᥇ ᤐᤋᤪᤢᤛ 2
2
1ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤃ ᤔᤏᤠ ᤋᤢᤰᤂᤣ ᤁᤧᤈᤠ᤺ᤵᤐᤠ ᤁᤠᤰ ᤑᤧᤴ ᤕᤠ᤺ᤶᤒᤰᤜᤠ᤹ ᤗᤧᤖᤧᤶᤍᤣ᤺ᤛᤧᤶᤔᤧ᤹ᤀᤥ॥ ᤀᤡᤱᤗᤧᤰ ᤌᤣᤀᤠᤱ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹. ᤛᤠᤶᤕᤥᤒᤠ ᤔᤧᤗᤧᤱᤅᤠᤛᤡᤶᤔᤧᤴᤏᤧ᤹. ᤏᤠᤜᤧᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤐᤠ ᤆᤧ᤹ᤕᤠᤐᤠᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ॥ 2ᤂᤠᤖᤰ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤅᤧ᤺ᤰᤘᤠ᤺ᤸᤗᤧ ᤏᤢ᤺ᤴ ᤌᤢᤱᤔᤠ ᤁᤥ᤺ᤳᤋᤢᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤸᤗᤧᤴ ᤛᤢᤳᤌᤥ ᤕᤠᤶᤛᤠᤶᤃᤧᤴ ᤏᤢ᤺ᤴ ᤌᤢᤱᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤧᤴᤗᤠᤶᤒᤠ ᤂᤡᤏᤡ᤹ ᤛᤧᤴᤗᤵᤐᤥ ᤁᤧᤒᤥᤖᤡᤖ ᤁᤧᤒᤣᤃᤡ᤹ᤖᤥ॥ 3ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤍᤠᤱᤒᤠᤴ ᤏᤢᤒᤠ ᤆᤥᤰ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
ᤁᤢᤜᤡᤱᤘᤧᤳ ᤗᤢᤱᤜᤠ᤹ᤖᤧᤴ ᤕᤠᤶᤛᤠᤶᤃᤧᤴ ᤔᤠᤱᤜᤡᤶ
4ᤔᤏᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤀᤡᤔᤧᤸᤗᤢᤱᤒᤠ ᤁᤢᤜᤡᤱᤘᤧᤳ ᤗᤢᤱ ᤂᤪᤡᤛ᤻ᤋᤀᤥ ᤁᤧᤍᤩᤧ᤹ᤀᤡᤸᤗᤧ 5ᤂᤡᤏᤡ᤹ᤀᤠᤱ ᤁᤢᤜᤡᤱᤘᤧᤳ ᤗᤢᤱ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤛᤠᤶᤃᤧᤴ ᤔᤠᤱᤜᤡᤶ ᤁᤧᤈᤥᤃᤡ᤹ᤖᤥ॥ ᤂᤡᤏᤡ᤹ᤃ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤕᤠᤶᤛᤠᤶᤃᤧᤴ ᤛᤡᤍᤢᤱᤈᤓᤠ ᤁᤧᤍᤥᤶᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤛᤠᤶᤒᤠᤏᤡᤱᤗᤥ॥ 6ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ.
“ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤡᤱᤃᤠ᤹ ᤛᤣ᤺ᤰᤔᤏᤠᤒᤠ ᤏᤢ ᤀᤡᤔᤧᤸᤗᤢᤱᤒᤠ
ᤁᤢᤶᤔᤠᤗᤢᤱᤅᤡᤴ#᥈:᥌ ᤁᤢᤶᤔᤠᤗᤢᤱ—ᤁᤴ ᤑᤠ᤹ᤀᤡᤴ ᤗᤢᤱᤎᤠᤰ ᤛᤧᤵᤔᤠᤸᤗᤧ ᤁᤢᤛᤢᤰᤐᤥ ᤏᤧᤔᤏᤠᤒᤠ ᤁᤧᤕᤧᤰᤐᤠ ᤕᤶᤒᤠ ᤗᤢᤱᤗᤥ॥ ᤕᤖᤢᤛᤗᤧᤶᤔᤥ ᤏᤧᤛ᤻ᤛᤢᤱᤗᤥ.
ᤜᤧᤰᤁᤩᤠᤱ ᤂᤢᤏᤧ᤹ ᤛᤶᤍᤠᤱ ᤏᤛᤠᤴ ᤁᤧᤈᤥ᤺ᤰᤐᤠᤱᤃ
ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱᤔᤔᤥ ᤔᤧᤎᤠᤏᤧᤴᤗᤥ॥”#ᤕᤛᤤ ᥈᥎:᥇᥌
7ᤀᤠᤸᤗ ᤂᤡᤏᤡ᤹ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤀᤡᤔᤧᤸᤗᤢᤱᤒᤠ ᤗᤢᤱ ᤆᤥᤰᤗᤥ. ᤁᤖ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤗᤠᤃᤡᤃ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ.
“ᤗᤢᤱ ᤁᤧᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴ
ᤁᤢᤶᤔᤠᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”#ᤏᤡᤱ ᤛᤢᤶ ᥇᥇᥎:᥈᥈
8ᤜᤧᤰᤁᤩᤠᤱ “ᤂᤧᤴ ᤗᤢᤱᤅᤡᤸᤗᤧ ᤔᤏᤠᤜᤠ᤹ ᤂᤛᤢᤛᤡᤀᤠᤱ ᤔᤧᤈᤥᤴᤗᤥ॥” ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤸᤗᤧ ᤆᤥᤃᤢᤸᤗᤧ ᤔᤧᤈᤥᤴᤗᤥ॥ ᤜᤧᤰᤋᤱᤒᤠ ᤔᤏᤠᤜᤠ᤹ ᤔᤧᤈᤥ᤺ᤴ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤃᤡᤛᤠ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤕᤧ॥
9ᤁᤖ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣᤃᤡᤒᤠ ᤔᤏᤠ. ᤜᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ. ᤛᤣᤛᤣ ᤛᤢᤘᤠᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤏᤡᤱᤗᤥ॥ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤀᤡᤱᤃᤧᤓᤥᤛᤢᤶᤗ ᤑᤠ᤹ᤀᤠᤱ ᤔᤠᤰᤆᤡᤃᤧᤴ ᤂᤠᤍᤠᤶᤔᤥᤗᤠᤶ ᤏᤡᤱᤘᤠ᤹ ᤁᤧᤔᤠᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥ 10ᤋᤃᤡᤃ ᤂᤡᤏᤡ᤹ ᤁᤢᤔᤏᤠ ᤁᤧᤜᤥ᤺ᤵᤋᤡ. ᤁᤖ ᤀᤠᤸᤗᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹॥ ᤋᤃᤡ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤁᤣ ᤁᤧᤘᤕᤡ. ᤁᤖ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤁᤧᤘᤕᤡ᤹ᤖᤥ॥#ᤜᤥᤛᤣ ᥇:᥌. ᥏. ᥈:᥈᥉
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤜᤧᤰᤁᤣ ᤘᤕᤧᤶᤔᤧ᤹
11ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤁᤵᤔᤥ ᤘᤧᤵᤔᤡᤒᤠ ᤏᤢ ᤔᤠ᤺ᤱᤄᤠ ᤗᤠᤈᤣ᤹ᤒᤠ ᤁᤢᤀᤡᤛᤡᤰ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤗᤠᤕᤥᤒᤠ ᤑᤧᤴ ᤏᤡᤱᤘᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤧᤴ ᤗᤠᤕᤥᤒᤠ ᤑᤧᤴ ᤏᤡᤱᤘᤠ᤹ᤀᤡᤱᤃ ᤂᤡᤏᤡ᤹ ᤕᤠᤶᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ 12ᤂᤡᤏᤡ᤹ᤃ ᤂᤪᤡᤛ᤻ᤋᤧᤴ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤏᤢᤖᤡᤰᤁᤠᤱ ᤏᤢᤒᤠ ᤜᤡᤱᤔᤴᤏᤥ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤑᤧᤴ ᤐᤠ᤺ᤴᤜᤠ᤹ ᤁᤧᤈᤥᤃᤢᤶ ᤗ᤹ᤖᤡᤰ ᤐᤠᤴ ᤁᤧᤶᤎᤡᤰᤋᤡᤛᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡᤛᤢᤖ. ᤂᤠᤛᤧᤴ ᤆᤥ᤺ᤰᤛᤧ ᤕᤢᤒᤠ ᤕᤧᤴᤏᤥ ᤁᤢᤏᤠᤖᤠ ᤔᤧᤓᤥᤛᤢ᤹ᤖᤥ॥
13ᤁᤠᤰ ᤔᤧᤴᤇᤠᤶ ᤕᤢᤰᤛᤠᤒᤠᤜᤠ᤹ ᤜᤧᤰᤁᤩᤠᤱ ᤁᤠᤰᤏᤢ ᤕᤶᤒᤠ ᤕᤢᤰ ᤁᤧᤃᤵᤐᤠ ᤜᤠᤱᤅᤡᤸᤗᤧ ᤁᤢᤕᤢᤰᤁᤥ ᤘᤕᤧᤶᤔᤧ᤹ ᤁᤧᤗ᤹ᤒᤠ ᤍᤠᤱᤒᤠᤸᤗᤧ ᤏᤡᤱᤘᤠ᤹ ᤆᤥᤃᤢ᤹ᤖᤥ॥ 14ᤂᤡᤏᤡ᤹ᤃ ᤁᤠᤰ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤜᤠ᤹ ᤋᤧᤴᤍᤡᤱ ᤆᤥ᤺ᤰᤔᤠ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤏᤢ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤠᤖᤠᤑᤥᤔᤠ ᤐᤠᤱᤄᤢᤛᤡᤒᤠᤖᤥ॥
15ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤏᤢᤒᤠ ᤕᤠ᤺ᤶᤒᤰᤜᤠ᤹ᤖᤧ ᤐᤠᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤴ ᤜᤢ᤹ᤖᤧᤶ ᤐᤡᤖᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ 16ᤂᤡᤏᤡ᤹ᤃ ᤆᤥ᤺ᤰᤕᤢᤶᤓᤥᤒᤠᤏᤡᤱᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤏᤡᤱᤗᤥ. ᤁᤖ ᤆᤥ᤺ᤰᤕᤢᤶᤓᤥᤒᤠᤛᤡᤃᤧ ᤑᤠ᤹ᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ 17ᤁᤠᤰ ᤔᤏᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤛᤡᤶᤔᤧ᤹. ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹. ᤁᤡᤛᤧᤶᤔᤧ᤹ᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤐᤡᤖᤧᤶᤔᤧ᤹ ᤜᤧᤰᤁᤩᤠᤱ ᤜᤠᤱ ᤁᤧᤈᤥᤰᤐᤧᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ॥
ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ ᤐᤥᤱ
18ᤛᤣᤘᤠᤖᤥᤒᤠᤛᤣ. ᤂᤡᤏᤡ᤹ ᤍᤠᤱᤒᤠᤜᤠ᤹ᤖᤧᤴ ᤁᤠᤰ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥ ᤏᤢᤒᤠ ᤏᤢ ᤁᤢᤏᤡᤱᤘᤠ᤹ ᤁᤧᤒᤠ᤺ᤱᤒᤠᤜᤠ᤹ᤖᤧᤴᤗᤰ ᤔᤣ᤺ᤴ. ᤁᤖ ᤁᤧᤀᤠ᤺ᤶᤒᤠ ᤜᤡᤶᤍᤠᤱᤒᤠᤜᤠ᤹ᤖᤧᤴᤏᤠᤱ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥ 19ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤐᤡᤖᤢᤱ ᤑᤠ᤹ᤀᤠᤱ ᤔᤧᤸᤗᤠ᤹ᤔᤏᤠᤒᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤁᤧᤎᤶᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢ᤹॥ 20ᤂᤡᤏᤡ᤹ ᤕᤠ᤺ᤶᤒᤰ ᤁᤧᤓᤣ᤺ᤴᤍᤢᤶᤔᤠᤱ ᤁᤧᤶᤗ᤺ᤵᤛᤡᤏᤧ ᤑᤠ᤹ᤃᤪ ᤌᤣᤀᤠᤱ ᤕᤶᤒᤠ ᤕᤠ᤺ᤶᤒᤰ ᤁᤧᤴᤈᤥᤃᤢᤶᤔᤡᤴᤗᤥ॥ ᤁᤖ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤀᤡᤏᤥᤃᤧᤴ ᤋᤢᤰᤂᤣᤴ ᤁᤧᤎᤖᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤁᤢᤏᤡᤱᤘᤠ᤹ ᤋᤠᤖᤥ॥ 21ᤒᤠ ᤂᤧᤸᤗᤧ ᤗᤠᤃᤡ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧᤀᤠᤱ ᤂᤡᤏᤡ᤹ ᤗᤠᤃᤡ ᤀᤡᤏᤥᤃᤧᤴ ᤋᤢᤰᤂᤣᤴ ᤌᤖᤢᤀᤠᤱ ᤂᤡᤏᤡ᤹ ᤗᤠᤃᤡ ᤁᤢᤒᤡ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤡᤏᤡ᤹ᤀᤠᤱ ᤂᤢᤏᤧ᤹ ᤁᤢᤗᤠᤱᤕᤥ᤺ᤰᤁᤡᤴ ᤁᤧᤍᤡᤶᤍᤢᤶᤗ ᤐᤥᤱᤗᤥ॥
22“ᤂᤢᤏᤧ᤹ᤃ ᤌᤣᤀᤠᤱ ᤗᤠᤕᤥ ᤗᤠᤛᤥᤳ ᤔᤧᤈᤥᤃᤢᤴ. ᤜᤧᤰᤁᤩᤠᤱ ᤌᤣᤀᤠᤱ ᤀᤡᤱᤗᤧᤰ ᤐᤠ᤺ᤴᤏᤠᤱ ᤔᤧᤒᤠᤖᤧᤴᤗᤥ॥”#ᤕᤛᤤ ᥋᥉:᥏
23ᤂᤢᤏᤧ᤹ ᤔᤏᤠᤜᤠ᤹ᤖᤧ ᤁᤢᤈᤠ᤺ᤳᤌᤡ ᤔᤧᤍᤣᤛᤢᤸᤗᤧ ᤂᤧᤱᤜᤠ᤹ᤀᤥ ᤕᤠᤱᤏᤠ ᤐᤠᤴ ᤔᤧᤏᤢ᤺ᤰᤋᤢᤴᤗᤥ॥ ᤂᤢᤏᤧ᤹ ᤋᤢᤰᤂᤣ ᤆᤧ᤺ᤸᤗᤧ ᤔᤏᤠ ᤔᤧᤓᤧ᤺ᤰᤋᤢᤴᤇᤡᤴᤗᤥ॥ ᤁᤖ ᤏᤢᤒᤠ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥᤀᤣ ᤀᤠᤒᤠᤅᤣ ᤜᤢᤰᤛᤢᤵᤛᤡᤱᤗᤥ॥ 24ᤂᤢᤏᤧ᤹ ᤀᤠᤏᤡ᤹ ᤗᤠᤕᤥ ᤗᤠᤛᤥ᤺ᤳᤋᤡᤴ ᤀᤠᤗᤧᤖᤢᤶᤔᤠᤱ ᤛᤠᤶᤕᤥᤒᤠ ᤜᤡᤱᤔᤴᤏᤥ ᤀᤠᤜᤡᤱᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤠᤕᤥᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤁᤢᤕᤢᤍᤣ᤹ᤖᤢᤖᤥ॥ ᤂᤢᤏᤧ᤹ ᤁᤢᤃᤠ᤺ᤶᤔᤠᤀᤥᤗᤠᤶ ᤂᤡᤏᤡ᤹ ᤁᤧᤘᤣ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥ 25ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤋᤠᤵᤁᤧᤒᤧ᤹ᤒᤠᤖ ᤁᤧᤘᤠ᤹ᤒᤠ ᤔᤧᤸᤗᤢᤰᤜᤠ᤹ ᤁᤢᤀᤡᤛᤡᤰ ᤁᤧᤘᤕᤡ. ᤁᤖ ᤀᤠᤸᤗᤥ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤁᤧᤃᤶᤒᤠ ᤏᤢ ᤁᤶᤒᤪᤠᤱ ᤁᤧᤔᤧᤵᤐᤠ ᤍᤠᤱᤒᤠᤀᤥ ᤁᤧᤏᤢ᤺ᤰᤂᤡ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥
Currently Selected:
᥇ ᤐᤋᤪᤢᤛ 2: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.