ᤛᤣ᤺ᤰᤕᤢᤰᤔᤡᤒᤠᤜᤠ᤹ 16

ᤐᤠᤘᤗᤖᤧ ᤏᤡᤛᤡᤃᤣᤰᤐᤠ ᤁᤢᤔᤠᤱᤛᤣᤘᤠ ᤗᤠᤶᤍᤡᤰ

1ᤐᤠᤘᤗᤧᤴ ᤍᤷᤒᤡ ᤏᤢ ᤗᤢᤛ᤻ᤋᤪᤠ ᤕᤧᤰᤕᤰᤜᤠ᤹ᤀᤥ ᤋᤩᤧᤖᤥ॥ ᤂᤧᤵᤔᤥ ᤋᤡᤔᤥᤌᤡ ᤔᤧᤵᤔᤏᤠᤒᤠ ᤏᤛᤠᤏᤡᤒᤠᤎᤡᤰ ᤘᤕᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤔᤠ ᤏᤛᤠᤴ ᤁᤧᤈᤥ᤺ᤰᤔᤠ ᤕᤜᤢᤍᤡ ᤘᤕᤧ. ᤁᤖ ᤁᤢᤶᤒᤠ ᤃᤪᤡᤁ ᤘᤕᤧ॥ 2ᤗᤢᤛ᤻ᤋᤪᤠ ᤏᤢ ᤀᤠᤀᤡᤁᤥᤏᤡᤕᤶᤒᤠ ᤁᤠᤰ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤋᤡᤔᤥᤌᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢᤒᤠ ᤁᤢᤀᤡᤱ ᤛᤧᤖᤧᤀᤠᤱ ᤘᤕᤧᤖᤥ॥ 3ᤐᤠᤘᤗᤖᤧ ᤋᤡᤔᤥᤌᤡ᤺ᤴᤏᤠᤱ ᤛᤥᤖᤡᤰ ᤋᤣ᤹ᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤂᤧᤵᤔᤥᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤂᤧᤴ ᤜᤷᤍᤥ ᤜᤧᤃᤢ ᤐᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤠᤈᤣ᤹ᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤋᤡᤔᤥᤌᤡᤖᤧ ᤁᤢᤶᤒᤠ ᤃᤪᤡᤁ ᤘᤕᤧᤒᤠᤴ ᤔᤧᤏᤡᤛᤢᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤂᤧᤴ ᤜᤷᤍᤥ ᤔᤧᤴᤜᤧᤰᤁᤣ ᤘᤕᤧᤖᤥ॥ 4ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ ᤌᤵᤔᤣ ᤕᤖᤢᤛᤗᤧᤔᤛᤔᤠ ᤛᤣ᤺ᤰᤕᤢᤰᤔᤡᤒᤠ ᤏᤢ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤏᤡ᤺ᤴᤎᤥ ᤔᤧᤈᤥᤃᤢᤒᤠ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤥ ᤑᤠ᤹ᤀᤠᤱ ᤏᤛᤠᤏᤡᤒᤠᤜᤠ᤹ ᤔᤧᤔᤧᤳᤋᤢᤛᤡᤖᤥ॥ 5ᤜᤧᤰᤁᤣᤗ᤹ᤖᤡᤰ ᤛᤣᤛᤣᤜᤢᤵᤗᤰᤜᤠ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤖ ᤌᤡᤰᤕᤠ᤺ᤴᤎᤰ ᤔᤧᤒᤥᤖᤧᤖ ᤔᤧᤒᤣᤖᤥ॥

ᤐᤠᤘᤗᤖᤧ ᤋᤪᤥᤀᤠᤛ᤻ᤛᤥ ᤋᤠᤍᤡᤃᤧᤴ ᤛᤢᤑᤥ ᤏᤡᤛᤢ᤹

6ᤐᤠᤘᤗ ᤏᤢ ᤁᤢᤴᤍᤣ᤺ᤱᤜᤠ᤹ ᤑᤪᤡᤃᤡᤕᤠ ᤏᤢ ᤃᤗᤠᤋᤡᤕᤠᤛᤔᤠ ᤌᤢᤶᤔᤥ ᤗᤠᤶᤍᤡᤰ ᤔᤧᤈᤥᤃᤧ. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤀᤣᤛᤡᤕᤠᤛᤔᤠ ᤋᤧᤱᤃᤵᤐᤥ ᤛᤢᤏᤠᤀᤡᤱ ᤛᤧᤔᤠ ᤛᤠᤰᤋᤢᤛᤡᤀᤠᤱ ᤘᤕᤧᤖᤥ॥ 7ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤀᤡᤛᤡᤕᤠᤛᤔᤠ ᤀᤡ᤺ᤴᤍᤥᤀᤥ ᤔᤧᤃᤧᤖᤧᤀᤠᤱ ᤒᤡᤌᤠᤏᤡᤕᤠᤛᤔᤠ ᤌᤢᤶᤔᤥ ᤐᤣ᤺ᤰᤔᤠ ᤋᤶᤛᤡᤱ ᤔᤧᤈᤥᤃᤧ. ᤁᤖ ᤕᤧᤛᤢᤖᤧ ᤁᤢᤕᤠᤶᤛᤠᤶᤔᤡᤸᤗᤧ ᤜᤧᤰᤁᤣ ᤆᤥ᤺ᤰᤔᤠ ᤂᤧᤱᤜᤠ᤹ ᤔᤧᤒᤠᤱᤄᤢᤴᤛᤡᤴᤗᤥ॥ 8ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤏᤠᤶᤎᤠ ᤐᤡᤛᤠᤱᤒᤠ ᤔᤠᤀᤡᤛᤡᤕᤠ ᤔᤧᤒᤥ᤺ᤰᤂᤧᤖ ᤋᤪᤥᤀᤠᤛ ᤕᤧᤰᤕᤰᤁᤥ ᤔᤧᤒᤣ॥ 9ᤂᤧᤵᤔᤥ ᤂᤧᤴ ᤛᤧᤴᤍᤡᤰ ᤐᤠᤘᤗᤖᤧ ᤋᤠᤍᤡᤃᤧᤴ ᤛᤢᤑᤥᤎᤡᤰ ᤏᤡᤛᤢ॥ ᤂᤧᤵᤔᤥ ᤔᤧᤛᤣᤍᤥᤏᤡᤕᤠᤛᤔᤠ ᤔᤏᤠᤎᤡᤰ ᤔᤧᤛᤣᤍᤥᤏᤡᤕᤠᤀᤥ ᤌᤠᤅᤧᤀᤠᤱ ᤀᤠᤏᤡᤃᤣ ᤕᤠᤵᤔᤡ ᤁᤢᤓᤠ᤹ ᤀᤠᤒᤡᤖᤧ᤹ ᤗ᤹ᤖᤡᤰ ᤐᤣᤗᤡ ᤑᤠᤰᤋᤢᤖ ᤕᤧᤒᤧᤒᤠ ᤏᤡᤛᤢᤖᤥ॥ 10ᤐᤠᤘᤗᤖᤧ ᤁᤴ ᤋᤠᤍᤡᤃᤧᤴ ᤛᤢᤑᤥᤴ ᤏᤡᤛᤢᤀᤠᤱ ᤀᤠᤏᤡᤃᤣ#᥇᥌:᥇᥆ ᤁᤴ ᤛᤠᤵᤐᤴ ᤁᤧᤛᤠᤵᤐᤠ ᤗᤢᤁᤠ᤺ᤸᤗᤧ ᤋᤪᤥᤀᤠᤛ ᤕᤧᤰᤕᤰᤁᤥᤗᤠᤶ ᤋᤣ᤺ᤱ ᤔᤧᤳᤋᤢᤛᤡᤖᤥ॥ ᤂᤡᤔᤥ ᤔᤧᤛᤣᤍᤥᤏᤡᤕᤠᤀᤥ ᤐᤣ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤡᤃᤧ. ᤌᤣᤀᤠᤱᤓᤧᤸᤗᤧ ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ᤀᤥ ᤛᤢᤏᤠᤀᤡᤱ ᤛᤧᤔᤠ ᤕᤠᤵᤔᤡ ᤀᤢ᤺ᤳᤋᤧᤒᤠ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥ᤺ᤰᤔᤏᤠᤖᤥ॥

ᤗᤡᤍᤡᤕᤠᤖᤧ ᤍᤠᤱᤒᤠᤀᤥ ᤏᤛᤠᤴ ᤆᤥᤃᤢ᤹

11ᤀᤠᤏᤡᤃᤣ ᤋᤪᤥᤀᤠᤛ ᤗᤧᤵᤔᤏᤠᤀᤠᤱ ᤘᤠᤗᤠᤎᤠᤗᤠᤶ ᤛᤠᤔᤥᤌᤪᤧᤛ ᤘᤠᤃᤵᤂᤠᤶ ᤐᤣ᤺ᤰᤔᤏᤠ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤏᤡᤕᤠᤐᤥᤗᤡᤛ ᤁᤧᤖᤡᤃᤧᤖᤥ॥ 12ᤂᤧᤵᤔᤥᤗᤠᤶ ᤀᤠᤏᤡᤃᤣ ᤗᤠᤱᤄᤣ᤺ᤰᤔᤏᤠᤀᤠᤱ ᤑᤡᤗᤡᤵᤐᤡᤀᤥ ᤁᤧᤵᤔᤏᤠᤖᤥ॥ ᤂᤧᤱᤃ ᤔᤧᤛᤣᤍᤥᤏᤡᤕᤠᤛᤔᤠ ᤌᤢᤶᤔᤥᤒᤠ ᤁᤧᤕᤧᤰᤐᤠ ᤕᤧᤰᤕᤰ ᤏᤢ ᤖᤥᤔᤡ ᤕᤰᤗᤠᤈᤣ᤹ᤀᤠᤱ ᤘᤕᤧᤖᤥ॥ ᤂᤧᤵᤔᤥ ᤀᤠᤏᤡᤃᤣ ᤁᤢᤓᤠ ᤕᤧᤴ ᤘᤕᤡᤃᤧᤖᤥ॥

13ᤜᤧᤰᤁᤩᤠᤱ ᤘᤣ᤹ᤛᤔᤠ ᤏᤠ᤺ᤶᤛᤡᤱ ᤕᤧᤴᤏᤥ ᤀᤠᤏᤡᤃᤣ ᤕᤧᤰᤕᤰᤁᤥᤛᤔᤠ ᤘᤠᤜᤱ ᤗᤧᤵᤔᤠᤱᤒᤠ ᤁᤢᤕᤠᤀᤥ ᤐᤣ᤺ᤰᤔᤏᤠ॥ ᤁᤴ ᤋᤧᤴᤏᤡᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠ ᤆᤥ᤺ᤰᤔᤠᤍᤧᤴ ᤑᤠ᤹ᤀᤠᤱ ᤀᤠᤏᤡᤃᤣ ᤏᤡᤱᤘᤠ᤹ ᤀᤡ᤺ᤵᤔᤏᤠᤖᤥ॥ ᤀᤠᤏᤡᤃᤣ ᤂᤧᤵᤔᤥ ᤛᤧᤘᤠ ᤆᤥ᤺ᤰᤛᤧ ᤁᤧᤈᤢᤶᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤋᤠ᤹ᤈᤧᤱᤔᤏᤠᤖ ᤕᤢᤱᤔᤏᤠᤖᤥ॥ 14ᤂᤧᤵᤔᤥ ᤛᤢᤏᤠᤀᤡᤱ ᤁᤧᤄᤧᤶᤔᤠᤜᤠ᤹ᤀᤥ ᤗᤡᤍᤡᤕᤠ ᤔᤧᤵᤔᤏᤠᤔᤠ ᤌᤡᤕᤠᤋᤡᤖᤠ ᤕᤧᤰᤕᤰᤁᤥᤛᤔᤠ ᤐᤖᤠᤴᤗᤠ ᤋᤣᤳ ᤗᤧᤱᤜᤱ ᤁᤧᤈᤥ᤺ᤰᤔᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤁᤧᤈᤥ᤺ᤰᤔᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤔᤠ ᤘᤕᤧ॥ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤏᤛᤠᤴ ᤆᤥᤃᤢᤖ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤴᤍᤢ ᤐᤡᤖᤢ॥ 15ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤠᤰ ᤁᤢᤜᤡᤶᤛᤕᤱᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧ॥ ᤜᤧᤰᤁᤩᤠᤱ ᤂᤧᤸᤗᤧ ᤀᤡᤱᤃᤠ᤹ ᤛᤧᤰᤂᤠᤀᤣ ᤍᤠᤱᤒᤠᤸᤗᤧ ᤁᤢᤏᤛᤠᤏᤡᤔᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤀᤡ᤺ᤳᤋᤡᤏᤧ ᤑᤠ᤹ᤃᤪ ᤀᤠᤜᤡᤶᤔᤥ ᤋᤩᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ ᤗ᤹ᤖᤡᤰ ᤕᤠᤵᤔᤡ ᤀᤢ᤺ᤳᤋᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤜᤡᤶᤔᤥ ᤕᤠᤵᤔᤡ ᤋᤣ᤹ᤔᤠ ᤑᤠ᤹ᤀᤠᤱ ᤛᤠᤰᤁᤧᤸᤗᤧᤰ ᤆᤥᤃᤧᤖᤥ॥

ᤐᤠᤘᤗ ᤏᤢ ᤛᤡᤗᤠᤛᤧᤴ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡ᤹

16ᤌᤡᤰᤕᤧᤴ ᤀᤠᤏᤡᤃᤣ ᤋᤢᤘᤠ ᤆᤥ᤺ᤰᤔᤠᤍᤧᤴᤏᤥ ᤐᤣ᤺ᤰᤔᤏᤠᤖ ᤐᤵᤔᤏᤠ᤺ᤸᤗᤧ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤔᤠ ᤕᤥ᤺ᤰᤔᤠᤎᤡᤰ ᤋᤢᤶᤏᤠ॥ ᤂᤧᤸᤗᤧ ᤂᤠᤀᤡᤃᤢᤀᤠᤱ ᤁᤢᤴᤍᤠᤱᤒᤠᤜᤠ᤹ ᤕᤖᤡᤰ ᤕᤠᤱ ᤌᤃᤢ ᤐᤡᤖᤢᤛᤡᤖ ᤘᤕᤧᤖᤥ॥ 17ᤂᤧᤸᤗᤧ ᤐᤠᤘᤗ ᤏᤢ ᤀᤠᤏᤡᤃᤣ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤖ ᤕᤠᤵᤔᤡ ᤋᤡᤶᤍᤧᤖᤥ. “ᤁᤴ ᤔᤏᤠᤜᤠ᤹ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤛᤧᤴᤗᤵ ᤁᤧᤄᤥᤛᤢᤶ ᤂᤧᤴ ᤂᤡᤏᤡ᤹ ᤁᤧᤶᤔᤧᤳᤋᤡᤖᤥ॥” 18ᤂᤧᤸᤗᤧ ᤕᤖᤡᤰ ᤕᤧᤴ ᤌᤠᤖᤡᤰ ᤜᤧᤰᤁᤣ ᤆᤥᤃᤢᤖ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤐᤠᤘᤗᤧᤴ ᤁᤢᤏᤡᤱᤄᤧᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤜᤡᤛᤡᤱᤅᤠᤱ ᤂᤧᤴ ᤕᤥ᤺ᤰᤔᤠᤀᤥ ᤁᤧᤕᤠᤰᤐᤠ ᤑᤧᤴᤛᤠᤶᤔᤡᤴ ᤀᤰᤂᤣ ᤔᤧᤳᤋᤢᤖ ᤑᤧ᤺ᤰᤋᤢᤖᤥ. “ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤏᤧ॥” ᤂᤡᤔᤥ ᤂᤧᤴ ᤑᤧᤴᤛᤠᤶᤔᤡᤴᤏᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤐᤰᤌ᤺ᤀᤠᤱ ᤐᤣᤖᤥ॥

19ᤜᤧᤰᤁᤩᤠᤱ ᤂᤧᤴ ᤕᤥ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤜᤠ᤹ᤖᤧ ᤀᤠᤸᤗ ᤕᤠᤱᤌᤰᤔᤠ ᤗᤠᤶᤔᤡᤴ ᤏᤢᤒᤧᤒᤠ ᤔᤧᤏᤡᤛᤢᤀᤠᤱ ᤐᤠᤘᤗ ᤏᤢ ᤛᤡᤗᤠᤛᤧᤴ ᤔᤧᤍᤧᤶᤛᤢᤛᤡᤀᤠᤱ ᤔᤧᤀᤢ᤺ᤰᤂᤢᤛᤡᤖ ᤕᤧᤰᤕᤰᤛᤔᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤔᤧᤍᤠᤖᤢᤛᤡᤖᤥ॥ 20ᤂᤧᤱᤜᤠ᤹ᤖᤧ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤁᤴ ᤔᤏᤠᤜᤠ᤹ ᤕᤜᤢᤍᤡᤛᤡᤖᤥ. ᤜᤧᤰᤁᤩᤠᤱ ᤁᤱᤜᤠ᤹ᤖᤧ ᤀᤠᤏᤡ᤹ ᤕᤧᤰᤕᤰᤁᤥ ᤜᤕᤱᤁᤡᤸᤗᤡᤱ ᤆᤥ᤺ᤰᤛᤢᤖ ᤕᤠᤰᤛᤡᤖᤥ॥ 21ᤂᤧᤱᤜᤠ᤹ᤖᤧ ᤀᤠᤏᤡ᤹ ᤖᤥᤔᤡ ᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥᤒᤠ ᤛᤠᤰᤌᤡᤶᤜᤠ᤹ ᤜᤢ᤹ᤛᤢᤛᤡᤖ ᤕᤠᤰᤛᤡᤖᤥ॥ ᤀᤠᤏᤡ᤹ ᤖᤥᤔᤡᤜᤠ᤹ᤖᤧᤃ ᤂᤧᤴ ᤋᤧᤴᤍᤡᤱ ᤆᤥ᤺ᤰᤔᤠ ᤏᤢ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤢᤰᤔᤧᤍᤧᤳᤋᤡᤴᤗᤥ॥”

22ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤜᤡᤵᤛᤧ ᤔᤧᤓᤢᤱᤛᤡᤱ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤐᤠᤘᤗ ᤏᤢ ᤛᤡᤗᤠᤛᤖᤧ ᤂᤢᤴᤇᤡ᤹ ᤆᤠᤱᤍᤣ᤺ᤳᤜᤠ᤹ ᤑᤧᤶᤔᤠᤀᤠᤱ ᤜᤡᤵᤔᤠ ᤔᤧᤒᤠᤱᤄᤢᤛᤡ॥ 23ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ॥ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤐᤢᤱᤗᤠᤀᤡᤱᤒᤠᤴ ᤏᤢᤖᤡᤰᤁᤠᤱ ᤂᤧᤱᤜᤠ᤹ ᤁᤥᤔᤠ ᤐᤠᤱᤄᤧᤛᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤔᤧᤒᤡᤖᤢᤖᤥ॥ 24ᤀᤰᤋᤱᤒᤠ ᤀᤡᤱᤈᤠᤱ ᤂᤥᤛᤢᤀᤠᤱ ᤐᤢᤱᤗᤠᤜᤡᤶ ᤁᤧᤃᤥᤒᤠ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤒᤠ ᤛᤡᤃᤠᤱᤛᤔᤠ ᤕᤠᤰᤑᤠᤀᤥ ᤂᤢᤴᤇᤡ᤹ ᤗᤠᤱᤜᤠ᤹ ᤑᤧᤴᤌᤰᤁᤪᤱᤅᤥ ᤕᤠᤰᤐᤠᤱᤄᤢᤛᤡᤀᤠᤱ ᤛᤠᤰᤋᤢᤛᤡᤖᤥ॥

25ᤛᤧᤳᤗᤢᤶ ᤑᤰᤋᤧᤖ ᤐᤳᤇᤧᤸᤗᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤆᤥᤃᤢᤛᤡᤖ ᤜᤧᤰᤁᤩᤠᤱ ᤛᤠᤶᤗᤥᤏᤢ ᤕᤠᤃᤧᤳᤇᤡᤖᤥ॥ ᤘᤣ᤹ ᤐᤢᤱᤗᤠᤎᤠᤒᤠᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤔᤧᤄᤧᤵᤛᤢᤛᤡᤖ ᤔᤧᤕᤢᤅᤧᤖᤥ॥ 26ᤜᤰᤆᤄᤳ ᤁᤡᤵᤔᤠ ᤁᤧᤄᤢᤒᤠ ᤗᤢᤵᤗᤡ ᤌᤠᤅᤧᤀᤠᤱ ᤐᤢᤱᤗᤠᤜᤡᤶ ᤕᤰᤜᤠ᤹ᤀᤣ ᤕᤰᤂᤢᤖ ᤗᤠᤶᤎᤣ᤺ᤵᤜᤠ᤹ ᤜᤸᤗᤧᤰ ᤘᤖᤧᤰ ᤜᤖᤧᤀᤠᤱ ᤁᤧᤖᤧᤰ ᤐᤢᤱᤗᤠᤎᤠᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤄᤣ᤺ᤱᤜᤠ᤹ ᤐᤠ᤺ᤰᤂᤧᤖᤥ॥ 27ᤜᤧᤰᤁᤣ᤺ᤸᤗᤧ ᤐᤢᤱᤗᤠᤀᤡᤱᤒᤠᤴ ᤁᤢᤔᤡᤰ ᤛᤥᤖᤧᤀᤠᤱ ᤐᤢᤱᤗᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤜᤠ᤹ ᤜᤖᤧᤀᤠᤱ ᤐᤳᤇᤧᤒᤠ ᤏᤡᤛᤢ ᤜᤧᤰᤁᤩᤠᤱ ᤐᤢᤱᤗᤠᤎᤠᤒᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤒᤡᤗᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ॥ ᤜᤧᤰᤁᤣ᤺ᤸᤗᤧ ᤜᤣᤛᤢᤒᤠ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤀᤠᤱ ᤛᤧᤳᤇᤡᤱᤔᤠ ᤁᤥ᤺ᤳᤋᤢᤖᤥ॥ 28ᤁᤖ ᤐᤠᤘᤗᤖᤧ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤠᤀᤣ. ᤌᤣᤀᤠᤱ ᤔᤧᤔᤧᤳᤇᤡᤅᤧᤴᤏᤧ᤹ᤀᤥ᥄ ᤀᤠᤏᤡᤃᤧᤃ ᤂᤠ ᤁᤵᤔᤥᤀᤣ ᤕᤠᤃᤡᤃᤧ᤹ᤖᤥ॥”

29ᤂᤧᤴ ᤐᤢᤱᤗᤠᤀᤡᤱᤒᤠᤸᤗᤧ ᤛᤣᤔᤡᤴ ᤜᤠ᤺ᤶᤔᤠ ᤐᤠᤱᤄᤢᤛᤡᤀᤠᤱ ᤛᤡᤃᤠᤱ ᤗᤥ᤺ᤰᤋᤧᤖ ᤋᤩᤧ॥ ᤂᤧᤴ ᤕᤰᤂᤧᤖ ᤐᤠᤘᤗ ᤏᤢ ᤛᤡᤗᤠᤛᤖᤧ ᤂᤢᤴᤇᤡ᤹ ᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗᤥ॥ 30ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. “ᤀᤠᤍᤠᤱᤒᤠᤛᤣ. ᤀᤡᤱᤃᤠ᤹ ᤌᤣ ᤆᤥᤃᤢᤱᤅᤡᤸᤗᤧ ᤛᤧᤴᤗᤵ ᤂᤥᤀᤠᤒᤣ᥅”

31ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤍᤠᤱᤒᤠ ᤕᤧᤛᤢᤴ ᤏᤛᤠᤴ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤴᤗᤵ ᤁᤧᤄᤥᤛᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤜᤡᤶᤛᤕᤱᤜᤠ᤹ᤖᤧᤀᤠᤱ ᤏᤛᤠᤴ ᤔᤧᤈᤥᤃᤢᤏᤧ ᤑᤠ᤹ᤃᤪ ᤛᤧᤴᤗᤵ ᤔᤧᤄᤥᤛᤢ᤹ᤖᤥ॥” 32ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ ᤆᤧᤰᤋᤧᤳᤇᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢᤖᤥ॥ 33ᤛᤧᤴᤍᤡᤰ ᤒᤠᤂᤧᤴ ᤕᤧᤶᤔᤥ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤢᤴᤇᤡ᤹ ᤕᤠᤱᤄᤣ᤺ᤰᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤐᤢᤱᤗᤠᤀᤡᤱᤒᤠᤴ ᤏᤢ ᤁᤢᤜᤡᤶᤛᤕᤱᤜᤠ᤹ ᤂᤡᤔᤥ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥ 34ᤂᤧᤸᤗᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤁᤢᤜᤡᤶᤔᤥ ᤋᤣ᤹ᤖᤢᤛᤡᤀᤠᤱ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ॥ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤀᤥᤔᤢ ᤔᤧᤗ᤹ᤖᤧᤖᤥ॥

35ᤁᤢᤍᤠ᤺ᤴᤍᤡᤰᤔᤠ ᤒᤠ ᤂᤧᤴ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤜᤠᤖᤠ᤹ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤏᤠᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤐᤣ᤺ᤰᤔᤠ ᤐᤠᤱᤄᤢᤛᤡᤏᤡ ᤑᤠ᤹ᤀᤠᤱ ᤋᤡᤗᤡᤱᤃᤠᤜᤠ᤹ᤗᤠᤶ ᤀᤡᤱᤈᤠᤱ ᤔᤧᤜᤠᤰᤋᤢᤖᤥ॥ 36ᤜᤧᤰᤁᤣ᤺ᤸᤗᤧ ᤐᤢᤱᤗᤠᤀᤡᤱᤒᤠᤸᤗᤧ ᤐᤠᤘᤗᤧᤴ ᤀᤰᤂᤣ ᤔᤧᤳᤋᤢ. “ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤧᤏᤧ᤹ ᤏᤢ ᤛᤡᤗᤠᤛᤧᤴ ᤗᤧᤵᤔᤠᤍᤣᤔᤠᤏᤧᤛᤡᤱ ᤑᤠ᤹ᤀᤠᤱ ᤀᤡᤱᤈᤠᤱ ᤔᤧᤜᤠᤅᤢᤀᤠᤱ ᤔᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤡᤴᤇᤡ᤹ ᤐᤣ᤺ᤰᤔᤠ ᤁᤧᤛᤢᤰᤛᤢᤖᤥ॥ ᤏᤢᤖᤡᤰᤁᤠᤱ ᤐᤣᤛᤧᤳᤇᤧ᤹ᤀᤥ॥”

37ᤁᤖ ᤐᤠᤘᤗᤖᤧ ᤂᤧᤴ ᤋᤡᤗᤡᤱᤃᤠᤜᤠ᤹ ᤔᤧᤳᤋᤢᤛᤡ. “ᤀᤠᤴᤇᤡᤃᤣᤃ ᤖᤥᤔᤡ ᤕᤰᤕᤢᤱᤒᤠᤛᤡᤃᤧᤛᤠᤱ#᥇᥌:᥉᥍ ᤕᤰᤕᤢᤱᤒᤠᤛᤡᤃᤧ᤹—ᤂᤧᤴ ᤕᤧᤶᤔᤥᤒᤠ ᤖᤥᤔᤡ ᤋᤢ᤺ᤴᤍᤣ᤹ ᤔᤣ᤺ᤴᤏᤣ ᤖᤥᤔᤡ ᤕᤰᤕᤢᤱᤒᤠᤜᤠ᤹ ᤐᤢᤱᤗᤠᤜᤡᤶᤔᤥ ᤛᤠᤰᤔᤠᤛᤡ ᤌᤡᤶ ᤜᤥ᤺ᤵᤋᤧᤖᤥ॥ ᤌᤧᤔᤠᤀᤠᤱ ᤋᤢ᤺ᤴᤍᤣ᤹ ᤔᤣ᤺ᤴᤏᤣ ᤔᤏᤠᤗᤢᤶᤔᤥ ᤀᤠᤴᤇᤡᤃᤣ ᤕᤠᤵᤔᤡ ᤋᤧ᤺ᤶᤓᤢᤰ ᤔᤧᤕᤠᤰᤋᤧᤳᤇᤡᤃᤧᤀᤠᤱ ᤐᤢᤱᤗᤠᤜᤡᤶᤔᤥ ᤕᤠᤵᤔᤡ ᤔᤧᤛᤠᤰᤋᤧ॥ ᤀᤠᤸᤗ ᤂᤧᤱᤜᤠ᤹ᤖᤧ ᤛᤫᤠ᤺ᤳᤋᤠᤱ ᤗᤧᤵᤔᤠᤍᤣᤔᤠ ᤔᤧᤃᤥ᤺ᤳᤋᤧᤳᤇᤡᤃᤧᤒᤠᤒᤡ᥅ ᤁᤱᤃ ᤐᤥᤱᤔᤠ ᤔᤧᤛᤢᤰᤏᤧᤴᤗᤥ᥄ ᤜᤠᤖᤠ᤹ ᤛᤢᤜᤠᤱᤕᤢᤰᤐᤠᤜᤠ᤹ᤀᤣ ᤁᤵᤔᤥ ᤔᤧᤍᤠᤀᤠᤱ ᤔᤧᤗᤧᤳᤇᤡᤃᤧᤖ ᤐᤥᤱᤗᤥ॥”

38ᤜᤧᤰᤁᤩᤠᤱ ᤋᤡᤗᤡᤱᤃᤠᤜᤠ᤹ᤖᤧ ᤛᤢᤜᤠᤱᤕᤢᤰᤐᤠᤜᤠ᤹ ᤒᤠᤁᤴ ᤐᤠ᤺ᤴᤜᤠ᤹ ᤔᤧᤔᤧᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤖᤥᤔᤡ ᤕᤰᤕᤢᤱᤒᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤂᤧᤱᤜᤠ᤹ ᤔᤧᤃᤡᤛᤧᤖᤥ॥ 39ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤔᤧᤏ᤺ᤶᤛᤡᤱᤗ ᤂᤧᤱᤜᤠ᤹ᤏᤢ ᤗᤧᤵᤔᤡ ᤔᤧᤏᤠ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡᤀᤠᤱ ᤀᤠᤸᤗ ᤁᤴ ᤕᤧᤰᤕᤰᤁᤥᤗᤠᤶ ᤐᤣᤛᤧᤇᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤛᤡᤖᤥ॥ 40ᤜᤧᤰᤁᤩᤠᤱ ᤐᤠᤘᤗ ᤏᤢ ᤛᤡᤗᤠᤛᤧᤴ ᤂᤧᤵᤔᤥᤗᤠᤶ ᤗᤡᤍᤡᤕᤠᤖᤧ ᤁᤢᤜᤡᤶᤔᤥ ᤐᤣᤛᤡ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤗᤡᤍᤡᤕᤠ ᤏᤢ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤋᤢᤔᤧᤳᤇᤢᤖ ᤀᤠ᤺ᤴᤇᤡᤱᤔᤠ ᤐᤡᤖᤧᤳᤇᤢᤀᤠᤱ ᤂᤧᤵᤔᤥᤗᤠᤶ ᤐᤣᤛᤡᤖᤥ॥

Currently Selected:

ᤛᤣ᤺ᤰᤕᤢᤰᤔᤡᤒᤠᤜᤠ᤹ 16: LIFOTNT

Highlight

Copy