Ni Aizjih 16

Dij Goanz Yixsowhleh Nyah Dwk Moahciz Daj Yaqlunh

1Dij goanz Yixsowhleh daengzle ni ndaw Yixlinh. Ni Aizjih yaq, gvaq ndaej song ndown laeng siphaj vaenz, paenqdix mwz taeng ndaw doanghmowz rongx hoak Cinq naeh, doangh naeh yuq jinghzang Yixlinh daj Ciznaiq. 2Dij goanz Yixsowhleh yuq ndaw doanghmowz, daengzle nyah dwk Moahciz daj Yaqlunh. 3Dij goanz Yixsowhleh daj doiqdix hax: "Zwz gaenqpiu yuq ndaw Aizjih naeh, gaenqpiu yuq haenz zauq nowx jin imqdwngq, gangzmaz zwz naeh piu yuq dawj mungz Yez'hoahhuah tai naengz ndae nyeuz eh. Gannaeh doiq su zowz gaenqpiu og daeuj ndaw doanghmowz, gaenqsu zawx hawj piu daengzle tai yaeg raj?" 4Yez'hoahhuah daj Moahciz hax: "Su lez oaj, gux sauq gaenqjin daeq ndaw fax daeuj hawj su. Gux hawj gaenqsu gaj vaenz gaj bae zaep, goanz ux ndaej sownq ux. Gux hawj paenqdix hoakzaqnaeh hoak, zawh lez paenqdix biak mboq biak kauq gux. 5Taeng vaenz daih choak, gaenqsu zaep lai nyeuz vaenz ndai daep ux, ndaep naeh aeu nyaengx vaenz daih jiat, Vaenz Cednoiq jin." 6Yaq Moahciz, Yaqlunh daj dij goanz Yixsowhleh hax: "Haemh naeh su zoq ruxndeq zawh Yez'hoahhuah lingz su daeq Aizjih og daeuj yah. 7Nawbig gaenqsu zoq leztaen Yez'hoahhuah miz najta baenzzaqrawz yah. Unj Yez'hoahhuah haeuz ruxnyinz su nyah dwk dix yah. Baenzzaqrawz hax gaenqsu zawh nyah dwk Yez'hoahhuah mah? Doiq piu suanq gaeng mux? Gaenqsu baenzzaqrawz nyah dwk piu mux?" 8Moahciz daeuq hax: "Zang'haemh Yez'hoahhuah aeu nowx hawj su jin, zangnaw Yez'hoahhuah aeu gaenqjin hawj su jin imq. Unj Yez'hoahhuah haeuz ruxnyinz su nyah dwk dix yah. Baenzzaqrawz hax gaenqsu zawh nyah dwk Yez'hoahhuah mah? Doiq piu mboq suanq zawh gaeng, gaenqsu nyah dwk piu, zoq zawh nyah dwk Yez'hoahhuah."

9 Moahciz daj Yaqlunh hax: "Mawz daj daengzle dij goanz Yixsowhleh hax: ‘Gaenqsu daengzle maz in doqnaj Yez'hoahhuah, unj Yez'hoahhuah haeuz ruxnyinz su nyah dwk dix eh.’" 10Gau Yaqlunh daj daengzle dij goanz Yixsowhleh hax kauq naeh, paenqdix lez bae doq ndaw doanghmowz, leztaen ngaeuz Yez'hoahhuah yuq ndaw pajfax rowngz taeuq. 11Yez'hoahhuah daj Moahciz hax: 12"Dij goanz Yixsowhleh nyah gaeng, gux haeuz ruxnyinz yaq. Mawz haxdoq paenqdix: ‘Tang'vaenz laij doangh maz, su ndaej jin nowx mboqyaq, zangnaw su miz gaenqjin jin imq mboqyaq. Hoakzaqnaeh su zoq ruxndeq gux zawh Yez'hoahhuah dij Sen su.’"

Noag'oak Daj Maznah

13Tang'vaenz laij doangh maz, miz dij noag'oak mbin maz, yaz daengz dih paenqdix ndowj naeh. Zangnaw haenzhenz dih paenqdix ndowj naeh, miz naemxchaq. 14Naemxchaq kawq yaq, zoq leztaen dihndin ndaw doanghmowz miz laeb ux mbang mbejmbej daj nyeq dungzlumj. 15Dij goanz Yixsowhleh leztaen yaq, paenqdix mboq ruxndeq zawh gaeng, zoq goanz lej cham goanz: "Gaenqnaeh zawh gaeng mux?" Moahciz daj paenqdix hax: "Gaenqnaeh zawh gaenqjin, zawh Yez'hoahhuah aeu hawj gaenqsu. 16Yez'hoahhuah hoakzaqnaeh yaix: ‘Gaenqsu gaj goanz gaj bae aeu sownq su, goanz ux zaep owhmaeh'ex#16:16 Owhmaeh'ex daj gau'zawjraeuz siq gaen dungzlumj. ux. Ndaw zangjpungh su miz jij goanz ndowj, su zoq bae zaep jij sownq.’" 17Dij goanz Yixsowhleh zoq bae zaep. Mbangj goanz do zaep, mbangj goanz cauz zaep. 18Gau paenqdix chau naeh, sowh puj do zaep naeh goj mboq low, sowh puj cauz zaep naeh goj mboq cha. Gaj goanz gaj hemq doh. 19Moahciz daj paenqdix hax: "Mboq jinx gawz aeu gaenqjin leux taeng nawlaeng." 20Gaj paenqdix mboq biak kauq Moahciz, mbangj goanz aeu leux i ux, taeng zangnaw gaenqjin zoq miz dij noan, maen uj. Moahciz zoq jihdwk paenqdix. 21Naw rawz gojvenj, paenqdix gawz jin ndaej gajrawz zoq bae zaep gajrawz. Nded daeh ndaed, zoq zowg nauq. 22Taeng vaenz daih choak, paenqdix goanz ux bae zaep song owhmaeh'ex, zaep lai nyeuz vaenz ndai daep ux. Sowh puj hoak goak naeh zoq maz cham Moahciz baenzzaqrawz hoakzaqnaeh hoak. 23Moahciz daj paenqdix hax: "Yez'hoahhuah hoakzaqnaeh hax: ‘Vaenzbig zawh Vaenz Cednoiq, zawh vaenz Yez'hoahhuah aeu hoak daj vaenz ndai mboq dungzlumj naeh. Vaenznaeh gaenqjin, su ngaiq aeu pin zoq aeu pin, ngaiq aeu tung zoq aeu tung, gaenq low mbeh'ej aeu nyaengx nawlaeng.’" 24Paenqdix zoq hoakzaq Moahciz yaix naeh, aeu gaenqlow nyaengx nawlaeng, gaj gaenqjin paenqdix mboq maen uj, goj mboq miz dij noan. 25Moahciz hax: "Vaenz naeh gaenqsu jin sowh gaenq vaenzva su aeu nyaengx naeh. Unj vaenznaeh zawh vaenz Yez'hoahhuah aeu hoak Vaenz Cednoiq, ndaw doanghmowz mboq miz gaenqjin hawj su zaep eh. 26Jiat vaenz jiat vaenz, choak vaenz daekgoanq naeh, gaj vaenz gaj miz yowngh zaep, gaj vaenz daih jiat zawh Vaenz Cednoiq, vaenznaeh mboq miz gaenqjin hawj su zaep."

27Vaenz daih jiat miz dij goanz bae ndaw doanghmowz cha gaenqjin, gaj gaeng goj cha mboq taen. 28Yez'hoahhuah daj Moahciz hax: "Gaenqsu mboq biak diauq gux saengq su naeh daj Fahlih gux taeng zwzrawz mux? 29Su lez, gux Yez'hoahhuah hawj su miz Vaenz Cednoiq, baenzzaqnaeh vaenz daih choak gux aeu gaenqjin hawj su lai nyeuz vaenz ndai daep ux. Vaenz daih jiat, gaenqsu gawz goj haeggaj yuq rownz hoakri ndowj, laek og nog." 30Yaq vaenz daih jiat daengzle zoq cednoiq. 31Dij goanz Yixsowhleh rongx sowh gaenqjin naeh hoak maznah, gaenqnaeh daj faenz yenhciq dungzlumj, kau, jin van daj sowh binx aeu towngdoq daz naeh dungzlumj. 32Moahciz hax: "Yez'hoahhuah hoakzaqnaeh yaix raeuz: ‘Aeu owhmaeh'ex maznah#16:32 Maznah hax kauq Cizboahlaiz zoq zawh hax: "Gaenqnaeh zawh gaeng mux?" ux nyaengx hawj luglan su, hoakzaqnaeh mbaedmawq paenqdix zux ruxndeq zwz gux lingz su ni Aizjih naeh, su yuq ndaw doanghmowz, gux aeu gaenq naeh hawj su hoak gaenqjin.’" 33Moahciz daj Yaqlunh hax: "Aeu mbwnq maz, aeu owhmaeh'ex maznah ux nyaengx bae ndaw dix, aeu dix nyaengx doqnaj Yez'hoahhuah, aeu nyaengx hawj luglan su." 34Yez'hoahhuah hoakrawz yaix Moahciz, Yaqlunh zoq hoakzaq rawz hoak, dix aeu maznah nyaengx doqnaj aen gvih dij Sen naeh. 35Dij goanz Yixsowhleh jin maznah ndaej siqsip bi. Jin mwz taengdeg zwz paenqdix mwz taeng dih miz dij goanz ndowj naeh zux gah. Zoq zawh jin mwz taengdeg zwz paenqdix mwz taeng Zaznanh naeh zux gah. 36Sip owhmaeh'ex zawh yizfah ux.

Currently Selected:

Ni Aizjih 16: ZHN

Highlight

Copy