Cantares 1
1
1Te buen t'ujbil c'ayoj yu'un Salomón:#1 R 4.32; Cnt 3.9-11.
Sbabial c'ayoj
Ants:
2Bujts'iyon caiy.
Te bujts'iyel awu'un c'axem jich sbujts' a te bit'il vino.
3Buen t'ujbil sbujts' te perfumeetic awu'une;
malem perfume c'oem te abiile.
Ja' yu'un ya smulanat te antsetique.
4Ic'awon bael ta ora,
ic'awon bael ta ana.
Muc' ajwalil, ic'awon bael ta banti nainemat.
Coro:
Bin nax me co'tantic ya x'ainotic ta atojol;
ya me jna'tic spisil ora te bujts'iyel awu'une,
c'ax me jich sbujts' a te bit'il vino.
Ja' yu'un ya smulanat te antsetique.
Ants:
5Antsetic ta Jerusalén,
ijc'al antson, pero t'ujbilon;
ijc'on jichuc campamento yu'un Cedar,
buen t'ujbilon jichuc spac'al snailpac' Salomón.
6Ma me ja'uc ay sc'oplal awu'un te bit'il ijc'one,
soc ma me ja'uc ay sc'oplal awu'un te bit'il xchic'ojbon jnujc'ulel te c'aale.
Te jbanquiltac ilinic ta jtojol,
jich la yac'onic ta scanantayel ts'usubiletic;
te jts'usubil c'oem ma ba ju' cu'un scanantayel.
7Ja'at te jmulanejat ta co'tane,
albon caiy, ¿banti ya awac' sle swe'el te chambalametic awu'une?
¿Banti ya awic' bael ta cux-o'tan ta olil c'aal?
¿Bi yu'un ya xbeenon jichuc jmelmonel,
ta sts'eel te chambalametic yu'un ajo'tac?
Coro:
8Teme ma ba ana'oj te ja'ate,
ja'at te c'axem at'ujbilale,
t'una bael te yacan ta spisil te chambalametic.
Ac'a ta we'el tey a te ch'in tentsunetic awu'une,
tey me ta nopol nailwamal yu'un te jcanan-chijetique.
Winic:
9Ja'at te bayal ya jmulanate,
jichat ta co'tan ya caiy te bit'il
te buen t'ujbil yegua yu'un scarreta faraón.
10Buen t'ujbil te asit-awelawe,
buen t'ujbil te xch'alil te achiquine.
Buen t'ujbil te anuc',
buen t'ujbil c'oem soc te ualil-perlaetique.
11Ya me jpastic xan ta oro capal ta plata te ach'alile.
Ants:
12Te c'alal nacal ta ti' mesa te muc' ajwalile,
te nardo cu'un ya spuc bael sbujts'.
13Te mach'a mero mulanbil cu'une,
jich c'oem cu'un te bit'il ch'in bolsa mirra,
te spisil ora jipil ta jtan ta yolil xchebal jchu'.
14Te mach'a mulanbil cu'une,
jich c'oem cu'un te bit'il alheña-nichim te
ya xch'i ta ts'usubil ta En-gadi.
Winic:
15Ja'at te buen mulanbilat cu'une,
mero buen t'ujbilat ya quil,
c'ax t'ujbilat ya quilat.
Ta xchebal te asite pajal soc cheb stsumutetic ya quil.
Ants:
16Buen t'ujbil winicat,
buen ya jmulanat ya caiy,
mero buen t'ujbilat ya quil.
Winic:
Yaxal ja'mal te jwayibtique. 17Cedroetic te sts'amte'al te jnatique,
te c'antajetic ja' smujq'uil,
ja' te smujq'uil te ya yaxintesotique.
Currently Selected:
Cantares 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.