Ni Aizjih 35

Goizdingq Vaenz Cednoiq

1 Moahciz rongx daengzle dij goanz Yixsowhleh maz, dix daj paenqdix hax: "Le gaenqnaeh zawh Yez'hoahhuah hax, dix nemz su biak. 2Jiat vaenz, choak vaenz hoak gaengx, gaj vaenz daih jiat daj vaenz ndai mboq dungzlumj, aeu hoak vaenz Yez'hoahhuah, daengzle cednoiq, vaenz naeh gawz hoak gaengx, zoq hawj gawz tai. 3Vaenzcednoiq rownz gawz goj mboq jinx ndaengfaez."

Hoak Zangjpungh Dij Sen Aeu Gaeng Raeuh

4 Moahciz haxdoq daengzle dij goanz Yixsowhleh, dix hax: "Yez'hoahhuah hoakzaqnaeh nemz, dix hax: 5‘Gaenqsu aeu za'hoq soangq hawj gux, gawz mizzaw soangq, gawz zoq aeu sowh za'hoq inxnaeh maz soangq hawj gux: Jim, ngaenz, dongz, 6mae daeuh, mae zaemq, mae ndiang, mae'banq, koan dij mbej, 7naeng dij mbej taek sowh aeu nyomx ndiang naeh, sowh naeng naemx bae ndaw dix mboq ndaej naeh, maex ciztimh, 8yuz daeng, sowh gaenqhom aeu hoak sowh yuz aeu daz naeh, sowh gaenqhom aeu hoak ciang naeh, 9sowh tin yawz rongx hoak hunghmaxnaux daj bauxswh naeh, le gaenqnaeh aeu doj Yixfuhdowh daj sowh paeng aeu yaz baeg'aek naeh.’

10"Gaenqsu gawz hoakzangh liauq, gawz hoakroiz seb, gawz zoq maz hoak sowh za'hoq Yez'hoahhuah yaix hoak naeh. 11Zoq zawh hoak zangjpungh dij Sen, hoak song laeb paeng gumq niangz zangjpungh naeh, koa kven paeng, teqpa, maexkvang, saeu, sowh zoa aeu saeu doj naeh, 12aen gvih, maextam aen gvih, pa gvih, kvaix paeng yaz baegdu ruk dij Sen naeh, 13zongz, maextam aen zongz, za'hoq aen zongz, sowh binx aeu baiz doqnaj dij Sen naeh, 14rax daeng, za'hoq aen daeng, zoa daeng, yuz daeng, 15aen diamj ciang, maextam aen diamj ciang, yuz puj mbud dij Sen, sowh gaenqhom aeu hoak ciang naeh, kvaix paeng yaz baegdu zangjpungh naeh, 16aen kuq aeu pyaeu gaenq aeu pyaeu mbud naeh, kvaix aeu san aeu doj ndaw kuq naeh, maextam aen kuq, za'hoq aen kuq, banz, aen aeu banz nyaengx naeh, 17sowh paeng aeu dingz gumhhongh naeh, saeu, sowh zoa aeu saeu doj naeh, kvaix paeng aeu yaz baegdu gumhhongh naeh, 18dengdinz zangjpungh, dengdinz gumhhongh, daj zowg song dih naeh, 19sowh ndangnungh puj hoakroiz seb hoak naeh, zoq zawh sowh ndangnungh Yaqlunh daj le lug zaiz dix nungh mbud dij Sen naeh."

20 Moahciz hax nauq yaq, dij goanz Yixsowhleh daengzle ni doqnaj dix bae. 21Sowh puj mizzaw soangq naeh, aeu za'hoq maz soangq hawj Yez'hoahhuah, aeu hoak zangjpungh, za'hoq zangjpungh, ndangnungh puj mbud dij Sen. 22Sowh puj mizzaw soangq naeh, puj zaiz puj nyingz, aeu za'hoq maz soangq hawj Yez'hoahhuah. Paenqdix mbangj goanz aeu ven jim loaj, dingqmungz jim loaj, sowh teu jim aeu kven goakhoz naeh loaj maz soangq Yez'hoahhuah aeu hoak gaenq vae mbud, yuq doqnaj Yez'hoahhuah vae mbud 23Paenqdix mbangj goanz aeu mae daeuh, mae zaemq, mae'ndiang, mae'banq, koan dij mbej, naeng dij mbej taek sowh nyongx ndiang naeh, sowh naeng naemx mboq rux bae ndaw dix naeh, 24ngaenz, dongz, sowh maex ciztimh yungq baenz naeh, paenqdix zoq aeu maz soangq. 25Sowh mehrownz rux laenz mae'banq naeh, paenqdix haeggaj aeu sowh mae paenqdix laenz naeh maz soangq, zoq zawh mae daeuh, mae zaemq, mae ndiang, mae'banq si liak gaenqnaeh. 26Sowh mehrownz rux laenz koan dij mbej naeh, paenqdix haeggaj venq maz laenz koan dij mbej. 27Puj saeq Yixsowhleh, paenqdix aeu sowh tin yawz rongx hoak hunghmaxnaux daj bauxswh naeh maz soangq, aeu le gaenqnaeh doj Yixfuhdowh daj sowh paeng aeu yaz baeg'aek naeh, 28aeu gaenqhom sowh aeu hoak ciang, yuz aeu diamj daeng, yuz puj mbud dij Sen naeh maz soangq. 29Dij goanz Yixsowhleh, puj zaiz gojndae, puj nyingz gojndae, sowh puj mizzaw soangq naeh, paenqdix aeu za'hoq maz soangq hawj Yez'hoahhuah, aeu hoak le gaenq Yez'hoahhuah tungzgoaq Moahciz yaix hoak naeh.

30 Moahciz daj dij goanz Yixsowhleh hax: "Yez'hoahhuah haeuz lowg Bixsaxleh goanz daeq ngah Yaeuhdaq daeuj, goanz lan Fuq'ex, lug zaiz Uzliq naeh, 31Yez'hoahhuah goj aeu Minghkoan dix bae ndang Bixsaxleh, hawj Bixsaxleh miz aen gvai, miz aen dongx, miz mbaedmungz, hawj dix gaj yowngh gaj rux zangh. 32Hawj dix rux aeu jim, ngaenz, dongz chauq yowngh chauq yowngh. 33Hawj dix rux kaeuz tinngaeuz, doj tinngaeuz, kaeuz maex, chauq yowngh chauq yowngh. 34Yez'hoahhuah goj hawj dix daj Yaqhoahliqyaqboah goanz daeq ngah Danq daeuj, goanz lug zaiz Yaqcizsaxmoah naeh lingj, rux zau daenh. 35Yez'hoahhuah goj aeu sowh minghkoan miz aen gvai naeh bae ndang paenqdix, hawj paenqdix rux chauq yowngh chauq yowngh, nwh ndaej sowh daenh nwh mboq taeng naeh, rux kaeuz, rux aeu mae daeuh, mae zaemq, mae'ndiang daj mae'banq liak va, rux daemq paeng, gaj yowngh gaj rux hoak.

Currently Selected:

Ni Aizjih 35: ZHN

Highlight

Copy