Ni Aizjih 14
14
Dij Goanz Yixsowhleh Kamj Gvaq Haij Ndiang
1 Yez'hoahhuah haxdoq Moahciz: 2"Mawz yaix dij goanz Yixsowhleh dauh maz, yaix paenqdix yuq dih ux daengj zangjpungh, dih naeh yuq baihnaj Bixhazcizluh, yuq jinghzang Mihdoah daj haij, yuq doiqfaeg Bazlihcixfaenz, yuq haenz haij. 3Hoakzaqnaeh laux hongz Aizjih toj faeklaih dij goanz Yixsowhleh loangloh, ni ndaw doanghmowz mboq baenz. 4Gux hawj laux hongz Aizjih zawnyaeb, dix zoq daem su mboqyaq, yaq gux hawj laux hongz Aizjih daj bin dix miz saeh, taeng zwz naeh, daenh zoq ruxndeq gux haen baenzzaqrawz, miz najta baenzzaqrawz, dij goanz Aizjih zoq ruxndeq gux zawh Yez'hoahhuah." Yaq dij goanz Yixsowhleh zoq bae dih Yez'hoahhuah haxdoq Moahciz naeh.
5Miz dij goanz haxdoq laux hongz Aizjih: "Dij goanz Yixsowhleh lenh ni yah." Laux hongz daj dij goanz dix zoq daeuq mboq zawx hawj dij goanz Yixsowhleh ni, paenqdix hax: "Gaenqraeuz hawj dij goanz Yixsowhleh ni, mwznaj paenqdix mboq hoakkoij gaenqraeuz, gaenqraeuz baenzrawz hoanx hoak mux?" 6Laux hongz Aizjih zoq kwnj mwz now chowz, lingz bin dix bae daem dij goanz Yixsowhleh. 7Dix lingz chowz Aizjih sowh chowz aeu dungzsaeuh naeh bae nauq, miz choak baeg aen chowz zawh lowg gaj aen ndae gangq, aen chowz rawz goj miz puj saeq. 8Dij goanz Yixsowhleh yumq ni Aizjih, Yez'hoahhuah hawj laux hongz Aizjih zawnyaeb, laux hongz Aizjih zoq bae daem dij goanz Yixsowhleh. 9Dij goanz Aizjih daem dij goanz Yixsowhleh. Laux hongz lingz daengz paenq bin dix, zoq zawh sowh bin kviq max naeh, sowh bin naengh chowz naeh, sowh bin aeu din daeq naeh, bae taeng haenz haij, dih dij goanz Yixsowhleh ndowj naeh, daem mex paenqdix. Dih naeh yuq baihnaj Bixhazcizluh, yuq doiqfaeg Bazlihcixfaenz.
10Gau laux hongz Aizjih zaekgaj bae daeux dih dij goanz Yixsowhleh yuq naeh, dij goanz Yixsowhleh leztaen dij goanz Aizjih daeuj daem paenqdix, paenqdix zoq mbu taeuq, rongx Yez'hoahhuah jeuq. 11Paenqdix daj Moahciz hax: "Mawz nih nih, ndaw Aizjih mboq miz dih hawj raeuz hoak moh lox? Mawz baenzzaqrawz zowz piu daeuj ndaw doanghmowz tai mux? Mawz baenzzaqrawz hoakzaqnaeh doiq piu, baenzzaqrawz zowz piu ni Aizjih mux? 12Zwz piu naengz yuq ndaw Aizjih naeh, piu haeuz daj mawz hax yaq: ‘Laek gvanx gaenqpiu, hawj piu hoakkoij dij goanz Aizjih’? Hoakkoij dij goanz Aizjih ndae nyeuz yuq ndaw doanghmowz tai." 13Moahciz daj paenqdix hax: "Laek mbu, in singjringh. Vaenz naeh su leztaen Yez'hoahhuah hoakrawz jeuq su, dij goanz Aizjih sowh goanz vaenzzawjraeuz su leztaen naeh mwznaj su mboq rux ndaej taen yah. 14Yez'hoahhuah saeh su saeuh, gaenqsu yumq yuq byaekrik."
15 Yez'hoahhuah daj Moahciz hax: "Mawz baenzzaqrawz goj rongx qeu doq gux mux? Nemz dij goanz Yixsowhleh daeq mwz baihnaj. 16Mawz aeu laenj maexdaeux mawz jix bae ndaw haij, hawj naemx dungzbyaeg, baenz rongh kawq ux, yaq yaix dij goanz Yixsowhleh daeq bae rongh kawq naeh. 17Gux hawj zaw dij goanz Aizjih haxnyaeb, paenqdix zoq nowngz gaenqsu bae mboqyaq. Gux hawj laux hongz Aizjih, bin dix, chowz dix, sowh bin kviq dij max dix naeh miz saeh, daenh zoq ruxndeq gux haen baenzzaqrawz, miz najta baenzzaqrawz. 18Taeng zwz naeh, dij goanz Aizjih zoq ruxndeq gux zawh Yez'hoahhuah."
19Bin dij Sen laux yuq baihnaj dij goanz Yixsowhleh daeq naeh, dix baenq bae baihlaeng, bo saeu aeu pajfax hoak naeh goj zaemh baenq bae baihlaeng. 20Bo saeu aeu pajfax hoak naeh yuq jinghzang dij goanz Aizjih daj dij goanz Yixsowhleh. Baih dij goanz Aizjih yuq naeh ndaem, baih dij goanz Yixsowhleh yuq naeh rungh. Hoakzaqnaeh hawj dij goanz Aizjih maz zawj dij goanz Yixsowhleh mboq baenz.
21 Moahciz ed mungz dix bae doq ndaw haij, Yez'hoahhuah zoq hawj laemz dwx daeq baih tang'vaenz og naeh baeuq maz, hwnz doag hawj laemz baeuq jinghzang ndaw haij baenz zaq song bowng jingz naeh. Dix hawj zang haij byenqbaenz dih kawq, naemx ndaw haij zoq dungzbyaeg. 22Dij goanz Yixsowhleh daeq bae ndaw haij dih kawq dix, naemx yuq haenz paenqdix baenz zaq song bowng jingz naeh. 23Dij goanz Aizjih daem paenqdix, dij max laux hongz, chowz laux hongz, sowh bin kviq dij max laux hongz naeh, daengzle nowngz dij goanz Yixsowhleh bae ndaw haij. 24Fax zaekgaj rungh maz, Yez'hoahhuah lez daeuj doq dij goanz Aizjih, dix daeq bo saeu aeu faez hoak naeh daj bo saeu aeu pajfax hoak naeh lez daeuj, hawj dij goanz Aizjih haeggaj dungzvaej dungzvangj. 25Dix hawj biz chowz paenqdix lod, mwz naj mboq baenz. Dij goanz Aizjih hax: "Yez'hoahhuah saeh dij goanz Yixsowhleh saeuh raeuz yah, gaenqraeuz lenh ni naeuz kvaiq ux."
Bin Aizjih Yuq Ndaw Haij Ndiang Tai
26 Yez'hoahhuah daj Moahciz hax: "Mawz ed mungz mawz bae doq ndaw haij, hawj naemx daengh dij goanz Aizjih, daengh chowz paenqdix, daengh sowh bin kviq dij max naeh." 27Moahciz zoq aeu mungz dix jix bae doq ndaw haij, fax rungh maz, naemx ndaw haij zoq gaen baenzzaq gaeuq. Gau dij goanz Aizjih lenh ni naeh, Yez'hoahhuah aeu naemx daengh paenqdix bae ndaw haij. 28Sowh bin laux hongz Aizjih daem dij goanz Yixsowhleh bae ndaw haij naeh, sowh gau naemx daengh bae doq paenqdix naeh, naemx tumj daengzle nauq, tumj daengz chowz, tumj daengz sowh bin kviq dij max naeh nauq, goanz rawz goj mboq low. 29Gaj sowh gau dij goanz Yixsowhleh naengz yuq ndaw haij naeh, paenqdix ndaej yuq dih kawq daeq, naemx baenz zaq song bowng jingz naeh yuq haenz paenqdix. 30Vaenz gaengnaeh, Yez'hoahhuah jeuq dij goanz Yixsowhleh ni dawj mungz dij goanz Aizjih. Dij goanz Yixsowhleh leztaen dij goanz Aizjih tai ndaw haij nauq. 31Dij goanz Yixsowhleh leztaen Yez'hoahhuah aeu riangz dwx dix hawj dij goanz Aizjih baenzzaqnaeh, paenqdix zoq ruxndeq mbu Yez'hoahhuah, sinq Yez'hoahhuah daj Moahciz goanz puj koij Yez'hoahhuah naeh.
Currently Selected:
Ni Aizjih 14: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
