᥈ ᤐᤋᤪᤢᤛ 2
2
ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹
1ᤁᤖ ᤀᤢᤴᤇᤥᤴ ᤀᤡᤛᤪᤠᤀᤡᤗᤀᤥ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤘᤕᤧᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤗᤢᤶᤔᤥᤀᤠᤱ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ ᤔᤧᤗᤴ ᤔᤧᤍᤠᤖᤥ॥ ᤂᤧᤱᤜᤠ᤹ᤖᤧᤃ ᤛᤫᤠ᤺ᤳᤋᤠᤱ ᤕᤠᤵᤔᤡ ᤁᤧᤔᤧᤱᤒᤠ ᤀᤡᤱᤗᤧᤰ ᤐᤠ᤺ᤴᤜᤠ᤹ ᤔᤧᤜᤢ᤹ᤖᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤸᤗᤢᤱ ᤁᤧᤜᤢᤱᤒᤠᤀᤠᤱ ᤁᤧᤎᤧ᤹ᤒᤠ ᤍᤠᤱᤒᤠᤴᤏᤠᤱ ᤔᤧᤏᤠ᤹ᤖᤢᤀᤠᤱ ᤜᤠᤖᤠᤀᤣ ᤀᤠᤒᤠᤅᤣ ᤂᤢᤏᤡ᤹ᤀᤥ ᤔᤧᤰᤔᤧᤴ ᤔᤧᤍᤠᤖᤢ᤹॥ 2ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤡᤴ ᤕᤖᤡᤰᤗᤧ ᤔᤧᤍᤡᤶᤍᤢ ᤔᤧᤏᤠ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤛᤧᤰᤂᤠᤒᤠ ᤗᤠᤶᤔᤡᤸᤗᤧᤴᤏᤠᤱ ᤁᤢᤈᤠ᤺ᤳᤌᤡ ᤐᤣ᤺ᤰᤗᤥ॥ 3ᤂᤢᤏᤡ᤹ ᤂᤡ᤺ᤶᤒᤪᤠᤰᤔᤥ ᤁᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤍᤠᤒᤠ ᤀᤡᤱᤗᤧᤰᤐᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤀᤠᤱ ᤂᤡᤏᤡ᤹ ᤀᤡᤱᤃᤧᤶᤗᤧᤰᤋᤡᤀᤠᤱ ᤀᤡᤴᤎᤠ᤺ᤰ ᤔᤧᤎᤃᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤢᤶᤍᤡᤱᤅᤡᤴ ᤋᤃᤡᤛᤠ ᤂᤠᤛᤧᤴ ᤆᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤡ᤹ ᤔᤧᤰᤔᤧᤴ ᤏᤡ᤺ᤴᤎᤥ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
4ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥ ᤁᤧᤈᤥ᤺ᤰᤐᤠ ᤔᤠᤱᤗᤠᤀᤡᤱᤒᤠᤜᤠ᤹ᤀᤠᤱ ᤂᤠᤛᤧᤴᤗᤠᤶ ᤔᤧᤍᤠᤱᤄᤢᤴᤇᤡᤴᤗᤥ. ᤁᤖ ᤂᤧᤱᤜᤠ᤹ ᤀᤡᤄᤣ᤺ᤰᤂᤢᤛᤡᤀᤠᤱ ᤂᤧᤔᤠᤕᤱᤛᤱᤅᤥ ᤁᤣ᤺ᤳᤋᤢᤛᤡᤀᤠᤱ ᤂᤠᤛᤧᤴ ᤕᤧᤴ ᤌᤠᤖᤡᤰ ᤂᤧᤴ ᤂᤠᤔᤠᤰᤗᤢᤶᤒᤠ᤺ᤳᤋᤥ ᤔᤧᤕᤠᤰᤗᤥ॥ 5ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤘᤠᤍᤥ᤺ᤰᤔᤥᤗᤠᤶ ᤔᤧᤰᤂᤢᤛᤡᤸᤗᤧ ᤂᤧᤴ ᤀᤢᤴᤇᤣ᤺ᤴᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤠᤱ ᤔᤧᤍᤠᤱᤄᤢᤴᤇᤡᤴᤗᤥ. ᤁᤖ ᤛᤠᤶᤕᤥᤒᤠ ᤐᤠᤴ ᤀᤡᤱᤃᤧᤓᤥᤒᤠ ᤏᤢᤜᤴ ᤏᤢ ᤘᤣ᤹ ᤏᤢᤛᤡ ᤔᤏᤠᤜᤠ᤹ᤖᤰ ᤋᤠᤱᤄᤢᤛᤡᤖᤥ॥ 6ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥ ᤁᤢᤎᤡᤶ ᤛᤍᤥᤔ ᤏᤢ ᤃᤔᤥᤖᤠ ᤕᤧᤰᤕᤰᤜᤠ᤹ᤀᤠᤱ ᤔᤡᤎᤡᤰᤂᤢᤀᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤀᤠᤱ ᤂᤧᤴ ᤕᤧᤰᤕᤰᤜᤠ᤹ᤖᤧ ᤁᤢᤔᤡᤱ ᤔᤠᤛᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤂᤧᤴ ᤕᤠᤵᤔᤡᤜᤠ᤹ᤖᤧᤴ ᤀᤠᤰᤋᤱᤒᤠ ᤜᤡᤱᤃᤳ ᤐᤥᤱ ᤁᤧᤗ᤹ᤒᤠ ᤁᤢᤒᤡ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥ 7ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥᤒᤠ ᤛᤠᤶᤕᤥᤒᤠ ᤗᤢ᤺ᤋᤧᤱᤃ ᤛᤧ᤺ᤵᤋᤢᤖᤥ॥ ᤂᤢᤏᤧ᤹ᤃ ᤂᤧᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰᤜᤠ᤹ ᤏᤡᤛᤢᤀᤠᤱ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤘᤕᤧᤖᤥ॥ 8(ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤌᤡᤰᤕᤠ᤺ᤴᤎᤰ ᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤏᤡᤛᤢ ᤂᤧᤵᤛᤢᤸᤗᤧ ᤛᤠᤶᤕᤥᤒᤠ ᤗᤢ᤺ᤳᤋᤧᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤘᤕᤧ॥)
9ᤜᤧᤰᤁᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤗᤠᤶ ᤛᤧ᤺ᤵᤔᤠᤛᤡᤀᤠᤱ ᤗᤧᤛ᤻ᤛᤢ᤹ᤖᤥ॥ ᤜᤧᤰᤁᤩᤠᤱ ᤗᤠᤕᤥᤒᤠ ᤔᤏᤠᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤖ ᤂᤠᤛᤧᤴ ᤕᤧᤴᤏᤥ ᤌᤠᤖᤡᤰ ᤁᤵᤔᤠᤛᤡᤀᤠᤱ ᤗᤧᤛ᤻ᤛᤢᤖᤥ॥ 10ᤀᤰᤋᤱᤒᤠᤜᤠ᤹ᤃ ᤀᤠᤒᤠᤅᤣ ᤑᤧᤴᤏᤡᤱᤘᤠ᤹ ᤁᤢᤀᤡᤛᤡᤰ ᤕᤠᤶᤍᤠᤍᤠᤀᤥ ᤁᤧᤘᤠ᤹ᤒᤠ ᤏᤢ ᤍᤠᤱᤒᤠᤸᤗᤧ ᤁᤢᤕᤢᤰᤁᤡᤴ ᤁᤧᤏᤠ᤹ᤒᤠ ᤔᤏᤠᤛᤡᤖᤥ॥ ᤂᤧᤴ ᤀᤠᤎᤡᤱᤃᤠᤏᤡ ᤏᤢ ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ᤖᤧᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ ᤜᤡᤏᤠ᤺ᤶ ᤔᤧᤵᤔᤠᤛᤡ ᤔᤧᤱᤃᤡᤏᤧᤴᤗᤥ॥ 11ᤁᤖ ᤁᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤏᤢ᤺ᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ ᤁᤧᤎᤢᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤔᤧᤈᤥ᤺ᤰᤛᤠᤱ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠᤛᤡ ᤔᤧᤴᤀᤠ᤺ᤴᤇᤡᤱᤅᤡᤴᤗᤥ॥
12ᤁᤖ ᤁᤴ ᤔᤏᤠᤜᤠ᤹ᤖᤧᤃ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤐᤠ᤺ᤴᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤔᤧᤒᤠ᤺ᤳᤋᤢ᤹ᤖᤥ॥ ᤂᤧᤱᤜᤠ᤹ ᤋᤧᤶᤔᤠᤛᤡᤀᤠᤱ ᤛᤧᤵᤔᤠᤛᤡ ᤑᤠ᤹ᤀᤠᤱ ᤛᤡᤰᤁᤢᤶ ᤏᤡᤱᤘᤠ᤹ ᤔᤣ᤺ᤴᤏᤣ ᤁᤧᤎᤠᤵᤐᤠ ᤌᤰᤛᤠᤜᤠ᤹ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤁᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ ᤂᤧᤴ ᤌᤰᤛᤠᤜᤠ᤹ ᤁᤢᤀᤡᤛᤡ᤺ᤰᤁᤣ ᤔᤧᤔᤧᤰᤗᤥ॥ 13ᤂᤧᤱᤜᤠ᤹ᤖᤧᤃ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤒᤰᤁᤡᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠᤀᤣ ᤔᤧᤍᤢᤔᤢ᤹ᤖᤥ॥ ᤂᤧᤱᤜᤠ᤹ᤖᤧᤃ ᤗᤧᤴᤍᤡᤰᤛᤠ ᤕᤠᤶᤍᤠᤍᤠ ᤏᤢ ᤏᤡᤱᤘᤠ᤹ᤋᤠᤍᤠ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ᤌᤠᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤡᤏᤡ᤹ᤏᤢ ᤔᤧᤈ ᤔᤧᤎᤢᤅᤢᤸᤗᤧ ᤔᤧᤛ᤺ᤳᤗ ᤀᤡᤱᤃᤧᤶᤗᤧᤰᤋᤡᤀᤠᤱ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡ᤹ᤖᤥ॥ 14ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤰᤁᤡᤸᤗᤧ ᤋᤠᤵᤑᤧ᤺ᤶᤒᤠ ᤕᤠᤶᤍᤠᤍᤠᤒᤠ ᤆᤠᤖᤠᤶᤔᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤀᤠᤱ ᤀᤠᤰᤂᤧᤴ ᤗᤠᤕᤥ ᤔᤧᤈᤥᤃᤢᤛᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤠᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤗᤠᤕᤥᤀᤥ ᤔᤧᤎᤠᤛᤢᤛᤡ᤹॥ ᤂᤧᤱᤜᤠ᤹ᤖᤧᤃ ᤂᤡ᤺ᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠ᤹ᤖᤡᤰ ᤔᤧᤗᤧᤛ᤻ᤛᤢ᤹ᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤱᤃᤪᤠᤖᤧ ᤋᤧᤳᤋᤢᤛᤡᤒᤠ ᤔᤏᤠᤛᤡᤖᤥ॥ 15ᤂᤧᤱᤜᤠ᤹ᤖᤧᤃ ᤋᤥ᤺ᤴᤍᤥᤶᤒᤠ ᤗᤠᤶᤔᤡᤴ ᤔᤧᤗᤧᤖᤢᤀᤠᤱ ᤂᤧᤱᤜᤠ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤔᤧᤗᤠᤛᤧᤀᤠᤱ ᤔᤧᤘᤠ᤹ᤖᤥ॥ ᤒᤥᤀᤖᤖᤧ ᤁᤢᤛ᤻ᤛᤠᤜᤠ᤹ ᤒᤠᤗᤠᤔᤖᤧ ᤁᤢᤗᤠᤶᤔᤥ ᤔᤧᤒᤣᤀᤠᤱ ᤔᤧᤘᤠ᤹॥ ᤒᤠᤗᤠᤶᤔᤡᤸᤗᤧᤃ ᤗᤠᤕᤥᤗᤠᤶ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧ. 16ᤁᤖ ᤜᤧᤰᤋᤱᤒᤠ ᤑᤧᤴ ᤕᤠ᤺ᤶᤒᤰ ᤆᤥᤃᤢᤒᤠᤸᤗᤧ ᤁᤢᤒᤠᤴ ᤔᤧᤴᤗ᤺ᤶᤔᤏᤠᤒᤠ ᤀᤍᤱᤅᤡᤸᤗᤧ ᤂᤢᤏᤧ᤹ ᤑᤧ᤺ᤰᤋᤢ॥ ᤂᤧᤴ ᤀᤍᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡ ᤐᤠ᤺ᤴᤗᤠᤶᤒᤠ ᤒᤠᤗᤠᤶᤔᤡᤸᤗᤧ ᤁᤧᤏᤠᤱᤒᤠ ᤁᤢᤀᤡᤛᤡᤰ ᤆᤥᤃᤢᤒᤠ ᤀᤍᤱ ᤁᤢᤕᤠ᤺ᤶᤒᤰᤁᤡᤴ ᤛᤠᤰᤋᤢᤖᤥ॥
17ᤀᤰᤋᤱᤒᤠ ᤔᤏᤠᤜᤠ᤹ᤃ ᤁᤧᤈᤵᤐᤠ ᤘᤠᤒᤢᤴ ᤏᤢ ᤛᤢᤖᤡᤳᤔᤠᤸᤗᤧ ᤔᤢ᤺ᤳᤋᤢ ᤋᤣ᤹ᤖᤢᤒᤠ ᤂᤠᤵᤔᤡ᤺ᤵᤐᤠ ᤜᤧᤰᤋᤱᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤔᤠᤰ ᤗᤢᤶᤒᤠ᤺ᤳᤋᤡᤴ ᤕᤠᤖᤡᤵ ᤆᤥᤃᤢᤀᤠᤱ ᤏᤧᤖᤥ॥ 18ᤂᤧᤱᤜᤠ᤹ᤃ ᤁᤢᤛᤢᤶ ᤔᤧᤴᤍᤶᤔᤏᤠ ᤀᤠᤱᤍᤡᤱ ᤀᤡᤛᤣ᤺ᤱᤒᤠ ᤐᤠᤴ ᤔᤧᤒᤠ᤺ᤳ. ᤜᤧᤰᤁᤩᤠᤱ ᤂᤠᤖᤰ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤗᤧᤵᤐᤠᤀᤠᤱ ᤍᤠᤱᤒᤠᤀᤥ ᤁᤧᤍᤠᤒᤠᤜᤠ᤹ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤸᤗᤧ ᤌᤣᤀᤠᤱ ᤔᤧᤗ᤹ᤏᤧᤴ ᤗ᤹ᤖᤡᤰ ᤔᤧᤜᤢᤛᤢᤛᤡᤖ ᤕᤠᤶᤔᤥ ᤗᤠᤕᤥᤀᤥ ᤔᤧᤎᤠᤛᤢᤛᤡᤖᤥ॥ 19ᤂᤧᤱᤜᤠ᤹ᤃ ᤀᤠᤒᤠᤅᤣ ᤑᤧᤴᤏᤡᤱᤘᤠ᤹ ᤕᤧᤵᤗᤧᤰᤁᤡᤸᤗᤧ ᤁᤢᤕᤥᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤛᤠᤱ ᤘᤣ᤹ᤜᤠ᤹ᤃ ᤆᤥ᤺ᤰᤕᤢᤶᤓᤥᤖᤧᤴ ᤔᤠᤱᤜᤧᤰ ᤔᤧᤒᤡᤖᤢᤛᤡ᤹॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤔᤏᤠᤜᤠ᤹ ᤕᤢᤰᤋᤢᤛᤡ᤹. ᤂᤧᤱᤜᤠ᤹ ᤒᤠ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤕᤥ᤺ᤰᤐᤠ ᤔᤧᤒᤥᤱᤗᤥ॥ 20ᤁᤖ ᤂᤧᤱᤜᤠ᤹ᤖᤧ ᤍᤠᤱᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤐᤠ᤺ᤴᤗᤠᤶ ᤔᤧᤗᤴ ᤜᤧᤰᤁᤩᤠᤱ ᤕᤠᤶᤔᤥ ᤔᤧᤏᤢ᤺ᤱ ᤔᤧᤒᤣ᤺ᤰᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤗᤠᤃᤡ ᤋᤃᤡᤏᤢ᤺ᤸᤗᤧᤀᤠᤱ ᤁᤢᤏᤢᤵᤔᤥᤃ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤥᤱᤗᤥ॥ 21ᤂᤧᤱᤜᤠ᤹ᤖᤧ ᤛᤠᤶᤕᤥᤒᤠ ᤗᤠᤶᤔᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤄᤥᤛᤢᤒᤠ ᤛᤣᤛᤣ ᤀᤡᤱᤈᤠᤱᤅᤡᤴ ᤔᤧᤏᤠ᤹ᤖᤢᤏᤢ᤺ᤸᤗᤧᤃ ᤂᤧᤴ ᤛᤠᤶᤕᤥᤒᤠ ᤗᤠᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤏᤡᤸᤗᤧ ᤏᤢᤖᤧᤒᤠᤖᤥ॥ 22ᤂᤧᤱᤜᤠ᤹ᤃ ᤛᤡᤘᤠᤍᤡᤱ ᤂᤠᤜᤢᤴᤏᤡᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤈᤥᤰᤗᤥ. “ᤁᤥ᤺ᤳᤆᤥ᤺ᤸᤗᤧ ᤐᤧᤛ᤻ᤛᤢᤀᤠᤱ ᤁᤢᤒᤧ᤹ᤔᤠ᤺ᤳᤋᤡᤴ ᤀᤠᤒᤠᤅᤣ ᤆᤖᤥ.”#ᤂᤠᤜᤢᤴ ᥈᥌:᥇᥇ ᤜᤧᤰᤁᤩᤠᤱ “ᤑᤠᤰᤁᤡᤴ ᤘᤠᤖᤢ᤺ᤶᤔᤠᤛᤠᤱ ᤕᤠᤶᤔᤥ ᤂ᤺ᤱᤘᤠ ᤏᤧ᤺ᤴᤇᤡᤱᤗᤥ॥”
Currently Selected:
᥈ ᤐᤋᤪᤢᤛ 2: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.