ᤛᤣ᤺ᤰᤕᤢᤰᤔᤡᤒᤠᤜᤠ᤹ 19
19
ᤕᤧᤛᤢᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ
1ᤀᤵᤐᤥᤗᤥᤛᤧᤴ ᤁᤥᤖᤴᤌᤡ ᤕᤧᤰᤕᤰᤁᤥ ᤘᤕᤧᤸᤗᤧ ᤐᤠᤘᤗᤧᤴ ᤀᤣᤛᤡᤕᤠ ᤋᤧᤱᤃᤵ ᤛᤡᤃᤠᤱ ᤗᤠᤶᤍᤡᤰ ᤆᤥᤃᤧᤖ ᤀᤣᤑᤡᤛᤛ ᤕᤧᤰᤕᤰᤁᤥ ᤁᤧᤖᤧ ᤋᤩᤧᤖᤥ॥ ᤂᤧᤵᤔᤥ ᤁᤢᤓᤠ ᤏᤛᤠᤏᤡᤒᤠᤜᤠ᤹ ᤋᤢᤔᤢᤛᤡᤀᤠᤱ 2ᤛᤣ᤺ᤴᤍᤥᤛᤢᤛᤡ. “ᤏᤛᤠᤴ ᤁᤧᤈᤥᤃᤢᤶᤔᤡᤸᤗᤧ ᤛᤣᤛᤣᤔᤠᤱᤅᤡᤴ ᤁᤧᤄᤥᤛᤢᤶᤒᤡ᥅”
ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤛᤣᤛᤣᤔᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤱᤃ ᤔᤧᤱᤄᤧᤶᤔᤣ ᤘᤕᤡᤃᤧᤖᤥ॥”
3ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤰᤋᤱᤒᤠ ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡᤒᤣ᥅”
ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤣ ᤏᤛᤠᤴ ᤆᤥ᤺ᤰᤔᤏᤠ᤺ᤸᤗᤧ ᤕᤢᤜᤢᤴᤏᤠᤖᤧ ᤜᤢ᤹ᤖᤡᤃᤧᤒᤠ ᤒᤵᤋᤡᤛ᤻ᤔᤠᤴ ᤐᤥ᤺ᤰᤂᤡᤃᤧᤖᤥ॥”
4ᤐᤠᤘᤗᤖᤧ ᤔᤧᤳᤋᤢᤛᤡ. “ᤕᤢᤜᤢᤴᤏᤠᤖᤧᤃ ᤗᤠᤕᤥᤗᤠᤶ ᤁᤧᤜᤡᤶᤒᤠᤜᤠ᤹ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. ‘ᤋᤠ᤺ᤴᤍᤡ ᤀᤠᤀᤣᤃᤠᤱ ᤁᤧᤍᤠᤒᤠᤖ ᤁᤧᤒᤵᤐᤧᤴ ᤏᤛᤠᤴ ᤆᤥᤃᤧᤶᤔᤧ᤹ᤀᤥ. ᤂᤢᤏᤧ᤹ᤀᤣ ᤕᤧᤛᤢᤖᤥ॥’”
5ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧ॥ 6ᤐᤠᤘᤗᤖᤧ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢ ᤐᤡᤖᤢᤛᤡᤸᤗᤧ ᤛᤣᤛᤣᤔᤠᤱᤅᤡᤴ ᤂᤢᤏᤡ᤹ ᤛᤶᤍᤠᤱ ᤌᤩᤧᤀᤠᤱ ᤂᤧᤱᤜᤠ᤹ ᤘᤣ᤹ ᤐᤠ᤺ᤴᤍᤠᤱᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠᤖᤧᤖᤥ॥ 7ᤂᤧᤵᤔᤥ ᤁᤧᤖᤧᤰᤁᤥ ᤌᤡᤰ-ᤏᤧᤳ (᥇᥈) ᤕᤠᤖᤡᤰ ᤕᤧᤶᤒᤡᤳᤇᤠ᤹ᤜᤠ᤹ ᤔᤧᤘᤕᤧᤖᤥ॥
8ᤐᤠᤘᤗᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤖ ᤗᤠ ᤛᤢᤶᤛᤡ ᤌᤠᤖᤡᤰ ᤜᤠᤱᤜᤠᤱ ᤗ᤹ᤖᤡᤰ ᤔᤏᤠᤜᤠ᤹ᤏᤢ ᤐᤠ᤺ᤴᤎᤱ ᤆᤥᤃᤢᤖ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤡ᤹ ᤏᤡᤱᤘᤠ᤹ ᤋᤠᤔᤠ ᤐᤡᤔᤠᤛᤡ ᤋᤶᤛᤡᤱ ᤆᤥᤃᤢ॥ 9-10ᤁᤢᤓᤠᤖᤧ ᤛᤢᤏᤠᤀᤡᤱᤅᤡᤴ ᤏᤛᤠᤴ ᤔᤧᤈᤥᤃᤢ. ᤁᤖ ᤁᤢᤓᤠᤃ ᤂᤢᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤔᤧᤘᤕᤧᤀᤠᤱ ᤏᤛᤠᤴ ᤆᤥ᤺ᤰᤔᤠ ᤔᤧᤴᤍᤧᤴᤍᤧᤴᤏᤠᤱ ᤍᤠᤱᤒᤠᤖᤧ ᤁᤢᤗᤠᤶᤔᤡᤸᤗᤧ ᤁᤢᤍᤰᤗᤧᤱᤅᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤋᤠᤵᤑᤧ᤺ᤶᤒᤠ ᤔᤧᤒᤠ᤺ᤳᤋᤢ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤂᤧᤱᤜᤠ᤹ ᤐᤰᤌᤛᤡᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤘᤣ᤹ᤛᤔᤠ ᤋᤧᤴᤏᤥ ᤋᤣ᤹ᤖᤢᤛᤡ॥ ᤜᤧᤰᤁᤩᤠᤱ ᤋᤡᤖᤠᤏᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤏᤡᤛᤠᤶᤜᤡᤶᤔᤥ ᤌᤡᤰᤕᤠ᤺ᤴᤎᤰ ᤋᤱᤒᤣ ᤏᤧᤳᤇᤡ ᤌᤠᤖᤡᤰ ᤔᤏᤠᤜᤠ᤹ᤏᤢ ᤐᤠ᤺ᤴᤎᤱ ᤆᤥᤃᤢ॥ ᤀᤰᤂᤣᤗ᤹ᤖᤡᤰ ᤀᤣᤛᤡᤕᤠ ᤋᤧᤱᤃᤵᤐᤥᤒᤠ ᤁᤠᤰ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤖᤥ॥
ᤀᤣᤑᤡᤛᤛᤀᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ
11ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤘᤗᤗᤠᤶᤒᤠ ᤐᤥᤱᤔᤤ ᤔᤧᤴᤇᤢᤰᤔᤏᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤖᤥ॥ 12ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤛᤢᤛ᤻ᤛᤢᤒᤠ ᤐᤱᤃᤧᤴᤜᤠ᤹ ᤏᤢ ᤐᤌᤠᤱᤜᤠ᤹ ᤔᤧᤍᤣ᤹ᤖᤢᤀᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠ ᤛᤶᤍᤠᤱ ᤔᤧᤏᤧᤛ᤻ᤛᤢ ᤔᤧᤒᤡᤖᤢᤛᤡᤸᤗᤧ ᤂᤧᤱᤜᤠ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤔᤧᤘᤣ᤺ᤳᤋᤧᤀᤠᤱ ᤑᤧᤴᤛᤠᤶᤜᤠ᤹ ᤔᤧᤗ᤺ᤴᤍᤧ ᤔᤧᤒᤣᤖᤥ॥
13ᤂᤧᤵᤔᤥ ᤋᤠᤰᤁᤴᤏᤢ ᤑᤧᤴᤛᤠᤶ ᤁᤧᤗ᤺ᤵᤐᤠ ᤁᤢᤓᤠ ᤕᤜᤢᤍᤡᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤡᤴ ᤀᤥᤃᤵ ᤆᤥ᤺ᤰᤔᤠ ᤋᤶᤛᤡᤱ ᤔᤧᤈᤥᤃᤢᤖ ᤂᤧᤱᤜᤠ᤹ᤖᤧ ᤑᤧᤴᤛᤠᤶᤔᤡᤴ ᤀᤰᤂᤣ ᤔᤧᤔᤧᤳᤋᤢ. “ᤐᤠᤘᤗᤖᤧ ᤀᤡᤱᤓᤥᤛᤢᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤡᤱᤈᤠᤱ ᤐᤡᤏᤧᤖᤥ॥” 14ᤂᤧᤵᤔᤥ ᤛ᤻ᤁᤣᤘᤠᤛ ᤔᤧᤵᤔᤏᤠᤒᤠ ᤕᤜᤢᤍᤡ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤏᤢᤛᤡ ᤁᤢᤛ᤻ᤛᤠ ᤕᤧᤶᤒᤡᤳᤇᤠ᤹ᤜᤠ᤹ᤖᤧᤀᤠᤱ ᤜᤧᤰᤋᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤢ॥ 15ᤌᤡᤰᤕᤧᤴ ᤜᤧᤰᤁᤣ ᤔᤧᤈᤥᤃᤢᤸᤗᤧ ᤑᤧᤴᤛᤠᤶᤔᤡᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤐᤠᤘᤗᤧᤴ ᤁᤢᤛᤡᤱ ᤏᤡ᤺ᤳᤋᤢᤱ. ᤕᤧᤛᤢᤴ ᤁᤢᤛᤡᤱ ᤏᤡ᤺ᤳᤋᤢᤱ. ᤁᤖ ᤂᤡᤏᤡ᤹ᤃ ᤜᤠ᤺ᤳᤏᤡᤱᤒᤣ᥅” 16ᤂᤧᤴ ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤒᤠ ᤔᤏᤠᤴ ᤐᤡᤳᤆᤠᤰ ᤐᤡᤴᤍᤧᤖ ᤂᤧᤱᤜᤠ᤹ ᤑᤳᤋᤢᤛᤡᤖ ᤕᤢᤰᤋᤢᤛᤡᤀᤠᤱ ᤂᤧᤸᤗᤧ ᤂᤢᤏᤡ᤹ ᤋᤣᤳᤜᤠ᤹ ᤌᤧ᤺ᤰᤂᤢᤒᤡᤖᤢᤛᤡᤖ ᤂᤠ᤺ᤴᤍᤢᤛᤡᤀᤠᤱ ᤂᤧᤴ ᤜᤡᤶᤔᤥᤗᤠᤶ ᤂᤧᤱᤜᤠ᤹ ᤗᤧᤰᤆᤠᤒᤧᤎᤡ᤺ᤰ ᤔᤧᤗ᤺ᤴᤍᤧᤀᤠᤱ ᤔᤧᤗᤥ᤺ᤰᤋᤧ ᤔᤧᤒᤣᤖᤥ॥
17ᤜᤧᤰᤁᤩᤠᤱ ᤀᤣᤑᤡᤛᤛᤀᤥ ᤁᤧᤘᤠ᤹ᤒᤠ ᤁᤠᤰ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤔᤧᤃᤡᤛᤧᤖᤥ॥ ᤂᤧᤱᤜᤠ᤹ᤖᤧ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤡᤴ ᤐᤕᤶ ᤀᤡᤱᤎᤠᤱ ᤔᤧᤒᤡᤖᤢᤖ ᤌᤠ᤺ᤱᤎᤠ᤺ᤱ ᤔᤧᤈᤥᤃᤢᤖᤥ॥ 18ᤕᤖᤡᤰ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤘᤣ᤹ ᤏᤛᤠᤏᤡᤒᤠ ᤋᤃᤡ ᤂᤢᤏᤡ᤹ ᤔᤧᤈᤥᤃᤢᤒᤠ ᤑᤧᤴ ᤕᤠ᤺ᤶᤒᤰᤜᤠ᤹ ᤕᤠᤶᤔᤥ ᤔᤧᤈᤥᤃᤢᤶᤒᤧᤴ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤖᤥ॥ 19ᤀᤰᤂᤣᤗ᤹ᤖᤡᤰ ᤕᤖᤡᤰ ᤁᤡᤳᤆᤠᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤴ ᤔᤏᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤁᤡᤳᤆᤠᤰ ᤛᤠᤵᤗᤠᤜᤠ᤹ ᤔᤧᤛᤢᤵᤛᤢᤀᤠᤱ ᤔᤏᤠ ᤋᤃᤡᤀᤣ ᤔᤧᤜᤠ᤺ᤴᤍᤢ ᤔᤧᤍᤣᤛᤢᤖᤥ॥ ᤂᤧᤴ ᤁᤡᤳᤆᤠᤰ ᤛᤠᤵᤗᤠᤜᤠ᤹ᤖᤧ ᤁᤢᤔᤧᤸᤗᤢᤱᤃ ᤜᤧᤴᤇᤡᤱ ᤅᤠᤒᤥᤱᤏᤢ᤺ᤸᤗᤧᤀᤠᤱ ᤕᤖᤡᤰ (᥋᥆.᥆᥆᥆) ᤕᤢᤵᤐᤠᤕᤠᤱ ᤘᤕᤧᤖᤥ॥ 20ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤍᤠᤱᤒᤠᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤒᤠ᤺ᤴᤈᤠᤰᤁᤡᤴ ᤔᤢᤰᤛᤠᤶᤏᤢ ᤁᤢᤎᤡᤶ ᤛᤧᤖᤧᤖ ᤐᤣᤖᤥ॥
ᤀᤣᤑᤡᤛᤛᤀᤥ ᤜᤕᤱᤋᤧᤴᤎᤱ
21ᤁᤴ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤆᤢᤖᤧᤀᤠᤱ ᤐᤠᤘᤗᤖᤧ ᤔᤧᤛᤣᤍᤥᤏᤡᤕᤠ ᤏᤢ ᤀᤰᤂᤤᤕᤠ ᤌᤢᤶ ᤐᤥᤱᤔᤠᤖ ᤕᤖᤢᤛᤗᤧᤔ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥ ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤂᤧᤵᤔᤥ ᤐᤣ᤺ᤰᤔᤠᤀᤠᤱ ᤖᤥᤔ ᤕᤧᤰᤕᤰᤁᤥᤀᤠᤱ ᤐᤣ᤺ᤰᤔᤠᤀᤣ ᤐᤥᤱᤗᤥ॥” 22ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤠ᤹ ᤁᤧᤒᤡᤒᤠ ᤏᤧᤵᤑᤢ ᤁᤢᤴᤈᤢᤶᤜᤠ᤹ ᤋᤡᤔᤥᤌᤡ ᤏᤢ ᤀᤡᤖᤠᤛ᤻ᤋᤛᤧᤴ ᤋᤃᤡ ᤔᤧᤛᤣᤍᤥᤏᤡᤕᤠᤀᤥ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ᤃ ᤀᤣᤛᤡᤕᤠ ᤋᤧᤱᤃᤵᤐᤥᤀᤣ ᤁᤢᤓᤠ ᤕᤧᤴ ᤕᤠ᤺ᤰᤋᤧᤖᤥ॥
23ᤒᤠ ᤂᤧᤴ ᤕᤧᤶᤔᤥ ᤀᤣᤑᤡᤛᤛᤀᤥ ᤍᤠᤱᤒᤠᤸᤗᤧ ᤁᤢᤗᤠᤶᤔᤡᤸᤗᤧ ᤁᤢᤍᤰᤗᤧᤱᤅᤥ ᤕᤶᤒᤠ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧᤖᤥ॥ 24ᤍᤧᤔᤧᤋᤪᤡᤕᤛ ᤔᤧᤵᤔᤏᤠᤒᤠ ᤕᤢᤵᤐᤠ ᤆᤥᤒᤧᤃᤢᤎᤡᤰ ᤘᤕᤧ॥ ᤂᤧᤴ ᤀᤠᤷᤋᤣᤔᤡᤛ#᥇᥏:᥈᥊ ᤀᤠᤷᤋᤣᤔᤡᤛ—ᤃᤪᤡᤁᤣᤗᤡᤜᤠ᤹ᤖᤧ ᤀᤠᤷᤋᤣᤔᤡᤛ ᤔᤧᤵᤔᤏᤠᤔᤠ ᤛᤠᤶᤔᤠᤱᤅᤡᤴ ᤔᤏᤠᤜᤠ᤹ ᤏᤢ ᤕᤖᤡᤰ ᤘᤣ᤹ ᤛᤠᤶᤔᤠᤱᤜᤠ᤹ᤖᤧ ᤂᤢᤏᤡ᤹ ᤔᤠ ᤑᤠ᤹ᤀᤠᤱ ᤏᤛᤠᤴ ᤔᤧᤈᤥᤃᤢ॥ ᤀᤣᤑᤡᤛᤡᤒᤠ ᤔᤏᤠᤜᤠ᤹ᤖᤧ ᤗᤳᤇᤠ ᤏᤢᤒᤠ ᤏᤢ ᤕᤶᤒᤠ ᤔᤠᤱᤜᤡᤶᤎᤡᤰ ᤔᤧᤈᤥᤃᤢᤀᤠᤱ ᤘᤕᤧ॥ ᤂᤧᤵᤔᤥ ᤀᤠᤷᤋᤣᤔᤡᤛᤧᤸᤗᤧ ᤁᤢᤏᤠᤘᤠᤀᤡᤳᤗᤠᤴ ᤛᤧᤘᤠ ᤔᤧᤔᤧᤳᤋᤢ॥ ᤛᤠᤶᤔᤠᤱᤅᤡᤸᤗᤧᤴ ᤆᤢᤈᤢᤰᤛᤠ ᤕᤢᤵᤐᤠ ᤔᤠᤱᤜᤡᤶ ᤁᤧᤈᤥ᤺ᤰᤐᤠ ᤘᤕᤧ ᤜᤧᤰᤁᤩᤠᤱ ᤂᤧᤴ ᤕᤠ᤺ᤶᤒᤰᤁᤥᤗᤠᤶ ᤕᤖᤡᤰ ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤜᤡᤶᤒᤪᤠᤶ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥ 25ᤜᤧᤰᤁᤩᤠᤱ ᤁᤴ ᤏᤠᤘᤠᤀᤡᤳᤗᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤘᤣ᤹ ᤜᤧᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤛᤢᤵᤛᤢᤛᤡᤀᤠᤱ ᤆᤢᤶᤗᤢᤱ ᤆᤥᤃᤢᤖ ᤀᤰᤂᤣ ᤔᤧᤳᤋᤢᤛᤡ. “ᤋᤣ᤺ᤱᤈᤢᤶᤛᤣ. ᤁᤴ ᤕᤠ᤺ᤶᤒᤰᤁᤥᤗᤠᤶ ᤀᤠᤏᤡ᤹ᤃ ᤛᤠ᤹ᤖᤡᤰᤁᤣ ᤕᤖᤡᤰ ᤕᤠᤱ ᤀᤠᤎᤃᤢᤶᤒᤠᤴ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤘᤠ᤹ᤖᤥ॥ 26ᤀᤠᤸᤗ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡᤛᤢᤶᤔᤠᤱ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ᤁᤴ ᤐᤠᤘᤗ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤀᤣᤑᤡᤛᤛᤀᤥᤖᤰ ᤔᤣ᤺ᤴ. ᤁᤖ ᤀᤣᤛᤡᤕᤠ ᤂᤠᤖᤠᤰᤐᤠ ᤋᤧᤱᤃᤵᤐᤥ ᤕᤖᤡᤰ ᤔᤏᤠᤜᤠ᤹. ᤀᤠᤏᤡ᤹ ᤔᤏᤠᤜᤠ᤹ᤖᤧ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤛᤡ ᤔᤣ᤺ᤴᤗᤥ ᤑᤠ᤹ᤀᤠᤱ ᤗᤧᤔᤢᤛᤡᤖ ᤘᤠ᤹ᤖᤥ॥ 27ᤜᤧᤰᤁᤣ᤺ᤸᤗᤧ ᤁᤸᤗᤧᤃ ᤀᤠᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤏᤠᤜᤠ᤹ᤖᤧ ᤑᤧᤴᤐᤠᤴ ᤔᤧᤒᤠ᤺ᤳᤋᤢᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤣᤛᤡᤕᤠᤛᤔᤠ ᤋᤧᤱᤃᤵᤐᤥ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤧᤘᤠ ᤔᤧᤈᤥᤃᤢᤒᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴ ᤏᤢ ᤁᤢᤔᤠᤱᤜᤡᤶᤔᤡᤸᤗᤧ ᤁᤢᤈᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
28ᤀᤠᤸᤗ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧ. “ᤀᤣᤑᤡᤛᤛᤔᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴᤏᤣ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤛᤠᤶᤔᤠᤱᤗᤥ᥄” 29ᤜᤧᤰᤁᤣ᤺ᤸᤗᤧ ᤛᤵᤑᤠᤖᤧᤛᤠ ᤁᤠᤰ ᤕᤧᤰᤕᤰᤁᤥ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤐᤠᤘᤗᤧᤴᤏᤢ ᤔᤧᤛᤣᤍᤥᤏᤡᤕᤠᤗᤠᤶ ᤗᤠᤶᤍᤡᤰ ᤁᤧᤈᤥ᤺ᤰᤐᤠ ᤁᤢᤴᤈᤢᤶᤜᤠ᤹ ᤃᤠᤕᤛ ᤏᤢ ᤀᤖᤡᤛ᤻ᤋᤠᤷᤂᤛᤛᤡ ᤔᤧᤍᤧᤶᤛᤢᤛᤡᤀᤠᤱ ᤐᤱᤘᤠᤀᤡᤳᤗᤠᤍᤧᤴᤏᤥ#᥇᥏:᥈᥏ ᤐᤱᤘᤠᤀᤡᤳᤗᤠᤍᤧᤴ—ᤀᤣᤑᤡᤛᤛ ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥ ᤐᤱᤘᤠᤀᤡᤳᤗᤠᤍᤧᤴ ᤘᤕᤧ॥ ᤂᤧᤵᤔᤥ ᤕᤖᤡᤰ ᤔᤏᤧᤜᤠ᤹ ᤆᤢᤶᤗᤢᤱ ᤔᤧᤈᤥᤃᤧ. ᤜᤧᤰᤁᤩᤠᤱ ᤐᤱᤘᤠᤀᤡᤳᤗᤠ ᤏᤢ ᤜᤰᤆᤠᤳᤋᤠᤱ ᤔᤧᤈᤠ᤺ᤳᤋᤢ॥ ᤔᤧᤍᤠᤖᤢᤛᤡᤖᤥ॥ 30ᤐᤠᤘᤗᤖᤧᤀᤠᤱ ᤂᤧᤵᤔᤥ ᤐᤣ᤺ᤰᤔᤠᤀᤠᤱ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤔᤧᤶᤒᤠᤱᤄᤢᤴᤗᤥ॥ 31ᤐᤠᤘᤗᤖᤧ ᤁᤢᤓᤠ ᤁᤢᤴᤈᤢᤶ ᤋᤧᤱᤃᤐᤩᤢᤰᤐᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤱᤘᤠᤀᤡᤳᤗᤠᤍᤧᤴᤏᤥ ᤀᤥᤛᤣ᤺ᤴᤔᤧᤎᤠᤰᤛᤡᤱᤅᤡᤴᤏᤡ ᤑᤠ᤹ᤀᤠᤱ ᤀᤡᤱᤄᤱ ᤔᤧᤜᤠᤅᤢᤖᤥ॥
32ᤜᤧᤰᤁᤩᤠᤱ ᤆᤢᤶᤗᤢᤱᤒᤠ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢᤖ ᤁᤢᤓᤠ ᤌᤡᤰ ᤐᤠ᤺ᤴᤏᤥ ᤔᤧᤀ᤺ᤰᤋᤧ. ᤘᤣ᤹ᤜᤠ᤹ ᤘᤣ᤹ ᤐᤠ᤺ᤴᤏᤥ ᤔᤧᤀ᤺ᤰᤋᤧ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤡ᤹ ᤐᤠᤴ ᤔᤧᤍᤅᤧᤴᤏᤠᤱ ᤌᤣᤀᤠᤱ ᤔᤏᤠᤜᤠ᤹ ᤂᤧᤵᤔᤥ ᤔᤧᤈᤢᤵᤛᤧᤒᤠ ᤕᤖᤡᤰᤗᤧ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ 33ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤀᤗᤧᤰᤈᤧᤴᤍᤖ ᤔᤧᤵᤔᤏᤠᤒᤠ ᤔᤏᤠᤴ ᤁᤴ ᤜᤕᤱ ᤁᤡᤸᤗᤡᤱᤅᤡᤴ ᤌᤣᤀᤠᤱ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤆᤧᤱᤛᤧ ᤂᤢᤏᤧ᤹ ᤋᤃᤡ ᤔᤧᤈᤴᤍᤢ॥ ᤜᤧᤰᤁᤩᤠᤱ ᤀᤗᤣᤰᤈᤣᤴᤍᤖᤗᤧ ᤌᤡᤰᤏᤧᤳᤇᤡ ᤏᤠᤱᤛᤡᤱᤔᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤑᤠ᤹ᤀᤠᤱ ᤜᤢᤰᤑᤥ᤺ᤰᤂᤢᤖ ᤔᤏᤠᤜᤠ᤹ ᤛᤫᤠ᤺ᤳ ᤆᤥ᤺ᤰᤔᤠᤛᤡ ᤏᤡᤱᤘᤠ᤹ ᤆᤥᤃᤢᤖᤥ॥ 34ᤁᤖ ᤂᤢᤏᤧ᤹ ᤕᤜᤢᤍᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤔᤏᤠᤜᤠ᤹ ᤛᤠ᤹ᤖᤡᤰ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤂᤵᤔᤧ ᤁᤢᤔᤢᤰ ᤏᤧᤳᤇᤡ ᤌᤠᤖᤡᤰ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧ. “ᤀᤣᤑᤡᤛᤛᤔᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴᤏᤣ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤛᤠᤶᤔᤠᤱᤗᤥ᥄”
35ᤜᤧᤰᤁᤩᤠᤱ ᤁᤢᤏᤢᤵᤔᤥ ᤕᤧᤰᤕᤰ ᤛᤢᤜᤠᤱᤃᤧᤶᤒᤠᤸᤗᤧ ᤁᤠᤰ ᤔᤏᤠᤜᤠ᤹ ᤛᤫᤠ᤺ᤳ ᤆᤥᤃᤢᤛᤡᤀᤠᤱ ᤔᤧᤳᤋᤢᤛᤡ. “ᤋᤣ᤺ᤱᤈᤢᤶᤛᤣ. ᤁᤴ ᤀᤣᤑᤡᤛᤛᤔᤠ ᤋᤧᤱᤃᤵᤐᤡᤱᤃ ᤐᤕᤶ ᤀᤠᤷᤋᤣᤔᤡᤛ ᤔᤠᤱᤅᤡᤸᤗᤧ ᤁᤢᤔᤠᤱᤜᤡᤶ ᤏᤢ ᤋᤠᤱᤛᤠᤰᤐᤥᤗᤠᤶ ᤔᤰᤁᤧᤎᤠᤒᤠ ᤁᤢᤏᤠᤘᤠᤀᤡᤳᤗᤠ ᤁᤧᤃᤵᤐᤠ ᤑᤠ᤹ᤀᤠᤱ ᤁᤠᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤔᤧᤘᤠ᤹ᤖᤥ॥ 36ᤀᤠᤳᤋᤡᤸᤗᤧᤀᤠᤱ ᤁᤴ ᤐᤠ᤺ᤴᤏᤡᤴ ᤀᤵᤔᤠ ᤔᤧᤛᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤁᤠᤰᤗᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤔᤧᤏᤡᤛᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤸᤗᤥ ᤂᤡᤏᤡ᤹ᤃ ᤔᤧᤴᤀᤡ᤺ᤳᤋᤣ ᤌᤣᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤠᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ 37ᤂᤡᤏᤡ᤹ ᤁᤴ ᤏᤧᤵᤑᤢ ᤔᤏᤠᤜᤠ᤹ ᤁᤧᤍᤠᤖᤢᤶᤛᤡᤶᤔᤠᤱ ᤘᤠ᤹ᤛᤡ. ᤁᤖ ᤁᤱᤜᤠ᤹ᤖᤧ ᤔᤠᤱᤜᤡᤶᤔᤥᤗᤠᤶ ᤌᤣᤀᤠᤱ ᤔᤧᤱᤄᤢ᤺ᤳᤋᤣ ᤘᤠ᤹ᤛᤡ. ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤷᤋᤣᤔᤡᤛ ᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴᤏᤠᤱ ᤔᤧᤶᤒᤠ᤺ᤳᤋᤣ ᤘᤠ᤹ᤛᤡᤖᤥ॥ 38ᤍᤧᤔᤧᤋᤪᤡᤕᤛ ᤏᤢ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤀᤠᤵᤋᤡᤰ ᤘᤠ᤹ᤏᤧ ᤑᤠ᤹ᤃᤪ ᤂᤠᤛᤧᤴᤜᤡᤶᤜᤠ᤹ ᤏᤢ ᤛᤢᤜᤠᤱᤜᤡᤶᤜᤠ᤹ ᤘᤠ᤹. ᤜᤠᤖᤠ᤹ ᤂᤧᤵᤔᤥ ᤔᤧᤍᤠᤖᤢᤏᤡ॥ 39ᤁᤖ ᤂᤧᤴᤏᤠᤱᤎᤥ ᤘᤣ᤹ ᤐᤠᤴ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤆᤥ᤺ᤰᤌᤡᤶ ᤆᤢᤶᤗᤢᤱᤅᤥᤗᤠᤶ ᤐᤠᤴ ᤁᤧᤔᤠ ᤐᤥᤱᤗᤥ॥ 40ᤜᤧᤰᤁᤣ᤺ᤸᤗᤧ ᤀᤠᤀᤡᤴ ᤁᤧᤒᤥᤱᤒᤠ ᤁᤴ ᤜᤕᤱᤁᤡᤸᤗᤡᤱᤖᤧᤴ ᤀᤠᤵᤋᤡᤰᤁᤡᤴ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤠᤏᤡ᤹ ᤀᤠᤶᤃᤢ᤺ᤵᤐᤠ ᤐᤥ᤺ᤰᤂᤧᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤌᤣᤀᤠᤱ ᤐᤠ᤺ᤵᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥” 41ᤕᤧᤰᤕᤰ ᤛᤢᤜᤠᤱᤔᤡᤒᤠᤸᤗᤧ ᤜᤧᤰᤁᤣ ᤔᤧᤳᤋᤢᤛᤡᤀᤠᤱ ᤁᤧᤍᤠᤒᤠ ᤔᤏᤠᤜᤠ᤹ ᤐᤠᤱᤄᤢᤍᤣᤛᤢᤛᤡᤖᤥ॥
Currently Selected:
ᤛᤣ᤺ᤰᤕᤢᤰᤔᤡᤒᤠᤜᤠ᤹ 19: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
