Mǒhtûlû̌hǎhtûsa 2
2
1Ta̤bǒlò̤ mǒkhû̌ ta hǎkhû̌ ta ta̤ ǒ nû̌ûkû pṳ̂̌꤮ tacǎ htobò hǒ. 2Cǒmaradû̌ ma̤htobò ata̤bǒlò̤ toǒ hǒ dě bǎ mṳni̤ susǒti̤ni̤nu ti̤ni̤nu, a ǒkǔ dě a ma̤pe ta̤ma̤ dǐcǎ꤮ tò̤. #Ta̤lû̌htò̌ge 20:8-11, 31:17; Ebrephû̌ 4:4, 10 3Ma̤tè̤hî̌dě Cǒmaradû̌ bǒlò̤ ta̤ lǒ̤꤮ bònu a htobòhǒ dě a ǒkǔ bǎnu ti̤ni̤. Hǐnudě a howi̤homò̤ mṳni̤ susǒti̤ni̤nu ti̤ni̤ htodě a bè̌cahtǐ nû̌û.
Ta̤bǒlò̤ mamǔ ta makhû
4Dě ta̤wi̤ta̤kè̌ htǒotoǒ numî̌ bǎ Cǒmaradû̌ bǒlò̤ mǒkhû̌ ta hǎkhû̌ akha toǒ awi̤akè̌ hǒ.
Bǎ Běcǎ Cǒmara tûjûpwa̤ bǒlò̤ hǎkhû̌ ta mǒkhû̌ toǒ akhanu, 5Ta̤khlita̤lè ta sǒdosǒlǎ sîtoǒ dǒhtò̌phǎhtò̌ dǐmṳ̌ hǒtò̤. Sǒmṳwû̌bo sîtoǒ a dǒhtò̌phǎhtò̌ hǒtò̤tò̤, ma̤tè̤hî̌dě Běcǎ Cǒmara tûjûpwa̤ nojulò̤ khwè̌ hǎkhû̌bǎo hǒtò̤, dě pwa̤ma̤hǔkla mî̌ a ǒ dǐpwǎ̤ hǒtò̤tò̤. 6Pwǎ̤ta shi ǒ dě hǎla̤ toǒnu asǐcǒ bǎ hǎkhû̌. 7Htodě Běcǎ Cǒmara tûjûpwa̤ phî̌ lo̤hǎ dě a bǒ nû̌ûta makhû tapwa̤. Dě a ǔnṳ gili̤ dě a ǐ ta̤htûpwa̤ ta makhû nò̌khikû dě makhû htǒo a htûpwa̤htò̌. #Kòrî̌tiaphû̌ awǐlǒ tabǎ 15:45
8Běcǎ Cǒmara tûjûpwa̤ tîwî̌tòwò shǒnǎ bǎ makhû aya we̤kû te̤we̤ htě kò kaǎ nû̌ûta Edî we̤kû gamṳhtò̌ taga dě a bè̌ǒlò̤ makhû htě a bǒnu tapwa̤ bǎ we̤kûnu. 9Htodě Běcǎ Cǒmara tûjûpwa̤ nodǒhtò̌ sǒmṳwû̌bo pṳ̂̌꤮ tacǎ dě awî̤atè̤ mè̤mè̤̌ a sǎhtò̌ sǒsǎnu awǐashu mè̤mè̤̌ toǒ. Dě we̤ kamakûnu sǒmṳ htě a ǐ kò ta̤htûpwa̤nu a ǒ tosǒ, ta sǒmṳ htě a ǐ kò ta kò glè sî̌ya ta̤wǒ ta ta̤phû̌mò̤ tosǒnu a ǒ dǒ bǎnunu. #Ta̤dǔlè̌nǎ 2:7, 22:2, 14 10Shikhî̌ tobo tèhtò̌ dû̌hè Edî we̤kû dě a ǐ dû̌hègûjûbò sǒmṳ bǎ Edî we̤kûnu toǒ, dě Shikhî̌htǒo tobonu a dû̌hè phû̌phòhǎhtò̌ gesǒ shiklo lǐ̤bo. 11Shiklo awǐgutṳ̌ tobonu kò kaǎ nû̌ûmi̤ ta Phǐsho, dě a dû̌hè te̤we̤lṳ̂cû̌bò Hawǐlaga htě hta la̤hǎhtò̌nu taga hǒ. 12Hta bǎnu tò̤glòmî̌ htawî̤ mè̤mè̤̌, ta̤nṳmû̌ htě kò kaǎ nû̌ûta Badola ta lo̤pwî̤dû̌ htě kò kaǎ nû̌ûta Shahalo̤ toǒnu kò kè̌shǐ a hǎhtò̌ bǎnu. 13Shiklo ginǐ̤bo tobo mî̌ kò kaǎ nû̌ûmi̤ ta Gǐho, a dû̌hè te̤we̤lṳ̂cû̌bò bǎ Kǔshǎgakû. 14Shiklo subo tobonu kò kaǎ nû̌ûmi̤ ta Tǐkorǐ, a dû̌hènṳ cû̌ Ashurǎgakû dě a dû̌hǎhtò̌to̤ gamṳhtò̌ tokho. Htodě shiklo lǐ̤bo tobonu kò kaǎ nû̌ûta Uphrětǐ shikhî̌.
15Běcǎ Cǒmara tûjûpwa̤ nṳbè̌ǒ makhû bǎ Edî we̤kûnu, dě a noǎwè̤ nokè̌ǐkhwè̌ǐ nû̌û. 16Dě Běcǎ Cǒmara tûjûpwa̤ mǎnǎ ayo̤, “Sǒ titètè̌ asǎ bǎbǎ, a ǒ Edîwe̤kû toǒnu, na ǎ mî̌ anî̤bò pwǎ. #Mǒhtûlû̌hǎhtûsa 3:2-3 17Pwǎ̤ta sǒmṳ htě ami̤ ta sî̌ya ta̤wǒ ta ta̤phû̌mò̤ htǒotṳmṳ asǎnu, na běǎ yǎ anî̤ dî̌kî̌꤮ tò̤. Na dè ǎ a hî̌numî̌ na si mè̤mè̤̌ bǎ na ǎ anu ti̤ni̤ pě.” #Rò̌mǎphû̌ 6:23; Jǎgomo̤ 1:15 18Htodě Běcǎ Cǒmara tûjûpwa̤ hî̌ gesǒ ayo̤, “Makhû ǒtû̌pwǎ tapwa̤pa dě awǒ ta aya tò̤. He glè bǒlò̤ bǎ a pwa̤ma̤jè nû̌û akhobǒsû̌ htě ate̤bǎte̤to ta aya tapwa̤.” #Kòrî̌tiaphû̌ awǐlǒ tabǎ 11:9
19Htodě Běcǎ Cǒmara tûjûpwa̤ phî̌ lo̤hǎ dě a bǒlò̤ nû̌ûta ta̤phû̌ta̤li̤ lǒ̤bò ǒ hǎkhû̌ htǒonu toǒ ta htû̌phû̌yṳphû̌ wi̤ dě mǒla̤nu toǒ. Dě ma̤pûhǐ Cǒmara kè̌shǐ sî̌ya makhû htǒotapwa̤ kaǎbò kwè̌꤮ ta̤phû̌ta̤li̤ htǒotoǒ ami̤ hî̌tènu, Cǒmara sûhèbò ta̤phû̌ta̤li̤ htǒotoǒ aǒ dě makhû htǒo kaǎ asîmi̤ hî̌tènu a htûbò asîmi̤ hǐnu hǒ. #Mǒhtûlû̌hǎhtûsa 1:24, 26 20Hǐnudě makhû kaǎ ta̤phû̌ta̤li̤ htě kò bǔǐ a dě hǐphònu toǒ ta htû̌phû̌yṳphû̌ wi̤ dě mǒla̤nu toǒ ta ta̤mi̤ta̤mò̤ ǒ dě mi̤klanu toǒ ami̤. Pwǎ̤ta pwa̤ma̤jè Ada mî̌ akhobǒsû̌ htě ate̤bǎte̤to nû̌ûyanu, a ǒ tò̤.
21Htodě Běcǎ Cǒmara tûjûpwa̤ nohǎmoǒ shope̤ makhû dě bǎ a hǎmoǒ shope̤ akhanu, a běhtò̌ nû̌ûwe̤khwǐ tabǎ dě bǎ a běhtò̌ agûla̤nu a ma̤bǐ gesǒ bǎ nû̌û ta yî̌. 22Dě Běcǎ Cǒmara tûjûpwa̤ bǒ mamǔ tapwa̤ ta we̤khwǐ htě a běhtò̌ makhûkû htǒo dě a sûhè mamǔhtǒo makhû aǒ.
23Dě makhû hî̌shǔ nû̌û,
“Kǒ꤮ khònò̤ htǒonu akhwǐ mî̌ aphî̌ he khwǐ,
ayî̌ mî̌ aphî̌ he yî̌ hǒ.
Kò phî̌htò̌ yǎ dě makhûkû akhû̌akhî,
Kò tobǎ kaǎ nû̌ûmi̤ ta ‘Mamǔ.’”
24Ta̤wi̤ta̤kè̌htǒo akhû̌akhî, makhû bè̌kè amo̤apha dě a cû̌ǒplǒkû̌ ta ama, dě kòyò htǒosò̌gini̤nu a htûhtò̌ tapwǎ̤꤮ pa. #Matěo 19:5; Mǎ̤riko 10:7-8; Kòrî̌tiaphû̌ awǐlǒ tabǎ 6:16; Ephè̌shiaphû̌ 5:31
25Dě makhû ta ama htǒosò̌gini̤bò, a ǒkûglepwǎ pwǎ̤tadě a sòwò̤ lǒkho tò̤.
Currently Selected:
Mǒhtûlû̌hǎhtûsa 2: KRC
Highlight
Share
Copy
Want to have your highlights saved across all your devices? Sign up or sign in
Wycliffe USA