Ta̤htû̌sò̌ǐ 10
10
Ta̤kwicaba ta la̤ma̤pî̌kè pwa̤ma̤jîma̤jû kò aya
1Kǒ Cǒmara tûjûpwa̤, na cû̌tepheyî̤ mè̤mè̤̌ ma̤tè?
Bǎ pa bǎpò̤bǎsha mè̤mè̤̌ akhanu, na cû̌ ǒhǔ nana̤ ma̤tè?
2Kòyòjîkòyòphû̌mò̤ phî̌htò̌yî̤ ana̤ toǒnu, a pè̤ǎpè̤o kòyòshuphǔshèwèphû̌.
Nokhabǎnṳ gesǒtû̌ asî htò̌glo htě a dò̌nǎ kònu.
3Asî hî̌bǎhtò̌yî̤ lǒkho dě a sò̌yṳ shokhû̌ye̤yo̤ ma̤phû̌mò̤ kòhǔwa̤.
Kòyò htě aphî̌sigwiwe̤saphǎ ǎ pǒ̤꤮ tû̌ ayanu toǒ a ǐsho, wîkè Cǒmara tûjûpwa̤.
4Dě asî phî̌dû̌phî̌htû lǒkho ana̤ akhû̌akhî, asî kè̌lǎpe Cǒmaradû̌ tò̤.
Asî gènè̤to̤pe Cǒmaradû̌ dǐcǎ꤮ tò̤.
5Asî sò̌yṳ titè꤮ nu a nî̤bǎ pṳ̂̌꤮ taplǎ.
Asî sî̌yahtûbò̌ Cǒmaradû̌ ata̤cèrò aklè̌aklò tò̤.
A hî̌khǒwa̤shǔbò pwa̤sò̌khě asî toǒ.
6“Pa la̤lò̤jûlò̤po̤nu tòkhò̌꤮ a ǒpe tò̤.
“Pṳ̂̌plǎplǎ pa sò̌le̤sò̌lò̤ pě. Ta̤jîta̤jûnu a hèbǎjòpe pa dǐkhò̌꤮ tò̤,” a gènè̤ lǒkho ana̤ hǐnu.
7Asî ta̤hî̌bǎhî̌sho lǒbebò ta ta̤ǐshoǐbě, ta̤lòhǎlòho, ta̤hî̌sò̌gònò̤ ǐsha kò.#Rò̌mǎphû̌ 3:14
Asîkhû̌phě lǒbebò ta ta̤hî̌bǎ sò̌khěkhû̌khwè, hî̌bǎ phû̌mò̤shî̌hto kò.#Yò̤̌bǎ 20:12
8Asî cû̌ ǒhǔphǔ dě dohtu, ǒpo̤ ma̤sishǔ kòyò htě ata̤sǔ ǒtò̤.
Pṳ̂̌plǎplǎ asî kè̌lǎma̤si kòyò htě a shodo pwa̤ma̤jè.
9Asî cû̌ǒhǔ lǒkho joji̤kla dě kè̌johǔ sǒsǒta sî̌ò̌ ǒhǔpṳ̂ǎ ta̤mi̤nu.
A ǒpo̤dǒshǔ kòyò htě a shodo pwa̤ma̤jènu aklè̌.
A pṳ̂nṳ kòyò htě a shodo pwa̤ma̤jènu ta htò̌glo, a cǐjûgrû cû̌ tepheyî̤kè asî.#Mika 7:2
10Asî ma̤jîma̤jû shò̌tûnû̌lò̤kè kò dě hǎkhû̌.
Kòyò shodo pwa̤ma̤jè htǒotoǒ lòte̤nṳkè dě kòyò khû̌ǎshû̌sho acǔdekû.
11Kòyòphû̌mò̤nu toǒ a gènè̤ lǒkho ana̤ ta, “Cǒmara shope̤nǎkè pa hǒ.
“A kè̌khǒkè dě a kè̌shǐpe pa tò̤.”
12Kǒ Cǒmara tûjûpwa̤, ihtǒmò̌ tò̤ya, phlěkèmò̌ kòyòphû̌mò̤nu toǒ tò̤ya.#Mika 5:9
Shope̤nǎkè pûma̤ kòyò htě a khòjîkhòjûnu ma̤.
13Kòyòphû̌mò̤ cû̌hî̌bǎ takǎ na gètè̤̌ numî̌ ma̤tè?
“Cǒmara phlě pa dǐkhò̌꤮ tò̤,” a cû̌hî̌tǒ̤ hǐnu ma̤tè?
14Na kè̌shǐ sî̌ya te̤mǎhtobò ta̤pò̤ta̤sha, ta̤khòjîkhòjû hǒ.
Na gènè̤ tîwî̌tòwò te̤mǎwǒnǎ dě na glè ma̤jè kò.
Pwa̤bǎpò̤bǎsha ǐlò̤ ana̤ dě nacǔdekû.
Na mî̌ pwa̤ma̤kwaǐ phû̌ htě a shodomo̤pha.
15Delagakèbòmò̌ kòyòjîkòyòjû, kòyòphû̌mò̤ acû̌go.
Cèròkèbòmò̌ ta̤sǔta̤plě htě asî ma̤nu toǒ to̤htû̌ asî ma̤bò̌pe dǐcǎ꤮ tò̤nu.
16Cǒmara tûjûpwa̤ mî̌ Khwǐ htě a pǒta̤ tûjûpwa̤ talakhǎ.
A glè wṳ̂hǎhtò̌kèbò shigaphû̌ toǒ dě ashigakû.#Ta̤dǒhtû̌ǐ 8:20
17Kǒ Cǒmara tûjûpwa̤ na sî̌ya kòyò htě a khòbǎ ta̤pò̤ta̤shanu toǒ ata̤sò̌yṳgwabǎǐ hǒ.
Na ǐkhû̌ǐǎ ǐshû̌ǐshohtò̌ asîsò̌phlǒ hǒ, na gana̤de asî ta̤kwigwèbǎǐ hǒ.
18Ma̤pûhǐ kòyòhǎkhû̌phû̌ htě a sijò htǒotoǒ ma̤sò̌gònò̤ ǐshape pûma̤ phû̌ htě shodomo̤pha ta kòyò htě kò pè̤ǎpè̤o nû̌ûnu ma̤ ayanu, na ma̤kwaǐ asî hǒ.#Isaǐa 29:20
Currently Selected:
Ta̤htû̌sò̌ǐ 10: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
