ᤔᤳᤋᤡ 14

ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤴ ᤛᤡ᤹᤺

(ᤔᤷᤁᤢ ᥌:᥇᥊-᥈᥏; ᤗᤢᤁᤠ ᥏:᥍-᥏)

1ᤂᤧᤴ ᤕᤧᤶᤔᤥ ᤃᤠᤗᤡᤗ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤜᤧᤖᤥᤍ ᤀᤣᤴᤋᤡᤐᤠᤛᤖᤧ ᤕᤧᤛᤢᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢ. 2ᤜᤧᤰᤁᤩᤠᤱ ᤁᤢᤛᤧᤘᤠᤖᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤁᤱᤃ ᤛᤧᤰᤂᤠᤛᤠᤱ ᤛᤧᤵᤐᤠᤱᤄᤢᤱᤛᤡᤱᤒᤠ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴᤏᤣᤖᤥ. ᤂᤢᤏᤧ᤹ ᤕᤠᤶᤔᤥ ᤜᤡᤅᤧᤒᤠᤸᤗᤧ ᤆᤥᤃᤢᤸᤗᤧ ᤔᤢᤰᤛᤠᤶᤗᤠᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹ᤖᤥ॥” 3-4ᤀᤠᤸᤗ ᤀᤢᤴᤇᤥ᤺ᤴᤇᤠ ᤜᤧᤖᤥᤍᤖᤧ ᤀᤠᤒᤠᤅᤣ ᤁᤢᤴᤛᤠ᤹ ᤑᤡᤗᤡᤐᤖᤧ ᤁᤢᤔᤣᤳ ᤜᤧᤖᤥᤍᤡᤕᤠᤛᤧᤴ ᤔᤣ᤺ᤳ ᤁᤳᤋᤢᤀᤠᤱ ᤘᤕᤧ॥ ᤜᤧᤰᤁᤣ᤺ᤸᤗᤧ ᤕᤢᤜᤢᤴᤏᤠᤖᤧ ᤂᤢᤏᤧ᤹ ᤀᤧᤳᤗᤧᤱ “ᤂᤧᤴ ᤀᤠᤒᤠᤅᤣ ᤁᤧᤴᤛᤠ᤹ᤖᤧ ᤁᤢᤔᤣ᤺ᤳᤋᤡᤴ ᤂᤧᤏᤧ᤹ ᤔᤣ᤺ᤳ ᤁᤵᤔᤠ ᤔᤧᤏᤢ᤹ᤏᤧᤴ” ᤔᤧᤳᤋᤢᤀᤠᤱ ᤘᤕᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤜᤧᤖᤥᤍᤖᤧ ᤕᤢᤜᤢᤴᤏᤠᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤀᤠᤱ ᤘᤕᤧ॥ 5ᤜᤧᤖᤥᤍᤖᤧ ᤕᤢᤜᤢᤴᤏᤠᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢ ᤁᤖ ᤔᤏᤠᤜᤠ᤹ᤏᤢ ᤁᤡᤛᤧᤀᤠᤱ ᤘᤕᤧ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧᤃ ᤕᤢᤜᤢᤴᤏᤠᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤏᤛᤠᤴ ᤔᤧᤈᤥᤃᤢᤀᤠᤱ ᤘᤕᤧᤖᤥ॥

6ᤁᤖ ᤜᤧᤖᤥᤍᤖᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤛᤛ᤺ᤳᤛᤖᤠᤱᤅᤥ ᤜᤧᤖᤥᤍᤡᤕᤠᤛᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤀᤡᤴ ᤜᤧᤖᤥᤍᤧᤏ ᤏᤢ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤏᤢᤖᤡᤰ ᤗᤠ᤺ᤰᤂᤧᤀᤠᤱ ᤜᤧᤖᤥᤍᤖᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧᤒᤠᤸᤗᤧ ᤆᤥᤃᤢᤸᤗᤧ 7ᤂᤧᤏᤧ᤹ ᤌᤣ ᤁᤧᤏᤠ᤺ᤰᤋᤢᤛᤠᤱ ᤐᤡᤏᤧᤖᤥ ᤗ᤹ᤖᤡᤰ ᤔᤠᤱᤜᤧᤰᤛᤡᤱᤗᤥ॥ 8ᤁᤢᤶᤔᤠᤖᤧ ᤜᤢ᤺ᤛ᤻ᤛᤢᤀᤠᤱ ᤂᤧᤴ ᤆᤢᤰᤔᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤆᤧᤳᤌᤩᤠᤀᤥ ᤐᤡᤖᤠᤱᤅᤧ᤹ᤀᤥ॥” 9ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤜᤧᤖᤥᤍᤧᤏ ᤁᤢᤏᤡᤱᤘᤠ᤹ ᤋᤢᤃᤧ. ᤁᤖ ᤂᤧᤵᤔᤥ ᤁᤧᤘᤠ᤹ᤒᤠ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤆᤢᤰᤔᤧᤸᤗᤧ ᤏᤠ᤺ᤰᤋᤢᤒᤠᤴ ᤁᤧᤳᤋᤧᤶ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡᤖᤥ॥ 10ᤂᤧᤸᤗᤧᤆᤥᤃᤢᤸᤗᤧ ᤐᤢᤱᤗᤠᤜᤡᤶᤔᤥ ᤁᤧᤕᤠᤰᤐᤠ ᤕᤢᤜᤢᤴᤏᤠᤖᤧ ᤁᤢᤎᤣᤃᤣ᤺ᤰᤐᤧᤴ ᤂᤰᤐᤠᤱᤄᤢᤛᤡᤀᤠᤱ 11ᤁᤢᤎᤣᤃᤣ᤺ᤰᤐᤧᤴ ᤔᤧᤍᤠᤖᤢᤀᤠᤱ ᤂᤧᤴ ᤆᤢᤰᤔᤧᤴ ᤆᤧᤳᤌᤩᤠᤀᤥ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤁᤢᤶᤔᤠᤖᤥ ᤋᤣ᤹ᤖᤢ॥ 12ᤂᤧᤴ ᤀᤣᤃᤠᤱ ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤁᤢᤎᤰᤁᤡᤴ ᤔᤧᤍᤣ᤹ᤖᤢᤀᤠᤱ ᤔᤧᤗᤢᤵᤋᤢ॥ ᤜᤧᤰᤁᤩᤠᤱ ᤔᤧᤒᤣᤀᤠᤱ ᤁᤴ ᤐᤠ᤺ᤴᤏᤡᤴ ᤕᤧᤛᤢᤴ ᤔᤧᤔᤧᤳᤋᤢ॥

ᤕᤧᤛᤢᤖᤧ ᤜᤧᤴᤇᤡᤱ ᤅᤠᤛᤡ ᤔᤏᤠᤜᤠ᤹ ᤆᤠᤈᤠ᤺ᤳᤋᤢᤛᤡ᤹

(ᤔᤷᤁᤢ ᥌:᥉᥆-᥊᥊; ᤗᤢᤁᤠ ᥏:᥇᥆-᥇᥍; ᤕᤢᤜᤢ ᥌:᥇-᥇᥊)

13ᤕᤧᤛᤢᤖᤧ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤀᤠᤱ ᤂ᤺ᤱᤒᤣᤀᤥᤗᤠᤶ ᤂᤢᤏᤧ᤹ᤖᤰ ᤀᤣ᤺ᤰᤛᤠᤍᤧᤴᤏᤥ ᤐᤣ॥ ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤴ ᤐᤣᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤐᤠᤱᤈᤢᤶᤗᤠᤶ ᤂᤢᤏᤧ᤹ ᤐᤣᤒᤠ ᤗᤧᤵᤔᤠᤱ ᤗᤠᤱᤔᤧᤄᤣᤃᤧᤖ ᤁᤢᤀᤣᤃᤠᤱ ᤔᤧᤎᤠᤛᤡᤱᤗᤥ॥ 14ᤕᤧᤛᤢᤴ ᤂ᤺ᤱᤒᤣᤀᤥᤗᤠᤶ ᤗ᤺ᤴᤍᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤛᤢᤛᤡᤀᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤂᤧᤴ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤢᤛᤡᤖᤥ॥

15ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤱᤜᤠ᤹ ᤐᤠᤱᤄᤧᤍᤣᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤀᤣ᤺ᤰᤛᤠᤍᤧᤴᤏᤥ ᤌᤣᤀᤠᤱ ᤀᤡᤱᤔᤠ ᤆᤠᤔᤠ ᤂᤥᤔᤧᤍᤧᤳᤏᤧᤴᤗᤥ. ᤕᤠᤶᤔᤥ ᤏᤠᤶᤎᤩᤧᤒᤣᤖᤥ॥ ᤜᤠᤖᤠ᤹ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤆᤠᤔᤠ ᤌᤢᤱᤔᤠ ᤔᤧᤀᤡᤅᤢ ᤔᤧᤈᤖᤖᤥ॥”

16ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴᤜᤠ᤹ ᤐᤣ᤺ᤰᤔᤠ ᤔᤧᤒᤥᤱᤏᤧᤴᤗᤥ॥ ᤂᤡᤏᤡ᤹ᤀᤣ ᤁᤱᤜᤠ᤹ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹ᤀᤥ॥”

17ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤅᤠᤛᤡ ᤂᤖᤧ᤺ᤱᤜᤠ᤹ ᤏᤢ ᤏᤧᤳᤇᤡ ᤅᤠᤜᤠ᤹ᤖᤰ ᤁᤳᤋᤢᤶᤒᤧᤱᤃ᥄”

18ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤂᤖᤧ᤺ᤱᤅᤡᤴ ᤏᤢ ᤏᤧᤳᤇᤡ ᤅᤠᤜᤠ᤹ ᤁᤳᤏᤠ ᤀᤡᤱᤃᤠ᤹ᤀᤥ ᤑᤧᤳᤋᤧᤶᤔᤧ᤹॥” 19ᤜᤧᤰᤁᤩᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤕᤠᤴ ᤛᤶᤍᤠᤱ ᤕᤢᤱᤔᤠ ᤐᤠᤱᤄᤢᤛᤡᤀᤠᤱ ᤅᤠᤛᤡ ᤂᤖᤧ᤺ᤱᤅᤡᤴ ᤏᤢ ᤏᤧᤳᤇᤡ ᤅᤠᤜᤠ᤹ ᤐᤰᤂᤢᤀᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤌᤥ ᤀᤥᤔᤕᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤂᤖᤧ᤺ᤱᤜᤠ᤹ ᤂᤧ᤺ᤰᤂᤢ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖᤥ॥ 20ᤂᤧᤴ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤈᤡ ᤁᤧᤏᤶᤒᤠᤜᤠ᤹ ᤔᤧᤛᤢᤵᤛᤢᤸᤗᤧ ᤌᤡᤰ-ᤏᤧᤳ (᥇᥈) ᤏᤀᤡᤔᤠ ᤕᤥᤖᤧᤖᤥ॥ 21ᤂᤧᤴ ᤁᤧᤈᤠᤒᤠᤜᤠ᤹ᤀᤥᤃ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤅᤠᤛᤡ (᥋.᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥

ᤕᤧᤛᤢᤴ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣᤰ

(ᤔᤷᤁᤢ ᥌:᥊᥋-᥋᥈; ᤕᤢᤜᤢ ᥌:᥇᥋-᥈᥇)

22ᤂᤧᤴ ᤀᤣᤃᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤐᤠᤱᤄᤢᤛᤡᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤗᤠ᤺ᤛ᤻ᤛᤧᤶᤔᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤏᤠᤜᤠᤱᤍᤠᤱ ᤐᤣᤃᤧᤶᤔᤧ᤹ ᤔᤧᤳᤋᤢᤛᤡ॥ 23ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤔᤏᤠᤜᤠ᤹ ᤐᤠᤱᤄᤢᤍᤣᤛᤢᤛᤡᤀᤠᤱ ᤋᤢᤘᤠ ᤆᤥ᤺ᤰᤛᤧ ᤌᤥ ᤁᤥ᤺ᤰᤔᤠᤀᤥ ᤐᤣᤖᤥ॥ ᤂᤠᤍᤠᤔᤧᤸᤗᤧ ᤂᤧᤵᤔᤥ ᤂᤢᤏᤧ᤹ᤖᤰ ᤘᤕᤧᤖᤥ॥ 24ᤂᤧᤴ ᤕᤧᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤗᤠᤶ ᤘᤖᤰᤁᤡᤸᤗᤧ ᤁᤢᤕᤠᤀᤥᤏᤢ ᤔᤠ᤺ᤱᤄᤠ ᤔᤧᤃᤧᤖᤧᤀᤠᤱ ᤔᤧᤘᤕᤧᤸᤗᤧ ᤂᤢᤏᤡ᤹ ᤋᤰᤗᤧᤵᤔᤠᤱᤏᤢ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤖᤧᤀᤠᤱ ᤘᤠᤓᤧᤸᤗᤧᤱᤅᤡᤸᤗᤧ ᤂ᤺ᤱᤒᤣᤴ ᤛᤠ᤹ᤖᤡᤰ ᤘᤠ᤺ᤴᤍᤢᤖᤥ॥

25ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤕᤧᤛᤢᤴ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣᤃᤧᤖ ᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤂ᤺ᤱᤒᤣᤀᤥ ᤐᤣᤖᤥ॥ 26ᤂᤧᤱᤜᤠ᤹ᤖᤧ ᤂᤢᤏᤧ᤹ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣᤃᤧᤖ ᤐᤳᤇᤧᤒᤠ ᤔᤧᤏᤡᤛᤢᤀᤠᤱ “ᤁᤱᤃ ᤛᤡᤛᤠᤶᤗᤥ᥄” ᤗ᤹ᤖᤡᤰ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤓᤡ᤺ᤰᤋᤧᤖᤥ॥

27ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤂᤡᤔᤥ ᤔᤧᤳᤋᤢᤛᤡ. “ᤔᤧᤃᤡᤛᤧᤶᤔᤡᤴᤏᤧ᤹᥄ ᤀᤡᤱᤃᤠ᤹ ᤕᤣᤛᤢᤀᤠ॥ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ᥄”

28ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤔᤧᤳᤋᤢ. “ᤍᤠᤱᤒᤣ. ᤛᤧᤰᤂᤠ ᤂᤧᤏᤧ᤹ᤀᤣᤏᤧ ᤑᤠ᤹ᤃᤪ ᤀᤡᤱᤃᤠ᤹ᤀᤠᤱ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣᤃᤧᤖ ᤑᤧᤖᤧ᤹ ᤔᤧᤳᤋᤠᤱᤅᤧ᤹ᤀᤥ॥”

29ᤕᤧᤛᤢᤖᤧ ᤔᤧᤳᤋᤢ. “ᤑᤧᤖᤧ᤹॥” ᤜᤧᤰᤁᤣ᤺ᤸᤗᤧ ᤐᤋᤪᤢᤛᤧᤴᤏᤠᤱ ᤆᤫᤠ᤺ᤳᤋᤥ ᤗᤠᤱᤄᤣᤃᤧᤖ ᤕᤧᤛᤢᤴ ᤘᤕᤧᤒᤠ ᤗᤧᤵᤔᤠᤱ ᤌᤠᤛᤡᤱ॥ 30ᤁᤖ ᤐᤣᤖ ᤐᤳᤇᤧᤸᤗᤧ ᤂᤧᤸᤗᤧ ᤕᤶᤒᤠ ᤛᤢᤖᤡᤳ ᤁᤣᤈᤱ ᤏᤢ ᤘᤠᤓᤧᤸᤗᤧᤱᤅᤡᤴ ᤏᤡᤛᤢᤀᤠᤱ ᤁᤡᤛᤧ॥ ᤜᤧᤰᤁᤩᤠᤱ ᤂᤧᤴ ᤆᤫᤠ᤺ᤳᤋᤥ ᤜᤢᤶᤔᤠ ᤜᤣ᤺ᤰᤋᤧᤸᤗᤧ “ᤀᤠᤍᤠᤱᤒᤣ. ᤋᤠᤱᤛᤧ᤺ᤵᤋᤠᤱᤅᤧ᤹ᤀᤥ” ᤗ᤹ᤖᤡᤰ ᤀ᤺ᤰᤋᤧ॥

31ᤂᤡᤔᤥ ᤕᤧᤛᤢᤖᤧ ᤁᤢᤜᤢᤰᤁᤥ ᤋᤧᤶᤛᤢᤖ ᤔᤧᤳᤋᤢ. “ᤏᤛᤠᤴ ᤁᤧᤛᤢ᤺ᤶᤒᤠᤀᤣ. ᤌᤣᤀᤠᤱ ᤆᤵᤆᤡ ᤁᤧᤈᤥᤃᤢᤒᤠᤒᤣ᥅” 32ᤜᤧᤰᤁᤩᤠᤱ ᤂᤢᤴᤇᤡ᤹ ᤂ᤺ᤱᤒᤣᤀᤥ ᤗᤠᤛᤧᤳᤇᤡᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤔᤠ ᤆᤰ ᤗ᤹ᤖᤧᤖᤥ॥

33ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤧᤘᤠ ᤔᤧᤈᤥᤃᤢ. “ᤍᤠᤱᤒᤣ. ᤂᤧᤏᤧ᤹ᤃ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤛᤠᤏᤧᤖᤥ᥄”

34ᤂᤧᤱᤜᤠ᤹ ᤏᤠᤎᤠ᤺ᤶᤒᤡᤒᤠ ᤃᤏᤧᤛᤖᤧᤋ ᤋᤧᤴᤏᤥ ᤔᤧᤃᤧᤖᤧᤀᤠᤱ 35ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤕᤧᤛᤢᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤂᤢᤏᤧ᤹ ᤋᤩᤧᤒᤠ ᤀᤡᤱᤄᤱᤅᤡᤴ ᤂᤧᤴ ᤂᤡᤖᤡᤒᤠ ᤋᤧᤴᤏᤥ ᤛᤧ᤺ᤖᤧ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤕᤧᤛᤢᤖᤥ ᤔᤧᤍᤠᤖᤢᤛᤡ॥ 36ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤧᤍᤣ᤺ᤳᤋᤡᤸᤗᤧ ᤁᤢᤛᤢᤰᤐᤧᤴᤗᤰᤛᤠᤱ ᤛᤢᤔᤠ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤔᤧᤓᤠᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤛᤢᤒᤠᤜᤠ᤹ ᤁᤧᤖᤧᤰ ᤔᤧᤘᤣ᤺ᤳᤋᤧᤖᤥ॥

Currently Selected:

ᤔᤳᤋᤡ 14: LIFOTNT

Highlight

Copy

Compare