Cantares 2
2
Ants:
1Jo'on snichimalon Sarón,
jo'on rosa-nichimalon stenlej xatal q'uinal.
Winic:
2Te ants bayal ya jmulane, c'ax jich st'ujbilal a te bit'il yantique,
pajal soc rosa-nichim ta yolil ch'ixtiquil.
Ants:
3Te winic bayal ya jmulane, c'ax jich st'ujbilal a te bit'il yantique,
pajal soc ste'el manzana ya quil ta yolil ja'mal q'uinal.
Mero bayal yutsil co'tan ya jnajc'an jba ta yaxinal.
Buen chi' ya caiy te site.
4Jo'on la yic'on bael ta na ta banti ay we'eliletic,
te sit la yilon a, swenta mulanel la caiy ta co'tan.
5Ac'bon xan yich' yip co'tan,
ac'bon xan yip co'tan soc pejchanbil taquin ts'usubetic,
mac'linawon ta manzana,
melel te jo'one, ya xlajonix ya caiy yu'un te ya jmulanate.
6Meybon jol ta xq'uexen ac'ab,
Petawon a te swa'el ac'abe.
Winic:
7Antsetic ta Jerusalén,
albonic caiy ta jamal ta swenta te ja'mal chijetic,
soc ta swenta te tsajal chijetic ta witstiquile,
te ma ba ya atijbeyic swayel te mach'a bayal jmulaneje.
Ijq'uitayawotic, ac'a wayucotic
ja' to c'alal ya jc'an xjajch'otic.#Cnt 3.5; 8.4.
Xchebal c'ayoj
Ants:
8Talix te mach'a bayal jmulaneje.
Chicanix ya caiy te sc'ope.
Talix ta wilawetel ta baba witstiquil,
Talix ta wilawetel ta sba tseletic.
9Te mach'a bayal ya jmulane,
jich c'oem ya caiy te bit'il ja'mal chij,
soc jich c'oem te bit'il ch'in chije.
Li' ayix to, ayix ta spat ti'nail,
chicnajix tel ta ventana,
yaquix sju'sitaybelon ta bay jamal.
10Te mach'a ya jmulane jich la yalbon:
“Ja'at te bayal ya jmulanate,
jajch'an, ya xbootiquix, ja'at te jc'anojate.
11Ila awil, c'axix te yorail invierno,
ja' la sjoinix bael te ja'ale.
12T'omenix nichimetic ta aquiltic,
c'otix yorail te c'ayoje,
ya xchicnajix ta aiyel ta jlumaltic te yutsil sc'unil sc'ayoj te puliwoquetique.
13Te higuera ayix sit,
te jts'usubiltic ya xpujq'uix bael sbujts'.
“Jajch'an, ja'at te bayal ya jmulanate;
beenan, ya xbootiquix, ja'at te jc'anojate.
14“Stsumut cu'un, te ya anac' aba ta muc'ul tontiquile,
ta toyol chujc'ul nac'jibaletic,
ac'bon quilbat asit-awelaw,
ac'bon caiybat ac'op.
Mero t'ujbil ya caiy te ya quilate.
Ay sbujts' ta aiyel te ac'ope”, xi' ta jtojol.
Xchebalic:
15Tsaca te waxetic, ja'ic te ch'in waxetic,
te ya yixlanbotic te ts'usubil cu'untique,
ja' te jts'usubiltic yac ta niche.
Ants:
16Te mach'a mulanbil cu'une, jo'on cu'un, soc ja' yu'unon.
Ja' stuquel ya me yac' ta we'el ta spisil te chijetic yu'une,
ya me yac' ta yolil rosa-nichimaltic.#Cnt 6.3.
17Ma to ba staoj te sc'aalelale,
soc te ya x'an bael te axinale,
ja'at te bayal c'uxat ta co'tane,
la', sujt'an tel.
Jich me xtalat te bit'il ja'mal chije,
jich me xtalat te bit'il ch'in chij
ta sba te chujc'ul witstiquile.
Currently Selected:
Cantares 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.