Mǒhtûlû̌hǎhtûsa 42
42
Jǒjè awè̤sî cû̌pwî̤ lǒkho bǔkû̌lǎ dě Egyptga
1Bǎnukha, Yǎ̤kò ta ahǐphû̌phòphû̌ ǒ dě Khana̤ga, dě bǎ Yǎ̤kò gana̤de ta bǔkû̌lǎ ǒ dě Egyptga akhanu, a hî̌ aphû̌sî, “Sî cû̌꤮ ǒ dò̌tûklû̌ kè̌ǐ nû̌û tapwa̤ ta tapwa̤ mî̌ ma̤tè, tapwǎpwǎ꤮ ama̤ pwǎ sî ya? 2He gana̤de ta dě Egyptganu bǔkû̌lǎ ǒ hî̌ lè, ma̤pûhǐ pa si tò̤, pa ǒhtûpwa̤ sělě bò̌pe ayanu, hǎte̤lò̤mò̌, cû̌mò̌ dě cû̌pwî̤ dǒmò̌ lǒkho kò bǔkû̌lǎ bǎnu nî̌.”#Ta̤htû̌sò̌ǐ 33:18-19; Pwa̤nophû̌ toǒ 7:12
3Hǐnuakhû̌akhî, Jǒjè awè̤makhûnu apwa̤shǐ hǎte̤lò̤ lǒkho Egyptga dě a lò̤pwî̤ lǒkho bǔkû̌lǎ bǎnu. 4Pwǎ̤tadě Yǎ̤kò nocû̌htu Jǒjè apṳmakhû Bejame ta awè̤sî tò̤, ma̤tè̤hî̌dě pěmî̌ aphû̌ Bejame cû̌ htûhtò̌ bǎ nû̌û timitacǎ hè̌ a ǐsha hǐnu. 5Bǎ Khana̤ganu mî̌ gawi̤gako ǒhtò̌dû̌dǒ akhû̌akhî, Yǎ̤kò#42:5 Yǎ̤kò ta Israel mî̌ tapwa̤pa. aphû̌makhû toǒ cû̌htu kû̌ta kòhǔwa̤ toǒ dě a lò̤pwî̤ lǒkho bǔkû̌lǎ bǎnunu.#Pwa̤nophû̌ toǒ 7:11
6Khònò̤dě Jǒjè htò̌htû pwa̤pǒshipǒga bǎ Egyptga, dě a shaǎlò̤bò bǎ shiphû̌gaphû̌ toǒ bǔkû̌lǎ. Dě bǎ Jǒjè awè̤sî toǒ hèto̤ akhanu, asî gene̤lò̤ û̌tṳglulò̤ lǒkho hǎkhû̌. 7Jǒjè kè̌shǐ awè̤ sî ta a to̤ǐsělě asî, pwǎ̤ta a jî ana̤ pwǐ a sî̌ya asî tò̤nu, dě a hî̌bǎshû̌hî̌bǎsho asî, “Sî ǒ bǎtè hè?”
Dě asî hî̌shǔ nû̌û, “Pa ǒ Khana̤ga hè dě pa hè pwî̤kû̌ kòyò bǔkû̌lǎ la̤ǎ bǎo.”
8Jǒjè to̤ǐ awè̤sî pwǎ̤ta awè̤sî to̤ǐ nû̌û tò̤. 9Jǒjè gènè̤bǎ gesǒ a ahǎmoǒmi̤mò̤ǐ asî awi̤akè̌nu dě a hî̌ asî, “Sî mî̌ pwa̤htûkè̌sû̌kè̌jota̤ toǒ lè! Ma̤pûhǐ sî hèshě pa ayanu, sî hèsèlèkè̌ wǐ pashiga akhû̌ǎjalò̤ htě pa ma̤kwaǐbò̌ tò̤nu tò̤glòglò yahî̌.”#Mǒhtûlû̌hǎhtûsa 37:5-10
10Asî hî̌shǔ, “Kǒ běcǎ, amè̤ nǒtò̤꤮, pa hèpwǎ pwǐ najû toǒnu pwǎ꤮, pa hèpwî̤dǒpwǎ shǎǎshǎo pwǎ꤮. 11Lǒ̤꤮ bò pahtǒo toǒ mî̌ paphahtupwǎ nû̌û nî̌꤮. Najû htǒotoǒ mî̌ kòyò cǒtè̤꤮ toǒ pwǎ, pwa̤htûkè̌sû̌kè̌jota̤ mè̤ nǒtò̤꤮.”
12Dě Jǒjè hî̌po̤ asî, “A mè̤ tò̤, sî hèsèlèkè̌ pashiga akhû̌ǎjalò̤ htě pa ma̤kwaǐbò̌ tò̤nu tò̤glòglò yahî̌.”
13Pwǎ̤tadě asî hî̌geshǔsǒ nû̌û, “Najû htě pa htǒo toǒmî̌ paphahtupwǎ nû̌û dě papṳwè̤ makhû ǒ shǐsò̌gini̤ dě pa ǒ Khana̤ga. Papṳmakhû kònò dě a ǒkè kû̌ta papha, tapwa̤pe dě aǒpe tò̤ hǒ.”
14Jǒjè hî̌shǔ asî, “Pwǐ he hî̌hto sînu, sî mî̌ pwa̤htûkè̌sû̌kè̌jota̤ toǒ pwǎ! 15He bǎ sèlèkè̌bǎ sî hǐnu, he bè heyo̤ ta Khwǐ ami̤ dě sîpṳkònò dè hèto̤ bǎo hǒtò̤ hî̌mî̌, Sî bǎ hǎhtò̌cǔtephe ta gûla̤ bǎo tò̤. 16Sîkla tapwa̤pwa̤ bǎ gekaǎhè sîpṳ, a ǒkè toǒ dě bǎ dǒlò̤te̤bò asî dě apo̤kû pě, ma̤pûhǐ he sî̌ya ta sî hî̌bǎcǒtè̤ yo̤ ya mî̌tò̤yanu he bǎ sèlèkè̌ sî hǐnu. Sî dè hî̌lòho hî̌mî̌, he bè heyo̤ ta Khwǐ ami̤ dě sî mî̌ pwa̤htûkè̌sû̌kè̌jota̤ toǒ hǒ.” 17Htodě a dǒlòte̤bòkè awè̤sî dě apo̤kû suni̤.
18Abe suni̤ ti̤ni̤ akhanu, Jǒjè hî̌ asî, “He mî̌ kòyò htě a bè̌dû̌bè̌htû Cǒmaradû̌ tapwa̤ akhû̌akhî, ma̤ lǒkho pwǐ he hî̌ sînu, sî htûpwa̤tû̌ pě. 19Sî dè mè̤mè̤̌ kòyòcǒtè̤ toǒ hî̌dě, noǒkè sîpṳwè̤ tapwa̤pwa̤ bǎ apo̤kû bǎo, ahǔwa̤ toǒ dě phî̌nṳ lǒkho bǔkû̌lǎ la̤ǎ htǒo dě ge lǒkhomò̌ sîhǐphû̌phòphû̌ htě a shěto̤bǎ ta ta̤hǒwi̤nu toǒ aǒnu. 20Pwǎ̤tadě ma̤pûhǐ he sî̌ya ta sî hî̌bǎcǒtè̤ dě he noma̤si sî ta kò tò̤ ayanu, sî bǎ ge kaǎhè sîpṳkònò bǎ heǒ bǎo.” Dě asî jû lǒkho pwǐ a hî̌nu.
21Dě asî tapwa̤ ta tapwa̤ hî̌ lǒkho nû̌û, “A htûhtò̌ hǐnu mî̌ mî̌htě pa ma̤sǔ Jǒjè akhû̌akhî hǒ. Pa kè̌shǐ ta ajîajû mè̤mè̤̌ nû̌û dě a kwigwèbǎǐ pa ta asò̌phlǒhtûpwa̤ aya hǐnudě pa bè̌dubè̌na̤ dǐcǎ꤮ tò̤. Hǐnuakhû̌akhî, ta̤jîta̤jû htǒo a lò̤bǎ pakhû̌ hǒ.”
22Rube hî̌shǔ asî, “Ma̤pò̤ma̤sha pû a ma̤ nî̌꤮ he hî̌sî yahî̌. Sî gana̤de tò̤ nǔ! Khònò̤dě pa ma̤si yǎ dě pa ma̤sǔ a htǒo akhû̌akhî, pa bǎ khòbǎkè hǒ.”#Mǒhtûlû̌hǎhtûsa 37:21-22 23Asî gènè̤ lǒkho ta Jǒjè sî̌ya asî yo̤ tò̤. Ma̤tè̤hî̌dě bǎ Jǒjè ta asî hî̌bǎ nû̌û akhanu, a noǎ pwa̤hî̌tèplè̌htò̌jòyo̤ dě asî plǎkû.
24Jǒjè hǎhtò̌cû̌ tephekè ta asî dě a cû̌hǎ hǔ. Htodě a gehî̌bǎsǒ ta asî. Dě a nokaǎhǎhtò̌ Simeo dě a nocomě nû̌û apṳwè̤sî lo̤mo̤.
25Jǒjè noto̤nṳbebò bǔkû̌lǎ dě awè̤sî huěkû. Dě awè̤sî tapwa̤꤮ ta tapwa̤ awû toǒnu anoshû̌nṳbòsǒ asî huěkû. Htodě asî la̤ge klè̌lo̤ ayanu, a ǐgenṳpo̤ asî la̤ǎla̤o. Dě Jǒjè apwa̤ma̤ta̤ toǒ ma̤bǎ nû̌û pwǐ a hî̌nu. 26Htodě asî dò̌htò̌ bǔkû̌lǎ mòû̌lǎtoǒ alo̤ dě asî hǎhtò̌ge lǒkho.
27Dě bǎ lṳmṳkhǐ, asî ǒkǔ bǎ gûla̤ la̤ǒkǔ akhanu, asîkla tapwa̤ glè̌ bǔǎ amòû̌lǎ ashǎ ta hu dě a bòmo ahuě akhanu, a kè̌shǐ awû huěkû. 28Dě a pwe̤ǐ apṳwè̤sî, “Kò bè̌nṳ gesǒ bǎ hewû huěkû htǒo, Kè̌mò̌lè! A ǒ he huěkû htǒo.” Hǐnu akhû̌akhî, ajîbò asî sò̌phlǒ, dě a ǐsha gònò̤gèglèbò lǒkho dě a hî̌ kè̌khînû̌û tapwa̤ ta tapwa̤, “Ǒ꤮ Cǒmaradû̌ cû̌ma̤tǒ̤ pa hǐnu mî̌ ma̤tè?”
29Bǎ asî geto̤ Khana̤ga asîpha Yǎ̤kò ǒǐ ga akhanu, asî ge pwe̤ǐlṳbò apha ta ta̤ lǒ̤꤮ bò htě a htûhtò̌ ta asînu toǒ. Dě asî hî̌, 30Pwa̤pǒshipǒga htě a pǒǐ shiga bǎ Egyptganu tapwa̤, a hî̌bǎshû̌hî̌bǎsho mè̤mè̤̌ pa, a hî̌ pa ta pa hèkè̌sû̌kè̌jo asîga. 31Pwǎ̤ta pa hî̌ yǎ, pa mî̌ kòyòcǒtè̤ pwǎ, pwa̤htûkè̌sû̌kè̌jota̤ mè̤ tò̤. 32Pa htǒo toǒmî̌ paphahtubòpwǎ nû̌û dě papṳwè̤ makhû ǒ shǐsò̌gini̤. Papṳmakhû kònò mî̌ a ǒkèkû̌ta papha dě Khana̤ga, tapwa̤pe dě aǒpe tò̤ hǒ.
33“Kòyò htě a pǒ shiga bǎnu tapwa̤ hî̌ pa, Ma̤pûhǐ he sî̌ya ta sî mî̌ kòyòcǒtè̤ mè̤mè̤̌ya mè̤tò̤ yanu, he ma̤ hǐnu, noǒkè sî pṳwè̤ tapwa̤pwa̤ bǎ heǒ bǎo, ahǔwa̤ toǒ dě phî̌nṳ lǒkho bǔkû̌lǎ dě ge lǒkhomò̌ sîhǐphû̌phòphû̌ htě a shěto̤bǎ ta ta̤hǒwi̤nu toǒ aǒnu, dě hǎhtò̌ge mò̌ lǒkho. 34Pwǎ̤ta sî bǎ ge kaǎhè sîpṳkònò bǎ heǒ bǎo dě he sî̌ya ta sî mî̌ pwa̤htûkè̌sû̌kè̌jota̤ mè̤tò̤, kòyòcǒtè̤ toǒ pě, dě he ǐgesǒ sîpṳwè̤ Simeo pě, dě sî pwî̤shaǎ ma̤guma̤khè̌ nṳdǒ bǎ gakû bǎo pě.”
35Bǎ asî glohǎhtò̌ hu dě asî huěkû akhanu, asîwû toǒ a ǒbò asî huěkû pṳ̂̌꤮ tapwa̤. Bǎ asî ta apha kè̌shǐ wûhta toǒ akhanu, a ǐshabò lǒkho. 36Asîpha Yǎ̤kò hî̌ asî, “Sî ma̤hǎmǎbò hephû̌ toǒ hǒ, Jǒjè ǒpetò̤ hǒ, htodě Simeo mî̌ ǒpetò̤tò̤ hǒ, khònò̤dě sî glè̌ kaǎcû̌pe Bejame me, sî ma̤ta̤ hǐnudě ta̤guta̤gè pṳ̂̌tacǎ lò̤bǎbò he hǒ!”
37Htǒotaplǎ dě Rube hî̌ apha, “He dè kaǎgenṳsǒ Bejame dě naǒ tò̤ hî̌nu, tûrû̌꤮ ma̤sikè tû̌ hephû̌makhû htǒosò̌gini̤nu. Yṳǎ he dě nocû̌ a hecǔdekûnu, he kaǎgesǒtû̌ yǎ dě naǒ pě.”
38Pwǎ̤tadě Yǎ̤kò hî̌shǔ, “Bejame bǎ gûcû̌nṳ kû̌ta sî tò̤, awè̤dě a sikè hǒ, hema Rakhelǎ phû̌ǒlò̤ aklanu a ǒkèpwǎ tǒ̤꤮ a tapwǎ̤ pa. Bǎ na kaǎcû̌ a klè̌lo̤ akhanu, pěmî̌ a cû̌htûhtò̌jò tacǎcǎ hè̌. He mo̤pwa̤ le hǒ, pěmî̌ he si ta sî ma̤guma̤gè sǎpla̤jî he htǒo akhû̌akhî hè̌.”
Currently Selected:
Mǒhtûlû̌hǎhtûsa 42: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
