Ro i Som Muro 28

Pool ta Malta

1Takfai tima ni pwet ɗak ni hal asum i ta' ti Malta. 2Ɗufal i kyeli si mas nin maɗesi fwet. Si shwai nin shak a sinin ni, si mat nin si njaar nin man ɓa ni hali, ɓurti foon ma shwai, kyel ti tiɗya hwak. 3Pool suɓut yitat yis shwai ta man ndai, unai ɗamafwashi nin maɓin fwet, ɓurti a oi man, ma hwet lyam ra i Pool. 4Myan ima ɗufal si ɗing ɗamafwashii yis kwetleng tasi rai Pool hai, unai si lak ɗiyai ames si ni, “Ti mwawei maɗufal mai a ma shwaiti wash ya, pwet a purut na ham wi, mafwashii makoltifai amesi, ma wa honsus u pwet kwa.” 5Pool fivit ra ames hwiti ɗamafwashii ya ta man wi, kaciwa' wis ti afol. 6Ɗufal si kin shit ɓa si ɗingi hwa'a' ahun si ɗingi fo abet fur mot. Takfai tima si yash ta si ɗing ɗama mafwashi nin wisus kwa, unai si shen ambe'a' si ni yis a DeeƁwe nin.

7Anggasi ti kyeli, maɗufal nin ma sum Pubilyus mati mbai ya. A mbai maɗufal ta ta' ti Malta. Mat nin ta wur ames ra apil-apil, mas nin maɗesi i mukon ataat, fanin kikyal i marak. 8Dees i Pubilyusi yis raki ti mwatan i nzam hu i kafor. Unai Pool lang ta kyel ames kinus ra hai fwal DeeƁwe, maɗufali wis njeng i lo' ames. 9Ti ɗing ti aɗeng ima wisus mai, unai shak anggum i ɗufal ima si mii nggori ta Malta, si cu wei ti yes sin wis ti cala. 10Si fanin ngye fwet. Myan ima nin mulang ta kwang i ham, si fanin shak aɗeng ima ni ɓweti.

Muru i Pool ta Rom

11Takfai ti ture ataat, ni lang ta kwang i ham i Alekzandira, ima cu humbil ta Malta. Kwangi mati njanan i harkyel ima si sissak ta wei, asumam ames a Kasto hu Poluks. 12Ni ru ta Sirakus, ni mas mukon ataat ta. 13Ta te'i ni kin hai ni wa Rejiyum. Takfai ti mukon andek, sei lang fu'i ta ɓwai i muɗor, mwen ti ɓu ni ru ta Putiyoli. 14Nanati ni shwai hu shini som koltifaiyi, si fwal nin ɓa ni mas mukon pyoron akul hu sin. A ti andi ni ru ta Rom. 15Myan ima som koltifai si hali ni ma yes, unai si yes ɓa si shwai nin. Si at a at ma maleng, shini si yes ta kyeli i Woor i Apyus, shini si yes ta Wurai Ataat i Mwalmwat. Myan ima Pool ɗing ɗufal mii, wis njeng i fwaran, palang DeeƁwe. 16Myan ima ni lang ta Rom, si hon Pool ɓa u wa ute ta wur ima u tal haisus, maɓwol yis fwangsus ta.

Pool Mba Findel i DeeƁwe ta Rom

17Takfai ti, mukon ataat, Pool lai mbayai i Ju. Myan ima si suɓut unai nyus, “A shunun, shak ta ngga' ima i mas ɗufal amukan mafwashi nin kwa, ahun a lakan i washash amukan kwa, shak ta andi si ka'un ta Yerushalima si fa ta ra i Rom ta shitam wi. 18Si lulun fo, si wisun ti mafwashi nin ima kol ɓa si forun kwa, unai mbayai i Rom si ɓwet ɓa si catun ii ra. 19Myan ima som Ju si nggwes, unai tyon hai a kpang ɓa i ha' ɓur amen fit wa mabel i Makai Mbai, shak ta ha' ti ɓuri fit, i kol a ɗufal amukan ta kyel i ɓur kwa. 20Ɓurti mai aɗengi i fwal ɓa i ɗingu ka findel. A ɓurti kintiɓwi i ɗufal i Isar'ila ima mano' na shitam mai wi.”

21Unai si humuskyel ti findel si ni, “Ni wis kaada nin tima si worong ta Judya si ha hai kwa, shak shunukan ima si yes ta kyeli, ɗeng mba nin findel ama ahun u lak findel mafwashi si ha hai kwa. 22Shak ta andi, ni ɓweti hal ti ambe' ama na fo ya ti, ɓurti ni shangi nyai ɗufal hyang sima lak ti findelal mafwashi si moti fiseli hai.”

23Unai si kin mwen ɓa si shwai hu Pool, mweni ti ru si yes hyang fwet ta wur ima mati mute ta. Tasi mwen ti ɓwai wa ango, yis mba ti findel si kaitat i DeeƁwe, yis woti hihai ames wa kyel i Yeso ta si anggut i Mosis hu kaadaha i som shit i DeeƁwe. 24Shini si ɓwet si fa mwawei si aɗeng ima lak, shini si nggwes i fati mwawei. 25Ɓurti andi si hal i ɗiyai kwa. Si te honti kyeli, Pool lakus findel i dala ni, “Rin Masapai lak washash amu mwawei ta foi Ishaya mashit, ni,

26“ ‘Ɓwa kyel i ɗufal mii, ha nyus,

hali, hu wa fyayan hali,

shak ta andi hu wa ka'i kwa fweng,

Ɗingi, hu wa fyayan ɗingi,

shak ta andi hu wa shangi kwa fweng.

27Ɓurti mulwat i ɗufal mii njengus,

si ndus mwal ames ya,

Si vo shishat ames ya,

ɓurti kandok si ɗingi ti shishat ames,

Si hali ti mwal ames,

si shangi ti mulwat ames,

u kol ima si hatat yes kyel amen i fas cala.’#28:27 Ɗing huni hwak: Ish 6:9-10.

28“Ɓurti andi, i ɓweti hu shangi nyai, DeeƁwe ro ti findel i abum wa kyel i ɗufal ima a Ju kwa. Sin si wa hali.” 29Takfai tima lak mai i findeli, unai Ju si hon kyeli, sin masti uɓet ti ɗiyai ti ambas fwet.

30Pool te ta wur ima yis tali ti haisus i wilyal apil, yis mat ti shak ɗufal ima si yes sus fai. 31Ti mulut andek lak findel i DeeƁwe, ɗeng shahus kwa. Cu wei ti mba ti findel i kaitat i DeeƁwe, yis kofiti si Deembai Yeso Kristi hai.

Currently Selected:

Ro i Som Muro 28: AlisIRonNT

Highlight

Copy