ᤖᤥᤔᤡ 4

ᤀᤒᤪᤠᤜᤠᤔᤖᤧ ᤁᤢᤏᤛᤠᤴ

1ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤏᤡ᤹ ᤕᤜᤢᤍᤡᤜᤠ᤹ᤖᤧ ᤐᤠᤎᤧᤒᤠ ᤀᤒᤪᤠᤜᤠᤔᤖᤧ ᤏᤡᤛᤢ ᤌᤠᤛᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣ ᤐᤠ᤺ᤵᤔᤠᤒᤣ᥅ 2ᤛᤧᤰᤂᤠᤀᤣ ᤀᤒᤪᤠᤜᤠᤶᤔᤡᤱᤃ ᤂᤢᤏᤧ᤹ ᤆᤥᤃᤢᤒᤠ ᤏᤢᤒᤠ ᤕᤠ᤺ᤶᤒᤰᤗᤠᤶ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤃᤧᤀᤠᤱ ᤘᤕᤧᤸᤗᤧᤃ ᤀᤠᤱᤍᤡᤱ ᤗ᤹ᤔᤠ ᤛᤢᤰᤋᤢᤒᤠᤔᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥᤃ ᤔᤣ᤺ᤴᤗᤥ. 3ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤸᤗᤧᤃ ᤀᤰᤂᤣᤏᤧ ᤐᤠ᤺ᤳᤋᤢ᤹ᤖᤥ. “ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢᤖᤥ॥”#ᤋᤥᤗᤡᤱ ᥇᥋:᥌

4ᤀᤠᤸᤗ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤁᤢᤏᤠᤶᤕᤠᤰᤁᤡᤴ ᤗᤢᤱᤔᤠ᤹ ᤋᤢᤰᤔᤠᤗᤠᤶ ᤂᤥᤛᤢᤒᤠ ᤔᤣ᤺ᤴ. ᤁᤖ ᤂᤧᤱᤃ ᤂᤢᤏᤧ᤹ ᤂᤥᤔᤠ ᤁᤧᤒᤥᤱᤒᤠ ᤁᤢᤗᤰᤗᤥ॥ 5ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤀᤠᤒᤠᤅᤣ ᤕᤠ᤺ᤶᤒᤰ ᤆᤥᤃᤢᤒᤠᤸᤗᤧ ᤔᤣ᤺ᤴ. ᤁᤖ ᤗᤠᤕᤥᤒᤠ ᤔᤏᤠᤴ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤸᤗᤧ ᤏᤛᤠᤴ ᤆᤥᤃᤢᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢᤖᤥ॥ 6ᤍᤠᤀᤢᤍ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤛᤠᤶᤕᤥᤒᤠ ᤗᤣ᤺ᤳᤋᤢᤒᤠ ᤔᤏᤠᤴ ᤀᤠᤰᤂᤧᤴ ᤔᤢ᤹ᤀᤡᤛᤠᤒᤠᤒᤣ ᤑᤠ᤹ᤀᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.

7“ᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥᤒᤠᤜᤠ᤹.

ᤂᤢᤏᤡ᤹ ᤗᤠᤕᤥᤴ ᤋᤧᤵᤋᤧᤀᤠᤱ ᤁᤧᤘᤠ᤹ᤒᤠᤜᤠ᤹ᤃ.

ᤔᤢ᤹ᤀᤡᤛᤠᤒᤠᤛᤡᤖᤥ॥

8ᤀᤠᤳᤋᤡᤸᤗᤧ ᤁᤢᤗᤠᤕᤥᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤄᤠᤖᤥ᤺ᤳᤋᤥᤗᤠᤶ ᤋᤢᤃᤢᤍᤣᤛᤢᤀᤠᤱ ᤘᤠ᤹.

ᤂᤧᤴ ᤔᤏᤠᤴ ᤔᤢ᤹ᤀᤡᤛᤠᤒᤠᤖᤥ॥”#ᤏᤡᤱ ᤛᤢᤶ ᥉᥈:᥇-᥈

9ᤁᤴ ᤔᤢ᤹ᤀᤡᤛᤠᤶᤔᤡᤱᤃ ᤜᤷᤍᤥ ᤁᤧᤜᤧᤰᤐᤠ ᤕᤜᤢᤍᤡᤜᤠ᤹ᤖᤧ ᤗᤠᤃᤡᤖᤰ ᤔᤣ᤺ᤴ. ᤁᤖ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤌᤡᤶᤔᤧᤴᤍᤱ ᤛᤢᤘᤠᤜᤠ᤹ᤖᤧ ᤗᤠᤃᤡᤀᤠᤱᤗᤥ॥ ᤀᤒᤪᤠᤜᤠᤔᤖᤧ ᤆᤥᤃᤢᤒᤠ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢᤀᤠᤱ ᤘᤕᤧ ᤗ᤹ᤖᤡᤰ ᤀᤠᤏᤡᤃᤧᤃ ᤐᤠ᤺ᤳᤋᤢᤶᤒᤧᤖ ᤘᤕᤡᤃᤧᤖᤥ॥ 10ᤁᤖ ᤀᤠᤵᤑᤠᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗ᤹ᤖᤡᤰ ᤗᤣ᤺ᤳᤋᤧᤒᤣ᥅ ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤜᤷᤍᤥ ᤜᤧᤰᤔᤠᤏᤢ᤺ᤸᤗᤧ ᤋᤃᤡᤒᤡ ᤀᤡ ᤕᤠᤱᤛᤡ ᤐᤥ᤺ᤰᤂᤧᤒᤠᤒᤡ᥅ ᤛᤧᤰᤂᤠᤀᤣ ᤛᤠᤶᤕᤥᤒᤠ ᤗᤣ᤺ᤳᤋᤧᤒᤠᤃ ᤋᤃᤡᤀᤣᤖᤥ॥ 11ᤀᤒᤪᤠᤜᤠᤔᤖᤧ ᤂᤥᤛᤢᤒᤠ ᤁᤴ ᤜᤷᤍᤥ ᤜᤧᤰᤔᤠ ᤌᤡᤶᤔᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤢᤀᤠᤱ ᤘᤕᤧᤸᤗᤧ ᤜᤷᤍᤥ ᤔᤧᤴᤜᤧᤰᤁᤣᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧᤴ ᤔᤡᤰᤛᤣ᤺ᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤒᤪᤠᤜᤠᤶᤔᤡᤴ ᤜᤷᤍᤥ ᤔᤧᤴᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤠᤖᤥ॥ ᤂᤧᤱᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠᤶᤕᤥᤒᤠ ᤗᤣ᤺ᤳᤋᤢᤛᤡ᤹ᤖᤥ॥ 12ᤀᤒᤪᤠᤜᤠᤶᤔᤡᤱᤃ ᤜᤷᤍᤥ ᤁᤧᤜᤧᤰᤐᤠᤜᤠ᤹ᤖᤧᤴᤏᤠᤱ ᤂᤢᤏᤡ᤹ ᤐᤠᤖᤥ. ᤁᤖ ᤜᤷᤍᤥ ᤁᤧᤜᤧᤰᤐᤠᤀᤠᤱ ᤀᤒᤪᤠᤜᤠᤔᤖᤧ ᤜᤷᤍᤥ ᤜᤧᤰᤔᤠᤏᤢ᤺ᤸᤗᤧ ᤋᤃᤡ ᤁᤳᤋᤢᤒᤠ ᤁᤢᤀᤡᤛᤡᤰ ᤏᤛᤠᤴ ᤁᤧᤃᤵᤐᤠᤜᤠ᤹ᤖᤧᤴᤗᤰ ᤂᤢᤏᤡ᤹ ᤐᤠᤖᤥ॥

ᤏᤛᤠ᤺ᤴᤗᤠᤶᤒᤠ ᤏᤡᤱᤘᤠ᤹ᤑᤢ ᤔᤠᤱᤜᤧᤰᤁᤡᤴ ᤂᤥᤔᤠ

13ᤀᤒᤪᤠᤜᤠᤶᤔᤡᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱᤃ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤢᤒᤠᤗᤠᤶ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥ᤺ᤰᤂᤧᤒᤠᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤗᤰ ᤁᤧᤄᤥᤛᤢᤶ ᤁᤧᤗ᤹ᤒᤠ ᤔᤠᤱᤜᤧᤰᤁᤡᤴ ᤀᤒᤪᤠᤜᤠᤶᤔᤡᤴᤏᤢ ᤆᤥᤃᤢᤒᤠᤖᤥ॥ 14ᤛᤠᤶᤕᤥᤒᤠ ᤐᤥᤱᤔᤠ ᤑᤠ᤹ᤀᤠᤱ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤗᤰ ᤔᤧᤄᤥᤛᤢ᤹ᤏᤧ ᤑᤠ᤹ᤃᤪ ᤏᤛᤠ᤺ᤴᤏᤡᤴ ᤜᤏᤧᤒᤠ ᤐᤥᤱ ᤜᤧᤰᤁᤩᤠᤱ ᤂᤧᤴ ᤔᤠᤱᤜᤧᤰᤁᤡᤴᤏᤠᤱ ᤜᤏᤧᤒᤠ ᤐᤥᤱᤗᤥ॥ 15ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤶᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡ᤹ᤖᤥ. (ᤛᤠᤶᤕᤥᤌᤡᤶ ᤜᤥ᤺ᤵᤐᤡᤸᤗᤧᤖᤰ ᤗᤠᤕᤥᤴ ᤜᤥᤵᤗᤥ)॥

16ᤂᤧᤸᤗᤧᤆᤥᤃᤢᤸᤗᤧ ᤁᤴ ᤔᤠᤱᤜᤧᤰᤁᤡᤱᤃ ᤏᤛᤠ᤺ᤴᤗᤠᤶ ᤋᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤀᤠᤶᤓᤠ ᤀᤠᤒᤡ᤹ᤖᤥ॥ ᤜᤧᤰᤁᤩᤠᤱ ᤛᤠᤶᤕᤥᤌᤡᤶ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤔᤠᤱ ᤔᤣ᤺ᤴ. ᤁᤖ ᤀᤒᤪᤠᤜᤠᤶᤔᤡᤸᤗᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤏᤛᤠᤴ ᤀᤠᤈᤥᤃᤢᤶᤏᤧ ᤑᤠ᤹ᤃᤪ ᤁᤴ ᤔᤠᤱᤜᤧᤰᤁᤡᤴ ᤀᤠᤄᤥᤛᤢᤶ ᤁᤧᤗ᤹ᤒᤠ ᤏᤡ᤺ᤴᤎᤥ ᤐᤥᤱᤗᤥ॥ ᤌᤣᤀᤠᤱᤓᤧᤸᤗᤧ ᤀᤒᤪᤠᤜᤠᤶᤔᤡᤱᤃ ᤀᤠᤏᤡ᤹ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧᤴ ᤐᤠᤖᤥ॥ 17ᤛᤠᤶᤕᤥᤛᤠᤵᤗᤠᤀᤥ ᤀᤒᤪᤠᤜᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤧᤏᤧ᤹ᤃ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤐᤠᤏᤢᤍᤡᤱ ᤐᤠ ᤆᤥ᤺ᤰᤏᤧᤀᤠᤱ ᤘᤠ᤹॥”#ᤋᤥᤗᤡᤱ ᥇᥍:᥋ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤢᤀᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤏᤡ᤹ ᤁᤧᤖᤧᤰᤗᤧᤴ ᤐᤠ ᤐᤥ᤺ᤰᤂᤧ. ᤁᤧᤛᤡᤒᤠᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤏᤢ ᤁᤧᤜᤥᤵᤐᤠ ᤐᤠ᤺ᤴᤜᤠ᤹ᤀᤥᤗᤠᤶ ᤆᤀᤡ᤺ᤳ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤒᤪᤠᤜᤠᤔᤖᤧ ᤏᤛᤠᤴ ᤆᤥᤃᤢᤖᤥ॥

18ᤏᤡᤱᤛᤠᤱ ᤆᤥ᤺ᤰᤔᤠ ᤛᤢᤰᤔᤧᤴᤍᤧᤵᤔᤏᤠ ᤘᤕᤧᤛᤠᤱ ᤀᤒᤪᤠᤜᤠᤔᤖᤧ “ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤂᤣ᤺ᤶᤛᤡᤰᤐᤠ ᤁᤢᤀᤡᤛᤡᤰ ᤕᤖᤡᤰ ᤔᤧᤒᤥᤱᤗᤥ”#ᤋᤥᤗᤡᤱ ᥇᥋:᥋ ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤳᤋᤢᤒᤠ ᤐᤠ᤺ᤴᤏᤡᤸᤗᤧᤴ ᤏᤡᤱᤛᤠᤱ ᤆᤥᤃᤢᤀᤠᤱ ᤏᤛᤠᤴ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤐᤠᤏᤢᤍᤡᤱ ᤐᤠ ᤐᤥ᤺ᤰᤂᤧᤖᤥ॥ 19ᤂᤢᤏᤧ᤹ ᤋᤱᤒᤣ ᤁᤡᤵᤌᤡᤰ (᥇᥆᥆) ᤕᤠᤖᤡᤰ ᤁᤧᤖᤧᤀᤠᤱ ᤕᤖᤧᤒᤣᤀᤠᤱ ᤘᤕᤧ. ᤜᤧᤰᤁᤩᤠᤱ ᤁᤢᤔᤣᤳ ᤛᤠᤖᤠᤴᤏᤠᤱ ᤛᤠᤔᤢ᤹ᤀᤡ ᤂᤰᤋᤧᤀᤠᤱ ᤆᤵᤋᤧᤒᤣᤀᤠᤱ ᤘᤕᤧᤛᤠᤱ ᤂᤢᤏᤧ᤹ ᤁᤢᤏᤛᤠ᤺ᤴᤏᤡᤴ ᤀᤕᤠᤰ ᤔᤧᤗ᤹ᤖᤧᤴᤏᤠᤱ 20ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤆᤵᤆᤡ ᤔᤧᤈᤥᤃᤢᤴ. ᤁᤖ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤖᤥ॥ 21ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤛᤢᤰᤋᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤀᤒᤪᤠᤜᤠᤶᤔᤡᤴ ᤏᤡ᤺ᤴᤎᤥ ᤘᤕᤧ॥ 22ᤂᤧᤸᤗᤧᤆᤥᤃᤢᤸᤗᤧᤀᤣ ᤀᤒᤪᤠᤜᤠᤔᤖᤧ ᤁᤢᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢᤖᤥ॥”#ᤋᤥᤗᤡᤱ ᥇᥋:᥌ 23ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤒᤪᤠᤜᤠᤔᤖᤧ ᤁᤢᤗᤠᤃᤡᤖᤰ ᤔᤣ᤺ᤴ. 24ᤁᤖ ᤀᤠᤏᤡ᤹ ᤗᤠᤃᤡᤀᤠᤱ ᤛᤠᤵᤋᤧᤒᤠᤖᤥ॥ ᤕᤧᤛᤢ ᤀᤠᤏᤡ᤹ ᤍᤠᤱᤒᤠᤴ ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤀᤠᤈᤥᤃᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤛᤠᤶᤕᤥᤒᤠ ᤀᤠᤗᤣ᤺ᤳᤗᤥ॥ 25ᤂᤢᤏᤧ᤹ᤃ ᤀᤠᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤛᤧᤵᤔᤠ ᤑᤠ᤹ᤀᤠᤱ ᤜᤢᤰᤛᤢᤵᤋᤧ. ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥ᤺ᤰᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤂᤢᤏᤧ᤹ ᤁᤢᤜᤡᤱᤘᤧᤳ ᤆᤥᤃᤢᤖᤥ॥

Currently Selected:

ᤖᤥᤔᤡ 4: LIFOTNT

Highlight

Copy

Compare