ᤕᤢᤜᤢᤴᤏᤠ 10
10
ᤁᤧᤏᤢ᤹ᤒᤠ ᤔᤧᤸᤗᤢᤰᤁᤶᤒᤠ
1ᤕᤧᤛᤢᤖᤧ ᤐᤠ᤺ᤳᤋᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤴ ᤔᤏᤠᤴ ᤗᤠᤶᤎᤣ᤺ᤵᤐᤥᤗᤠᤶ ᤔᤧᤸᤗᤢᤰ ᤌᤠ᤺ᤱᤅᤥ ᤔᤧᤗᤠ᤺ᤳᤏᤧᤴ ᤁᤖ ᤘᤣ᤹ ᤗᤧᤵᤔᤠᤱᤏᤢ ᤗᤠ᤺ᤳ ᤂᤧᤱᤃ ᤂᤢ᤺ᤴᤍᤪᤡᤰᤐᤠ ᤏᤢ ᤑᤠ᤺ᤴᤍᤠᤖᤥ॥#᥇᥆:᥇ ᤔᤧᤸᤗᤢᤰᤂᤖᤀᤥ ᤔᤧᤸᤗᤢᤰᤜᤠ᤹ ᤔᤧᤗᤠ᤺ᤳᤋᤠᤱ ᤗᤠᤶᤎᤣ᤺ᤵᤐᤧᤴ ᤛᤢᤵ ᤜᤧᤰᤁᤣ᤺ᤸᤗᤧ ᤛᤧᤴᤍᤡᤰ ᤔᤧᤸᤗᤢᤰᤜᤠ᤹ ᤂᤢ᤺ᤴᤍᤪᤡᤰᤐᤠ ᤏᤢ ᤑᤠ᤺ᤴᤍᤠ ᤜᤧᤰᤁᤩᤠᤱ ᤌᤰᤛᤠᤜᤠ᤹ᤗᤠᤶ ᤋᤠᤱᤛᤧ᤺ᤵ ᤔᤧᤄᤥ॥ 2ᤁᤖ ᤔᤧᤸᤗᤢᤰᤁᤶᤒᤠᤱᤃ ᤗᤠᤶᤎᤣ᤺ᤵᤐᤥᤗᤠᤶ ᤗᤠ᤺ᤳᤗᤥ॥ 3ᤗᤠᤶᤎᤣ᤺ᤵ ᤁᤧᤃᤥᤒᤠᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤗᤠᤶᤎᤣ᤺ᤵᤐᤧᤴ ᤜᤴᤍᤢ ᤐᤡᤖᤢ ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤢᤀᤡᤰᤗᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤧᤸᤗᤢᤰᤜᤠ᤹ ᤂᤢᤏᤡ᤹ ᤔᤡᤱᤅᤥᤏᤢ ᤀᤢ᤺ᤳᤋᤢᤛᤡᤀᤠᤱ ᤗᤠ᤺ᤰᤁᤠᤳ ᤗᤠᤶᤗᤥᤛᤢᤛᤡ᤹ᤀᤠᤱ ᤋᤣ᤹ᤖᤢᤛᤡᤖᤥ॥ 4ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤢᤔᤧᤸᤗᤢᤰᤜᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡ᤹ᤀᤠᤱ ᤋᤃᤡ ᤋᤃᤡ ᤗᤠᤱᤄᤣ᤺ᤰᤗ ᤗᤠᤶᤗᤥᤛᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ᤹ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤰᤗᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥ 5ᤁᤖ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠᤱᤃ ᤂᤧᤱᤜᤠ᤹ᤖᤧ ᤔᤧᤴᤍᤡᤶᤍᤢᤴ. ᤁᤖ ᤔᤧᤗᤥᤰ ᤔᤧᤒᤣ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤀᤡᤰᤗᤠᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥”
6ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤂᤧᤍᤠ᤹ᤀᤥ ᤔᤧᤳᤋᤢᤛᤡᤀᤠᤱ ᤘᤕᤧ. ᤁᤖ ᤕᤧᤛᤢᤖᤧ ᤌᤣ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ 7ᤂᤧᤸᤗᤧᤆᤥᤃᤢᤸᤗᤧ ᤕᤠᤶᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤀᤡᤱᤃᤠ᤹ᤀᤣ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡ ᤗᤠᤶᤎᤣ᤺ᤵᤐᤠᤀᤠᤖᤥ॥ 8ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤁᤧᤍᤠᤒᤠᤜᤠ᤹ ᤁᤧᤖᤧᤰ ᤂᤢ᤺ᤴᤍᤪᤡᤰᤐᤠ ᤏᤢ ᤑᤠ᤺ᤴᤍᤠᤛᤡᤖᤥ. ᤁᤖ ᤔᤧᤸᤗᤢᤰᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠᤴ ᤔᤧᤱᤄᤧᤵᤛᤢᤴᤗᤥ॥ 9ᤀᤡᤱᤃᤠ᤹ᤀᤣ ᤗᤠᤶᤎᤣ᤺ᤵᤐᤠᤀᤠᤖᤥ. ᤀᤡᤱᤃᤠ᤹ᤗᤠᤶ ᤛᤡᤃᤠᤱ ᤁᤧᤗᤠ᤺ᤵᤐᤠᤜᤠ᤹ ᤋᤠᤱᤔᤧᤛᤧ᤺ᤵᤗᤥ॥ ᤂᤧᤴ ᤛᤡᤃᤠᤱ ᤗᤠ᤺ᤵᤔᤠ ᤏᤢ ᤗᤠ᤺ᤰᤁᤠᤳ ᤐᤣ᤺ᤰᤔᤠ ᤛᤢᤰᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤆᤠᤖᤠᤶᤍᤧᤴ ᤂᤥᤛᤢ᤹ᤖᤥ॥ 10ᤂᤢ᤺ᤴᤍᤪᤡᤰᤐᤠᤱᤃ ᤂᤢ᤺ᤳᤇᤧ. ᤛᤧᤳᤇᤧ ᤏᤢ ᤔᤧᤱᤛᤧᤖᤰ ᤋᤠᤖᤥ. ᤁᤖ ᤀᤡᤱᤃᤠ᤹ᤃ ᤔᤏᤠᤜᤠ᤹ᤖᤧ ᤛᤧᤰᤂᤠᤒᤠ ᤜᤡᤱᤔᤴᤏᤡᤴ ᤔᤧᤄᤥᤛᤢᤖ. ᤜᤧᤰᤁᤩᤠᤱ ᤂᤧᤴᤏᤠᤱ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤧᤄᤥᤛᤢᤖ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥
11“ᤀᤡᤱᤃᤠ᤹ ᤁᤧᤏᤢ᤹ᤒᤠ ᤔᤧᤸᤗᤢᤰᤁᤶᤒᤠᤀᤠᤖᤥ॥ ᤁᤧᤏᤢ᤹ᤒᤠ ᤔᤧᤸᤗᤢᤰᤁᤶᤒᤠᤱᤃ ᤁᤢᤔᤧᤸᤗᤢᤰᤜᤠ᤹ᤖᤧ ᤗᤠᤃᤡ ᤛᤡᤔᤠᤀᤣ ᤐᤥᤱᤛᤠᤱ ᤔᤧᤃᤡᤏᤧᤴᤗᤥ॥ 12ᤁᤖ ᤕᤠᤱᤅᤥ ᤕᤠ᤺ᤗᤡᤰ ᤛᤠᤱᤔᤏᤠᤒᤠ ᤔᤏᤠ᤺ᤱᤃ ᤛᤧᤰᤂᤠᤒᤠ ᤔᤧᤸᤗᤢᤰᤁᤶᤒᤠ ᤏᤢ ᤔᤧᤸᤗᤢᤰᤍᤠᤱᤒᤠ ᤔᤣ᤺ᤴᤗᤥ॥ ᤂᤧᤸᤗᤧ ᤐᤖᤠᤒᤠᤴ ᤑᤧᤴᤗ ᤐᤵᤐᤠ ᤏᤡᤛᤢᤸᤗᤧ ᤔᤧᤸᤗᤢᤰᤜᤠ᤹ ᤗᤧᤖᤢᤎᤛᤡᤀᤠᤱ ᤂᤧᤳᤇᤡᤱ ᤐᤣ᤺ᤰᤗᤥ ᤜᤧᤰᤁᤩᤠᤱ ᤐᤖᤠᤒᤠᤴ ᤋᤠᤀᤠᤱ ᤔᤧᤸᤗᤢᤰᤜᤠ᤹ ᤑᤳᤋᤢᤛᤡ᤹ᤀᤠᤱ ᤛᤧᤛᤢᤍᤣᤛᤢᤛᤡ᤹ᤖᤥ॥ 13ᤂᤧᤴ ᤔᤏᤠᤴ ᤕᤠᤱᤅᤥ ᤕᤠ᤺ᤸᤗᤡᤰ ᤛᤠᤱᤔᤏᤠᤒᤠᤀᤠᤱᤗᤰ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤔᤧᤸᤗᤢᤰᤜᤠ᤹ ᤏᤢᤖᤡᤰᤁᤠᤱ ᤀᤥᤔᤧᤔᤧᤳᤋᤢᤴᤇᤡᤴ ᤁᤖ ᤗᤧᤖᤢᤎᤛᤡᤀᤠᤱ ᤂᤧᤳᤇᤡᤱ ᤐᤣ᤺ᤰᤗᤥ॥
14-15“ᤀᤡᤱᤃᤠ᤹ ᤁᤧᤏᤢ᤹ᤒᤠ ᤔᤧᤸᤗᤢᤰᤁᤶᤒᤠᤀᤠᤖᤥ॥ ᤀᤡᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤛᤡᤱ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤛᤡᤱ ᤏᤡ᤺ᤳᤋᤠᤒᤠ ᤜᤧᤰᤁᤣᤀᤣ ᤀᤠᤔᤧᤸᤗᤢᤰᤜᤠ᤹ᤖᤧ ᤀᤡᤱᤃᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ—ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱ. ᤜᤧᤰᤁᤩᤠᤱ ᤀᤠᤔᤧᤸᤗᤢᤰᤜᤠ᤹ᤖᤧ ᤗᤠᤃᤡ ᤛᤡᤔᤠᤀᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥ 16ᤀᤡᤱᤃᤠ᤹ ᤘᤣ᤹ ᤔᤧᤸᤗᤢᤰᤜᤠ᤹ᤀᤠᤱ ᤁᤳᤋᤢᤱᤛᤡᤱ॥ ᤂᤧᤱᤜᤠ᤹ᤃ ᤁᤴ ᤗᤢᤵᤐᤥᤒᤠ ᤔᤣ᤺ᤴᤇᤡᤖᤥ ᤁᤖ ᤂᤧᤱᤜᤠ᤹ᤀᤠᤱ ᤀᤡᤱᤃᤠ᤹ ᤗᤳᤇᤠ ᤗᤢᤵᤐᤥ ᤋᤠ᤺ᤵᤔᤠᤛᤡ ᤐᤥᤱᤗᤥ॥ ᤀᤡᤱᤃᤠ᤹ ᤀᤠᤀᤡᤰᤗᤠᤴ ᤔᤧᤄᤧᤵᤛᤢ᤹ᤀᤠᤱ ᤂᤧᤱᤜᤠ᤹ ᤌᤡᤰ ᤗᤢᤵ ᤔᤧᤒᤥᤱ ᤜᤧᤰᤁᤩᤠᤱ ᤔᤧᤸᤗᤢᤰᤁᤶᤒᤠᤴᤏᤠᤱ ᤗᤳᤇᤠᤖᤰ ᤐᤥᤱᤗᤥ॥
17“ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤕᤠᤶᤔᤥ ᤕᤠᤱᤏᤠ ᤂᤥᤔᤠ ᤑᤠ᤹ᤀᤠᤱ ᤁᤴ ᤀᤠᤜᤡᤱᤔᤴᤏᤡᤴ ᤂᤢᤏᤧ᤹ ᤐᤡᤖᤢᤱᤍᤣᤛᤢᤱᤗᤥ॥ 18ᤀᤠᤳᤋᤡᤸᤗᤧᤀᤠᤱ ᤏᤧᤳᤋᤡᤃᤧᤴ ᤀᤠᤜᤡᤱᤔᤴᤏᤡᤴ ᤀᤡᤱᤃᤠ᤹ᤀᤥᤗᤠᤶ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ. ᤁᤖ ᤁᤱᤃ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤛᤡᤖᤠ᤹ ᤌᤠᤱᤎᤠᤱ ᤐᤡᤖᤢᤱᤗᤥ॥ ᤏᤧᤳᤋᤡᤃᤧᤴ ᤀᤠᤜᤡᤱᤔᤴᤏᤡᤴ ᤀᤠᤒᤠᤅᤣ ᤐᤡᤔᤠ ᤏᤢ ᤕᤠᤶᤔᤥ ᤕᤠᤱᤏᤠ ᤂᤥᤔᤠ ᤕᤢᤰ ᤁᤳᤋᤢᤱᤗᤥ॥ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤰᤂᤣ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥”
19ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤕᤜᤢᤍᤡᤜᤠ᤹ ᤕᤠᤶᤔᤥᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤅᤧᤴᤏᤠᤱ ᤔᤧᤛᤧᤖᤧᤖᤥ॥ 20ᤕᤖᤡᤰᤗᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤱᤃ ᤛᤧᤰᤂᤠᤛᤠᤱ ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤀᤠᤱ ᤏᤠᤰᤂᤧ ᤐᤣᤀᤠᤱ ᤘᤠ᤹ᤖᤥ᥄ ᤀᤰᤋᤱᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤌᤣᤀᤠᤱ ᤂᤧᤶᤔᤠᤒᤣ᥅” 21ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤒᤠ ᤔᤏᤠᤴ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤏᤧᤴᤗᤥ॥ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠᤸᤗᤧ ᤔᤡᤰᤑ᤺ᤶᤒᤠᤸᤗᤧ ᤁᤢᤔᤡᤰᤁᤡᤴ ᤜᤶᤔᤠ ᤛᤢᤰᤋᤢᤒᤡ᥅”
ᤕᤜᤢᤍᤡᤜᤠ᤹ᤖᤧ ᤕᤧᤛᤢᤴ ᤔᤧᤏᤠ᤹ᤖᤢ
22ᤜᤧᤰᤁᤩᤠᤱ ᤕᤖᤢᤛᤗᤧᤶᤔᤥ ᤔᤠᤱᤜᤡᤶ ᤋᤥ᤺ᤶᤔᤠ ᤋᤱᤏᤠᤶᤖᤧᤴ#᥇᥆:᥈᥈ ᤁᤱᤃ ᥇᥌᥎ ᤏᤠᤈᤡᤖᤡ ᤋᤱᤒᤣ ᤋᤃᤡ ᤕᤜᤢᤍᤡᤜᤠ᤹ᤖᤧ ᤔᤠᤱᤜᤡᤶᤔᤡᤴ ᤛᤣᤛᤣᤛᤠᤱᤛᤠᤱ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤛᤥᤀᤥ ᤕᤧᤳᤇᤡ ᤕᤧᤴ ᤌᤠᤖᤡᤰ ᤛᤛᤠᤱᤛᤪᤥᤳ ᤆᤥ᤺ᤰᤔᤏᤠᤒᤠ ᤋᤱᤏᤠᤶᤔᤡᤴ ᤘᤕᤧ॥ ᤕᤧᤶ ᤘᤕᤧ. ᤁᤱᤃ ᤆᤢᤱᤘᤠ᤺ᤶᤔᤠ ᤗᤠᤀᤥ ᤘᤕᤧᤖᤥ॥ 23ᤜᤧᤰᤁᤩᤠᤱ ᤂᤧᤵᤔᤥ ᤕᤧᤛᤢᤴ ᤔᤠᤱᤜᤡᤶ ᤗᤰᤂᤢᤶ ᤂᤡᤖᤡ ᤛᤥᤗᤥᤔᤏᤖᤧ ᤁᤢᤀᤠ᤺ᤶᤓᤥ ᤔᤧᤵᤔᤏᤠᤒᤠ ᤋᤧᤴᤏᤥ ᤗᤠᤱᤄᤣ᤺ᤰᤁᤡ ᤘᤕᤧᤖᤥ॥ 24ᤂᤢᤏᤧ᤹ ᤁᤢᤄᤡᤖᤡ ᤕᤜᤢᤍᤡᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤐᤡᤷᤒᤣ᤺ᤶᤒᤥ ᤕᤠᤵᤔᤡ ᤁᤧᤃᤵᤐᤠᤒᤣ᥅ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤧᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ ᤁᤢᤍᤥ᤺ᤵᤔᤠᤱ ᤐᤠ᤺ᤳᤋᤧ᤹ᤀᤥ᥄”
25ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤋᤃᤡᤛᤠ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤁᤖ ᤂᤡᤏᤡ᤹ᤃ ᤏᤛᤠᤴ ᤀᤠᤃᤧᤴᤈᤥᤃᤡᤴᤗᤥ॥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤕᤢᤰᤁᤥᤗᤠᤶ ᤆᤥᤃᤢᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤖᤧᤀᤣ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤃᤧᤎᤠᤰᤋᤡ᤹. 26ᤁᤖ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤗᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤠᤔᤧᤸᤗᤢᤰ ᤔᤧ᤺ᤴᤏᤡᤱᤗᤥ॥ 27ᤀᤡᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ᤖᤧᤃ ᤀᤠᤀᤡᤰᤗᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧᤃ ᤀᤡᤱᤃᤠ᤹ ᤔᤧᤍᤡᤶᤔᤠᤖᤥ॥ 28ᤂᤧᤱᤜᤠ᤹ ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤏᤧᤴ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤧᤱᤜᤠ᤹ ᤀᤠᤜᤢᤰᤁᤥᤗᤠᤶ ᤏᤠᤵᤔᤠ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ. 29ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤱᤜᤠ᤹ ᤀᤡᤱᤃᤠ᤹ ᤐᤡᤖᤠᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤆᤥᤰᤗᤥ॥ ᤂᤧᤱᤜᤠ᤹ ᤀᤠᤶᤒᤠᤖᤧ ᤁᤢᤜᤢᤰᤁᤥᤗᤠᤶ ᤀᤠᤳᤋᤡᤸᤗᤧᤀᤠᤱ ᤏᤠᤵᤔᤠ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ॥ 30ᤐᤠᤏᤢᤍᤡᤱ ᤀᤠᤶᤒᤠ ᤏᤢ ᤀᤡᤱᤃᤠ᤹ ᤗᤳᤇᤠᤛᤡᤃᤧᤖᤥ॥”
31ᤜᤧᤰᤁᤣ᤺ᤸᤗᤧ ᤕᤠᤶᤔᤥ ᤕᤜᤢᤍᤡᤜᤠ᤹ᤖᤧ ᤕᤧᤛᤢᤴ ᤗᤧᤵᤔᤠ ᤛᤧᤵᤔᤠ ᤑᤠ᤹ᤀᤠᤱ ᤗᤢᤱᤅᤡᤴ ᤔᤧᤄᤵᤛᤢ. 32ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤐᤠᤏᤢᤍᤡᤱ ᤀᤠᤶᤒᤠᤗᤠᤶ ᤕᤖᤡᤰ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤐᤡᤏᤡᤱ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤀᤥ ᤀᤠᤳᤋᤡᤴ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤗᤢᤱᤅᤡᤸᤗᤧ ᤗᤧᤵᤔᤠ ᤀᤠᤃᤧᤃᤥ᤺ᤳᤋᤡᤒᤠᤒᤣ᥅”
33ᤕᤜᤢᤍᤡᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧᤃ ᤔᤣ᤺ᤴᤗᤥ. ᤁᤖ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤁᤧᤒᤠᤖᤧᤒᤠᤸᤗᤧ ᤆᤥᤃᤢᤸᤗᤧ ᤗᤢᤱᤅᤡᤸᤗᤧ ᤗᤧᤵᤔᤠ ᤁᤥ᤺ᤳᤋᤠᤛᤡᤃᤧᤒᤠᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤔᤧᤴᤇᤠᤶ ᤕᤠᤵᤔᤡᤏᤧᤖᤰ. ᤁᤖ ᤏᤡᤱᤘᤠ᤹ᤑᤢᤔᤠᤱᤀᤠ ᤗ᤹ᤖᤡᤰ ᤁᤧᤒᤠ᤺ᤳᤋᤢ᤹ᤖᤥ॥”
34ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤀᤠᤒᤠᤅᤣ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤡᤏᤡ᤹ ᤔᤠᤱᤏᤡᤱᤗᤥ ᤗ᤹ᤖᤡᤰ ᤔᤧᤳᤋᤢᤛᤡᤒᤠ ᤛᤠᤵᤋᤧᤀᤠᤱ ᤐᤳᤗᤥ॥#᥇᥆:᥉᥊ ᤏᤡᤱ ᤛᤢᤶ ᥎᥈:᥌ ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤗᤠᤶᤗᤥᤒᤠ ᤐᤥᤱᤔᤠ ᤁᤧᤒᤥᤱᤒᤠ ᤔᤏᤠᤜᤠ᤹ ᤁᤴ ᤐᤠ᤺ᤴᤜᤠ᤹ ᤔᤧᤳᤋᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ “ᤂᤡᤏᤡ᤹ ᤔᤠᤱᤏᤡᤱᤗᤥ” ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤧᤰᤘᤠ ᤔᤏᤠᤜᤠ᤹ᤗᤢᤶᤔᤥ ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤘᤕᤧ॥ 35ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤴ ᤗᤧᤱᤔᤠ ᤛᤢᤰᤔᤧᤍᤧᤳᤏᤧᤴᤒᤠᤴ ᤁᤧᤏᤡᤛᤢᤶᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴᤜᤠ᤹ ᤐᤠ᤺ᤴᤈᤠᤰ ᤐᤡᤖᤢᤛᤡ ᤂᤧᤱᤜᤠ᤹ ᤂᤡᤏᤡ᤹ ᤔᤠᤱᤏᤡᤱᤗᤥ ᤗ᤹ᤖᤡᤰ ᤔᤧᤳᤋᤢᤛᤡᤖᤥ॥ 36ᤜᤧᤰᤁᤣ᤺ᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤛᤣᤛᤣ ᤆᤥᤃᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢᤒᤠ ᤔᤏᤠ᤺ᤸᤗᤧ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤛᤠᤀᤠ ᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤁᤧᤒᤠ᤺ᤳᤋᤢ ᤑᤠ᤹ᤀᤠᤱ ᤕᤠᤵᤔᤡ ᤁᤧᤎᤡᤰᤋᤡᤒᤠᤒᤣ᥅ 37ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤆᤥᤰ ᤐᤠᤱᤅᤠᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥ᤺ᤰᤁᤠᤴᤏᤧ ᤑᤠ᤹ᤃᤪ ᤕᤠᤵᤔᤡ ᤏᤛᤠᤴ ᤀᤠᤴᤈᤥᤃᤧᤶᤔᤡᤴᤏᤧ᤹ᤀᤥ॥ 38ᤁᤖ ᤀᤡᤱᤃᤠ᤹ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ᤀᤥ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤇᤠᤱ ᤁᤴ ᤆᤥᤃᤢᤱᤒᤠ ᤕᤠ᤺ᤶᤒᤰᤜᤠ᤹ᤀᤥᤃ ᤏᤛᤠᤴ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤐᤠᤏᤢᤍᤡᤱ ᤐᤠᤴ ᤀᤡᤱᤃᤠ᤹ᤀᤥ ᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤧ᤹ᤀᤥ ᤘᤠ᤹ᤀᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥”
39ᤂᤧᤱᤜᤠ᤹ᤖᤧ ᤂᤢᤏᤧ᤹ ᤕᤠᤶᤔᤥ ᤋᤧᤶᤔᤠ ᤔᤧᤃᤥ᤺ᤳᤋᤢ ᤁᤖ ᤂᤢᤏᤧ᤹ ᤑᤡ᤺ᤴᤇᤡᤱ ᤐᤣᤖᤥ॥
40ᤜᤧᤰᤁᤩᤠᤱ ᤕᤧᤛᤢᤴ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡ ᤋᤃᤡ ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤒᤠ ᤋᤧᤴᤏᤥ ᤐᤣ॥ ᤂᤢᤏᤧ᤹ ᤂᤧᤵᤔᤥᤀᤣ ᤕᤠ᤺ᤰᤋᤧᤸᤗᤧ 41ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤖᤥ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤕᤢᤜᤢᤴᤏᤠᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤇᤠᤱ ᤁᤴ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤧᤰᤂᤠᤀᤣᤖᤥ॥” 42ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤴ ᤏᤛᤠᤴ ᤔᤧᤈᤥᤃᤢᤖᤥ॥
Currently Selected:
ᤕᤢᤜᤢᤴᤏᤠ 10: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.