ᤛᤣ᤺ᤰᤕᤢᤰᤔᤡᤒᤠᤜᤠ᤹ 10

ᤐᤋᤪᤢᤛ ᤏᤢ ᤁᤷᤏᤠᤗᤡᤕᤛ

1ᤛᤡᤈᤖᤡᤕᤠ ᤕᤧᤰᤕᤰᤁᤥ ᤁᤷᤏᤠᤗᤡᤕᤛ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤀᤡᤋᤠᤗᤡᤕᤠ ᤔᤧᤵᤔᤏᤠᤒᤠ ᤖᤥᤔᤡ ᤋᤢᤖᤠᤖᤧᤴ ᤌᤰᤋᤢᤶᤒᤠ ᤘᤕᤧᤖᤥ॥ 2ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ ᤔᤡᤱᤛᤥᤍᤠᤱᤒᤠ ᤏᤢ ᤛᤠᤶᤕᤥᤛᤠᤒᤠ ᤔᤧᤘᤕᤧᤖᤥ॥ ᤂᤢᤏᤧ᤹ᤃ ᤕᤠᤱᤃᤧᤛᤠ᤹ᤒᤠᤜᤠ᤹ ᤕᤖᤡᤰ ᤁᤢᤓᤠ᤹ᤕᤠᤱ ᤁᤧᤒᤡᤒᤠ ᤏᤢ ᤌᤡᤰᤕᤠ᤺ᤴᤎᤰ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤘᤠ ᤁᤧᤈᤥ᤺ᤰᤐᤠ ᤘᤕᤧᤖᤥ॥ 3ᤌᤡᤰᤕᤧᤴ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤀᤠᤱ ᤘᤕᤧᤸᤗᤧ ᤂᤢᤏᤧ᤹ ᤛᤢᤑᤥᤎᤡᤰ ᤏᤡᤛᤢ॥ ᤂᤧᤴ ᤛᤢᤑᤥᤀᤥ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤴ ᤂᤢᤏᤧ᤹ ᤗᤧᤵᤔᤠᤱ ᤑᤧᤖᤧᤖ “ᤁᤷᤏᤠᤗᤡᤕᤛᤣ.” ᤔᤧᤳᤋᤢᤖᤥ॥

4ᤁᤷᤏᤠᤗᤡᤕᤛᤖᤧ ᤁᤡ᤺ᤛᤧᤖ ᤀᤥᤔᤧᤳᤋᤢᤖ ᤀᤥᤒᤧ ᤀᤠᤍᤠᤱᤒᤣ ᤗ᤹ᤖᤡᤰ ᤏᤥᤃᤵ ᤐᤡᤖᤢ॥

ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠᤜᤠ᤹ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤕᤖᤡᤰ ᤁᤢᤓᤠ᤹ᤕᤠᤱ ᤁᤧᤒᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤀᤡᤋᤢᤀᤠᤱ ᤘᤠ᤹ᤖᤥ॥” 5ᤀᤠᤸᤗ ᤈᤥᤵᤐᤠ ᤕᤧᤰᤕᤰᤁᤥ ᤛᤡᤔᤥᤏ ᤐᤋᤪᤢᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤀᤢ᤺ᤳᤇᤧ ᤔᤏᤠᤜᤠ᤹ ᤐᤠᤱᤄᤧᤛᤧ᤹ᤀᤥ॥ 6ᤂᤧᤴ ᤘᤠᤜᤱ ᤐᤣᤛᤠᤱᤒᤠ ᤛᤧᤜᤥᤒᤠᤖᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤠ᤹॥

7ᤂᤧᤴ ᤔᤠᤱᤗᤠᤀᤡᤱᤒᤠᤴ ᤜᤧᤰᤁᤣ ᤐᤠ᤺ᤳᤋᤢᤀᤠᤱ ᤐᤣ. ᤜᤧᤰᤁᤩᤠᤱ ᤁᤷᤏᤠᤗᤡᤕᤛᤖᤧ ᤏᤧᤵᤑᤢ ᤁᤢᤛᤧᤘᤠᤖᤥᤒᤠᤜᤠ᤹ ᤏᤢ ᤛᤠᤶᤕᤥᤒᤠ ᤁᤢᤍᤠᤱᤛᤧᤵ ᤌᤰᤛᤢᤒᤠᤴ ᤀᤢ᤺ᤳᤋᤢᤀᤠᤱ 8ᤁᤴ ᤐᤠ᤺ᤴᤏᤡᤴ ᤆᤧᤰᤋᤢᤛᤡᤖ ᤈᤥᤵᤐᤠᤀᤥ ᤐᤋᤪᤢᤛᤖᤧ ᤁᤢᤗᤠᤛᤧ ᤂᤧᤱᤜᤠ᤹ ᤐᤠᤱᤄᤢᤍᤣᤛᤢᤛᤡᤖᤥ॥

9ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧᤸᤗᤧ ᤂᤧᤱᤜᤠ᤹ ᤈᤥᤵᤐᤠ ᤐᤣᤛᤠᤱ ᤔᤧᤃᤧᤖᤧ॥ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤔᤢᤰᤋᤧᤸᤗᤧ ᤐᤋᤪᤢᤛᤧᤴ ᤋᤢᤘᤠ ᤆᤥ᤺ᤰᤛᤧ ᤌᤠ᤺ᤱᤛᤔᤠ ᤀᤠ᤺ᤶᤓᤥᤀᤥ ᤐᤣ॥ 10ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤧᤳ ᤗᤠ᤺ᤰᤋᤧᤀᤠᤱ ᤌᤣᤀᤡ ᤆᤠᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤆᤠ ᤔᤧᤈᤥᤃᤢᤖ ᤔᤧᤒᤳᤇᤧᤸᤗᤧ ᤁᤢᤎᤏᤠ ᤗᤧᤰᤂᤧᤖᤥ॥ 11ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤜᤖᤧᤒᤠ ᤁᤢᤀᤡᤛᤡᤰ ᤂᤧᤳᤌᤥᤗᤠᤶ ᤕᤶᤒᤠ ᤋᤣᤳ ᤜᤧᤰᤋᤱᤒᤠᤴ ᤗᤡᤛᤡ ᤁᤢᤛᤢᤰᤐᤥ ᤂᤣ᤺ᤱᤔᤏᤠᤒᤠ ᤌᤩᤧᤖ ᤐᤳᤇᤧᤒᤠ ᤏᤡᤛᤢ॥ 12ᤂᤧᤵᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤐᤖᤡᤰᤗᤧᤴ ᤌᤰᤛᤠᤜᤠ᤹. ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤏᤢ ᤐᤢᤛᤠᤜᤠ᤹ ᤔᤧᤕᤠᤃᤧ॥ ᤂᤧᤱᤜᤠ᤹ᤀᤥ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤆᤠᤔᤠ ᤀᤠᤶᤒᤡᤏᤧᤴᤒᤠᤜᤠ᤹ᤀᤠᤱ ᤔᤧᤕᤠᤃᤧ॥ 13ᤜᤧᤰᤁᤩᤠᤱ ᤐᤋᤪᤢᤛᤖᤧ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢ. “ᤐᤋᤪᤢᤛᤣ. ᤐᤥᤃᤧ᤹᥄ ᤛᤧᤖᤧᤛᤧ᤹ᤀᤠᤱ ᤆᤧ᤹ᤀᤥ॥”

14ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤛᤠᤱ ᤀᤰᤋᤱᤒᤠᤃ ᤀᤡᤱᤃᤠ᤹ ᤔᤧᤈᤠᤀᤠᤴᤗᤥ॥ ᤀᤠᤸᤗᤥ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤶᤒᤠ ᤆᤠ ᤌᤣᤀᤠᤱ ᤔᤧᤴᤈᤠᤀᤣ ᤘᤠ᤹ᤀᤠᤖᤥ॥”

15ᤜᤧᤰᤁᤩᤠᤱ ᤕᤠᤶᤔᤥ ᤀᤡᤰᤗᤠᤴ ᤋᤩᤧ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤁᤢᤈᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤕᤠᤵᤔᤡ ᤁᤧᤈᤡ᤺ᤶᤒᤠ ᤔᤧᤗᤣ᤺ᤳᤋᤧᤴᤏᤧ᤹ᤀᤥ॥”

16ᤀᤰᤂᤣᤗ᤹ᤖᤡᤰ ᤁᤴ ᤛᤢᤶᤗᤧᤱ ᤌᤠᤖᤡᤰ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤴ ᤁᤢᤛᤢᤱᤔᤧᤴ ᤕᤠᤱᤎᤥ ᤋᤠᤱᤛᤠᤰᤐᤥ ᤀᤢ᤺ᤰᤂᤧ ᤋᤣ᤹ᤖᤧᤖᤥ॥

17ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤴ ᤛᤢᤑᤥ᤺ᤸᤗᤧ ᤁᤢᤒᤣᤴ ᤌᤣᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤗ ᤐᤳᤇᤧᤸᤗᤧ ᤁᤷᤏᤠᤗᤡᤕᤛᤖᤧ ᤐᤠᤱᤄᤢᤛᤡᤒᤠ ᤔᤏᤠᤜᤠ᤹ ᤛᤡᤔᤥᤏᤖᤧ ᤁᤢᤜᤡᤶᤔᤡᤴ ᤔᤧᤃᤥ᤺ᤳᤋᤢᤖ ᤗᤠᤶᤎᤣ᤺ᤵᤐᤥ ᤔᤧᤍᤩᤧᤖᤥ॥ 18ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ. ᤛᤡᤔᤥᤏ ᤔᤧᤵᤔᤏᤠᤒᤠ ᤐᤋᤪᤢᤛᤧᤴ ᤁᤵᤔᤥ ᤘᤠ᤹ᤒᤡ ᤜᤥ᤺ᤵᤐᤡ ᤑᤠ᤹ᤀᤠᤱ ᤛᤣ᤺ᤴᤍᤥᤀᤡ ᤔᤧᤕᤧᤒᤧᤖᤥ॥

19ᤜᤧᤰᤁᤩᤠᤱ ᤐᤋᤪᤢᤛᤖᤧ ᤀᤠᤸᤗᤛᤠᤱ ᤁᤴ ᤛᤢᤑᤥᤀᤡᤴ ᤌᤣᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡᤋᤢᤖ ᤐᤳᤇᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤔᤧᤳᤋᤢ. “ᤛᤡᤔᤥᤏᤣ. ᤛᤢᤶᤛᤡ ᤔᤏᤠᤜᤠ᤹ ᤁᤧᤃᤥ᤺ᤳᤇᤧ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥ 20ᤂᤧᤸᤗᤧᤆᤥᤃᤢᤸᤗᤧ ᤐᤥᤃᤧ᤹ᤀᤠᤱ ᤕᤥ ᤌᤩᤧ᤹. ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤛᤡ ᤑᤠ᤹ᤀᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤂᤧᤱᤜᤠ᤹ᤏᤢ ᤐᤣᤃᤧ᤹ᤀᤥ॥ ᤂᤧᤱᤜᤠ᤹ᤃ ᤀᤡᤱᤃᤠ᤹ᤀᤣ ᤐᤠᤱᤄᤢᤱᤛᤡᤱᤒᤠᤖᤥ॥”

21ᤜᤧᤰᤁᤣ᤺ᤸᤗᤧ ᤐᤋᤪᤢᤛᤧᤴ ᤕᤥ ᤌᤩᤧᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤔᤏᤠ᤺ᤱᤃ ᤀᤡᤱᤃᤠ᤹ᤀᤣᤖᤥ॥ ᤌᤣᤀᤠᤱ ᤁᤵᤔᤥ ᤁᤧᤍᤩᤧ᤹ᤀᤡᤒᤠᤒᤣ᥅”

22ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤁᤷᤏᤠᤗᤡᤕᤛ ᤔᤧᤵᤔᤏᤠᤒᤠ ᤌᤰᤋᤢᤶᤒᤧᤸᤗᤧ ᤕᤠᤵᤔᤡ ᤐᤠᤱᤄᤧᤒᤠᤖᤥ॥ ᤂᤢᤏᤧ᤹ᤃ ᤛᤠᤶᤕᤥᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤒᤠ ᤔᤏᤠ ᤏᤢ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ᤃ ᤛᤠ᤹ᤖᤡᤰᤁᤣ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤛᤣᤛᤣ ᤔᤠᤱᤗᤠᤀᤡᤱᤒᤠᤎᤡᤰᤗᤧ ᤂᤧᤏᤧ᤹ ᤁᤢᤜᤡᤶᤔᤥ ᤀᤢ᤺ᤵᤔᤠᤀᤠᤱ ᤂᤧᤏᤧ᤹ᤗᤠᤶ ᤐᤠ᤺ᤵᤔᤠ ᤁᤧᤃᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤔᤧᤳᤋᤢᤖᤥ॥” 23ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤧᤱᤜᤠ᤹ ᤜᤡᤶᤛᤡᤃᤠᤱ ᤀᤢ᤺ᤳᤋᤢᤛᤡᤀᤠᤱ ᤋᤖᤣ ᤋᤠ᤺ᤰᤋᤢᤛᤡᤖᤥ॥

ᤁᤢᤏᤠᤶᤍᤠ᤺ᤵᤔᤠ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤏᤢᤀᤣ ᤐᤣ॥ ᤜᤧᤰᤁᤩᤠᤱ ᤈᤥᤵᤐᤠᤒᤠ ᤁᤢᤓᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤧᤒᤣᤖᤥ॥ 24ᤁᤢᤀᤠᤳᤇᤡᤴᤍᤠ᤺ᤴ ᤂᤧᤱᤜᤠ᤹ ᤛᤡᤈᤖᤡᤕᤠᤀᤥ ᤔᤧᤃᤧᤖᤧᤀᤠᤱ ᤁᤷᤏᤠᤗᤡᤕᤛᤖᤧ ᤁᤢᤃᤠᤀᤡᤜᤠ᤹ ᤏᤢ ᤏᤡ᤺ᤳᤋᤠᤱᤒᤠ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ ᤛᤥᤖᤡᤰ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ ᤔᤧᤜᤠᤱᤄᤢᤛᤡᤖ ᤔᤧᤕᤢᤅᤧᤖᤥ॥ 25ᤐᤋᤪᤢᤛᤧᤴ ᤜᤡᤶᤛᤡᤃᤠᤱ ᤗᤠ᤺ᤵᤔᤠ ᤀᤡ᤺ᤳᤋᤧᤸᤗᤧ ᤁᤷᤏᤠᤗᤡᤕᤛᤖᤧ ᤂᤢᤏᤧ᤹ ᤋᤢᤔᤢᤀᤠᤱ ᤁᤢᤗᤠᤱᤈᤰᤐᤥ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤛᤧᤘᤠ ᤆᤥᤃᤢᤖᤥ॥ 26ᤁᤖ ᤐᤋᤪᤢᤛᤖᤧ ᤂᤧᤴ ᤑᤥ᤺ᤰᤂᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤥ. ᤀᤡᤱᤃᤠ᤹ᤃ ᤔᤏᤠᤀᤠᤖᤰᤗᤥ॥”

27ᤐᤋᤪᤢᤛᤧᤴ ᤁᤷᤏᤠᤗᤡᤕᤛᤧᤴᤏᤢ ᤋᤠ᤹ᤈᤧᤰᤂᤧᤖ ᤜᤡᤶᤛᤡᤃᤠᤱ ᤗᤠᤛᤧ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤕᤢᤅᤧᤒᤠ ᤏᤡᤛᤢᤛᤡᤖᤥ॥ 28ᤜᤧᤰᤁᤩᤠᤱ ᤐᤋᤪᤢᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ. ᤂᤢᤏᤡ᤹ ᤜᤡᤶᤔᤥ ᤐᤣ᤺ᤰᤔᤠ ᤀᤠᤏᤡᤃᤣ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤔᤧᤒᤡᤖᤡᤃᤧᤴ ᤁᤧᤗ᤹ᤒᤠ ᤂᤡᤏᤡ᤹ ᤏᤢᤖᤡᤰᤁᤠᤱ ᤁᤧᤏᤡᤛᤢᤶᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤵᤔᤠᤛᤡ ᤔᤧᤏᤢ᤹ᤏᤧᤴᤗᤥ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤋᤠᤱᤗᤥ॥ 29ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤒᤠᤱᤄᤢᤛᤡᤒᤠ ᤔᤏᤠᤜᤠ᤹ᤏᤢ ᤌᤣᤀᤠᤱ ᤔᤧᤶᤒᤠ᤺ᤳᤋᤣ ᤀᤡᤱᤃᤠ᤹ ᤁᤵᤔᤥ ᤋᤩᤠᤱᤗᤥ॥ ᤀᤠᤸᤗ ᤌᤣᤀᤠᤱ ᤁᤧᤀᤢ᤺ᤳᤋᤠᤱᤒᤠ ᤐᤠ᤺ᤳᤋᤧ᤹ᤀᤥ॥”

30ᤁᤖᤏᤠᤗᤡᤛᤕᤖᤧ ᤂᤢᤏᤧ᤹ ᤔᤧᤳᤋᤢ. “ᤗᤡᤛᤡ ᤕᤧᤴ ᤋᤃᤡ ᤀᤡᤱᤃᤠ᤹ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤸᤗᤧ ᤋᤢᤘᤠ ᤆᤥ᤺ᤰᤁᤡ ᤀᤠᤜᤡᤶᤔᤥ ᤕᤠᤃᤠᤱ॥ ᤂᤡᤔᤥ ᤔᤡᤰᤁᤡᤴᤏᤣ ᤁᤧᤈᤧᤶᤒᤠ ᤋᤣᤳ ᤁᤧᤈᤠᤱᤒᤠ ᤔᤏᤠᤎᤡᤰ ᤀᤡᤱᤃᤠ᤹ ᤀᤠᤍᤃᤡ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ 31ᤔᤧᤳᤋᤠᤱ. ‘ᤁᤷᤏᤠᤗᤡᤕᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠᤴ ᤂᤧᤵᤛᤢᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤁᤢᤓᤠ᤹ ᤕᤠᤱᤜᤠ᤹ ᤏᤡᤱᤘᤠ᤹ ᤀᤡᤋᤢᤀᤠᤱ ᤘᤠ᤹ᤖᤥ॥ 32ᤜᤧᤰᤁᤣ᤺ᤸᤗᤧ ᤈᤥᤵᤐᤠᤀᤥ ᤛᤡᤔᤥᤏ ᤐᤋᤪᤢᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤗᤠᤛᤧ ᤔᤏᤠᤜᤠ᤹ ᤐᤠᤱᤄᤧᤛᤧ᤹ᤀᤥ॥ ᤂᤢᤏᤧ᤹ᤃ ᤛᤧᤜᤥᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤕᤠ᤺ᤰᤋᤧᤀᤠᤱ ᤘᤠ᤹॥ ᤂᤧᤴ ᤜᤡᤶᤔᤡᤴ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤏᤧᤖᤥ॥’ 33ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤔᤥ ᤁᤧᤗᤠᤛᤧ ᤐᤠᤱᤄᤢᤱᤛᤡᤱ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤠᤱ ᤁᤵᤔᤥ ᤁᤧᤍᤩᤧᤀᤠᤱ ᤏᤢᤒᤠᤀᤣ ᤐᤥ᤺ᤰᤂᤧᤖᤥ॥ ᤀᤠᤸᤗᤥᤃ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤘᤕᤡᤃᤧᤀᤠᤱ ᤍᤠᤱᤒᤠᤸᤗᤧ ᤂᤧᤏᤧ᤹ ᤌᤣ ᤐᤠ᤺ᤵᤔᤠ ᤀᤡᤱᤈᤠᤱ ᤁᤧᤒᤡᤖᤧᤀᤠᤱ ᤘᤠ᤹. ᤂᤧᤴ ᤐᤠᤴ ᤂᤧᤶᤛᤧ ᤁᤵᤔᤥ ᤕᤠᤖᤡᤵ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥”

ᤐᤋᤪᤢᤛᤖᤧ ᤀᤢᤘᤠ ᤆᤥᤃᤢ᤹

34ᤁᤴ ᤂᤧᤵᤛᤢᤀᤠᤱ ᤐᤋᤪᤢᤛᤖᤧ ᤐᤠ᤺ᤵᤔᤠ ᤜᤣ᤺ᤰᤋᤢ. “ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤔᤧᤛᤧᤴᤍᤢᤴᤇᤡᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤸᤗ ᤀᤡᤱᤃᤠ᤹ ᤏᤢᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ 35ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤀᤡᤱᤎᤠᤱ ᤁᤧᤒᤡᤒᤠ ᤏᤢ ᤁᤢᤏᤡᤱᤘᤠ᤹ ᤜᤧᤰᤁᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤋᤠ᤺ᤰᤋᤢᤛᤡᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ॥ 36ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤏᤠᤖᤢᤱᤗᤧᤴ ᤛᤢᤏᤠᤀᤡᤱᤅᤡᤴ ᤁᤠᤰ ᤀᤡᤛᤪᤠᤀᤡᤗᤡᤜᤠ᤹ᤖᤥ ᤐᤠᤱᤄᤢᤖᤥ॥ ᤂᤧᤴ ᤛᤢᤏᤠᤀᤡᤱᤅᤡᤱᤃ ᤕᤜᤢᤍᤡᤜᤠ᤹ᤖᤧᤴᤗᤰ ᤔᤣ᤺ᤴ. ᤁᤖ ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤋᤩᤧᤀᤠᤱ ᤘᤠ᤹ᤖᤥ॥ 37-38ᤃᤠᤗᤡᤗᤗᤠᤶ ᤕᤢᤜᤢᤴᤏᤠᤖᤧ ᤀᤡᤱᤓᤥᤛᤢᤒᤠ ᤒᤵᤋᤡᤛ᤻ᤔᤠᤀᤠᤱᤎᤥ ᤕᤜᤢᤍᤡᤕᤠᤀᤥ ᤐᤥ᤺ᤰᤂᤧᤒᤠ ᤁᤠᤰ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤛᤖᤋᤛᤔᤠ ᤕᤧᤛᤢᤴ ᤛᤣᤛᤣᤔᤠᤱᤅᤡᤴ ᤏᤢ ᤔᤢᤰᤛᤠᤶᤔᤡᤸᤗᤧ ᤔᤠᤱᤎᤥ᤺ᤰᤏᤠ ᤐᤡᤖᤢᤀᤠᤱ ᤂᤢᤏᤧ᤹ ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥ᤺ᤰᤁᤡ ᤔᤠᤑᤧᤴᤛᤠᤶᤔᤡᤸᤗᤧ ᤀᤣ᤺ᤵᤋᤢᤛᤡᤒᤠᤜᤠ᤹ ᤘᤣ᤺ᤴᤍᤢᤛᤡᤖ ᤗᤠᤶᤍᤡᤰ ᤆᤥᤃᤢᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤘᤕᤧᤒᤠᤴᤏᤠᤱ ᤁᤧᤏᤡᤛᤢᤶᤗᤥ॥

39“ᤜᤧᤰᤁᤩᤠᤱ ᤕᤧᤛᤢᤖᤧ ᤕᤖᤢᤛᤗᤧᤔ ᤏᤢ ᤁᤠᤰ ᤕᤜᤢᤍᤡᤕᤠᤛᤔᤠ ᤗᤠᤈᤣ᤹ᤀᤥ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ᤖᤧᤴ ᤀᤠᤏᤡᤃᤣ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤋᤥ᤺ᤴᤍᤡ ᤘᤕᤡᤃᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ᤃ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥᤴᤍᤢ ᤔᤧᤛᤧᤖᤢ. 40ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤀᤣ ᤛᤢᤶᤕᤧᤴ ᤀᤣᤃᤠᤱ ᤑᤥ᤺ᤰᤂᤢᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤡᤃᤧᤖᤥ॥ 41ᤂᤢᤏᤧ᤹ᤃ ᤁᤠᤰ ᤕᤜᤢᤍᤡᤜᤠ᤹ᤏᤢᤃ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤥ᤺ᤴᤍᤡ ᤐᤡᤛᤧ ᤛᤣᤃᤡᤃᤧᤒᤠᤜᤠ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱᤗᤥ॥ ᤂᤢᤏᤧ᤹ ᤛᤡᤔᤧᤴᤗᤠᤶ ᤜᤡᤅᤧᤀᤠᤱ ᤀᤠᤏᤡᤃᤣ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤆᤠ᤺ᤶᤏᤠ ᤌᤢᤱᤔᤏᤠᤖᤥ॥ 42ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ ᤀᤡᤱᤓᤴ ᤆᤥ᤺ᤰᤔᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡᤒᤠ ᤏᤢ ᤁᤧᤜᤡᤱᤒᤠᤜᤠ᤹ᤖᤧᤴ ᤂᤠᤛᤧᤴ ᤆᤥ᤺ᤰᤛᤧ ᤂᤢᤏᤧ᤹ᤀᤣ ᤛᤣᤃᤢᤒᤠ ᤐᤠ᤺ᤴᤏᤡᤴ ᤐᤠ᤺ᤳᤋᤧᤶᤔᤧ᤹ᤀᤥ ᤗ᤹ᤖᤡᤰ ᤂᤢᤏᤧ᤹ ᤕᤠᤵᤔᤡ ᤀᤡᤱᤈᤠᤱ ᤐᤡᤖᤧᤖᤥ 43ᤁᤠᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤘᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤜᤠᤱᤅᤡᤴ ᤏᤛᤠᤴ ᤁᤧᤈᤥ᤺ᤰᤐᤠ ᤀᤠᤳᤋᤡᤸᤗᤧᤛᤠᤱ ᤂᤢᤏᤧ᤹ᤗᤠᤶ ᤁᤢᤗᤠᤕᤥᤖᤧᤴ ᤗᤧᤵᤔᤡ ᤂᤥᤛᤢᤖᤥ॥”

ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤣᤛᤣᤔᤠᤱ ᤔᤧᤄᤥᤛᤢ᤹

44ᤐᤋᤪᤢᤛᤖᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖ ᤐᤳᤇᤧᤸᤗᤧᤛᤠ ᤂᤧᤴ ᤛᤢᤏᤠᤀᤡᤱ ᤁᤧᤄᤧᤶᤒᤠᤜᤠ᤹ ᤛᤶᤍᤠᤱ ᤛᤣᤛᤣᤔᤠᤱᤅᤡᤴ ᤆᤢᤰᤋᤧᤖᤥ॥ 45ᤂᤧᤴ ᤐᤋᤪᤢᤛ ᤏᤢ ᤈᤥᤵᤐᤠᤗᤠᤶ ᤁᤧᤓᤧᤶᤒᤠ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠᤶ ᤐᤡᤖᤢᤛᤡᤒᤠ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 46ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤘᤣ᤹ ᤐᤠ᤺ᤴᤍᤠᤱᤜᤠ᤹ ᤔᤧᤒᤠ᤺ᤳᤋᤢᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤒᤠ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤖᤥ॥

ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢᤛᤡ. 47“ᤁᤴ ᤔᤏᤠᤜᤠ᤹ᤖᤧᤀᤠᤱ ᤛᤣᤛᤣᤔᤠᤱᤅᤡᤴ ᤀᤠᤏᤡ᤹ ᤜᤧᤰᤁᤣᤀᤣ ᤔᤧᤄᤥᤛᤢᤀᤠᤱ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤁᤴ ᤔᤏᤠᤜᤠ᤹ ᤜᤠ᤺ᤳᤗᤧ ᤒᤵᤋᤡᤛ᤻ᤔᤠ ᤐᤥᤱᤔᤠ ᤛᤠᤰᤋᤢᤛᤡᤒᤣ᥅” 48ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤧᤱᤜᤠ᤹ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤡᤔᤠ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤁᤢᤓᤠ ᤕᤧᤴ ᤂᤢᤏᤡ᤹ᤏᤢᤀᤣ ᤘᤠ᤹ᤏᤡ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤔᤧᤓᤠᤰᤋᤢᤖᤥ॥

Currently Selected:

ᤛᤣ᤺ᤰᤕᤢᤰᤔᤡᤒᤠᤜᤠ᤹ 10: LIFOTNT

Highlight

Copy