ᤛᤣ᤺ᤰᤕᤢᤰᤔᤡᤒᤠᤜᤠ᤹ 27

ᤐᤠᤘᤗᤧᤴ ᤖᤥᤔ ᤐᤣᤰ

1ᤀᤠᤸᤗ ᤀᤠᤏᤡᤃᤣ ᤀᤡᤋᤠᤗᤡ#᥈᥍:᥇ ᤀᤡᤋᤠᤗᤡ—ᤀᤡᤋᤠᤗᤡ ᤗᤠᤈᤣ᤹ᤀᤥ ᤖᤥᤔ ᤕᤧᤰᤕᤰ ᤏᤧᤛ᤻ᤛᤧᤖᤥ॥ ᤖᤥᤔᤡ ᤜᤠᤱᤈᤢᤶᤖᤧ ᤂᤠᤛᤧᤴᤗᤥᤶᤔᤠ ᤋᤧᤴᤏᤥ ᤐᤠᤘᤸᤗᤧᤴ ᤁᤢᤍᤥ᤺ᤴᤇᤧ ᤋᤣ᤹ᤔᤠ ᤁᤧᤒᤥᤱᤒᤠ ᤘᤕᤧ॥ ᤗᤧᤵᤔᤠᤱ ᤘᤠᤗᤠᤶᤍᤡᤰ ᤆᤥ᤺ᤰᤔᤠ ᤐᤥᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤐᤥ᤺ᤰᤂᤧ॥ ᤂᤧᤱᤜᤠ᤹ᤖᤧ ᤐᤠᤘᤗ ᤏᤢ ᤘᤣ᤹ ᤐᤢᤱᤗᤠᤎᤠᤒᤠᤜᤠ᤹ ᤐᤕᤶ ᤜᤠᤱᤅᤡᤸᤗᤧᤴ ᤋᤢᤖᤠ ᤔᤧᤵᤔᤏᤠᤒᤠ ᤋᤢᤖᤠᤖᤧᤴ ᤌᤰᤋᤢᤶᤒᤠ ᤈᤢᤗᤡᤕᤛᤖᤧ ᤁᤢᤜᤢᤰᤁᤥ ᤗᤰᤐᤧᤴ ᤔᤧᤒᤡᤖᤢᤛᤡᤖᤥ॥ 2ᤜᤧᤰᤁᤩᤠᤱ ᤀᤠᤏᤡᤃᤣ ᤀᤣᤛᤡᤕᤠᤛᤔᤠ ᤋᤧᤱᤃᤵᤐᤥᤒᤠ ᤘᤠᤃᤵᤂᤣ᤺ᤱᤜᤠ᤹ ᤗᤧᤵᤔᤠᤱ ᤘᤠᤗᤠᤶᤍᤡᤰ ᤆᤥ᤺ᤰᤔᤠ ᤕᤠᤖᤡᤵ ᤁᤧᤒᤥᤱᤒᤠ ᤀᤠᤍᤪᤠᤔᤡᤋᤣᤏᤛᤗᤠᤶ ᤁᤧᤓᤧᤶᤒᤠ ᤘᤠᤗᤠᤎᤠᤀᤥ ᤗᤠ᤺ᤵᤔᤏᤠᤀᤠᤱ ᤗᤠᤶᤍᤡᤰ ᤆᤥ᤺ᤰᤔᤏᤠᤖᤥ॥ ᤀᤠᤏᤡᤃᤣ ᤏᤢ ᤌᤡᤛ᤻ᤛᤗᤥᤏᤡᤁᤠᤗᤠᤶ ᤁᤧᤍᤠᤒᤠ ᤀᤖᤡᤛ᤻ᤋᤠᤷᤂᤛ ᤔᤧᤵᤔᤏᤠᤒᤠ ᤔᤧᤛᤣᤍᤥᤏᤡᤕᤠᤗᤡ ᤏᤛᤠᤏᤡᤒᤠ ᤆᤢᤶᤎᤡᤰᤁᤠᤱ ᤘᤕᤧᤖᤥ॥

3ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤀᤠᤏᤡᤃᤣ ᤛᤡᤍᤥᤴᤏᤥ ᤁᤧᤵᤔᤏᤠᤀᤠᤱ ᤌᤰᤋᤢᤶᤒᤠ ᤈᤢᤗᤡᤕᤛᤧᤸᤗᤧ ᤐᤠᤘᤗᤧᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ᤏᤢ ᤋᤢᤶᤔᤠ ᤜᤧᤰᤁᤩᤠᤱ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃᤰᤘᤠ ᤋᤱᤃᤠᤶ ᤆᤥ᤺ᤰᤔᤠ ᤋᤧᤴᤍᤡᤱ ᤐᤡᤖᤢᤖᤥ॥ 4ᤂᤧᤵᤔᤥᤗᤠᤶ ᤀᤠᤏᤡᤃᤣ ᤋᤃᤡ ᤐᤥᤱᤔᤏᤠᤖ ᤐᤣ᤺ᤰᤔᤏᤠ ᤁᤖ ᤛᤢᤖᤡᤳ ᤁᤣᤈᤱᤅᤡᤴ ᤀᤠᤏᤡᤃᤣ ᤋᤰᤗᤧᤱᤘᤠ ᤗᤧᤵᤔᤠᤱᤗᤠᤶ ᤜᤢᤖᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤛᤢᤖᤡᤳᤔᤠᤴᤏᤢ ᤛᤧ᤺ᤵᤛᤡᤱᤔᤠ ᤑᤠ᤹ᤀᤠᤱ ᤀᤠᤏᤡᤃᤣ ᤛᤤᤐᤪᤛ ᤘᤠᤃᤵᤂᤠᤶᤔᤡᤸᤗᤧ ᤌᤥᤜᤠᤱᤗᤧᤵᤔᤠᤱᤏᤢ ᤁᤢᤕᤠ ᤁᤢᤕᤠ ᤐᤥᤱᤔᤏᤠᤖ ᤐᤣ᤺ᤰᤔᤏᤠᤖᤥ॥ 5ᤜᤧᤰᤁᤩᤠᤱ ᤛᤡᤗᤡᤛᤡᤕᤠ ᤏᤢ ᤐᤠᤶᤑᤡᤗᤡᤕᤠ ᤋᤧᤱᤃᤵᤖᤧ ᤁᤢᤕᤠᤀᤥ ᤐᤥᤱᤔᤏᤠᤖ ᤐᤣ᤺ᤰᤔᤏᤠᤀᤠᤱ ᤗᤡᤛᤡᤕᤠ ᤌᤢᤶᤔᤥᤒᤠ ᤔᤀᤡᤖᤠ ᤐᤠᤱᤈᤢᤶᤔᤥ ᤁᤧᤵᤔᤏᤠᤖᤥ॥ 6ᤂᤧᤵᤔᤥ ᤌᤰᤋᤢᤶᤒᤧᤸᤗᤧ ᤔᤡᤛᤪᤛᤔᤠ ᤀᤗᤧᤰᤈᤧᤴᤍᤪᤡᤕᤠᤗᤠᤶ ᤁᤧᤓᤧᤶᤒᤠᤀᤠᤱ ᤀᤡᤋᤠᤗᤡ ᤗᤧᤵᤔᤠᤱ ᤗᤠᤶᤍᤡᤰ ᤆᤥ᤺ᤰᤔᤠ ᤕᤠᤖᤡᤵ ᤁᤧᤒᤥᤱᤒᤠ ᤘᤣ᤹ ᤘᤠᤗᤠᤎᤠᤴ ᤂᤥᤛᤢ. ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤂᤧᤵᤔᤥ ᤆᤳᤇᤡᤱᤔᤏᤠᤖᤥ॥ 7ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤕᤖᤡᤰ ᤕᤧᤴ ᤏᤅᤣ᤺ᤰᤁᤠᤱ ᤘᤠᤗᤠᤶᤍᤡᤰ ᤆᤥ᤺ᤰᤔᤏᤠᤖ ᤐᤕᤶ ᤋᤢᤰᤂᤣᤏᤢ ᤏᤡᤍᤛ ᤔᤧᤵᤔᤏᤠᤒᤠ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤵᤔᤏᤠᤖᤥ॥ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤀᤡᤋᤠᤗᤡ ᤗᤧᤵᤔᤠᤱ ᤐᤣ᤺ᤰᤔᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤔᤧᤒᤡᤖᤡᤃᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤪᤣᤋ ᤔᤧᤵᤔᤏᤠᤒᤠ ᤘᤠᤃᤵᤂᤠᤶᤛᤔᤠ ᤛᤠᤗᤔᤥᤏᤣᤏᤢ ᤗᤠᤱᤃᤧᤳ ᤗᤧᤵᤔᤠᤱ ᤐᤥᤱᤔᤏᤠᤀᤠᤱ 8ᤁᤪᤣᤋᤖᤧ ᤗᤠᤱᤃᤧᤳ ᤐᤡᤛᤠᤱ ᤁᤢᤕᤠ ᤁᤢᤕᤠ ᤐᤥ᤺ᤰᤂᤡᤃᤧᤖ ᤐᤕᤶ ᤋᤢᤰᤂᤣᤘᤠᤏᤢ ᤀᤠᤏᤡᤃᤣ ᤗᤛᤡᤕᤠ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤏᤢᤒᤠ ᤘᤠᤃᤵᤂᤣ᤺ᤱ ᤔᤧᤵᤔᤏᤠᤒᤠ ᤋᤧᤴᤏᤥ ᤁᤧᤵᤔᤏᤠᤖᤥ॥

9ᤂᤧᤱᤜᤠ᤹ ᤘᤠᤗᤠᤶᤍᤡᤰ ᤆᤥ᤺ᤰᤔᤠ ᤔᤧᤛᤢᤛᤧᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱ ᤜᤢᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤖ ᤐᤳᤇᤧᤒᤠᤸᤗᤧ. ᤂᤧᤵᤔᤥᤏᤢ ᤋᤃᤡ ᤗᤠᤶᤍᤡᤰ ᤆᤥ᤺ᤰᤔᤠ ᤁᤡᤵᤔᤠ ᤁᤧᤄᤢᤒᤠ ᤐᤥ᤺ᤰᤂᤧᤀᤠᤱ ᤘᤕᤧ॥#᥈᥍:᥏ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤋ᤺ᤰ ᤏᤧᤵᤔᤏᤠᤒᤠ ᤕᤧᤴ ᤌᤩᤧᤀᤠᤱ ᤘᤠᤗᤠᤶᤍᤡᤰ ᤆᤥ᤺ᤰᤔᤠ ᤁᤡᤵᤔᤠ ᤂᤢᤛᤧᤖᤥ॥” ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤁᤧᤕᤧᤰᤐᤠ ᤋ᤺ᤰ ᤏᤧᤵᤔᤏᤠᤒᤠ ᤋᤱᤏᤠᤶ ᤀᤣᤃᤠᤱ. ᤋᤱᤒᤣᤒᤠ ᤂᤧᤴ ᤕᤧᤶᤔᤥ. ᤛᤢᤖᤡᤳ ᤁᤣᤈᤱ ᤛᤠ᤹ᤖᤡᤰ ᤜᤢᤔᤠ ᤜᤣ᤺ᤰᤋᤧ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤘᤠᤍᤥᤆᤠ᤺ᤰᤐᤠᤜᤠ᤹ ᤛᤢᤈᤠ ᤐᤡᤖᤢᤛᤡ. 10“ᤀᤠᤍᤠᤱᤒᤠᤛᤣ. ᤀᤠᤸᤗ ᤋᤃᤡᤒᤠ ᤘᤠᤗᤠᤶᤍᤡᤰ ᤆᤥ᤺ᤰᤔᤠ ᤁᤡᤵᤔᤠ ᤁᤧᤄᤢᤒᤠ ᤐᤥ᤺ᤰᤂᤧᤒᤠ ᤏᤡᤛᤢᤱᤗᤥ॥ ᤆᤰᤔᤧᤸᤗ᤹ᤀᤣ ᤘᤠᤗᤠᤶᤍᤡᤰ ᤀᤠᤈᤥᤃᤢᤶᤏᤧ ᤑᤠ᤹ᤃᤪ. ᤘᤠᤗᤠᤎᤠ ᤏᤢ ᤘᤠᤃᤰᤖᤧ ᤐᤕᤶ ᤀᤡᤶᤔᤥᤰᤗᤰ ᤔᤣ᤺ᤴ. ᤁᤖ ᤀᤠᤏᤡ᤹ᤀᤠᤱ ᤛᤡᤔᤠ ᤀᤠᤛᤢᤰᤗᤥ॥” 11ᤁᤖ ᤌᤰᤋᤢᤶᤒᤧᤸᤗᤧ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤏᤢ᤺ᤸᤗᤧᤀᤠᤱ ᤘᤠᤍᤥᤕᤢᤰᤐᤧᤴ ᤏᤢ ᤘᤠᤍᤥᤍᤠᤱᤒᤠᤸᤗᤧ ᤗᤠᤶᤍᤡᤰ ᤆᤥᤃᤡ ᤗ᤹ᤖᤡᤰ ᤐᤠ᤺ᤳᤋᤧᤳᤇᤢᤒᤠ ᤐᤠ᤺ᤴᤏᤥᤀᤣ ᤏᤡᤱᤘᤠ᤹ ᤐᤡᤖᤢᤖᤥ॥ 12ᤁᤴ ᤋᤧᤴᤏᤡᤴ ᤆᤢᤱᤘᤠ᤺ᤶᤔᤠᤀᤥ ᤘᤠ᤹ᤔᤠ ᤏᤢᤒᤠ ᤔᤧᤈᤥᤃᤧᤶᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰᤍᤱᤒᤠ ᤔᤏᤠᤜᤠ᤹ ᤗᤠᤶᤍᤡᤰ ᤆᤥ᤺ᤰᤔᤠᤀᤠᤱ ᤑᤥᤏᤡᤰᤛ ᤕᤧᤰᤕᤰᤁᤥ ᤁᤧᤵᤔᤠᤀᤠᤱ ᤆᤢᤱᤘᤠ᤺ᤶᤔᤠᤀᤥ ᤘᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥ ᤂᤧᤴ ᤘᤠᤃᤵᤂᤧ᤺ᤱᤅᤡᤱᤃ ᤁᤪᤣᤋᤛᤔᤠ ᤌᤠᤱᤃᤧᤳ ᤏᤠᤶᤎᤠ ᤏᤢ ᤗᤠᤱᤃᤧᤳ ᤏᤠᤶᤎᤠ ᤗᤧᤵᤔᤠᤱ ᤋᤰᤁᤧᤔᤧᤵᤐᤠ ᤏᤢᤒᤠ ᤘᤠᤃᤵᤂᤣ᤺ᤱ ᤆᤥᤃᤧᤖᤥ॥

13ᤗᤠᤱᤃᤧᤳ ᤐᤡᤛᤠᤱᤗᤠᤶ ᤕᤧᤶᤕᤧᤶᤃᤧᤴ ᤛᤢᤖᤡᤳ ᤁᤣᤈᤱ ᤜᤢᤔᤠ ᤜᤣ᤺ᤰᤋᤧᤀᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤁᤱᤃ ᤘᤠᤗᤠᤶᤍᤡᤰ ᤆᤥ᤺ᤰᤔᤠ ᤏᤢᤒᤠ ᤔᤡᤰᤛᤣ᤺ᤴᤗᤥ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ॥ ᤜᤧᤰᤁᤩᤠᤱ ᤘᤠᤍᤥᤂᤧ᤺ᤰᤆᤢᤖᤡᤴ ᤔᤧᤀᤢ᤺ᤰᤂᤢᤀᤠᤱ ᤁᤪᤣᤋᤖᤧ ᤗᤠᤱᤃᤧᤳ ᤐᤡᤛᤠᤱᤗᤠᤶ ᤁᤢᤕᤠ ᤁᤢᤕᤠ ᤔᤧᤒᤥ᤺ᤰᤂᤧᤖ ᤏᤠᤶᤎᤠ ᤐᤡᤛᤠᤱ ᤗᤧᤵᤔᤠᤱ ᤗᤠᤶᤍᤡᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ॥ 14ᤁᤖ ᤜᤠᤖᤠᤀᤣ ᤂᤧᤵᤔᤥ “ᤌᤠᤱᤃᤧᤳ-ᤏᤠᤶᤃᤧᤴ” ᤔᤧᤵᤔᤏᤠᤒᤠ ᤀᤡᤎᤢᤃᤧᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤘᤠᤃᤵᤂᤠᤶᤗᤠᤶ ᤁᤡᤵᤔᤠ ᤂᤢᤛᤧᤖ ᤜᤢᤔᤠ ᤜᤣ᤺ᤰᤋᤧᤖᤥ॥ 15ᤂᤧᤸᤗᤧ ᤘᤠᤗᤠᤎᤠᤴ ᤜᤡᤵᤋᤢᤀᤠᤱ ᤛᤢᤖᤡᤳ ᤁᤣᤈᤱ ᤁᤧᤜᤢᤒᤠ ᤗᤧᤵᤔᤠᤱ ᤋᤃᤡ ᤐᤥᤔᤠ ᤁᤧᤛᤠᤰᤐᤠ ᤐᤥ᤺ᤰᤂᤧᤀᤠᤱ ᤘᤠᤗᤠᤎᤠᤴ ᤀᤠᤏᤡᤃᤣ ᤛᤢᤖᤡᤳ ᤁᤣᤈᤱᤅᤥᤀᤣ ᤗᤧᤵᤔᤏᤠᤍᤣᤔᤏᤠᤖᤥ॥ 16ᤜᤧᤰᤁᤩᤠᤱ ᤀᤠᤏᤡᤃᤣ ᤁᤠᤀᤢᤍᤠ ᤔᤧᤵᤔᤏᤠᤒᤠ ᤆᤢᤰᤛᤠ ᤘᤠᤃᤵᤂᤠᤶᤔᤡᤸᤗᤧ ᤁᤢᤕᤠᤀᤥ ᤀᤡ᤺ᤶᤛᤡᤱᤔᤏᤠᤖ ᤐᤣ᤺ᤰᤔᤏᤠ॥ ᤂᤧᤵᤔᤥ ᤘᤠᤗᤠᤎᤠᤴ ᤑᤧᤳᤗᤠᤀᤠᤱ ᤏᤡ᤺ᤶᤔᤡᤸᤗᤧ ᤛᤧ᤺ᤵᤛᤡᤱᤛᤧ ᤀᤥᤃᤵ ᤆᤥ᤺ᤰᤔᤏᤠᤒᤠ ᤂ᤺ᤱᤒᤣᤜᤠ᤹ ᤀᤠᤏᤡᤃᤣ ᤛᤢᤰᤔᤧᤴᤇᤢᤰ ᤆᤫᤠ᤺ᤳᤋᤥᤗᤠᤶ ᤌᤥ ᤀᤢ᤺ᤰᤂᤢᤶᤒᤧᤀᤠᤱ ᤀᤡᤄᤣ᤺ᤱᤔᤏᤠᤀᤠᤱ ᤋᤠᤱᤔᤏᤠᤖᤥ॥ 17ᤂᤧᤱᤜᤠ᤹ᤖᤧ ᤂᤧᤴ ᤌᤥ ᤔᤧᤀᤢ᤺ᤰᤂᤢᤀᤠᤱ ᤘᤠᤗᤠᤎᤠᤴ ᤔᤧᤕ᤺ᤏᤧᤴᤗ ᤑᤠ᤹ᤀᤠᤱ ᤁᤢᤛᤡᤃᤠᤱᤗᤠᤶ ᤀᤡᤍᤠ᤺ᤰᤁᤡᤸᤗᤧ ᤆᤡᤃᤧᤰ ᤆᤡᤃᤧᤰ ᤀᤡᤔᤧᤄᤣ᤺ᤰᤂᤢᤖᤥ॥ ᤛᤡᤖᤋᤡᤛ#᥈᥍:᥇᥍ ᤁᤴ ᤋᤧᤴᤏᤡᤏᤱᤃ ᤀᤠᤀᤡᤴ ᤋᤠ᤺ᤴᤍᤡᤰ ᤀᤑᤪᤡᤁᤠᤛᤔᤠ ᤗᤡᤒᤡᤕᤠ ᤗᤠᤈᤣ᤹ᤀᤡᤴᤗᤥ॥ ᤔᤧᤵᤔᤏᤠᤒᤠ ᤕᤧ᤺ᤱᤄᤠ ᤘᤠᤈᤡᤶᤒᤣᤀᤥ ᤀᤠᤎᤠ ᤑᤠ᤹ᤀᤠᤱ ᤔᤧᤃᤡᤛᤧᤀᤠᤱ ᤕᤶᤒᤠ ᤘᤠᤍᤥᤛᤠᤖᤡᤴ ᤕᤥ ᤔᤧᤎᤠᤛᤢ॥ ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱ ᤜᤢᤖᤧᤒᤠ ᤗᤧᤵᤔᤠᤱ ᤘᤠᤗᤠᤎᤠᤴ ᤔᤧᤗᤧᤖᤢ ᤔᤧᤍᤣᤛᤢᤖᤥ॥ 18ᤆᤰᤔᤧᤸᤗ᤹ᤀᤣ ᤛᤢᤖᤡᤳ ᤁᤣᤈᤱ ᤁᤡᤵᤔᤠ ᤂᤢᤛᤧᤖ ᤜᤢᤖᤧᤖ ᤏᤧᤛ᤻ᤛᤧ॥ ᤂᤧᤸᤗᤧᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤥ ᤂᤧᤱᤜᤠ᤹ᤖᤧ ᤘᤠᤃᤰᤜᤠ᤹ ᤆᤫᤠ᤺ᤳᤋᤥ ᤗᤠᤵᤑᤢᤔᤠ ᤔᤧᤜᤣ᤺ᤰᤋᤢᤖᤥ॥ 19ᤁᤢᤀᤠᤳᤇᤧᤴᤍᤠᤴ ᤘᤠᤗᤠᤎᤠᤴ ᤕᤠᤱᤕᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤘᤠᤍᤥᤛᤠᤔᤠᤜᤠ᤹#᥈᥍:᥇᥏ ᤘᤠᤍᤥᤛᤠᤔᤠᤜᤠ᤹—ᤁᤱᤃ ᤘᤠᤗᤠᤎᤠᤀᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃᤰᤘᤠᤜᤠ᤹ᤖᤥ॥ ᤆᤫᤠ᤺ᤳᤋᤥ ᤀᤠᤒᤠᤅᤣ ᤗᤠᤵᤔᤧᤓᤢᤛᤢᤖᤥ॥ 20ᤕᤖᤡᤰ ᤕᤧᤴ ᤌᤠᤖᤡᤰ ᤁᤡᤵᤔᤠ ᤂᤢᤛᤧᤖ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤖᤧᤖ ᤏᤧᤛ᤻ᤛᤧᤒᤠᤸᤗᤧ ᤆᤥᤃᤢᤸᤗᤧ ᤗᤠᤶ ᤁᤧᤗᤥᤒᤠ ᤂᤣᤛᤣ. ᤏᤠᤶ ᤌᤣᤀᤠᤱ ᤀᤠᤏᤡᤃᤣ ᤏᤡᤔᤠ ᤔᤧᤛᤢᤰᤋᤢᤶᤒᤧᤴ॥ ᤜᤧᤰᤁᤣ᤺ᤸᤗᤧ ᤀᤠᤜᤡᤱ ᤁᤧᤗ᤹ᤒᤠ ᤏᤡᤱᤛᤠᤱᤅᤠᤱ ᤔᤠ᤺ᤶᤏᤠᤍᤣ᤺ᤶᤏᤠᤖᤥ॥

21ᤘᤠᤗᤠᤎᤠᤀᤥᤒᤠ ᤔᤏᤠᤜᤠ᤹ ᤆᤠ ᤔᤧᤴᤈᤠᤀᤣᤒᤠ ᤕᤖᤡᤰ ᤕᤧᤴ ᤐᤥ᤺ᤰᤂᤧᤀᤠᤱ ᤘᤕᤧᤒᤠᤸᤗᤧ ᤐᤠᤘᤗᤧᤴ ᤂᤢᤴᤇᤡ᤹ ᤗᤢᤶᤔᤥ ᤕᤧᤶᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤍᤠᤱᤒᤠᤛᤣ. ᤀᤠᤒᤠᤴ ᤁᤧᤄᤧᤵᤛᤢᤶᤔᤠᤱ ᤁᤪᤣᤋᤗᤠᤶ ᤀᤠᤴᤎᤠᤛᤡᤱᤅᤡᤴᤏᤡᤸᤗᤧᤃ ᤀᤰᤂᤣᤗ᤹ᤖᤡᤰ ᤀᤡᤶᤔᤥᤰ ᤔᤧᤒᤥ᤺ᤰᤂᤧᤶᤒᤠᤖᤥ॥ 22ᤁᤖ ᤀᤠᤸᤗ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤗᤳᤌᤡᤰᤁᤠᤱ ᤀᤠᤴᤇᤡ᤺ᤏᤧᤴᤗᤥ. ᤁᤖ ᤁᤴ ᤘᤠᤗᤠᤎᤠ᤺ᤴᤗᤰ ᤀᤡᤶᤔᤥᤰ ᤐᤥᤱᤗᤥ॥ 23ᤀᤡᤱᤃᤠ᤹ ᤛᤧᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤀᤠᤴᤍᤣᤴ ᤛᤧᤴᤍᤡᤰ ᤀᤡᤱᤃᤠ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ 24ᤀᤰᤂᤣ ᤔᤧᤳᤋᤠᤱ. ‘ᤐᤠᤘᤗᤀᤣ. ᤔᤧᤃᤡᤛᤧᤴᤏᤧ᤹ᤀᤥ. ᤂᤧᤏᤧ᤹ᤃ ᤛᤡᤈᤖᤗᤧ ᤁᤢᤍᤃᤡ ᤂᤠᤛᤧᤴ ᤗᤥ᤺ᤴᤇᤡᤱᤛᤧ ᤕᤧᤵᤔᤠᤀᤣ ᤐᤥᤱᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤏᤢ ᤗᤠᤶᤍᤡᤰ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤜᤡᤱᤄᤢᤛᤡ᤹ᤖᤥ॥’ 25ᤂᤧᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠᤛᤣ. ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ᥄ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤁᤧᤳᤗᤥ॥ 26ᤜᤧᤰᤁᤣᤛᤠᤱ ᤀᤠᤏᤡ᤹ᤃ ᤁᤢᤓᤠ ᤘᤠᤃᤵᤂᤠᤶᤔᤥ ᤀᤠᤜᤠᤰᤛᤡᤱᤗᤥ॥”

27ᤂᤠᤶᤍᤥᤗᤢᤶ ᤘᤖᤰᤁᤥ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤕᤠᤵᤔᤡ ᤔᤢ᤺ᤳᤋᤧᤒᤠ ᤌᤡᤰ-ᤗᤡ (᥇᥊) ᤕᤧᤴ ᤐᤥ᤺ᤰᤂᤧᤆᤢᤖᤧᤀᤠᤱ ᤘᤕᤧᤖᤥ॥ ᤛᤧᤳᤗᤢᤶᤓᤰᤋᤧᤸᤗᤧ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤗᤠᤈᤣ᤹ᤖᤧ ᤁᤢᤒᤣᤛᤠᤱ ᤔᤧᤃᤧᤖᤧᤒᤠ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ 28ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤆᤫᤠ᤺ᤳᤋᤡᤸᤗᤧ ᤁᤢᤓᤡ᤺ᤶᤔᤧᤴ ᤀᤠᤰᤂᤧᤶᤔᤩᤠᤰ ᤏᤧᤒᤣ ᤑᤠ᤹ᤀᤠᤱ ᤔᤧᤛᤡ᤺ᤰᤋᤢᤸᤗᤧ ᤜᤢᤰᤛᤡᤰ ᤕᤧᤳᤁᤡᤵ (᥎᥆) ᤔᤧᤄᤥᤛᤢ॥ ᤜᤧᤰᤁᤩᤠᤱ ᤛᤵᤑᤠᤱ ᤔᤧᤛᤡ᤺ᤰᤋᤢᤸᤗᤧ ᤜᤢᤰᤛᤡᤰ ᤋᤢᤰᤁᤡᤵ (᥌᥆) ᤔᤧᤄᤥᤛᤢᤖᤥ॥ 29ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤕᤠᤀᤥᤒᤠ ᤐᤕᤶ ᤗᤢᤱᤅᤥ ᤀᤠᤍᤥ᤺ᤰᤐᤡᤗᤠ ᤑᤠ᤹ᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤘᤠᤗᤠᤎᤠ᤺ᤸᤗᤧ ᤁᤢᤀᤣ᤺ᤰᤗᤧᤵᤔᤠᤱᤏᤢ ᤗᤡᤛᤡ ᤘᤠᤍᤥᤂᤧ᤺ᤰᤆᤢᤖᤡᤜᤠ᤹ ᤔᤧᤎᤠᤛᤢᤀᤠᤱ ᤀᤠᤸᤗ ᤜᤠᤖᤠ ᤂᤠᤀᤥ᤺ᤳᤏᤡᤖᤥ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ॥ 30ᤜᤧᤰᤁᤩᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤘᤠᤗᤠᤎᤠᤸᤗᤧᤴ ᤋᤰᤗᤧᤵᤔᤠᤱᤏᤢ ᤘᤠᤍᤥᤂᤧᤰᤆᤢᤖᤡᤜᤠ᤹ ᤁᤧᤎᤠᤒᤠ ᤔᤧᤗᤠᤶᤛᤡᤱᤗ ᤂᤧᤳᤇᤡᤱᤔᤠ ᤑᤠ᤹ᤀᤠᤱ ᤂ᤺ᤱᤒᤣᤴ ᤕᤥ ᤆᤫᤠ᤺ᤳᤋᤥ ᤌᤠᤔᤠ ᤔᤧᤜᤣ᤺ᤰᤋᤢᤖᤥ॥ 31ᤁᤖ ᤐᤠᤘᤗᤖᤧ ᤌᤰᤋᤢᤶᤒᤠ ᤏᤢ ᤌᤰᤛᤢᤒᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤘᤠᤍᤥᤆᤠ᤺ᤰᤐᤠᤜᤠ᤹ ᤁᤴ ᤘᤠᤗᤠᤎᤠᤀᤥ ᤔᤧᤴᤕᤠ᤺ᤰᤏᤧᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤧᤴᤜᤡᤱᤅᤡᤴᤗᤥ॥” 32ᤂᤧᤸᤗᤧᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂ᤺ᤱᤒᤣᤴ ᤁᤧᤓᤥ᤺ᤶᤒᤠᤀᤠᤱ ᤁᤧᤒᤵᤐᤠ ᤀᤡᤍᤠ᤺ᤰᤜᤠ᤹ ᤔᤧᤄᤰᤋᤢ ᤔᤧᤍᤣᤛᤢᤀᤠᤱ ᤂ᤺ᤱᤒᤣᤴ ᤆᤫᤠ᤺ᤳᤋᤥ ᤔᤧᤗᤧᤖᤢ ᤔᤧᤍᤣᤛᤢᤖᤥ॥

33ᤀᤠᤸᤗ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤐᤠᤘᤗᤖᤧ ᤂᤧᤱᤜᤠ᤹ ᤁᤢᤈᤠᤛᤡᤰ ᤆᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤛᤡ. “ᤂᤡᤏᤡ᤹ᤃ ᤁᤧᤃᤡᤛᤡᤒᤠᤸᤗᤧ ᤆᤥᤃᤢᤸᤗᤧ ᤌᤣᤀᤠᤱ ᤔᤧᤴᤈᤠᤀᤣ ᤁᤧᤘᤕᤡᤒᤠ ᤌᤡᤰ-ᤗᤡ (᥇᥊) ᤕᤧᤴ ᤐᤥ᤺ᤰᤂᤧ॥ 34ᤜᤡᤱᤔᤠᤖᤧ ᤗᤠᤃᤡ ᤌᤣᤀᤡᤃ ᤆᤠᤔᤠᤀᤣ ᤐᤥᤱ. ᤜᤧᤰᤁᤣ᤺ᤸᤗᤧ ᤆᤠᤈᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤡᤏᤡ᤹ ᤌᤧᤃᤣ᤺ᤰᤀᤡᤎᤡᤰᤁᤠᤱ ᤌᤣᤀᤠᤱ ᤔᤧᤒᤥᤱᤏᤧᤸᤗᤥ॥” 35ᤐᤠᤘᤗᤖᤧ ᤜᤧᤰᤁᤣ ᤔᤧᤳᤋᤢ ᤛᤢᤖᤢᤛᤡᤀᤠᤱ ᤁᤢᤓᤠ ᤂᤖᤧ᤺ᤱ ᤂᤵᤛᤢᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤆᤠᤔᤠ ᤜᤣ᤺ᤰᤋᤢᤖᤥ॥ 36ᤂᤧᤱᤜᤠ᤹ ᤁᤠᤰ ᤜᤠᤱᤜᤠᤱ ᤔᤧᤗ᤹ᤖᤧᤀᤠᤱ ᤆᤠᤈᤠᤔᤠ ᤔᤧᤜᤣ᤺ᤰᤋᤢ॥ 37ᤀᤠᤏᤡᤃᤣ ᤘᤠᤗᤠᤎᤠᤀᤥ ᤁᤡᤵ ᤌᤡᤰ ᤏᤧᤳᤇᤡᤀᤠᤱ ᤏᤢ-ᤋᤢᤰ (᥈᥍᥌) ᤔᤏᤠᤜᤠ᤹ ᤕᤠᤰᤔᤏᤠᤖᤥ॥ 38ᤁᤧᤖᤧᤰᤗᤧ ᤂᤢᤏᤡ᤹ ᤂᤠᤄᤠ ᤆᤠ ᤔᤧᤈᤀᤠᤱ ᤘᤠᤗᤠᤎᤠᤴ ᤕᤠᤱᤕᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤛᤡ-ᤈᤠᤜᤠ᤹ ᤆᤫᤠ᤺ᤳᤋᤥ ᤗᤠᤵᤔᤧᤓᤢᤛᤢᤖᤥ॥

39ᤜᤧᤰᤁᤩᤠᤱ ᤏᤠᤶᤒᤡᤴᤍᤧᤀᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤘᤠᤖᤰ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤋᤧᤴ ᤔᤧᤏᤡᤛᤢ. ᤁᤖ ᤗᤠᤈᤣ᤹ᤀᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥ ᤜᤧᤰᤁᤩᤠᤱ ᤁᤢᤕᤠᤀᤥ ᤋᤣ᤹ᤔᤠᤀᤠᤱ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤕᤧ᤺ᤱᤄᤠᤀᤥ ᤘᤠᤗᤠᤎᤠᤴ ᤜᤠᤰᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤔᤧᤈᤥᤃᤢᤖᤥ॥ 40ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤘᤠᤍᤥᤂᤧ᤺ᤰᤆᤢᤖᤡ ᤀᤡᤍᤠ᤺ᤰᤜᤠ᤹ ᤔᤧᤄᤰᤋᤢᤀᤠᤱ ᤘᤖᤰᤁᤥ ᤏᤡ᤺ᤒᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤍᤥ᤺ᤶᤔᤠ ᤁᤢᤜᤡᤔᤠ ᤛᤡᤱᤅᤡᤴ ᤁᤧᤎᤶᤒᤠᤀᤠᤱ ᤁᤧᤒᤵᤐᤠ ᤀᤡᤍᤠ᤺ᤰᤜᤠ᤹ᤀᤠᤱ ᤔᤧᤓᤠ᤺ᤰᤂᤢ ᤔᤧᤍᤣᤛᤢᤖᤥ॥ ᤂᤧᤱᤜᤠ᤹ᤖᤧ ᤘᤠᤍᤥᤛᤠᤖᤡᤴ ᤔᤧᤓᤠ᤺ᤰᤂᤢᤀᤠᤱ ᤔᤧᤓᤥᤴᤍᤢ॥ ᤜᤧᤰᤁᤣᤗ᤹ᤖᤡᤰ ᤛᤢᤖᤡᤳᤔᤠᤸᤗᤧ ᤘᤠᤗᤠᤎᤠᤴ ᤔᤢ᤺ᤳᤋᤢᤖ ᤁᤢᤕᤠᤀᤥ ᤋᤣ᤹ᤖᤢᤖᤥ॥ 41ᤁᤖ ᤘᤠᤗᤠᤎᤠ᤺ᤸᤗᤧᤴ ᤋᤰᤗᤧᤵᤔᤠᤱᤒᤧᤴ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤕᤧ᤺ᤱᤄᤠᤀᤥ ᤛᤠ᤹ᤖᤡᤰ ᤜᤠᤰᤛᤡᤱᤅᤠᤱ ᤔᤢᤶᤔᤠᤀᤠᤱ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤣ᤺ᤰᤗᤧᤵᤔᤠᤱᤒᤠᤴ ᤘᤠᤓᤧᤸᤗᤧᤱᤅᤡᤸᤗᤧ ᤜᤡᤵᤋᤢᤀᤠᤱ ᤕᤶᤔᤠ ᤜᤣ᤺ᤰᤋᤧᤖᤥ॥

42ᤌᤰᤛᤢᤒᤠᤜᤠ᤹ᤖᤧ ᤐᤢᤱᤗᤠᤎᤠᤒᤠᤜᤠ᤹ ᤘᤠᤔᤧᤈᤠ᤺ᤰᤁᤠᤱ ᤔᤧᤄᤧᤳᤇᤡᤱ ᤔᤧᤒᤣ᤺ᤰ ᤑᤠ᤹ᤀᤠᤱ ᤛᤧᤵᤔᤠᤛᤡ ᤏᤡᤱᤛᤣᤰ ᤔᤧᤈᤥᤃᤢ॥ 43ᤁᤖ ᤌᤰᤋᤢᤶᤒᤠᤸᤗᤧ ᤐᤠᤘᤗᤧᤴ ᤋᤠᤱᤛᤧ᤺ᤵᤔᤠ ᤑᤠ᤹ᤀᤠᤱ ᤔᤠ᤹ᤖᤢᤀᤠᤱ ᤘᤠᤈᤠ᤺ᤰᤔᤠ ᤁᤧᤗᤧᤒᤠᤜᤠ᤹ ᤋᤃᤡ ᤔᤧᤒᤡᤴ ᤔᤧᤎᤠᤏᤡᤀᤠᤱ ᤘᤠᤔᤧᤈᤠ᤺ᤰᤁᤠᤱ ᤁᤢᤕᤠᤀᤥ ᤔᤧᤒᤣ᤺ᤰᤏᤡ ᤜᤧᤰᤁᤩᤠᤱ 44ᤘᤠᤈᤠ᤺ᤰᤔᤠ ᤔᤧᤸᤗᤧ᤺ᤶᤏᤠᤒᤠᤜᤠ᤹ ᤛᤡᤱᤓᤧᤸᤗᤧᤰ ᤏᤢ ᤁᤧᤕᤶᤒᤠ ᤘᤠᤗᤠᤎᤠ ᤛᤡᤱ ᤜᤧᤵᤔᤥ ᤔᤧᤄᤡᤶᤛᤡᤱᤅᤠᤱ ᤘᤠᤔᤧᤈᤠ᤺ᤰᤗ ᤁᤢᤕᤠᤀᤥ ᤔᤧᤒᤣ᤺ᤰᤏᤡ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤌᤣᤀᤠᤱ ᤔᤧᤶᤒᤥᤱᤅᤣ ᤀᤠᤏᤡᤃᤣ ᤁᤢᤕᤠᤀᤥ ᤁᤧᤵᤔᤏᤠᤖᤥ॥

Currently Selected:

ᤛᤣ᤺ᤰᤕᤢᤰᤔᤡᤒᤠᤜᤠ᤹ 27: LIFOTNT

Highlight

Copy