Nahúm 1
1
Dios ya yac'bey spacol Nínive
1Te libro yu'un te j'alwanej Nahúm, te talem ta lum Elcos, ja' te bila ac'bot sna' stojol yu'un Dios, te bit'il ay sc'oplal te lum Nínive.#Is 10.5-34; 14.24-27; Sof 2.13-15.
2Te Cajwaltic, ja' te Dios te ma smulan teme ay bila yan ya jch'uuntique,
ya me sujt'esbey ta swenta te j'uts'inwanejetique.#Ex 20.5-6; Dt 4.24.
Ya me yac'bey spacol te mach'atic ya stoy sba ta stojole;
ya me yilintay te scontrotaque.
3Te Cajwaltic sts'icojbey to te smule; ja'uc me to, muc' te yu'ele.
Ma xch'aybey castigo ta stojol te mach'a ay smule.
Te Cajwaltic ya scajtijibin ta beel te tulan iq'ue;
te tocaletic jich c'oem te bit'il tan te ya xwil te c'alal ya xbeene.
4Ya scom te mar, soc ya staquintes;
ya me staquintes spisil te muc'ja'etique.
Te spamlejetic yu'un Basán soc te wits Carmelo, ya sayubic,
soc ya xlubaj te nichimetic ta Líbano.
5Ya xnijq'uic te toyol witstiquil ta stojol;
te peq'uel witstiquil ya x'ulubic yu'un.#Sal 97.5; Mi 1.4.
Spisil te lumq'uinal ya stij sba te c'alal ya yil;
spamal balumilal ya stij sba soc te mach'atic nainemic tey a.
6¿Mach'a ya xju' yu'un te ya stejc'an sba ta stojol te yilimbae?
¿Mach'a ya xcujch' yu'un te sc'ajc'ale?
Te sc'ajc'al yo'tan ya me spuc bael jichuc c'ajc',
ya me xjat yu'un te muc'ul tonetique.
7Te Cajwaltic lec yo'tan;
anjibal me c'oem ta yorail woclajel.
Ya scanantay te mach'atic ja' ya smuc'ulin yo'tanique.
8Ja'uc me to, jich bit'il snojel ja' ya smes bael spisil,
ya slajin te mach'atic ya stoy sbaic ta stojole;#Sal 25.8; 37.39-40.
ya xtaot ta ijc' q'uinal te scontrotaque.
9¿Bila a te ya achapic ja'ex ta scontroinel te Cajwaltique?
Ja' me ya slajinex ta jc'axel stuquel.
Ma'yuc mach'a ya xju' stoy sba cheb buelta.
10Melel jichic me te bit'il ch'ixetic te sts'otoj sbae,
jich bit'il taquin ac, ya me xc'ajq'uic ta jc'axel.
11Te ja'at Nínive, loc' tel ta awolil
te jtul jconsejero te amene,te la snop te bila amenya spasbey te Cajwaltique.
12Jich yu'un te Cajwaltic ya yalbey te lum yu'une:
—Manchuc me tulanic ta jyalel te asiriaetic soc bayalic,
ya me yich'ic jinel, soc ya me xch'ayic bael.
La cac' c'axuc awocol,
ja'uc me to, ma ba ya cac' xwoclajat yan buelta.
13Ya jwuybat te yugo acuchoj
soc ya jtuch'bat te cadenaetic chucbilat a —xi'.
14Te Cajwaltic la yalbat ac'oplal,
ja'at te muc' ajwalilat yu'un Nínive:
“Ma me ayuc ats'umbal te ya yich'bat jilel te abiile.
Ya me jinbat spisil te loc'omba ach'uunejic
ta bay stemplo te dios awu'une,
tey me ya jmucat a, melel ja'at ilaybilat”, xi'.
Ya yich' jinel lum Nínive
15¡Ilawilic! Ya xtalix ta sba witstiquil
te mach'a ya xtal yalbey sc'oplal te lamal q'uinale.#Is 52.7.
Ja'at Judá, pasa te q'uinetic awu'une;
c'otesa ta pasel te bitic awaloj ta jamale.
Mero ma me xyochintayatix te mach'atic amen yo'tanique;
jc'axel la yich'iquix jinel.
Currently Selected:
Nahúm 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.