̌lò̤ lǒ̤꤮ bò.
39Cǒmara hǔyo̤ǔ ma̤kwabǐ asî ta poǒlṳ.
Lṳmṳkhǐ dě a shělîlò̤ bǎ asî ta mî̌.#Ta̤lû̌htò̌ge 13:21-22
40Asî kwihtò̌ ta̤yî̌ dě a ǐlò̤ bǎ asî htû̌wǐ.
A ǐlò̤ asî ta mû̌ ǒ dě mǒkhû̌ hèlò̤, asî ǎkǒobebò.#Ta̤lû̌htò̌ge 16:2-15
41Cǒmara ma̤phò̌ bǎ asî lo̤ dě shi shǐhtò̌.
A dû̌cû̌ nò̤꤮ dě lo̤mî̌shǒklakhû̌ lò̤kèta shikhî̌.#Ta̤dǒbǎ 20:2-13
42Hǐnudě Cǒmara gènè̤to̤ ata̤olò̤ htě acahtǐ dě a olò̤hto ta apwa̤ma̤ta̤phû̌ Abrahamnu, dě a ma̤ bǎ asî hǐnu.
43Hǐnudě a kaǎhǎhtò̌ge akòyò dě Egyptgakû ta ta̤sò̌le̤sò̌lò̤.
A kaǎhǎhtò̌ge akòyò htě awû̌lǎnu ta ta̤sò̌po̤ mo̤sû̌mo̤sò̌.
44Khlilèphû̌hǔwa̤ hǎkhû̌ hǔkla toǒnu, a ǐbò nû̌ûta asî.
Kòhǔkla htě kò htǒkhû̌htǒǎma̤ toǒnu, a htûkè asî ta̤.#Jò̌shua 11:16-23
45Ma̤pûhǐ asî gana̤debò Cǒmara ata̤hî̌bǎlò̤yo̤ dě asî glè jûle̤phî̌yo̤bò nû̌ûta̤sû̌ta̤tòwò ayanu, a ma̤pwǎ ta̤ htǒotoǒ.
Htû̌sò̌ǐ Cǒmara tûjûpwa̤.
Currently Selected:
Ta̤htû̌sò̌ǐ 105: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
